Ngera dilubech?

Mla er a Rosemary M. Wixom

Primary General President

Ungil Kurismas!

Tiaia temel a Kurismas, el rengalek a meskid a ongasireng er a Kurismas el ngii a remutech a rengud. Ng sebeched el mo diak de ngai a rokui alsekum meng diak domes er a Kurismas lokiu osengel a ngalek, e le a rengalek a mes a llomes, e remenges a chelitakl, e tmungl a bul a Krismas tree me a kiande loba klemeriar reng. Kede mes a bekekerkard el otengir me a mekekere el isngir el bereked er a mado er a stouang ea uldesuir a ngar a tutau er a Kurismas, e a mekekerei el chekngelel chimorir a omechur a sils eng mo December 25. A roungalek a dirrek el omechur a sils eng mo December 25. Te omdasu el mo kldmokl el kirel a tutau er a Kurismas sel loruul a beresent el mo er a rengelekir.

Se er ak kekeriei, e a delak a mle blechoel el merasm a beresent el mei er ngak me a ki mkebtot el merrengek sel Kurismas. Ng nguu a mesil er a omerasm el mo er a delmerab er ngii e ulemuchel el merasm el bekord ngara ta el buil ruchei, el kerekikl me a chesimer a di chelsimer sel loureour. Sel merku sils er a Kurismas eng milrasm el mo chosoi. Sel bochul merek—meng di kirel kung el size er ngii er kemam e omes a mo ungil klemengetel—ng kildmeklii meng mlo sebechel mart a ikal bresent. Tiaikid eng siliseb a lechet er a medad. Ng lilechet a medemam el ta er a ta el taem, e ngilikemam el mora delmerab er ngii, e ulemail er kemam lomuchel er a bdelmam, e dimlak lolubet a lechetel a medemam. Tia kmal uluureor … el mo lmuut er a louring a dengua er a ta er a delmerab.

Meng mirael e millekoi, “Ak di mong e mei, me kele momdikm.” Me ke locha oker er kmo, me ngera dilubech?”

Msall e kuuchais er kemiu: tiang a mle bekekerkard el ikrel a bail.

E msall e kuuchais el kmo ng mekerang e tia el ker el, “Ngera dilubech?” a msa meral belkul a Kurismas.

Tia dilubech er a ta el taem er a chelsel a December er sera Amy Johnston, el mle oungerachel er a Cub Scout er a Gilbert, Arizona, blo le nguu a techall el mo olsisechakl er a rodikel el eai a rekrir el buik el kirel a cherellel a Jesus. Ng milchesuar el kirel mechei a tekingel a Scout el kildmokl e mo mengedecheduch er tirka el Cub Scouts el kirel a kot el Kurismas. Ng childeterir tirka el buik el mo iliuekl er a ulolel a chelsel a blil e milenguiu a bebil er a bades el ngara chedaol llechukl e ulesbech a siasing el olecholt er a chedaol el cheldechedechal a Maria me a Josef, re mengkar a sib, btuch, me a tolechoi el Jesus el mlechell er a blil a charm er a Bethlehem.

Meng milenguiu:

“Ma Josef a mla ra Nasareth, er a Galilea el mor a beluu, er a Judea, el mo er a belual a King David, el ngii a okedongall el Bethlehem; …

“Ng mlo meluches er a ngklel ngii ma Maria el mle telbiil el mo bechiil, e a Maria a mle dioll. …

“Me ng milechelii a ketengel el sechal, e mililii er a mamed e mekedusii er a ongolel a charm; e leng mlo meseked a lengiil el blai meng dimlak a bo le kiei er ngii.

“Isel beluu a mla er ngii a re bebil el mengkar a sib el mla er a ked er a klebesei el mengkar a delebechel el sib.

“E a tal anghel er a Rubak a mlo duum er tir ma klebekellel a Rubak a diliich el meliuekl er tir: me te kmal mlo medakt.

“Me ngii el anghel a dilu er tir el kmo, Lak kom medakt: Ngak olab a ungil chais el ekor kemiu, el ngii a mo mesterir a rokuil chad a klou el deureng.

“Chelechal sils e a Osobeliu el ngii a Kristus el Rubak a mlechell er a belual a David.”¹

Me se er a louchais el kirel a cherellel a Jesus, eng milsterir tir el rokui el buik el dimlak el blak a rengir lorenges el kmeed el tedobech el taem, eng di a ta er tir, el John, a meral mle blak a rengul lorrenges. A John a mle odikel el buik e diak el sebechel chelellakl, eng di sera louchais er tial cheldecheduch, e ng mle blak a rengul lorrenges e uleker, “Me, ngera dilubech?”

Ng millemolem el ouchais er tir er sera le kekerei a Jesus. Ng dilu, “a Jesus a mle kekere el buik, el kmal di uai kemiu. Ng mle soal remurt e milil. Eng di ng dirrek el mlukeroul el ‘mesisiich er a tekoi er a kle reng.’”² Ng uluuchais er tir er sera le teruich me a eru a rekil a Jesus, eng mirrael ngii me a rechad er a blil el mo er a Jerusalem. A Maria me a Josef er a le kaeri er tir el mo remei e te mlo metik er a ngelekir el dimlak lobengterir. Te di mle merreched el lmuut el mo er a Jerusalem e miltik er a Jesus el ngar a chelsel a templo el dengchokl er a delongelir a re sensei er a Judea el oker a ker er ngii, e a chedaol llechukl a melekoi el kmo tirkel rirengesii a mlo imis el mechas a rengrir er a klemedengei er ngii me a nger er ngii.”³

