O, Itok, Jen kwaļo̧k ad Iakwe E—im Karōk in Lo̧mo̧o̧r eo!
Āinwōt elōn̄ iaami, lakatu in ippa, Craig, im n̄a eļap amro iakwe al kwojarjar ko an Kūriijmōj. Āinwōt elōn̄ iaami, lakatu in ippa, Craig, im n̄a eļap amro iakwe al kwojarjar ko an Kūriijmōj. Eļan̄n̄e kōmro enkar kōllaajraki al in kūriijmōj ko me rem̧m̧an ippāmro, eo ilōn̄tata enkar “Oh, Come, All Ye Faithful.” Ej “lan̄lōn̄” im “anjo̧” naan ko ilo al eo me kūr kōj n̄an “itok,” “lo,” im “iakwe” ad Rilo̧mo̧o̧r, Jisōs Kraist—“Kiin̄ an enjel ran.”1 Ij en̄jake kam̧ool bwe, āinwōt jetōb ko ilo mour eo m̧okta jaar katak kōn karōk in lo̧mo̧o̧r eo, jejjab lo wōt im kar mōņōņō kake ak jaar barāinwōt lamōj kōn lan̄lōn̄ ke Ej kālet ilo ettā n̄an aje E make āinwōt juon Rilo̧mo̧o̧r an laļ.2 Ilo meļeļein naan kein me kar ba, Eaar ba ilo ettā, “N̄a e, jilkinļo̧k eō.”3
Rijilōk Paul eaar kauweik kōj n̄an “pojak iien otemjej n̄an leļo̧k … unin kōjatdikdik eo ej [ilowami].”4 Āinwōt Iaar kwaļo̧k jet iaan ememļo̧k ko aō kōn Kūriijmōj, ij kōjatdikdik bwe komaron̄ jeļā etke ejaam wōr aō kōjatdikdik kōn Rilo̧mo̧o̧r, ilo “Anij [Jemed Indeeo, eo] kōn an iakwe laļ, eaar letok juon wōt Nejin Ear keotak,”5 im ilo Karōk in mōņōņō eo ewāppen im aiboojoj an Jemān.
Ememļo̧kjen eo Kein Kajuon kōn raan in Kūriijmōj
Ke eaar 14 aō iiō, baam̧le eo aō rekar jokwe ilo New Zealand. Jema eaar kekemooj wōt ke ej 30 an iiō ke rekar kūr i āinwōt juon mijen būreejtōn.
Raan in Kūriijmōj eaar itok, im ajri ro 5 jeiū im jatū im N̄a kōm kar kajjieon̄ n̄an kamineneik kōm make n̄an juon em̧ eo ekāāl ilo juon jikin ekāāl. Ekar pen n̄an n̄a—juon jodikdik ej dik wōt—ļōmņak eo an ilo an etaļ ettoļo̧k jān mweo imōn, ro mōttan, im baam̧le eo. Iaar jab lukkuun m̧ōņōņō, ke māj ko ij kalimjōki raar oktak, ainikien ko, im kam̧ōņōņō ko an Kūriijmōj—al ko, tōma ko, im wōjke in Kūriijmōj ko, sno ko, im eļaptata baam̧le eo. Iaar oon̄ kōn ro rilikū, aunty ro aō, im em̧m̧an ro unlepa ro me iaar jeļā bwe ejjab to renaaj koba ippān doon ilo mōn jimma etan Kjar ilo Salt Lake City n̄an Kūriijmōj Bade an Baam̧le eo an Kjar aolep iiō.
Ekar joten eo m̧okta jān Kūriijmōj ilo 1966. Iaar jab kōņaan koba ippān baam̧le eo aō im mijinede ro ilo juon nokon in jota an baam̧le ilo mweo ekāāl (mijen home), ippān doon in eaar jab āinwōt bade ko an baam̧le eo an Kjar eo me ilukkuun kōņaan pād ie. Ijjab maron̄ kememej juon iien ke taļboon eo eaar riin̄, ak taļboon eo eaar kajju ukōt en̄jake ko ilo būruwō āinwōt juon jodikdik, kobrak aō kōn tūriamo̧ kōn jema eo ejitenbōro im būromōj kōn aō lukkuun ļōmņak kōn n̄a make.
