Ng Llomes e Klengar e ra Beluulechad
Sel kot el bleketakl e kesiokel el cheldechedechel a cherellel a Osobel a ngara ra onegrung el bliongel ra Lukas ra Beches el Renged. Ng tmolech el lomereng el saul a kulchesuar ra bek el taem sel kunguiu el kirel a Josef ma Maria ra lorael el mora Bethelehem, sel longolel a charm, ma cherellel a Rubak el Jesus Kristo, ma re mengkar a sib, ma re anghel lomerek e ra “ungil klumech ma klou el deureng…el mora re bek el chad” (Lukas 2:10).
A Olutel a ebangkelio er chelechal luriul el klebesei a odersii a techetechel a orechudel el cheldechedechal a cherellel a Osobel ra Babier ra Mormon. A cheldechedechak a melutk el kirel tiakid el techetechel a omsodel sel mle kot el Kurismas. Mesel dedak el lomtetab er tial dilubech el tekoi, e ak mengemedaol er kemiu el lomes er kemiu el seluk e ra chelsel a ikal lomeruul e lak ke di morenges e le merkong.
Ak meluluuch ma Chedaol Reng bol ngosukau elmo ousbech a ikal chedaol el lechukl el kirem ma telungalk er kau (mesa 1 Nephi 19:23) e bol mui a rengmiu el melchesuar a ikel lungil el reng el kirel a Kurismas.
Samuel el Lamanite
A cheldecheduch a omuchel e ra beluu ra Zarahemla ra kesai el rrak ruchei e ra le mechell a Osobel. A Samuel el Lamanite a mlei el mlo olsisechakl e ra rechad el kirel a ouchel el reng e ulemlaoch el kirel a Kristo. E msall e kulengit me molasem el lomtab el kmo ke mle teruich a rekim e mle teloi er sel seked lulerrenges e ra profet ra Dios e lomlaoch a blekeradel elmo dubech ra ngar medad el taem.
A Samuel a ulemeketakl el kmo: “Mesang, ak meskemiu a olangch; ng chelsel a eim el rak, e mesang, leng mei a Ngelekel a Dios el molsobel er tirkel mo oumerang er ngii.
“E mesang, tiakid a knguu el meskemiu e lolangch er sel bocha el temel el mei; le mesang, ng morngii a klou el llomes ra babeluades, el kmal klou me sel kesus ruchei ra le mei eng modiak a ilkolk, el kmal limis ma chad a mo rengul eng mellomes.
“Maleuaisei, ng morngii a tal sils ma tal kesus ma lmuut a tara sils, eldi rengud eng di mle tal sils el di mlak a klebesei; e tiakid ea omesang e lolangch. …
“E mesang, leng mo duum a beches el btuuch… ; me tiang meng tara olangch el mesang (Helaman 14:2–5).
Cherellel Osobel
Ea lorael a taem el mong, “ea ikel lulemlaoch a re profet a toutang; e leng mocha muchel el morngii a meklungang e lolangch ma meklou longasireng el bocha lomes a rechad” (3 Nephi 1:4).
Ka momtab e ra eim el rrak el mla ngelakl e kau a locha mla mo teruich ma eim a rekim. Ng sebechem el lungil mtab a ikel lulochel a Samuel sel momes a ikal teletael ra klengar el mngar ngii.
“Engdi te ngarngii a re bebil el mlo melekoi el kmo sel taem a mla ngelakl el kirel a ikel tekoi el mo dubech, el dilung a Samuel, el Lamanite.
“Me te mocha olsiich a rengrir ra re bebil re tir, el melekoi el kmo, Momes e ra taem el mla ngelakl, ma ikel tekingel a Samuel el mla bosech; maleuaisei, a deuil a rengmiu ma klaumerang er kemiu el kirel tial tekoi a di klsuul.
“Meng mlo uaisei el tir a mlo uchul a klou el nglemuu ra chelsel a beluu; e tirkel chad el tir a oumerang a mocha mekngit a rengrir, el bekikl el bol lak el sebechel a ikel mildung el tekoi el mo tmaut.
“Engdi mesang, te di millemolem el di mlak el mesim el kirel sel sils mesel kesus mesel tara sils el ngii a di tal sils eldi ua le mlak a klebesei, me bo lodengei el kmo a klaumerang er tir a dimlak el bol kelsuul.
“Meng mlo uaisei el mlo rengii a sils el kiltmeklii tirkel diak loumerang, el kmo tirkel tir a oumerang a ikel luldelid el tekoi a mo mad eldi le merkmo sel lolangch a mo tmaut, el lulmeketakl er ngii a profet el Samuel. (3 Nephi 1:5–9).
Rodam me a rodos, ng sebeched el telkib elmo metebengar el kmong ua ngerang sel mongiil er sel lolangch el Ngii el mermang e osisiu el taem e ke chelbangel e ra kodall el merael mei el diak el moiit? Ng sebechem kau me ngak el mesisiich e ka de mesim el loumerang, malechub e kede obeteteluut e mo medakt?
E ngii, a mermang, sel lolangch e ra cherellel a Kristo el lulemlaoch er ngii a Samuel. Ma chelsel a ikal betok el longarem ra odelcheklel a klechelid me ke ngeasak el rekim a locha teruich me a eim, e ke mechas a rengum ra sils el mocha ngmelt e di rekak el bol milkolk.