“Me, ngera dilubech?” nguleker a John. A Amy a uluuchais er tirka el buik er a Jesus Kristo er a lolsisechakl, el mle mui er a Reng er a Rubak. Ke de menguiu er a Bibilia el kmo Ng mle olsisechakl er a ebangkelio el mo er a remechebuul, e milngetmokl ongasireng el tekoi, Ng ulemekungil er a remeuikou me a resmecher, e meral ullekiis er a rulekeuad el chad. Ng ulsisechakl, “Moubeltik el reng el mo er a recherreuem, [e] bo mungil er a rouketui er kau.”⁴

A ikal mildung a rirtechii a rengul a John meng mle soal mo medengei a lmuut el betok. Meng liluut el oker, “Meng, ngera dilubech? Ng uluuchais er tirka el buik el rebebil er a rechad a mlo ikrii a Jesus e dimlak el sorir Ngii. Te bai millib a kodellel. Ng uluuchais er tirka el mekekerei el Cub Scout er a Ulebongel el Chedaol Belsoil, sers er a Gethsemane, me sera le mekerus a Jesus e le bekiis er a kodall. Ng mle medengei el kmo a ikal cheldecheduch a mle ketengel a John el remenges, e mle semeriar el mo medengei a lmuut el betok.

Ng ulmelchesiu el kirel mo diak el longedecheduch, e omekedong a ngklir a derta er tirka el buik, e melekoi el kmo, “A Jesus a mlad el kirem.” A John a mle blak a rengul lorrenges a ikal lullekoi el mo er a derta er tirka el buik. A Amy a ulemes er ngii e kmo, “John, a Jesus Kristo a mlad el kirem.” Me a John a ulemes er ngii e uleker el mechas a rengul, “Ng rirelii tial tekoi el kirek?”

A Amy a dilu el kmo, “A Reng er a Rubak a mle klou er a chelsel a blai er seikid el sils el imo el buik a mlo omelchesuar a odbechel Chedaol Reng el ngii a locha mong meng ketengel.” Amy a dilu el kmo, “Ng diak kudengelii a mo duubech el mo er a John er a ngarmedal klebesei, a telungalek er ngii a mla melukl el mo er cheroid. Eng di ak meluluuch me sel tane el mildalem er a miting er a Cub Scout er a eru el sandei ruchei er a Kurismas a mukeroul e mo msa mui el llomes er a ebangkelio er a ta er a klebesei.”

A uriul er a bocha lemerek a temel a Kurismas, ea light er a Kurismas a mle riou, e a bul a ngas a ngilemed er a eolt, me a chelitakl er a Kurismas a dikea lorrael er a rasio, kid el uaia John, a locha oker, “Ngera mo duubech?”

A ongasireng er a Kurismas a uchelel. A Kurismas a omeletked er a tolechoi el mlechell er a Bethlehem el mla meskid a moktek er a klengar er kid, me sel mo duubech el mei er kid a kmal di ultuil er a kengei er kid er a Osobel, el Jesus Kristo, e mo oltirakl er Ngii. A bek el sils e kede olengit er a Reng er Ngii el mei er a klengar er kid. Kede mes a llomes er a rebebil; kede remenges a deureng er a rengalek el ngii a meskid a urunguled me a dongiil el kirel a ngarmedad el klebesei. Kede omes a ikel uchul e kede mo dmak el bek el chad, olsiseb er a rebebil, mesiou, e mengelaod a reng, e subii el mo medengelii a meral belkul a dodengelii a Osobel, el Jesus Kristo. Kede mo metik er kid el omechur a sils el molmuut er sel sils el kid a meral mo omelchesuar a ongetikaik er Ngii—el uaia, sel mechell a tolechoi, techolbechelid er a ngalek, merolang el misionari, chebechiil el mlekedmokl er a templo, me a ngeiul a sacrament er a bek el sandei. Ngokiu a diua omerellel a Kristo me a klaumerang er a ngalek e kede osiik er Ngii e mo omelchesuar er a ongetikaik er Ngii.

“Di le merkong e kau … bom uai a kekerei el ngalek, eng diak el sebechem el mo soiseb er a rengedel a babeluades.”⁵

Ng klebokel el uldasu, tial uldasu el Demad a mla kudmeklii el tirkel rokui lokiu a Ngelekel Sechal, el Osobeled el Jesus Kristo, a sebechir el lemuut el mo kiei lobengklel e mo ngara deureng er a ikel rokui el ngii a olab a Edam, el tiang sel kot el klou a belkul el nger er mo er sel ker el kmo “Ngera modubech?” A Osobel a dilu el kmo ngkel ngoikak a mo nguu a Demak; e ngkel nguu a Demak a mo nguu a rengedel a Demak; me a le uaisei e a ikel rokui el ngara Demak a bol ngai.⁶

Sel de kldmokl el mo Nguu a meskid a beches el belkul a kldmokl el kirel a December 25.

John, ngii di el ker el omngarngii, e tirke el ngar el Apostol a mla melekoi el kmo: “Aki ouchais el kmo a klengar er a [Osobel] el ngii a klou a ultutelel er a reksi er a chad, a dimlak el omuchel er a Bethlehem me a kal blol merek er a Calvary. Ngii a mle Ketengel a Chedam, el Dita el Ngelekel er a tech, el Osobelel a beluulechad.”⁷

John, a sengk er Ngii el mei er kid a tiaikid el tekoi el uase ngera mo dubech.

Tiang a klemerang, e Ngii a kildemklii el mo er kau. Me tiaikid el klebokel el klemerang a kuuchais er ngii el oba Ngklel, a Jesus Kristo, amen.