Unleppa Joe (brother eo an jema) eaar riin̄ i tok kōm, ba n̄an kōm bwe ad jitenbōro, eo ejjab ļōmņak wōt kōn e make, im eļap an kate ilo jerbal, im rikōjparok bujen, Jimma Kjar, ekar en̄taan kōn an mej rājetin ānbwinin im kar babu wōt im jaje makūtkūt ilo aujpitōļ. Ememļo̧kjen ko raar jiktok ilo kōlmenļo̧kjeņ eo aō kōn an kajoor aititōl camera n̄an pija, al, kalimomo, im juon patriarch eo im kōm aolep eļap am iakwe! Jema eaar abōņōņō ke ej mōj an kōnaan ilo taļboon eo, ak eaar kaenōm̧m̧an e make, jutak pen, im kwaļo̧k an kam̧ool kōn karōk eo an Jemād Ilan̄ im an tōmak ilo jerbal eo Ekwojarjar an Rilo̧mo̧r. An naan in kam̧ool ekar un̄ūr buruō.
Būromōj, Jimma eaar jab em̧m̧an an mour. Ekar mōkaj an jako raan eo juon. Ekar jejjet raan in Kūriijmōj ilo New Zealand ak joten eo m̧okta jān raan in kūriijmōj ilo Salt Lake City, raan eo em̧m̧an tata ippān Jimma. Jako eo an eaar juon iaan en̄jake ko aō jinoin kōn jako an juon armej eo epaake eō im ejitenbōro ippa. Men̄e iaar buromōj kōn jako in an, eaar ļap aō jeram̧m̧an im eaar aeņōm̧m̧an ļōmņak eo aō kōn aibojooj in karōk eo ekamōņōņō. Iaar en̄jake kam̧ool bwe Inaaj bar lo Jimma eļan̄n̄e inaaj mour āinwōt e. Iaar jab ļōmņak inaaj kar lukkuun meļeļe, ilo kar tōre eo ilo mour eo aō, mōttan eo eaorōk Rilo̧mo̧o̧r eo eaar kōm̧m̧ane im Pinmuur eo an n̄an kōm̧m̧an bwe in maron̄ bar lo ro rejitenbōro ippa. Ak iaar lan̄lōn̄ kōn jeļā eo aō kōn karōk eo. Iaar jeļā bwe in iakwe E eo jej m̧ōņōņō kōn raan in ļotak eo an.
Jān Kūriijmōj eo ļo̧k etto, ikar ekkatak kōn ad Rilo̧mo̧o̧r, Jisōs Kraist. Būreejtōn Harold B. Lee eaar katakin: “Nejin Anij … eaar itok n̄an laļ in āinwōt juon Nejin eo Emake wōt n̄an kakūrm̧ool mijen eo an, āinwōt juon Lamb emōj m̧an E jān jinoin kōm̧anm̧an laļ, n̄an boktok lo̧mo̧o̧r n̄an aolep armej. Jisōs eo eaar pād aolep men ko rem̧m̧an ippān.” Ilo an kar leļo̧k mour eo an Eaar kōpelļo̧k kōjem … im kar katakin wāween eo me jemaron̄ bōk mour indeeo. … Jisōs wōt eo eaar pād aolep men ko rem̧m̧an ippān.”6
Ememļo̧kjen eo Kein Karuo kōn Kūriijmōj
Kūriijmōj eo eļap tokjen ilo 1984 ekar boktok n̄an eō juon ememļo̧kjeņ kōn Rilo̧mo̧o̧r im kōm̧m̧an bwe kamo̧lo̧o̧l eo aō kōn karōk in lo̧mo̧o̧r eo aiboojoj en ļapļo̧k an aorōk. Ke eaar 32 aō iiō, iaar m̧are ippān in ejitenbōro, ļeo pāleeō eo etiljek, im ij juon m̧am̧a eo emān nejin ajri ro raorōk, iiō ko aer raar jilu ļo̧k n̄an jon̄oul. Jijino wiik m̧okta jān Kūriijmōj, iaar ron̄ jet ennaan jān taktō eo me eaar kajju ukōt mour ko am ke ej kwaļo̧k bwe i kāānjer. Komro Craig kar kalimjōk doon ilo amro jab tōmak, kōmro jim̧or kar dānin kōmjaļaal, ļōmņak kōn ta eo enaaj waļo̧k ilju im jekļaj. En̄jake eo aō ālkin, men̄e, eaar em̧m̧an “aenōmm̧an … eo ej eļļā jān jeļā otemjej”7 kōn tōmak eo am ilo Jisōs Kraist im ilo karōk eo Jemān.”
