Jisos Ri Kraist eo—Ad Irooj in Aenōm̧m̧an
Jen Elder Rusell M. Nelson
Jen Doulul eo an Jon̄oulruo Rijilōk ro
Ro jeiū im jatū jitōn bōro, enin ej juōn en̄jake eo eļap an em̧m̧an. Al ko rekōperan im ennaan ko rōkōmenen būruwōd. Jetōb in Kūrijmōj elijur būruwōd!
Ememļo̧kjeņ kōn kūrijmōj ekakememej kōn baam̧le, kōn menin letok ko, im jerbal n̄an ro jet. Rej waļo̧k jen season eo em̧ool kōn, rej menin letok ko ejjelok uwaer jen Jemedwōj Ilañ. “Bwe kōn an Anij iakwe lal, Ear letok juōn wōt Nejin, Ear keotak, bwe jabdewōt eo ej lōke E en jab jako, ak en mour indeeo.”1
Kōlmenļo̧kjeņ kōn Irooj im mour indeeo emaron̄ jipan̄ kōj jab wōt ilo Kūrijmōj, ak n̄an eļļā jen aolep māllijon̄ kein ilo mour wabanban in. Armej ro rejjab wāppen rej ippān doon ilo laļ in ippān armej ro jet rejjab barāinwōt wāppen. Laļ in ad erum̧ļo̧k im meer kōn m̧uri ko reļļap, lan̄ im taibuun ko ilo laļ in, nan̄inmej, im mej.
Apan̄ ko an juon make maron̄ itok. Juon jemān emaron̄ kar luuji jerbal eo an. Juon kōrā eo emaron̄ kar dolool. Juon ļaddik ak leddo eo bōlen ejabwābwe. Jabdewōt men eo ej kōm̧m̧an inepata, kajjojo iaad jekōņaan lo aenōm̧m̧an ilowa.
Ennaan eo aō jotenin ejelōt wōt jipan̄ eo em̧ool im aenōm̧m̧an eo ejjeļo̧k jem̧ļo̧kin, Jisōs Kraist—ad Irooj in Aenōm̧m̧an.2 Taitōļ in Eaar kwaļo̧k ilo kakkobaba n̄an ro jet bwe E eaar ekkapit m̧okta.
Kar kapit e jen Jemān n̄an erom Rilo̧mo̧o̧r eo an laļ in. Taitōļ kein ruo—Messaia im RiKraist eo—kar ejaake eddō in An ke kar kapit juon.3
Iumin ijitōn̄ eo an Jemān, Jisōs eo eaar kōm̧anm̧an laļ in im bar lal ko jet.4 Jisōs ej ad Rijojomar ippān Jemān.5 Jisōs eo kar kanaan kake āinwōt Anij ippād wōj,6 N̄a Anij ļapļap im Jeova ilo tōre ko ilo kalim̧m̧ur m̧okta.7
E kar jilkintok jen ippān Jemān n̄an ņa wāween Pinmuur eo, unleplep in jerbal otemjej ilo bwebwenato in armej, mour in jab wabanban eaar erom juōn men emool n̄an aolep, im eaar maron̄ wōr mour indeeo n̄an ro rej kelet n̄an ļoor E8Jibadbad kein otemjej rej jerbal im aibojo̧o̧j eo an Anij ekajoor pōtata.9
Āinwōt ad Riwanjon̄ak eo em̧m̧an, Jisōs eaar katakin kōj n̄an mour, n̄an iakwe, im n̄an ekatak. Eaar katakin kōj jar, n̄an joļo̧k bōd, im niknik n̄an jemļo̧kin.10
Eaar katakin kōj wāween bwe en ļap ļo̧k ad kea kake ro jet jen ad kea kake kōj make. Eaar katakin kōj jouj im tiriamo—kōm̧m̧an oktak ko reļļap ilo mour ko ad kōn kajoor eo an. Eaar katakin kōj n̄an lo aenōm̧m̧an ilo ad im ilo būruwōd. Juōn raan, jenaaj jutak im̧aan Mejen āinwōt ad riekajet em̧m̧an im M̧aajta etiriam̧o.11
Eddo kein rekwojarjar an Irooj rej kōm̧m̧an bwe jen nōbar E āinwōt Irooj in Aenōm̧m̧an. Jej nebar E kōn jeram̧m̧an in ad āinwōt ro jinen im jemān, bubu im jim̧m̧a ro, im rūkaki ro an ajri ro.
