Jesus el Kristo—King er a Budech el Mei er Kid

Mla er a Elder Russell M. Nelson

Er a Chelechad er a Teruich me a terung el Apostol

Kemiu el rodam me a rodos, ng meral klebokel el teletael tiang. A chelitakl a meral mla smisiich a rengud me a klumech a mla kmeald a rengud. Kede melchesuar a sils er a Kurismas er a chelsel a rengud!

A uldesued el kirel a Kurismas a mekletkid el kirel a telungalek, sengk, me a omesiou el mora rebebil. Ng omuchel er se el meral belkul a Kurismas, el ngii a ngarbab el sengk er a Demad er a Babeluades. “Ng beltkil a rengul a Dios a uchul, e nguldureklii a di ta el Ngelekel, me tirkel rokui el mo oumera er ngii a diak bol riid, e bai mo nguu a diak a ulebengelel klengar.”¹

A moktek er kid se el sekum eng melutk el kirel a Rubak me a diak a ulebengelel klengar eng sebechel ngosukid er a diak di el chelechal temel a Kurismas, ng dirrek el kirel a rokui el ringel er tial klengar. A rediak el melemalt el chad a mechell er tial beluulechad lobengterir a rebebil er a rediak el melemalt el chad. Tial mle ruebet el bleuulechad a mui er a chachisois el blals, mekemad, meklou el kerior, rakd, me a kodall.

A ringel er a dersta el chad a mo er ngii. A chedam a locha mo diak loureor. A ngeasek el chedil a locha mo smecher er a oberaod el secher. A ngalek el sechal malechub a redil a locha a mo diak loltirakl a llach. Ngii di el ngera el uchul a sebekreng, a rullii a derta me a derta er kid el mo osiik er a budech.

A klemechek er chelechal kesus a melutk el kirel a uchul a meral diak a ulebengelel budech, el ngii a Jesus el Kirsto—el King er a Budech el mei er kid.² Tial dui el Ngii a ulebang lobengkel aikel bebil el Ngii a ngilai er a uchelel.

Ng mlengilt lokiu a Demal el mo Osobelel a beluulechad. Aika el eru el dui—el Messiah e Kristo—a oterkeklii a Ngerchelel el di chimong el mlengilt.³

Ngara cheungel a derderel a Demal, e a Jesus a Ulemeob er tial beluulechad me a bebil er a beluulechad.⁴ A Jesus a Sebechekled lobengkel a Chedam.⁵ A Jesus a ngike el miltib el Immanuel,⁶el ngarbab el Ngak e Jehovah er a Chuodel Renged.⁷

Ngii a mlodurokl er a Demal el mo kudmeklii a Tngakirengelel ngii a kmal moktek er a chelsel a reksi er a chad. Ngokiu a Tngakireng er Ngii, e a klengar er a beluulechad a mlo klemerang el mora rokui el chad, e a diak a ulebengelel klengar a mlo sebechel mo er tirkel rokui el melilt el mo oltirakl er Ngii.⁸ Aikaikid el moktek a uchul a urerel me a klebkellel a Mesisiich el Dios.⁹

Ngii el ngarbab el Okesiud, e a Jesus a ulsischeklid el kirel a klengar, beltikelreng, me a omesuub. Ngii a ulsischeklid el kirel a nlgunguuch, klausubes, me a outekangel el mora ulebongel.¹⁰

Ngii a ulsischeklid el kirel omesiou el mora rebebil e diak di dosiou er kid. Ngii a ulsischeklid el kirel a chubechub me a blekokeuii el meral ngmodech a klengar kid lokiu a Klisichel. Ngii a ulsischeklid el kirel a budech er a rengud me a uldesued. E a ta er a klebesei, e kede mo dechor Medal ngii el melemalt el merritel e chubechub el Mastang.¹¹

Aikaikid el chedaol urerel a Rubak a rullid el mo dmanges er Ngii el diak a ulebengelel King er a Budech el mei er kid. Kede Odengesii er a techelled el chedam me a chedil, mechas me a rubak, e resensei er a rengalek.

A Kurismas el taem a tokubets el taem er a telungalek. A temel a telungalek el dmak a chedaol. Ng sebeched el ngosuterir a rengeleked lobult el mora Osobel. A chelitakl a sebechel ngosukid. A rengeleked a sorir el mengitakl er a “I’m Trying to Be like Jesus.”¹²

A Jesus a millekoi, “Bechiteterir a rengalek, e lak molkebai er tir, me lemei er ngak: le tir a oba rengedel a babeluades.”¹³

Ngii a sebechel uchul a budech el mo er tirkel klengar tir a telemall el mekemad a uchul. A telungalek el ngara ringel el mekemad a uchul a ultekuul omeltkir er a mekemad, el ngii a mildalm er a uldesuek er a taem er a Mekemad er a Korea.

A mekemedid er chelechal taem a kmal cheliseksikd e dirrek el ringel el mora telungalek. Tirkel mo ngara tiaikid el ringel a sebechir lobult el mora Rubak. A ongelaod el Klemechel a klumech er a budech er tial beluulehcad me a klungiaol el mora rechad.¹⁴

A budech a sebechel mo er tirkel lomelchesiu el diak el mesisiich. A rebebil a telemall a bedengir. E a rebebil a ngara ringel er a rengrir el kirir a re mla mo dibus el betik er a rengrir malechub a kuk di bebil er a ringel lomelchesiu. Rodam me a rodos, a budech a sebechel mei er a rengmiu se el moleketek er a klaumerang er kau er a King er a Budech.

