El Suc Wo ac Sruikihn in Eis
Prestuhn Dieter F. Uchtdorf
Mwet in Kahsruh Ahkluo ke Prestuhnsi Se Met
Fuhkah wolacnaiyacn pacl se ke yac se! Ke nga lohng puhsrwen on kahto, liye lahm sahrsahr uh, ac puhla ohu luhn eng uh, nga esamwack pacl pucspucs ke moul luhk uh nuh mihsenge ke nguhnin Krismas ahkwoye insiyuck ac ahkenganyeyuc uh.
Oacna puhsiyowos, nga konwacack lah kuhtuh sin esam wowo ac yohk srihpac ke Krismas uh tuhkuh ke pacl nga srihk ac. Nga ne mahtuhlah ke moul suhkahsruhp se, ninac pahpah tuhmuhk ah luhngse Krismas uh in oruh sie pacl in engan ac wolacna nuh sin tuhlihk nahtuhltahl uh. Elos orekma upac in oruh Krismas in pacl na sacohk se nuh sin sucu lasr uh.
Kuht tuhlihk uh orwaclah mwe sang luhn kais sie. Sie yac ah, nga esam lah nga srohloh petsac se in oruh mwe sang se luhk ke Krismas nuh sin tuhlihk muhtwacn se wiyuck ah. E kuh in tiac arlac wo, tuhsruhk el sekoi. Fuhkah luhpan luhngse luhk nuh sel kac ah! Sie pac yac ah tamuhlwel se wiyuck, suc yac 12 mahtuh likiyuc, use mwe sang na sacohk se luhk. El konwacack sahk soko ke yen in muhtwacta se apkuhran nuh lohm sesr ah ac taflwelah kihtin mitmit se kac. Atacn mitmit se, tiac arlac kahto, tuhsruhk we, fuhkah luhpan luhngse luhk ke mwe sang sac ke srihpen ma tuhkuh sel me!
Kuh tiac sie sin engan yohk ke Krismas in liye ngwetngwet enganwack luhn tuhlihk srihsrihk uh ke elos sruok mwe sang nuklac ma nuh selos uh?
Ke kuht mahtuhlah uh, tuhsruhktuh, eisyacn mwe sang lasr ke kain engnuh ac luhng kuhlwacng sac pacna luhman wacngihnlac. Kuhtuh pacl uh mwet uh sun pacl se ma elos tiac kuh in eis sie mwe sang kuh, nuh ke ohiyac sac, finne kaksahkihn in tiac ahkmwekihn kuh puhla in misac luhlahp kac. Elos tahfonglac in nuhnkuh lah inkacnek sefanna in fohlohkihn mwe sang elos eis uh pa in sang sie ma yohk molo likina. Kuhtuh tiac liye yohk srihpaciyacn sie mwe sang—liye muhkwena ke atac an kuh molo an ac tiac lohacng nuh ke kalmeyac yohk kac sin mwet sang ke inse pwacye se.
Oruh se inge ahkacsmakihnyeyuc ke sie mukwikwi ma orek ke fong sahflah se ke moul luhn Mwet Lahngo ah. El orwacni mwet tuhma lutlut wolacna Lal raunweluhlwack, kuhnsaclihk fuhlao yohrohlos, ac sang nuh selos ahkuhtweyac sacohk sahflah. Kowos esam ke elos mongo ah, Jisus el tuyak liki tepuh soko ah, okwacacng kof nuh lun sie pesin, ac muhtwacwacack oul niyen mwet tuhma lutlut Lal ah?
Ke El tuhkuh nuh yohrohl Simon Peter ah, mwet pahtuhr ah sruhnga, ac fahk, “Kom ac fah tiac ohllah niyuck ke kuhtwena pacl.” Mwet Lahngo el ahksuwohsyelah fahk lal: “Nga fin tiac oul niyom, kom ac fah tiac mwet tuhmuhk lutlut.”1
Nga etuh na pwacye lah Peter el nuhnkuh muh oasr srihpac yohk lah in sruhnga mwe sang inge ac puhla lah el oruh ma pwacye. Tuhsruhk ke in pacl sac el tiac etuh na pwacye yohk srihpac ke ip luhn nguhn ke ma Jisus el eis nuh sel ah.
Ke pacl in Krismas, kuht sramsram yohk ke sang, ac kuht nuh kwewa etuh lah “yohk insewowo in sang yohk liki insewowo in eis,”2 tuhsruhk nga ke etuh lah kuhtuh pacl uh kuht tiac lohacng kuh srihkkihn yohk srihpaciyac in oruh sie mwet eis wowo.