Iien Kūrijmōj ej iien an baam̧le emōņōņō. Iien an baam̧le ej juon iien ekwojarjar. Jemaron̄ jipan̄ ajri ro nejid oktak ļo̧k n̄an Rilo̧mo̧o̧r eo. Al emaron̄ jipan̄ kōj. Ajri ro nejid rekōņaan in al “I’m Trying to Be like Jesus.”12
Jisōs eaar ba, “Komwin kōtlok ajri re dik, im jab bōbrae er, bwe ren itok n̄an Ippa; bwe ro āierwōt aer aelōñ in lan.”13
Emaron̄ bōktok aenōm̧m̧an n̄an ro mour ko aer raar jorrāān ilo tariņae. Baam̧le ko raar rub jen eddo an ritariņae ej letok ememļo̧kjeņ kōn tariņae, eo ilo ļōmņak eo aō eaar eddo iien Pata eo an Korea.
Bata ko ilo tōre kein ad eļap ļo̧k aer kabokbok ak kaam̧jak n̄an baam̧le ko. Ro raar lukkuun en̄taan kar oktak tok n̄an Irooj. Naan in kaenōm̧m̧an eo an ioon laļ im jerbal eo em̧m̧an ilubwilijin armej.14
Aenōm̧m̧an emaron̄ itok n̄an ro rejjab em̧m̧an en̄jake ko aer. Jet armej rej ikinejnej. Ro jet metak ilo jetōb kōnke jako an ro reakwe ak en̄jake mijak an ro jet. Ro jeiū im jatū, aenōm̧m̧an emaron̄ itok n̄an jetōb eo am̧ ilo am kalōk jetōb eo am ippān Irooj in Aenōm̧m̧an.
“Ewōr ke iami jabdewōt ri nan̄inmej ilubwilijimi? Kom̧win bōktok er ije. Ewōr ke iami jabdewōt ri ake, ak ri pilo, ak ri jibikbik, ak ri kinejnej, ak ri leba, … ak jabdewōt wāween otemjeļo̧k? Kom̧win bōktok er ije im Inaaj kemour er, bwe ewōr Aō tiriam̧o kake kom̧, en̄jake ko Aō re obrak kōn tiriam̧o.”15
“Ij lo bwe ami tōmak ebwe bwe in kemour kom.”16
Aenōmman emaron̄ itok n̄an eo ej en̄taan kōn buromōj. Būromōj eo emaron̄ waļo̧k tok jen bōd ak jerawiwi, men eo de eo Irooj ej kōnaan ej ukweļo̧k eo em̧ool. Jeje ko rekwōjarjar rej jiron̄ kōj “A kwon ko, jen mom ko an likao; … [im] kūr n̄an Irooj kōn bōro erreo.”17 Ejjeļo̧k uno ilo Giliad ke? Ak ejjeļo̧k taktō ie ke? Innam etke e jan̄in kemour jiron̄ eo enan̄inmej kōn jerawiwi.18
Ļōmņak kōn oktak eo an John Newton, lotak ilo London ilo 1725. Eaar ukweļo̧k jen mour in jerawiwi eo an āinwōt kar juōn riwia kake rikōmakoko im erom juōn ri kaki elap. Kōn oktak eo ekabwilōn̄lōn̄ ilo būruwōn, John eaar je naan kein ilo al eo “Amazing Grace.”
Jouj eo an ekabwilōn̄lōn̄! Ainikien eo em̧m̧an.
Eaar kōjparok juon armej einepata āinwōt n̄a.
