Mai arue tatou nei—e te opuaraa !
Mai ia outou atoa, mea au roa na maua o to’u hoa faaipoipo here o Graig te mau pehe mo’a no te Noera. Mai te mea e tabulahia te mau pehe au-roa-hia e maua, tei ni’a roa ïa « A Haere Mai Outou o Tei Faaroo ». Te ani nei te mau parau « oaoa » e te « arue » ia tatou ia « haere mai », ia « hi’o », e ia « haamori » i to tatou Faaora, Iesu Mesia—te « Arii o te mau melahi ».1 Ua papû ia’u e, a haapii ai tatou, ei mau varua i roto i te oraraa matamua, i te opuaraa no te faaoraraa, aita tatou i hi’o noa e i haamori noa, ua pii atoa râ tatou i te oaoa a pûpû ai Oia Ia’na iho ma te haehaa ei Faaora no te ao nei.2 Na roto i na parau e pae hau roa i te hohonu, ua parau Oia ma te marû, « Teie au, a tono ia’u ».3
Mai te Apotesolo Petero ua a’o pinepine mai te peresideni Monson ia tatou ia « ineine noa â ia parau atu… i te tiaturi i roto ia [tatou] ».4 A faaite ai au i te tahi o ta’u mau haamana’oraa no ni’a i te Noera, te ti’aturi nei au e nehenehe ta outou e ite i te tumu no to’u ti’aturiraa i te Faaora, i te « Atua, [to tatou Metua Mure Ore] i aroha mai i to te ao, e ua tae roa i te horo’a mai i Ta’na Tamaiti fanau tahi »,5 e i te faanahoraa hanahana e te maitai roa no te oaoa a te Metua i te Ao ra.
Te haamana’oraa noera numera 1
I te 14raa o to’u matahiti, te ora ra to’u utuafare i Niu Terani. E taata apî to’u metua tane, i te area faito matahiti e 30 a piihia’i oia ia tavini ei peresideni misioni i reira.
Ua tae mai te tau noera, e te tamata noa ra to’u na taea’e e tuahine e pae e o vau nei i te haamatau i to matou oraraa i roto i te hoê vahi nohoraa apî. E tamataraa teie no’u—te hoê taure’are’a aita â i paari—ia ora atea i te mau fetii, te mau hoa e te utuafare. Ua mihi au i te mau vahi, te mau faarooraa, e te mau oro’a noera matauhia e au—te pehe, te mau mori, te raau noera, te hiona, e te utuafare ihoa râ. Ua mihi au i te mau taea’e, te mau tuahine, te mau metua vahine e te mau metua tane fetii [cousin, cousine, tatie e tonton] o te fatata ra i te putuputu atu i te fare o papa ruau Kjar i Salt Lake City no te oro’a noera matahiti o te utuafare Kjar.
E mahana teie na mua noa’e i te Noera i te matahiti 1966. Ua amui atu vau ma te anaanatae ore i to’u utuafare e te mau misionare no te hoê pureraa pô utuafare i te fare o te peresideni misioni, ma te ite papû eita roa’tu teie haaputuputuraa e nehenehe e mono i te rururaa a te utuafare Kjar o ta’u ho’i e mihi rahi ra. Aita vau e haamana’o maitai ra i te taime a ta’i ai te niuniu, na taua râ niuniu i taui i taua ihoa taime ra i to’u aau taure’are’a, ua tupu ia’u te aroha no to’u metua tane here e te tatarahapa no to’u haapa’o-noa-raa ia’u iho.
E niuniu na to’u metua tane fetii o Joe, tei faaite ia matou e, to matou papa ruau Kjar herehia, te taata o tei ore e haapa’o noa ia’na iho, tei rave puai i te ohipa e tei haapa’o maitai i te mau fafauraa, ua roo iho nei oia i te ma’i mafatu puai e te tarava ra oia ma te turuhe (inconscient) i roto i te fare ma’i. Ua puta mai te mau haamana’oraa i roto i to’u feruriraa no teie patereareha, tei au i te pata haere i te mau hoho’a, i te himene, e te arearea, o ta matou paatoa hoi i here ! Ua huru ê roa to’u papa i muri a’e i te niuniu, ua faaoroma’i râ oia, ua ti’a papû mai e ua faaite i to’na iteraa papû u’ana no te opuaraa a te Metua e to’na faaroo i te ohipa faufaa rahi a te Faaora i roto i taua opuaraa ra. Ua haaputapû roa to’na iteraa papû i to’u aau.