Ke lwen in Krismas se ke yac puhs somlah ah, tuhlihk muhtwacn fuhsr se eis sie kuhfwen mwe orek losr kahto. Pahpah tuhmwacn tuhlihk muhtwacn sac fahk nuh sel lacn orwaclah sie ma ah luhn sie sin sucu lal suc tuhkuh wi toeni in ahkfuhlwact se luhn sucu sac ah.
Muhtuhn tuhlihk muhtwacn sac srwacsrwaclihk ac el som in oruh ma se ma el nuhnkuh muh e oruh sie mwe sang wowo. El sulaclah mwet se ma el ke oruh nuh se—muhtwacn mahtuh se ma e ninac se kiyacl ma suhpwacr ngwetngwet la ac koluk kuhtuh elah.
“Sahp nga fin orwaclah sie lohlpo ah lal,” tuhlihk muhtwacn sac nuhnkuh muh, “e ahkenganyaclwack.”
Na el sulaclah ahkwoyac kais sie fihti in orek lohlpo ac sang kuhiyacl in oruh in mwe sang sacohk se nuh sin muhtwacn ma e ninac se kiyacl ah.
Ke el ahksahfyelah ah, el som nuh yurun muhtwacn e ninac se kiyacl ah ac sang lohlpo sac nuh sel, ac fahk nuh sel lah el luhmahlah ac orwaclah na nuh sel.
Mihsaclihk infuckihl sac ke muhtwacn e ninac se kiyacl ah kihnisyac sruhkwack lohlpo sac in sruhluhn el sruok suhl ke wet ahyah soko. El ngwetwacng liye mwe sang sac, irelihk muhtahl ac korouryak, ac kihpackihnyac lohlpo sac lun poun kihtin tuhlihk muhtwacn sac. Na el forlah luhkwel ac tiac fahk kuhtwena ma nuh sel ac muhtwacwacack sramsram nuh sin sie mwet sahyac.
Kihtin tuhlihk muhtwacn sac mwekihnlah. Ke inse koluklac yohk lal el mihslac na tifoklac liki infuckihl sac.
Pahpah ninac kiyacl ah srihke in ahkwoyacl. Elos srihke in kahsrwel in kahlwem kac lah lohlpo sac kahto—muhtwacn se ma e ninac kiyacl ah finne tiac luhngse. Tuhsruhk kihtin tuhlihk muhtwacn sac tiac kuh in kutong suhpwacr lal pacl nuh kwewa el nuhnkuh ke puhlakihn se inge.
Yac nuh ke yac somlah ah, ac kihtin tuhihk muhtwacn sac—ingena e ninac se lac—srwack esam, kuhtuh suhpwacrlac, ke lwen sac ke pacl se mwe sang se lal ke el srihk ac sruhngwacyuck ah.
Mwe sang nuh kwewa ma utuckuh nuh sesr uh—yohk na nuh ke mwe sang ma tuhkuh ke insiyac uh—pa pacl wowo se in muhsahi kuh ahkkweye tuhkweni luhn luhngse se. Ke kuht wo ac sruikihn in eis uh, kuht ikacslah sruhnguhl in ahkloalye inmahsrlosr yurin mwet use mwe sang uh. Tuhsruhk ke kuht tiac ahkkahlwemye luhngse kuh sruhnga mwe sang se uh, kuht tiac ahkngalye muhkwena mwet ma akacsruhi nuh sesr uh, tuhsruhk ke kuhtuh ohiyac kuht ahkngalye kuht pac.
Mwet Lahngo El luti lah kuht fin tiac “eklac oacna tuhlihk srihsrihk, [kuht] fah koflah ilyak … Tohkohsrahi luhn kuhsrao.”3
Ke kuht tuni pwacrack ac wolacna luhn tuhlihk uh ke pacl se inge ke yac se, sahp kuht kuh in ahkesamye kuht sifacna in sifil konwacack ac eis liye atac sacohk ac wolacna luhn tuhlihk srihsrihk uh—kuh se in eis inse pwacye ac sruikihn.
Tiac mwe lut, Mwet Lahngo pa mwe srihkasrak wowo se lasr uh tiac nuh ke sang ke pwacye tuhsruhk oacyacpac ke eis ke inse pwacye. Ke El tuh oasr Bethany, apkuhran nuh ke sahflahiyacn moul Lal ah, muhtwacn se tuhkuh nuh Yohrohl us sufah in alabaster soko sesseslah ke ono kweng ac yohk molo. El lwelah muhtwacn sac in akmuhsrai sifacl ke mwe sang sacohk se inge.
Kuhtuh mwet ma liye ke mukwikwi se inge foloyak. “Mukwikwi na sisi mani se,” elos fahk. Ono sac yohk na pwacye molo. E kuh in kuhkwaclac ac mani kac uh ituckyang nuh sin mwet suhkahsruhp. Elos liye muhkwena molun ono sac ac tiac liye na pwacye luhpan yohk srihpac ke ip luhn nguhn.
