Krismas Pa Luhngse
Prestuhn Thomas S. Monson
Tamuhlwel ac tahmtahel, fuhkah kahtoiyowos. Nga kuloh ke kais sie yac in muhtwacack pacl in Krismas luhk yuruwos ke, Alu Fototo ke Krismas luhn Prestuhnsi Se Met. Nga ahkkahlwemye luhngse luhk nuh suwos, finne kowos oasr lun lohm se inge kuh lohng ke ohiyac sahyac.
Pacl luhn Krismas, ke kalmac sacohk ac ohiyacn kahto, kuhtuh pacl uh oruh kuht in tuhng, mokle sie otwelah sasuc nuh sin God, ac sang—orekmakihn kahs ke on wolacna “Calvary”—“monglac nuh sin mwet ullac ac mihslac nuh sin nguhna.”
Tuhsruhktuh, ma nuh fihsracsr in sang yohk pacl nuh ke ma lusrohngtwen ac sahp kuhtuh pacl nguhn ac tuhlac ke moul lasr uh ma kuht srihke met in eis. Oruh ahluhkwelah pa kwacna orek ke pacl se inge ke yac uh sin puhsiyacsr. Ma oruh ma inge kuh in weacng mukwikwi pucspucs ke Krismas in wi kac, yohklaclac mongo, yohklaclac mani sisilac, yohklaclac ma enenweyuck, ac yohklaclac oasrasr. Kwacna kuhiyacsr ke pacl in Krismas oruh kuht in puhla toasr, ahkkohsyeyucklac, ac ullac ke pacl se ke kuht enenuh puhlah engan fihsracsr ke ahkfuhlwactye ke isuslac luhn Mwet Lahngo lasr.
In konwacack engan pwacye luhn Krismas tiac tuhkuh ke suhlahklahk ac ahkpihsrpihsrye in orwaclah ma puhs, ac tiac konweyuckyak ke moliyacn mwe sang uh. Kuht konwacack engan pwacye ke kuht oruh Mwet Lahngo elan pa mwe lohacng ke puhlan pacl sacn. Kuht kuh in Karuhnguhnuhl ke nuhnak lasr ac moul lasr ke kuht som oruh orekma ma El kena kuht in oruh fin facluh. Ke pacl se inge, yohk likina pacl sahyac, lwelah kuht in ukwe mwe srihkasrak Lal ke kuht luhngse ac kuhlwacnsap mwet tuhlan lasr.
Ip se ke mwet lasr uh suc suk yohk ke ohiyacn luhngse oasr yurin mwet mahtuh, ac yohk ke elos kweok ke ahsor luhn sifacna. Puhla ke wacngihn finsrak oasr yurin mwet mahtuh pucspucs suc fototo nuh ke pacl in ahksahfye moul lalos.
Elder Richard L. Evans el suhmuhslah yac pucspucs somlah ah: “Ma elos enenuh ke muhkahimtacl ke yac mahtuh lalos, ke ip se, pa ma kuht enenuh ke yac upac ke yac fuhsr lasr: puhla se lah kuht enenweyuck, kuh luhngseyuck, ac mukwikwi kuhlwacng luhn insiyac ac paho luhn luhngse; tiac oruh ke srihpen enenweyuck, kuh sie infuckihl ke lohm uh, tuhsruhktuh infuckihl se lun insiyac ac moul luhn mwet se. …
“Kuht tiac kuh in fohlohkohnma pacl fuhsr lalos. Tuhsruhktuh kuht kuh in kahsrwelos in moul ke acn kahto likina met ke kuhlwacng lasr, ke kahsruh lasr, ac ke mukwikwi lasr sesseslah ke luhngse.”1
Tamuhlwel ac tahmtahel wiyuck, luhngse pwacye ahkkahlwemye luhngse luhn Mwet Lahngo. Ke Tisacmpuh ke kais sie yac kuht pahngon nguhn luhn Krismas. Kowos kuh in lohng kac. Kowos kuh in liye kac. Kowos kuh in puhla kac.
