O Ie Pupuni, Faamalieina, ma le Kerisimasi
O se taimi matagofie ma le faafiafiaina o le tausaga! Ou te tulimatai pea lava ia ou i ai iinei i le Aso Sa muamua o Tesema, lea tatou te maua ai le avanoa e faalogologo ai i musika matagofie ma savali ia e amata ai se isi vaitau faamanuiaina o le Kerisimasi. Ma tatou toe tulimatai ai foi e faalogo atu i le perofeta a le Atua, la tatou pele o Peresitene Monson.
E avea pea le Kerisimasi ma se taimi faapitoa mo au. A o ou talavou, sa ou nofo i Siekisolovakia, ma o tu ma masani ua leva ma le ‘oa o seneturi o Kerisimasi sa siomia ai i matou i soo se mea. E ui ua tele tausaga ua tuanai, ae ou te manatua pea na aso ma se faamemelo ma le fiafia lea ou te maua ai ni lagona loloto o le faafetai ma le olioli.
I se tasi tausaga, masalo pe ua fa ou tausaga, sa ou i ai i le potu lea sa tuu ai la matou laau Kerisimasi. Sa teuteuina i ni mea teuteu matagofie ma le feilafi. O mea ilaila lanu siliva sa faatautau i lala, sa pueina ai le malama o moligao mao’i ia sa pei e emoemo faataaliolio ia te au. Sa i ai i talaane se faamalama lea sa iloa atu ai le alatele; o ona ie pupuni sa feilafi i le malamalama, sa faaopoopo ai se mealilo patino ma le faamaneta i le vaaiga.
O le aso lena sa faatoa ou maua ai ni mea fou se lua.
O le mea muamua afai ou te uuina se moligao i tua o ie pupuni, o le a susulu ma le matagofie mai tua atu o ie manifinifi, ma suia ai i se mea matagofie tele ma le maofa.
O le mea lona lua na ou mauaina o ie pupuni e mugofie. Atonu o le a outou mate maia, na apo e le afi mai le moligao le ie pupuni ma sosolo vave ai, ma lamatia ai puipui ma le faalo o lo matou fale.
Sa ou ee ma le fefe. Sa taufetuli mai ou matua mai le isi potu ma vave ona toso i lalo ie pupuni ma tape le afi, ma puipuia ai le mea semanu e oo ai i se faalavelave matuia.
Ina ua uma atu lea tulaga lamatia, o toega o ie pupuni matagofie na mu ua otaotā ai nei le fola; o le faamalama ua taatia fua mai ma le matautia i ou tua atu, ua malulu ma ua pei ua ta’usalaina au; ma sa ou tu ma le fefe tele i luma o lou tina ma lou tama e aunoa ma se faamalamalamaga po o se ‘alofaga.
Sa ou iloa, faatasi ai ma le mautinoa atoa o se tamaitiiti e fa tausaga, ua ou faaleagaina le Kerismasi!
Kerisimasi ma le Faaatoatoaga
Ua toeitiiti atoa le fitu sefulu tausaga talu lena aso matautia. Ma o se taunuuga o lena taimi e tasi na ou solia ai le tulafono o le susunuina o mea totino, sa ou aoaoina ai ni mea taua.
Muamua, aua lava nei taaalo i le afi---o se savali taua e i ai se faatatauga moni ma se faatusa mo tagata uma, ae le na o tamaiti.
Lua, e ui sa toetoe lava a ou faaliu-efuefuina ma le asu lo matou fale mautotogi, ae ou te lei faaleagaina le Kerisimasi.
O le mea tau afi, o se aafiaga matua taufaamatau lea. Ou te mautinoa lava sa faateia lou tina ma lou tama ma sa lē fiafia i lo’u faia o sea mea faavalevalea. Ae, i le faaiuga, e lei faaitiitia ai le alofa sa matou mauaina i lo matou aiga, e lei faaleagaina ai foi le ofoofogia o le vaitau o le Kerisimasi.