Iaar jako, ak kiiō ij mour,
Ikar pilo, ak kiō ij lolokjen.19
“Naaj lan̄lōn̄ ilo lan̄ kōn juōn rijerawiwi eo ej ukweļo̧k.”20
Aenōmman emaron̄ itok n̄an ro eddo jerbal ko aer:
“Komwin itok n̄an Ippa, kom̧ otemjej rej jerbal im ban, im Inaaj kakkijeik kom.
“Komwin bōk aō ine im likute i aerami, im katak Ippa, bwe Ij ineem̧m̧an im ettā būruō, im kom̧ naaj lo an ami kakkije.
“Bwe Aō ine ej emman, im men eo ij ineke e mōrā.”21
Aenōm̧m̧an emaroñ itok ñan ro rej buromōj. Irooj eaar ba, “E mōnōnō ro rej būromōj, bwe naaj kaaenōmman er.”22 Ilo ad kijenmej jen jako an juon eo jeakwe, jemaron̄ obrak kōn aenōm̧m̧an an Irooj jen unoojdikdik an Jetōb.
“Ro rej mej ilo n̄a naaj jamin edjon̄e mej, ak naaj lan̄lōn̄ n̄an er.”23
“Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom. Ña Ij lewōj n̄an kom̧, jab āinwōt an lal lewōj. En jab pok buruemi, im en ja lōln̄o̧n̄.”24
“Ña jerkakpeje eo im mour eo: Eo ej lōke Eō, men̄e e mej, enaaj bar mour:
“Im jabdewōt eo ej mour im lōke Eo, e jamin mej indeeo.”25
Aenōmman emaroñ itok ñan aolep rej likkuun kabukōte Irooj in Aenōm̧m̧an eo. Naan ko an mijinede ro ad rej bōk lok n̄an lal in rem̧m̧an im rej n̄an lo̧mo̧o̧r. Rej katakin kōn kojpel eo an Jisōs Kraist āinwōt an bar mōj an jepļaaktok ilo E im kōn Rikanaan Joseph Smith.26 Mijinede ro rej katakin kōn naan kein an Irooj rej ukōt mour. “Eļan̄n̄e komij yokwe Eō, kom naaj kōjparok kien ko Aō.”27
Aenōmman emaroñ itok ñan aolep ro rej etetal ilo ial ko an Maajta eo. Kūr eo An ej erļo̧ke tok kōn jilu naan in yokwe ko: “Itok, loor Eō.”28
Jenaaj aolep al ren nebar Irooj in Aenōm̧m̧an eo,29 bwe enaaj bar jepļaaktok. “Im naaj kwaļo̧k aibojooj an Jeova, im kanniōk otemjej renaaj jimor loe, bwe lon̄in Jeova ear konono kake.”30 Āinwōt Messaia eo an millinium̧, Enaaj irooj āinwōt, “Kiin̄ in Kiin̄ ro, Im Irooj in Irooj ro.”31
Ilo ad ļoor Jisōs Kraist, Enaaj tōl kōj n̄an mour Ippān im ippān Jemedwōj Ilan̄, ippān baam̧le ko ad. Kon mālijjon̄ ko ad rellōn̄ ilo mour in wabanban in, ilo ad pād wōt ilo tōmak ilo bujen ko ad jar kōm̧m̧ani, eļan̄n̄e jenaaj niknik n̄an jem̧ļo̧kin, jenaaj maron̄ kōjeram̧m̧an kōj kōn menin letok eļaptata an Anij, eo ej mour indeeo,32 Ilo an pād Aibojooj eo An eļap, baam̧le ko ad remaron̄ pād n̄an indeeo.
Anij en kōjeram̧m̧an kom̧. Ro jeiū im jatu jitōn bōro. Kajjojo iami en likkuun jeram̧m̧an ilo Kūrijmōj in! Im komin m̧ōņōņō n̄an indeeo kōn kōjeram̧m̧an ko an Irooj—ad Irooj in Aenōm̧m̧an—Ij jar ilo etan Jisōs Kraist, amen.