Ke pacl fototo somlah ah nga esam puhlakihn se ke nga fuhsr ah—puhlakihn se nga fahkwack tari ke pacl se kuh luo. Nga yac 11. Prestuhn lasr luhn U luhn Tuhlihk Srihsrihk, Melissa, el muhtwacn mahtuh ac sesseslah ke luhngse. Sie lwen ah ke pacl luhn U luhn Tuhlihk Srihsrihk, Melissa el siyuck nga fin kuh in muhta ac muhtwacta yohrohl. Na kuht mwet luo na sifacna muhta lun lohm alu ac. El fihliyac pahol ke finpihsuck ac muhtwacack in tuhng. Nga lut, nga siyuck sel lah efuh el tuhng.
El topuk, “Nga tiac kuh in oruh mukul ke Trail Builder in efahl ke pacl in ikacslah luhn U luhn Tuhlihk Srihsrihk. Kom ac kuh in kahsrweyuc ke ma inge, Tommy?”
Nga olwelah nuh sel Melissa lah nga kuh. Sasuc nuh sihk, tuhsruhktuh tiac nuh sel Melissa, oruh sac tilokihnyac kuhtwena elyah ke efahl ke U luhn Tuhlihk Srihsrihk. El sokwack oreyacn elyah sac—nga. Oruh sac pa luhngse.
Yac pucspucs somlah. Melissa wolacna, ingena ke yac yucngucul kuhtuh lal, muhta ke lohm luhlahp luhn mwet mahtuh ke acn acirrohtoh nuh Salt Lake City. Met liki Krismas ah nga suk ngan ohsun nuh sin prestuhn wolacna luhn U luhn Tuhlihk Srihsrihk ah. Ke radio luhn stosah an, nga lohng on soko “Hark! The herald angels sing glory to the newborn King!”2 Nga motko ke muhtwacta oreklac sin mukul lahlmwetmwet ke yac pucspucs somlah ah. Elos us mwe sang luhn kol, fruhnkuh, ac muhr. Nga use muhkwena mwe sang luhn luhngse ac kena in fahk kuloh nuh suwos.
Nga konwacack Melissa ke acn in mongo ah. El ngwetwacng liye ahluh in mongo se lal ah, ac fakihs ke fohrk se el sruok ke paho mahtohoh lal. El tiac kanglah kuhtwena mongo. Ke nga sramsram nuh sel, kahs luhk sonol tuhsruhk el lohsr. Nga sruokyac fohrk sac ac muhtwacack in kahsrwel Melissa mongo, ac sramsram nuh sel lusen pacl nohfohn nga kahsrwel ke kuhlwacnsap el oruh nuh sin tuhlihk mukul ac muhtwacn ke el wi kahsruh U luhn Tuhlihk Srihsrihk. El tiac esam kuhtwena ma, oayacpac kuhtwena kahs. Mwet luo ke lohm se inge ngwetma nuh sihk ac luhman fohs. Tiac paht sie seltahl sramsram nuh sihk ac fahk, “Nimet sramsram nuh sel. Wacngihn mwet el etuh—ne sucu lal. El tiac fahk kuhtwena ma ke lusen pacl nohfohn el muhta inge.”