O le taimi lena, e masani lava ona ta’u atu i tamaiti Siamani se tu masani e faapea o le taimi o le Kerisimasi, o tamaiti ma teineiti e amio lelei o le a mauaina ni meaalofa ma ni lole, ae o i latou e le amio lelei o le a faasalaina ma maua le die Rute, o se lala laau [e sasa ai]. I le tele o tulaga, o le susunuina o ie pupuni o le potu malolo ua agavaa ai i le le amio lelei---o lea sa le fetaui ai le taimi sa faia ai la’u mea sese lea. Ae sa lei mauaina sa’u die Rute. O mea sa ou manatuaina mai lena mea ma isi Kerisimasi uma o lo’u talavou e pele ma e taua ia te au. O le iloaina sa alolofa pea lo’u aiga ia te au o se faamanuiaga matagofie ma o se lesona sili lena.
O le toe tepa i tua, ou te manatu o lou fefe faapea sa ou faaleagaina le Kerisimasi sa sau mai se malamalama le atoatoa i le uiga moni o le Kerisimasi. Ma ua ou matauina e le na o tamaiti ta’i fa tausaga o loo i ai lea fenumiai.
O nisi taimi e foliga mai ai o a tatou taumafaiga ina ia maua se vaitau atoatoa o le Kerisimasi ua pei o le taaloga o le Jenga---tou te iloa, le taaloga lea e faaputuputu ai ma le faaeteete ia fasi poloka laau e fai ai se olo. A o tatou taumafai e faateleina le maualuga o le olo, tatou te aveesea maia se fasi poloka laau a o lei mafai ona tatou tuua i luga o le olo maaleale.
O tamai poloka laau taitasi uma na o se faatusa o mea tutupu atoatoa o le Kerisimasi ia tatou te matuai naunau e maua. Ua i ai i o tatou mafaufau se ata o mea uma e tatau ona i ai---le laau lelei atoatoa, moli lelei atoatoa, o meaalofa mananaia atoatoa, ma mea lelei atoatoa faaleaiga e tutupu. Atonu foi tatou te mananao e toe fatuai nisi taimi faamaneta tatou te manatuaina mai ni Kerisimasi ua tuanai, ma e leai ma se mea e itiiti ifo ma le atoatoa e mafai ona faamalieina ai i tatou.
Se taimi vave pe mulimuli ane, e tupu ai se mea faanoanoa---e solo i lalo ia poloka laau, e mu ia pupuni, e mu foi le pīpī, e sese le telē o le ofu mafanafana, e le o i ai ni maa mo mea taalo, ua fefinauai le fanau, ma faatupulaia ai le popole---ma o le ata atoatoa o le Kerisimasi sa tatou mafaufauina, le maneta lea sa tatou faamoemoe e faatupu, ua nutipala nei i o tatou autafa. O se taunuuga, e masani ai lava ona avea le vaitau o le Kerisimasi o se taimi o le atugalu, popolevale, atuatuvale, ma atonu e oo ai i le le fiafia.
Ae afai e na ona o tatou naunau lava e tatala o tatou loto ma mafaufau i le Agaga o le Kerisimasi, o le a tatou iloaina mea ofoofogia o loo tutupu i o tatou talaane ia o le a taulai atu ai lo tatou gauai i mea faalelagi. E masani lava o sina mea faatauvaa---tatou te faitau se fuaiupu o tusitusiga paia; tatou te faalogo i se pese paia ma faalogo moni lava i ona upu; pe tatou te molimauina se faailoaga faamaoni o le alofa. Pe o le a lava le auala, e pai mai lava le Agaga i o tatou loto, ma tatou vaaia ai lena Kerisimasi, i lona ute moni, e sili atu lona malosi ma le tumau nai lo le tele o mea iti o le olaga ia e masani lava ona tatou teuteuina ai.
O Le Kerisimasi e Faatatau ia Keriso
Ua tatou iloa i nei taimi taua mea tatou te lagonaina ma iloa i o tatou loto---o le Kerisimasi e faatatau ia Keriso.
