Aua E te Mata’u, Tau Lava Ina E Faatuatua

Elder Jeffrey R. Holland

O Le Korama a Aposetolo e Toasefululua

O Se Faasauga ma Elder Jeffrey R. Holland Saunoaga i Faiaoga Faalelotu o le OAE • 6 Fepuari, 2015 • Tapeneko i Sate Leki

Au uo pele i le Ofisa o Aoga a le Ekalesia, faafetai atu mo lenei avanoa e faatasi ai ma outou. O le mea moni o lea ua ou toe foi mai i le aiga. “E foliga mai o se taimi ua leva lava i se nofoaga e mamao lava,”¹ Sa ou amata ai i le mea sa ou manatu o le a avea ma se matata o le olaga atoa i le Ofisa o Aoga a le Ekalesia. Ae sa fai mai se tasi, “Afai e te fia manao e soisoi le Tama Faalelagi, tau atu ia te ia au fuafuaga.” O a’u fuafuaga—ma na o le pau ia o fuafuaga moni faalegaluega sa ou mauaina—ia avea au ma se faiaoga o le OAE, ia le aluese lava mai se potuaoga o aoaoga faalelotu, ma ia ou oti lava o uuina se penisioka i lo’u lima. Ou te fiafia e faapea atu sa ou maua ni nai tausaga i totonu o le potuaoga, ae sa taumafai pea le Usoga ia tuu lo’u faaleagamea e ala i le toso ese mai o au mai le potuaoga. I soo se tulaga lava, faamolemole ia iloa o loo ou lagonaina pea le avea ai ma se tasi o outou, ma ou te mitamita tele i mea o loo outou faia mo le autalavou ma talavou matutua o le Ekalesia, ma ou te faafetai tele mo faamanuiaga na ma mauaina ma Pat a o tatou faatasi ai i le OAE—ma ua ou iloa o loo ou talanoa atu i tua atu o le Tapeneko i le Aai o Sate Leki i lenei po i se aofia i le lalolagi. Oka, le tuputupu ae o lenei faatulagaga. O loo ma lagonaina pea o loo ma “faatasi ma outou” — sosoo tauau ma outou— i lenei galuega silisili i galuega uma.

I le agaga o lena mea, ou te fia faaaluina foi sina taimi e faafetai atu ai i le faatupulaia pea o le aofai o outou o loo taliaina valaauga e auauna atu i le OAE i le tele o auala ma le tele o vaega o le lalolagi. O faiaoga, supavaisa, faufautua faalepulega, tagata lagolago o ituaiga uma ua faamanuiaina ai nei a tatou seminare, inisitituti, aoga a le Ekalesia, ma faalapotopotoga o aoga maualuluga atu. Masalo e leai ma se tasi o na vaega e onomea i ai lo tatou maofa ma le talisapaia e sili atu i lo faiaoga o seminare i le vaveao. Uo pele, o loo i ai se nofoalii faapitoa i le lagi mo outou! O lea tausaga ma lea tausaga (ma le anoanoai o tausaga mo nisi o outou!) tou te sauniuni ai i le po, seti le faailo taimi mo le taeao, tau ita pe a tatagi, ona sosoo lea, a le o le tietie atu i se nofoaga i le pogisa ia po o le faafeiloai i lou potu malolo o tamaiti aoga e lei selua lelei ulu ma sauni mo le vasega. O se galuega paia o loo outou faia ma o se talita o le faatuatua o loo outou tuu atu faatasi ma e na muamua atu i le lua-vaetolu o se seneturi o tamaiti aoga i le vaveao. Ma e le manatu faatauvaa lava i mea o loo faalogo i ai ma lagonaina e na tamaiti aoga, e ui lava i foliga vaaia. Ia outou manuia ma ia manuia na tamaiti aoga mo se tasi o faataitaiga ofoofogia o le tuuto o loo faaalia i totonu o lenei Ekalesia—o se polokalama o loo faagaeetiaina ai pea lava taitai ma matua o isi tapuaiga o loo iloaina. Ae le o le mea lea o loo o’u fia talanoa atu ai. Ou te faafetai atu ia te outou uma, po o fea lava o outou i ai—totogi pe volenitia, tulaga lua po o le kolisi, ma oo atu i lalo i vasega i aoga amata lea o loo tatou maua ai le toalaiti o i latou.