Te mea oto râ, aita papa ruau i ora mai. Ua pohe oia i te mahana i muri mai. E mahana noera ïa i Niu Terani, i Roto Miti râ e mahana ïa na mua a’e i te Noera, te mahana o te matahiti au-roa-hia e papa ruau. Ua riro to’na poheraa ei taime matamua roa a ere ai au i te hoê taata piri roa e tei herehia e au. Noa’tu ua oto vau i to’na poheraa, ua haamaitai e ua tamahanahana to’u iteraa no te faanahonahoraa hanahana no te oaoa ia’u. Ua papû ia’u e, e farerei faahou â vau ia papa ruau mai te mea e ora vau mai Ia’na ra te huru. Aita vau i mana’o e ua taa maitai ia’u i taua taime ra o to’u oraraa, te tufaa ohipa faufaa rahi a te Faaora e a Ta’na tusia taraehara ia nehenehe ia’u ia amui faahou atu i te hoê mahana i te feia tei herehia e au. Ua nava’i to’u ite no te oaoa i te opuaraa. Ua nava’i to’u ite no te haamori Ia’na o ta matou e faahanahana nei i te fanauraa.
Mai taua Noera ra e mea maoro i teie nei, ua rahi atu ta’u i haapii mai no ni’a i to tatou Faaora, o Iesu Mesia. Ua haapii mai te Peresideni Harold B. Lee e: « Ua haere mai te Tamaiti a te Atua ei Tamaiti Fanau Tahi no te faatupu i te hoê misioni, ia riro ei Arenio i taparahihia hou te hamani-raa-hia o te ao, no te faatupu i te ora no te taata atoa. Na roto i te horo’araa i To’na ora, ua iriti Oia i te uputa… e ua haapii i te e’a e nehenehe ai e noaa ia tatou te ora mure ore… O Iesu ïa i roto i To’na ra hanahana mau ».6
Te haamana’oraa noera numera 2
Ua tupu te tahi atu haamana’oraa faufaa rahi no Noera i te matahi 1984, tei faatupu rahi roa i to’u mauruuru no te Faaora e no te opuaraa hanahana o te faaoraraa. E 32 matahiti to’u, faaipoipohia i to’u hoa here haapa’o maitai, e ei metua vahine no na tamarii rii e maha, mai te faito matahiti toru e tae atu i te ahuru. E ono hepetoma hou te Noera, ua farii matou i te parau apî a te taote tei faaarepurepu roa i to matou oraraa, a parau mai ai te taote e, e ma’i mariri ai taata to’u. Ua hi’o o Craig e o vau nei te tahi e te tahi ma te maere, te faaoroma’iraa eiaha e ta’i, ua feruri eaha râ to te ananahi. Tera râ, te mana’o i muri noa mai, o taua « hau [ïa]… tei hau atu i te ite taata nei »7 no to maua faaroo ia Iesu Mesia e i te opuaraa a te Metua.
Noa’tu e te tavini ra o Craig ei episekopo no ta matou paroita i taua taime ra, ua opua maua e faa’ite i te parau apî i to maua noa utuafare, ia vai taui ore noa te mau mea no ta maua mau tamarii rii. I roto i taua na hepetoma ra hou te Noera, ua faahoro vau i te pereoo fatata pauroa te mahana, na roto i te hiona e te to’eto’e, no te rapaauraa i te fare ma’i—na to maua iho na metua vahine e tuahine tei î i te aroha i tauturu i te utuafare. E taime fifi taua taime ra tera râ ia feruri au i taua Noera ra aita ïa e parau tano no te faaite i te hohonuraa o to’u mauruuru no te tusia taraehara a to tatou Faaora, o Iesu Mesia, e « te rave’a aroha a… Tei Hamani ».8
No to’u paha iteraa maitai a’e no te huru paari ore o te oraraa, ua riro te opuaraa no te oaoa a to tatou Metua i te Ao ra ei mana’ona’oraa rahi na’u i na mua’e. E mea taa ê te Noera i taua matahiti ra. Noa’tu to’u here rahi i te mau mea no ni’a i te Noera, te mau mea faufaa rahi a’e o to’u ïa faaipoiporaa mure ore, to’u utuafare, e to’u faaroo e te iteraa papû no to’u Metua i te Ao ra, no Iesu Mesia e te opuaraa.
I te hoê mahana, a faafaaea ai au i te fare, ma te mana’o pe’ape’a no te oraraa no ananahi o ta maua nau tamarii rii e maha, ua hi’o haere au i roto i te ve’a Friend e ua harû to’u mata i te api o te hoê himene. Ua parahi au i mua i te piana e ua ta’i au a himene ai e a ite ai au i te parau poro’i o te himene i te haaputapûraa i to’u aau. Ua ite au e ua ti’a ia’u ia haapii i teie himene eiaha noa i te mau tamarii Paraimere no ta matou Paroita, e arata’i himene au i taua taime ra, te mea hau atu râ i te faufaa rahi, i na tamarii faufaa rahi e ora ra i roto i to maua nei utuafare.
Nahea e nehenehe ai i te Metua ia parau i to te ao no ni’a i te aroha e te here ?