“Ea rechad a mecheserengrir e leng a diak a ilkolk ra le merma klebesei. …
“E te mocha medengei el kmo a Ngelekel a Dios a di kmedung el mei; oi, … a rokui el chad … el mlo imis el mechas a rengrir me tedi milterob el mora chutem. …
“Meng mlo uaisei el mlo diak a ilkolk er sel kesus, engdi bai di mle mellomes el ua le sueleb. E mlo uaisei el sils a liluut el ngmasech e ra tutau, … e tir a mlo medengei el kmo tiakid sel sils el cherellel a Rubak, leng tial lolangch el mla tmaut.
“Meng mlo uaisei, oi, rokui el tekoi, el diak a mo medechel, el lotirakl a tekingir a re profet.
“Meng mlo uaisei el dirrek el beches el btuuch a mlo rengii, lo tirakl a mildung” (3 Nephi 1:15, 17, 19–21)
Sel sils e ra Jesus ra lemechell a sils el silobel a rulmerang el ngarsel beluu ra Merikel. A llomes a mle olangch e ra cherellel a Osobel a bleketakl el lulelsobel er terir.
Kodellel me a Okiis er a Kodall er a Osobel
Chelechang e ka betebengar el mla ngelakl e ra okedei el rrak e kau a mocha okeim a rekim. Ke direk ke sebechem el lungil medengei a ikel losisecheklel a Samuel ma ikel blekeradel el siliseb er ngii ra mngeasek er sera le dubech sel lolangch e ra cherellel a Rubak.
A tara ikel lolangch e ra kodelel a Kristo el lulemlaoch a Samuel sel ledei el klebesei el di le blel milkolk (mesa Helaman 14:27; 3 Nephi 8:3).
“Meng mlo uaisei el mlo rengii a klou e lilkolk el dilkedekii a bebul a beluu el rokir, el kmal mlo klou me tirkel chad el di mlak el bol meterob a milchesaur ersel cheltel a ilkolk;
“Meng mlo diak a llomes, leng tial lilkolk, ka le kandalang, malechub eng olbidel; malechub eng ngobtaut a ngau …, me blol sebechel el morngii a ngidil llomes;
“Meng mlo diak el meues a ngidil llomes, malechub eng ngau, ng telituich, ka le sils, malechub eng buil, malechub eng btuuch, leng kmal mle klou el mengimkumk el lilkolk el melkedek e ra bebul a beluu.
“Meng mlo uaisei el milemolem el el bedul edei el klebesei el dimlak a llomes el meues” (3 Nephi 8:20–23).
Ng locha mle ua ngerang a blo lolchesuar ra ikel ledei el klebesei el diak el betebengii sel lilkolk e solang el telkib el taem, ra le chelludel tirkel kesengil e te eru el telael ma okeim el dart el chad el mla rsel templo ra beluu ra Bountiful? Ng sebechem el mesang tial klemiokel e tmolech el tekoi el Osobel el ngara babeluades el metengelang e melekoi el kmo, “Mesang, Ngak a Jesus Kristo. … Ngak a llomese klengar ra beluulechad”? (3 Nephi 11:10–11; smisichii omesodel).
Ng omtutek el kirel tial cheldebechel el mlara templo, a erung e ra ikel kot el tekoi el Osobel a ulesbech el lolcholt er Ngii a mle “ng llomes”. A Samuel a ulemlaoch e ra olangch el llomes. A olangch e ra llomes a mlocholt ra le mechell a Osobel. Me tirkel chad el mla rsel klou el cheldebechel, a mekngit el lilkolk ma dakt a ririid leng ngulkiu sel meral llomes, el ngii a Jesus Kristo.
Sel cheldecheduch e ra kot el Kurismas ra Babier ra Mormon a ngosukid el subii e lmuut elmo medengei el kmo Jesus Kristo a “llomes el kmard e ra ilkolk” (mesa D&C 10:57–61). Ng bek el bekesed e ra klengar, ma rokui el teletael, el de siseb er ngii, ma ikel longarm el de chebangel, eng Jesus Kristo ea llomes el lotngakl a dekted, e kilou a rengud e sumecheklid, e meskid a budech ma deurreng el mora ulebongel.
Ng betok el diak ke dobes e melmolem el luldelid el tekoi e ra Kurismas a uldimukl ra kakerous el llomes—llomes el ngara kerrekar, llomes e ra chelsel ma bebul a blid, ma kandalang ra bebul a tebeled. Bol sebechel a ikel klebokel el llomes el dousbech e ra bek el temel a ikal tokubets el sils lomeklatk er kid er Ngii el ngii a uchul a llomes e ra rokui el tekoi.
E di mellomes a ikel milkolk el rael
Er sel diak el ngemed el Llomes.
Le ikel lurungulled ma dakt ra irechar el mei
A di moungil lokiu a Jesus Kristo er chelechal kesus.
(“O Little Town of Bethlehem,” Chelitakl, no. 208).
A kuchais el kmo a Jesus a milechell e ra Bethlehem, el mlo mesisiich el kiltmeklii a ngerchelel er tial klengar ma omesiungel, e sel ngerchelel el mla mekiis el Rubak er kid, Ngii a ngar er chelechang. Ak melekoi er tiang loba chedaol el ngklel a Jesus Kristo, amen.