Pacl in mongo ah sahflah. Sramsram luhk nuh sihk sifacna ah sahflah. Nga tuyak in som. Nga sruokyac paho muhnahs lal, ngwetwacng liye ngwetngwet mahtohoh tuhsruhktuh srackna kahto lal, ac fahk, “God lacn ahkinsewowoye kom, Melissa. Meri Krismas.” Tiac pwacpa, el fahk kahs inge, “Nga etwekom. Kom pa Tommy Monson, mukul fuhsr nuhtihk ke U luhn Tuhlihk Fuhsr. Fuhkah luhngse luhk nuh sum.” El itucngyac pouk nuh ke inngoasrol ac ngokyac ke sie ngok sesseslah ke luhngse. Sronin muhta sohrohri ke muhtahl sroksrokihnyac pahosr. Paho ah ke lwen sac ahkmuhtahlye ke inkuhsrao ac ahkinsewowoyeyuck sin God. Ma nuh pwacye lah lihpufacn uh on. Kahs luhn Mwet Luti utyak nuh sihk yohk likina kuhtwena pacl met ah: “Muhtwacn, liye tuhlihk mukul nuhtum!” Ac nuh sin Mwet Sap Lal, “Liye ninac kiyom!”3
Ke Bethlehem luhman etahiyuck kahs inge:
Fuhkah mihslaciyac, fuhkah mihslaciyac
Mwe sang wolacna sang tari!
Na God el sang nuh ke insiyacn mwet
Mwe insewowo luhn inkuhsrao lal.
Wacngihn insroac kuh in lohng tuhkuh lal;
Tuhsruhktuh ke facluh koluk se inge,
Ma nguhnin mwet puhsisacl fah srackna isacl
Kraist sacohk utyak nuh lun.4
Prestuhn David O. McKay el fahk: “Engan pwacye tuhkuh muhkwena in mwet sahyac in engan. … [nguhnin] Krismas … oruh insiyacsr in kahlwem ke luhngse ac ohiyacn kawuck ac pihrihk kuht in oruh kuhlwacnsap kuhlwacng. Pa nguhn ke wosasuc luhn Jisus Kraist.”5
Wacngihn pacl wowo sahyacn liki ingena, pacl in Krismas se inge, nuh sesr nohfohn in ahksasucye kuht sifacna in ukwi ip yohk ma lutiyuck sin Jisus Kraist. Pa pacl inge in luhngse Leum, God lasr, ke insiyacsr nohfohn—ac mwet tuhlan lasr oacna kuht sifacna. Ma wo in esam lah el suc sang mani sang yohk; el suc sang pacl lal sang yohk likina; tuhsruhktuh el suc sang kacl sifacna sang ma nuh kwewa.
Lwelah kuht in ahkpwacyei Krismas. Tiac mwe ahtaht muhkwena, kuht fin ac oruh in oa ke moul lasr uh. Krismas pa nguhn luhn sang ac wacngihn nuhnak ke ma in eis. Pa mwe engan ke srihpen kuht liye engan yurin mwet. Pa pacl in muhlkuhnlah sifacna ac sohkwack pacl nuh yurin mwet sahyac. Pa in eslah ma lusrohngtwen ac wi ma yohk srihpac. Pa mihslac ke srihpen kuht konwacack mihslac ke mwe luti luhn Mwet Lahngo. Pa pacl kuht akihlen loal emet ma muh luhngse yohk liki ituckyang, yohkwaclihk liki met ah nuh sin mwet sahyac.
Oasr Krismas lun lohm ac alu uh,
Oasr Krismas ke stoh;
Tuhsruhktuh kom ac nihkihn lah meac Krismas
Ne ke na oasr ke insiyom.
Tahpweng uh kuh in pahng ahluhkwelah snow,
Ac on uh nwacklah eng uh ke puhsra uh,
Tuhsruhktuh, insiyac se fah tiac puhla
Ne ken a oasr Krismas we.6
Ke pacl luhn Krismas rauni kuhtyak ke wolacna la, lwelah kuht, oacna ke Mwet Lahlmwetmwet ah oruh ah, suk itu kahlwem se in kol kuht nuh ke pacl wo luhn Krismas in kuhlwacnsapuh mwet tuhlan lasr. Lwelah kuht nuh kwewa in wi fuhfahsryucsr nuh Bethlehem ke nguhn, ac in use yohrohsr, insiyac kuhlwacng ke mwe sang lasr nuh sin Mwet Lahngo. Ac lwelah kuht nuh kwewa in oasr Krismas sesseslah ke engan. Ke ine muhtahl ac insewowo Jisus Kraist, amen.