O le Kerisimasi ma nisi o tu masani faapelepele o le vaitau ua faamanatu mai ai ia i tatou, e pei o le Au Makoi anamua, e tatau ona tatou saili atu i le Keriso ma tuu atu i Ona luma meaalofa silisili ona taua: o se loto momomo ma se agaga salamo. E tatau ona tatou ofo atu lo tatou alofa. E tatau ona tatou tuu atu ia te Ia lo tatou naunautaiga e tauave i o tatou luga Lona suafa ma savavali i ala o le au soo. E tatau ona tatou folafola atu e manatua pea o Ia, ma mulimuli i Ana faataitaiga, ma o atu e fai mea lelei.1
E le mafai ona tatou ofoina atu ia te Ia le meaalofa o le atoatoa o mea uma ona o le meaalofa lea e le oo i ai lo tatou malosi e foai atu---mo le taimi nei. E le o faamoemoe le Alii tatou te tuuto atu e aveese ia mauga. Ae ua ia manaomia ona tatou aumaia e fai ma meaalofa a tatou taumafaiga sili e tulei i tatou lava, tasi le vae i luma o le isi, ma savavali i ala ua Ia saunia ma aoaoina mai.
Ae o a meaalofa a le Faaola ia i latou ua naunau e aumai nei meaalofa ia te Ia?
Atonu o le meaalofa le mafaatusalia lea i le faafesuiaiga o meaalofa i le talafaasolopito o le lalolagi. O meaalofa a le Faaola mo i tatou e ofoofogia.
Tatou amata i le tino ola pea. Talu ai ua faatoilalo e le Faaola le oti, o alii uma ma tamaitai---o e amiotonu ma amioletonu---o le a ola e faavavau.2
Ona sosoo lea ma le faamagaloga---e ui lava e mumu ulaula a tatou agasala ma lē atoatoa, ae mafai ona sinasina e pei o le kiona ona o Ia.3
Ma le mea mulimuli, o le ola e faavavau---o le meaalofa sili o meaalofa uma.4Ona o le Togiola a Keriso, e le gata ua faamaonia ai mo i tatou se olaga umi e le mafuatiaina, ae ua Ia ofoina mai foi le avanoa e maua ai se olaga lelei le matalitonuina.5
O nisi o Ana meaalofa paia ua faapolopolo mo lena aso mamalu i le lumanai pe a tatou toe foi atu i Lona afioaga.
Ae ua Ia tuuina mai le tele o meaalofa ma Lona alofa tunoa ia i tatou i aso uma. Sa Ia folafola mai e faatasi ma i tatou, e afio mai ia i tatou pe a tatou manaomia se faamafanafanaga,6 ia sii i luga i tatou pe a tatou pauu, ia tauave i tatou pe a manaomia, ia fetagisi, talie, faanoanoa, ma olioli faatasima i tatou. O aso uma lava Na te ofo mai ai e taitai i tatou i o tatou lima ma fesoasoani mai e liua olaga masani i aafiaga faaleagaga e le mafaatusaliaina.
O Se Faamanuiaga o le Kerisimasi
O le mea moni, tatou te le manaomiaina se aso malolo o le Kerisimasi po o ni tu masani o le Kerismasi e manatua ai Iesu Keriso, le Faaola. Ae o le faamanatuina o le Kerisimasi e mafai ona fesoasoani ai ia i tatou ia manatua o Ia. O le vaitau paia o le Kerisimasi e mafai ona avea o se avanoa e toe tuuto atu ai i le faatumauina o le Agaga ma le mamalu o le Alo o le Atua i o tatou loto i aso uma o le tausaga atoa.
O se taimi matagofie lenei o le tausaga. Atonu o le a le atoatoa. Ae afai e mafai e le Kerisimasi ona faasino atu o tatou loto i lo tatou Faaola, e mafai ona tatou olioli e tusa lava pe i ai ni le atoatoa o le vaitau. Uso e ma tuafafine, uo pele, tau ina ia tatou manatua pea e avatu ni meaalofa ia te Ia, o Le ua tuuina maia mea uma ia i tatou. Tau ina ia tatou manatua pea ma ia loto faafetai i le soifua mai o lena Tamaitiiti, ua olioli ai le lalolagi. Ma tau ina ia faamanatu mai e vaitau taitasi o le Kerisimasi ia i tatou ia sii ae o tatou leo ma faatumulia o tatou loto i le olioli ma le loto faafetai ua afio mai lena Keriso, o le Tupu! O loo soifua le Keriso! E moni o Ia. O Ia o lo tatou Toigola o le Kerisimasi ma taimi uma. Ou te molimau atu ai ma le faamaoni.
Ou te tuua outou ma se faamanuiaga o le alofa faatasi ai ma moomooga mo se vaitau anoa o le Kerisimasi, i le suafa o Iesu Keriso, Amene.