“Te ngarngii a rsmecher er a delongeliu?Mngititerir el mei. Te ngarngii a rediak lorael, remikou, malechub a rediak lorael, malechub a retelemall, …malechub e ngii di el ngerang? Mngititerir el mei me bo kumkungil er tir.”¹⁵

“Ng mla mo klebech a klaumera er kemiu el bo kumkungil er kemiu.”¹⁶

A budech a sebechel mora chad el ngara ringel er a klengitelreng. Me a le klengitelreng el cheleuid malechub ng klengit a uchul, e se el Rubak a mengerchir ngii a meral ouchelreng. A chedaol llechukl a melekoi er kid el mo “cheroid [er a] ngibesereng er a klengeasek; … [e] mo omekedong er a Rubak loba klikiid el reng.”¹⁷ Seikid e se el osumechereng er Ngii “el chilt er a Gilead” a mo sumechid luldimukl er a kngtil a klengit.¹⁸

Ka momdasu er a ngeldechel a John Newton, el mlechell er a beluu er a London er a 1725. Ng mlo ouchel a rengul er a mekngit el teletael lolterau er a resibai e mlo prist er a ikelesia er a England. Tiaikid el ngeldechel a rengul, e a John a lilchesii a chelitakl el “Mengasireng el Krasia.”

Mengasireng el krasia!Ungil oderngesall
El osbelii a chad el uai ngak.
Ak mlara iilkolk, e chelecha e ak tobedang,
Mle mikou, e chelecha kumes.19

“Deureng el mo er ngii er a babeluades er a chimol chad el mo ouchel rengul.”²⁰

A budech a sebechel mo er tirkel chellungel a berraod.

“Mei er ngak, kemiu el chellungel a berraod, me bok beskemiu a ulengull.

“Mnguu a berraod er ngak, e mosuub er ngak; le ngak a medemdemk e ngariou a renguk: me bo betik er a ulengull er a rengmiu.

“Le berraod er ngak a beot, me a chelngelek a kebekakl.”²¹

A budech a sebechel mei er tirkel ngara klengitelreng. A Rubak a millekoi, “Ngeltengat a re ngara klengitelreng: le temo metik ongelaod.”²² Me se el doutekangel er a klengitelreng er tirkel mla mad el betik er a rengud, eng sebeched el mo mui er a budech er a Rubak lokiu odbechel Chedaol Reng.

A Rubak a millekoi el kmo tirkel mle ultuil er ngii e mora kodall a diak bol cheremii a kodall leng mo klebokel el mo er tir.”²³

“A budech ak beskemiu, a budech er ngak ak beskemiu: el diak el beluulechad a meskemiu, ngak a meskemiu. Lak bol rrau a rengmiu, me a lak bo medakt.”²⁴

“Ngak a okiis er a kodall, e klengar: ngike el oumera er ngak, a le mad, eng mo ngar:

“E ngike el kiei el ngara klaumera er ngak a diak bol mad.”²⁵

A budech a sebechel mo er tirkel rokui el tir a meral losiik er a King er a Budech. A Klemechel a klebokel el klumech el remisionari er kid omerk er ngii er a beluulechad. Tir omerk er a ebangkelio er a Jesus Kristo el mloluut er Ngii lokiu a Profet Joseph Smith.²⁶ A remisionari olisechakl aikakid el melodech a klengar el tekingel a Rubak: “A le betik a rengmiu er ngak, e moltirakl a llechukl.”²⁷

A budech a sebechel mo er tirkel rokui el melilt el mo merael er a rolel a Mastang. A Ongtil a chemolt er a chelsel a kldei el tekoi: “Mei, e moltirakl er ngak.”²⁸

Kede mengitakl el mora King er a Budech,²⁹le Ngii a lmuut el mei. E a “klebkellel a Rubak a mo mocholt, e a rokui el chad a mo mesang.”³⁰ Me ngii el Messiah, eng mo oba dereder el King er a rokui el king e Rubak er a rokui.³¹

Se el doltirakl er a Jesus Kirsto, e Ngii a mo mekrolid el mo kiei Lobengkel me a Demad er a Babeluades, me a telungalek er kid. Ngokiu aikel betok el olibesongel er a klengar kid, e a lsekum e kede melemolem loltirakl a telbiled, el outekangel el mora ulebongel, eng sebeched el mo nguu se el kot el ngarbab el sengk er a Dios, el diak a ulebengelel klengar.³² Chelsel se el chedaol Rengedel, e a telungalek er kid a mo dmak el mora ulebongel.

A Dios bo lomekngeltengat er kemiu, e rodam me a rodos er ngak. Ungil Kurismas el mora derta me a derta er kemiu! E bom ngara deureng er a ikel rokui el klengeltengat er a Rubak—el ngii a King er a Budech el mei er kid—a nglunguchek el ngara ngklel a Jesus Kristo, amen.