Men̄e Craig eaar juon bisop ilo ward eo am ilo tōre eo, kōm kar kālet n̄an kwaļo̧k enaan in ippān baam̧le eo am bwe kōm en makūtkūt āinwōt n̄e ejjeļo̧k men eo n̄an ajri ro nejim. Ilowaan wiik ko jijino me repaake ļo̧k Kūriijmōj, iaar etal eiten aolep raan, ilo sno im ice, bwe in ebbōk uno ilo aujipitōļ—ilo an jino im leddik eo jeiū raar kotaik doon n̄an jipan̄ eō ilo mweo imō. Ekar juon tōre eo epen, ak ke ij reilik ļo̧k n̄an kar Kūriijmōj eo, iaar jab maron̄ kōmeļeļeik jon̄an kam̧oolol eo aō kōn pinmuur eo an Rilo̧mo̧o̧r, Jisōs Kraist, im “karōk in tūriam̧okake eo an Rikōm̧anm̧an eo eļap.”8
Iaar kile ilo m̧ool bwe em̧m̧an ļo̧k jān kar m̧okta kōn an kar pidodo mour, karōk eo ekamōņōņō an Jemedwōj Ilan̄ eaar lukkuun aorōk ippa jān mokta. Kūriijmōj eaar oktak ilo iiō eo. Toon wōt aō iakwe aolep men ko kōn raan in Kūriijmōj, men ko de ko me relukkuun aorōk n̄an n̄a rekar m̧are eo aō n̄an indeeo, baam̧le eo aō, im aō tōmak im naan in kam̧ool kōn Jemedwōj Ilan̄, Jisōs Kraist, im karōk eo an.
Juon raan ke iaar kakkije ilo m̧weo imō, ļōmņak kōn ilju im jeklaj eo an ajri ro nejūmro, iaar lale Friend magazine eo im eaar jejjet aō kalimjōk juon al. Iaar jijjet ilo piano eo im jan̄ ke ij al im en̄jake enaan eo an al eo ilo an un̄ūr būruō. Iaar jeļā bwe iaar aikuj katakin al in ejjab n̄an ajri in Būraimāri ro ilo ward eo, ijo iaar jerbal āinwōt juon ritōl in al an Būraimāri, ak eļapļo̧k an aorōk n̄an ajri ro nejū ro raar jokwe ilo m̧weo ippa.
Ewi wāween an Jemād ba n̄an kōj ilo laļ in kōn iakwe im jouj?
Eaar jilkintok Nejin, juon nin̄nin̄ ej kab ļotak, kōn aenōm̧m̧an im kwojarjar.
Ewi wāween an Jemād kwaļo̧k n̄an laļ in, iaļ eo jej aikuj etal ie ļo̧k?
Eaar jilkintok Nejin bwe en etetal ippān armej ioon laļ in, bwe jen jeļā.
Ewi wāween an Jemād ba n̄an laļ in kōn katok, im kōn mej?
Eaar jilkintok Nejin n̄an mej kōn kōj im bar jerkakpeje.
Ta eo Jemād ej kajjitōkin kōj? Ta eo jeje ko rekwojarjar rej ba?
En wōr ad tōmak, lōke, mour āinwōt eo Nejin, jipan̄ ro jet ilo mour ko aer.
Ta eo ej kajjitōkin kōj kake? Mour āinwōt eo Nejin.9
Al in eaar un̄ūr eō im eaar letok n̄an eō juon meļeļe n̄an wāween aō maron̄ kwaļo̧k n̄an Jemedwōj Ilan̄ aō kam̧oolol kōn eo Nejin im kōn karōk eo An. Iaar en̄jake bwe men̄e eļan̄n̄e iaar jab kōtļo̧k bwe in lo an ajri ro nejūmro rūttoļo̧k im jeļā wāween mour, eļan̄n̄e remeļeļe im jeļā im mour kōn katak ko rem̧ool me rej waļo̧k ilo al kwojarjar in, renaaj erom jet rikaļoor an Jisōs Kraist.