Tuhsruhk Mwet Lahngo El etuh ke mwe akucl ac ahkkahlwemyeyacn luhngse ke mwe sang sacn, ac El eis ke inse pwacye.
“Nimet ahnglol! El fahk nuh selos suc tohrkahskahs. “Efuh kowos kuh lusrohngohl? … Muhtwacn se inge el oruh ma el kuh in oruh. El mosrwelah monuk in ahkoelah met liki pacl in puckpucki luhk.”4
Tamuhlwel ac tahmtahel wiyuck an, kawuck wolacna luhk an, kain mwet eis fuhkah kuht uh? Kuh kuht, oacna Mwet Lahngo, akihlen mwe sang uh in oacna ahkkahlwemyeyacn luhngse?
Ke pacl lasr uh, Mwet Lahngo el fahk lah elos suc eis ma nuh kwewa in kulohkihn fah ahkenganyeyuck,”5 ac fohnlah luhn facluh fah ma na [lalos].”6
Nga finsrak Krismas se inge ac lwen nuh kwewa ke yac uh kuht ac fah nuhnkuh, in kain, mwe sang pucspucs utuckuh nuh sesr sin Pahpah pahkotwen tuhmasr Inkuhsrao. Nga finsrak kuht in fah eis mwe sang inge ke wolacna, kulohkihn, ac pwacrwack luhn sie tuhlihk.
Puhla luhk uh fihsrwacsrsrwacsr ac kuhlwacngi ke nga nuhnkuh ke mwe sang Pahpah pahkotwen, inse pwacye, ac kuhlwacng tuhmasr ma use nuh sesr: mwe sang wacngihn fahkyac se ke Nguhn Muhtahl, usrnguck luhn nuhnak muhnahs, fwackyuck ac kolyuck luhn kais sie, mihs ma tuhkuh sin Mwet Lahngo, luhlahlfongi ac inse wo ma misac uh kuhtangyucklac—ac puhs pac sahyac.
Yohk srihpac liki nuh kwewa, God El use nuh sesr mwe sang luhn Wen Kuloh Sefannna Nahtuhl, suc kihsackuhnlah moul Lal “tuh elos nuh kwewa suc luhlahlfongi in el fah tiac misac.”7
Kuh kuht eis mwe sang inge ke puhsisacl in sruikihn, ke engan? Kuh kuht ac na fohlohkihn ke inse fuhlwact kuh ke nuhnak tahfonglac se ma muh kuht sifacna in man uh kwewa? Kuh kuht puhla luhngse luhn Pahpah ahkkahlwemyeyuck ke mwe sang inge? Kuh kuht eis kac ke ohiyac se ma ahkloalye inmahsrlosr nuh sin Mwet wolacna, muhtahl se ma use uh inge? Kuh oacna kuht lohsrlah in liye ma God El use nuh sesr ke kais sie lwen uh?
Kuht etuh lah “God el luhngse el suc insewowo in sang,”8 tuhsruhk kuh El oacna tiac luhngse pac el suc wo, sruikihn, ac insewowo in sang?
“E tiac wo nuh sin mwet se mwe sang se fin ituck nuh sela c el tiac eis mwe sang sac. Mwet se ac tiac engankihn mwe sang se ma ituck nuh sel, kuh engankihn in oruh mwet sang mwe sang se.”9
Kuht finne puhlakihn Krismas 9 kuh 90, kuht srwackna tuhlihk—kuht nuh kwewa tuhlihk nuhtin Pahpah tuhmasr Inkuhsrao.
Pwacnwacng, kuht kuh in puhlakihn pacl in Krismas se inge ke wolacna ac ke pwacr luhn sie tuhlihk. Kuht kuh in fahk lah insiyacsr sesseslah ke engan, ac kuht ac engankihn God lasr”10—Mwet Sang se ke mwe sang wowo nuh kwewa uh.
Wi kowos, ac elos nuh kwewa suc kena in ukwe Kraist efahl se, nga sramsram ke puhsra luhlahp ke God kuhlacna lasr ke El use mwe sang sacohklacna luhn Wen Nahtuhl.
Pacl in Krismas se inge ac pacl nuh kwewa, nga pruhe tuh kuht in liye mwe sang usrnguck ke isuslac luhn Wen nuhtin God ke liye wo se luhn sie tuhlihk. Nga pruhe tuh in weacng ke sang luhn mwe sang wowo uh, kuht ac srihke in oruh el suc wo ac sruikihn in eis. Ke kuht oruh ohinge uh, nguhn luhn pacl se inge fah ahkyohkyaclihk insiyacsr ac tahfwelah engan lasr liki met ah. Ke ine muhtahl luhn Jisus Kraist, amen.