Ua tono mai oia i ta’na Tamaiti, te hoê aiû fanau apî ma te hau e te mo’a.
Nahea e nehenehene ai i te Metua ia faa’ite i to te ao te e’a e ti’a ia tatou ia haere atu ?
Ua tono mai oia i Ta’na tamaiti ia haere apiti e te mau taata i ni’a i te fenua, ia ite tatou i te e’a.
Nahea e nehenehe ai i te Metua ia parau i to te ao no ni’a i te tusia, te pohe ?
Ua tono mai oia i Ta’na tamaiti ia pohe no tatou e ia ti’afaahou ma te aho ora.
Eaha ta te Metua e ani ia tatou ? Eaha ta te mau papa’iraa mo’a e parau nei ?
Ia noaa te faaroo, te ti’aturi, ia ora mai ta’na Tamaiti, ia tauturu ia vetahi ê i roto i to ratou oraraa.
Eaha ta’na e ani nei ? Ia ora mai ta’na ra Tamaiti.9
Ua horo’a mai teie himene faauruhia i te tahi iteraa e nahea e nehenehe ai ia’u ia faaite i to’u Metua i te Ao ra i to’u mauruuru no Ta’na Tamaiti e no Ta’na opuaraa. Ua ite au e, noa’tu eita vau e faati’ahia ia ite mata i ta’u mau tamarii ia paari, mai te mea e taa, e ite, e e haapa’o ratou i te haapiiraa hohonu e te ohie e vai nei i roto i teie himene mo’a, e nehenehe ïa ia ratou ia riro ei mau pĭpĭ mau na Iesu Mesia.
E varua taa ê tei parahi mai i roto i to matou utuafare i taua matahiti ra, o tei haamaitai ia matou i te hau e te here i te tahi e te tahi e ore roa e mo’ehia ia’u. E au ra ia’u ua horo’ahia i ta maua mau tamarii te hoê iteraa taa ê no ni’a i te mau mea mo’a i taua Noera ra. Mai te reira taime, ia ha’uti ana’e ratou i te fanauraa o Iesu e na reira ratou na roto i te tura rahi, ma te maere e te here taa ê o to ratou faito matahiti apî. A tamatahia’i tatou i roto i to tatou oraraa, e au ra te ite nei tatou i te mau faa’iteraa varua, ia feruri e ia haamauruuru ana’e tatou i te horo’araa a to tatou Faaora, o Iesu Mesia, e no te opuaraa hanahana no te faaoraraa a to tatou Metua i te Ao ra.
Ua feruri pinepine au e nahea te taata e nehenehe ai e ora ma te ti’aturiraa ore e tae mai na roto i te iteraa i te opuaraa no te faaoraraa e te ti’araa tumu a te Taraehara a te Faaora i roto i taua opuaraa ra. Te apiti nei au ma te mauruuru i to’u iteraa i te iteraa papû o to tatou peropheta here, te peresideni Thomas S. Monson, tei faa’ite ma te puai : « Oia tei faaora ia tatou tata’itahi mai te pohe hopea ore, te faaite papû nei au e e orometua haapii Oia no te parau mau—ua hau atu râ Oia i te hoê noa orometua haapii. O Oia te hoho’a no te oraraa maitai a’e—ua riro Oia hau atu i te hoê noa hoho’a. O Oia te Taote Rahi—ua hau atu râ Oia i te hoê noa taote. O Oia tei faaora i te ‘mau taata tei mo’e’ o te Faaora ïa no to te Ao, te Tamaiti a te Atua, te Tamaiti Hui Arii no te Hau, tei Mo’a i Iseraela—te Fatu tei Ti’afaahou mai—tei parau mai, ‘O vau nei te matamehai e te hopea ra ; o vau nei hoi oia o te ora nei, o vau nei oia o tei taparahihia ; o vau nei hoi to outou arai i te Metua ra’ [PH&PF 110:4] ».10
A feruri ai tatou i To’na mamae taa-ore-hia no tatou, e mea papû roa e, i roto i na parau oto roa a’e e pae ta te Faaroa i parau o teie ïa : « E haere atoa anei outou ? »11 I te mau taime fifi, e nehenehe ta tatou e ma’iti ia fariu ê atu Ia’na e ia aro tatou ana’e i roto i to tatou mau ati, aore râ e nehenehe ta tatou e ma’iti ia fariu atu Ia’na e i te opuaraa a te Metua ma te ite e, eita tatou e « roohia i te hoê ati, maori râ o tei horomiihia i roto i te oaoa i te Mesia ra ».12 Ta’u pure no tatou tata’itahi maori râ, ia farii ïa tatou i te aniraa a te himene mo’a noera « Mai arue Tatou nei Ia’na » e i to tatou Metua i te Ao ra no Ta’na opuaraa hanahana e te maitai ! I te i’oa o Iesu Mesia, amene.