Ekar juon en̄jake eo em̧m̧an me eaar kobrak m̧weo imōm iiō eo, kōjeraam̧m̧an kōm kōn aenōm̧m̧an im iakwe n̄an ro jet me ijamin meļo̧kļo̧k.lan̄ me eaibojoj. Ikar en̄jake āinwōt n̄e emōj kar leļo̧k ajri ro nejūmro meļeļe kōn men ko rekwojarjar ilo kar Kūriijmōj eo. Rejjan̄in kar jān jinoin im ālkin kōm̧m̧ane tieta in kōn ļotak eo an Jisōs kōn eļap kautiej, kōn kautiej ilo ettā im iakwe me emenin aikuj n̄an iiō ko aer. Ilo aer kar mālijjon̄ e kōj im mour ilo tōre ko reppen, eļapļo̧k am kar en̄jake im̧we ko ralikkar ilo am kar lukkuun ļōmņak im leļo̧k kam̧oolol kōn menin letok an Rilo̧mo̧o̧r, Jisōs Kraist, im kōn aiboojoj in karōk in lo̧mo̧o̧r eo an Jemedwōj Ilan̄.
Iaar ļōmņak wāween an armej maron̄ mour ilo an ejjeļo̧k aer kōjatdikdik itok jān meļeļe ko aer kōn karōk in lo̧mo̧o̧r im eddo eo ioļaptata an Pinmuur eo an Rilo̧mo̧o̧r ilo karōk eo an. Iaar lukkuun kam̧oolol ilo aō kobaik tok naan in kam̧ool ko aō kōn naan ko an rikanaan, Būreejtōn Thomas S. Monson, eo eaar lukkuun kajoor ilo an kam̧ool: “Kōn E eo kar kaanjo̧ik kōj kōn mej eo ejjeļo̧k jemļo̧kin, aeet Jisōs Kraist, Ij kam̧ool bwe E ej juon rikaki in m̧ool—ak E ej eutiejļo̧k jān rikaki. Ej juon waanjon̄ak kōn mour eo ewānōk—ak eutiejļo̧k jān ri waanjon̄ak. E ej juon Taktō Em̧m̧an—ak eutiejļo̧k jān taktō. Eo ej lo̧mo̧o̧ren armej “ro remej” ej juon Rilo̧mo̧o̧r an laļ in, eo Nejin Anij, Irooj in irooj ro, ri Kwojarjar in Israel—aeet Irooj eo emōj an jerkakpeje—eaar kwaļo̧k, ‘N̄aij eo m̧oktata im eo āliktata; N̄aij E eo ej mour, N̄aij E eo kar m̧ane; N̄aij ami rijojomar ippān Jemān.’ [K&B 110:4].”10
N̄e jej ļōmņak kōn pinmuur eo an ejjeļo̧k jemļo̧kin n̄an kōj, aeet ilubwiljin naan ko laļem rekaburomōjmōj me Rilo̧mo̧o̧r eo eaar kwaļo̧k: "Kom̧ barāinwōt kōņaan ilo̧k ke?”11 Tōre ko reppen, jemaron̄ kōm̧m̧ane kālōt ko n̄an oktak likļo̧k jān E im kate kōj anjo̧ jān en̄taan ko ad make, ak jemaron̄ kālōt n̄an oktak ļo̧k n̄ān E im karōk eo an Jemān, lo bwe “ren jab en̄taan jabdewōt men in kaen̄tanaan otemjeļo̧k, ijjelo̧kin wōt n̄e eaar men in jakoļo̧k ilo lan̄lōn̄ an Kraist.”12 Aō jar kōn kōj kajjojo ej n̄an bōk kūr eo an al in Kūriijmōj eo ekwojarjar n̄an “itok, jen kwaļo̧k ad iakwe e” im Jemedwōj Ilan̄ kōn karōk eo an aiboojoj im eweppān! Ilo etan Jisōs Kraist, Amen.