Sei onosai mai lava mo le tasi faamamaluga taua tele lenei. Ou te faafetai faapitoa atu i taitoalua o loo tatou faatasi i lenei faatasiga, ana le seanoa ma outou e le manuia le Ofisa o Aoga a le Ekalesia. O loo tauivi Sister Holland ma se ma’i ogaoga tele ma o loo faasolosolo manuia, o le mea lea e le o mafai ai ona tatou faatasi ma ia i lenei po, ae masalo ua talafeagai atu ai ona faamamalu ia te ia ma isi uma taitoalua. Ou te iloa o se tala masani, “Ou te leiloa po o fea o o’u i ai i lenei po pe ana leai o ia,” ae i soo se tulaga lava, e moni a’ia’i lena mea i le mavae ai o le silia ma le 50 tausaga o lana taitaiga, alofa, ma faatosinaga faifai pea ia te au ma faaiuga taua ua ma faia faatasi, e aofia ai le faaiuga e faiaoga i le Ofisa o Aoga a le Ekalesia. Ou te faapea atu e uiga ia te ia le tala a Mark Twain na fai e lana Atamu e uiga ia Eva: “[Po o fea lava] sa i ai o ia, sa i ai [le parataiso].”²

O lea, āva—ma tane i tulaga e faatatau i ai—faafetai atu mo lo outou tuuto, o tou osigataulaga, tou faataitaiga, ma lo outou faatuatua. Tane—ma āva i tulaga e faatatau i ai—aua nei faatalitali seia atoa tou tai 74 tausaga ma lauga i se aufaigaluega a le OAE e faafetai ai i lau manamea mo le faafaigofieina o se olaga faamanuiaina. Ia lelei le tasi i le isi, ia fiafia faatasi, ma ia loto faafetai mo se auala tauia ua gafataulimaina ai le olaga.

A o tulalata i lenei tofiga i le po nei, sa ou fesili atu ai ia Elder Paul Johnson ma Brother Chad Webb ia valaaulia nisi o outou e tuuina mai ni fesili pe faailoa mai ni faafitauli e fai ma auala ia ou iloa ai le mea o loo i o outou mafaufau. Ina ua oo mai faamatalaga sa faateia lava au i le ta’ua soo ai o le mataupu o le fefe po o le popole po o le lē toafimalie—ae tele lava o le fefe ma le popole o tamaiti aoga, ae o nisi taimi o lo outou lē toafimalie sa faailoa mai i se isi itu po o le isi itu. O lea ala i le avea ai ma se autu o lenei po, ua ou faatulagaina ai la’u lauga i se mea na tupu i le soifuaga o Gordon B. Hinckley. Tou te manatua uma lava. Masalo sa outou faasoaina atu i tou tamaiti aoga.

Ina ua oo i le vaitausaga faamisiona o le taulealea o Elder Hinckley i le loloto o le pa’u o le tamaoaiga i le vaitau o le 1930, sa oo ai le lalolagi i le mala paga o mea tautupe, o le leai o ni galuega sa oso tu i luga i le 35 pasene, ma sa toalaiti faifeautalai sa ō e talai. O le taulealea o Gordon, sa maea lana faailoga o le tagata malaga, sa matua naunau lava ia auai i le aoga faauu ma sue se galuega e ola ai. Sa lei leva ona maliu atu lona tina; sa tuuatoatasi lona tama, ma feagai ai ma faigata tautamaoaiga o lena vaitaimi.

I le lotolotoi ai o nei popolega, sa maua ai e Gordon se valaauga o le misiona i Egelani—i le taimi sa sili ai ona taugata le misiona i le lalolagi, e le faatusalia i fuafuaga o i ai i le taimi nei. A o ia sauniuni e malaga ese, faatasi ai ma nei lagona uma ma faafitauli o loo fotu mai ua atugalu i ai, sa tuu atu filemu ai e lona tama pele, o Bryant S. Hinckley, ia te ia se kata sa tusia ai ni upu se iva: “Aua e te mata’u, tau lava ina e faatuatua.”³

Ou te le mautinoa pe aisea ua ou aafia tele ai i lena tamai tala, ae e moni lava. O lea, faatasi ai ma lena fautuaga maoti mai i le Mareko 5:36 e fai ma auivi, ou te talosagaina outou ma tou tamaiti aoga ina ia “aua e te matau, tau lava ina e faatuatua.”⁴ Faatasi ai ma se talitonuga le femoumouai i le Atua, ou te talosagaina ai outou ia i ai atoa le talitonuga ia te outou lava ma fausia le talitonuga atoa i tou tamaiti aoga e ala i le aoao atu faatasi ma le talitonuga ma le faamoemoe o le talalelei a Iesu Keriso o le upumoni sili lea ona mautinoa, sili ona malupuipuia, sili ona faatuatuaina, ma sili ona tauia i le lalolagi ma le lagi, i le olaga nei ma le faavavau. Ou te talosagaina outou ia aoao atu e faapea e leai lava se mea—leai soo se mea, leai soo se tasi, leai soo se faatosinaga—o le a taofia lenei Ekalesia mai le faataunuuina o lana misiona ma le iloaina o lona taunuuga na folafola mai a o lei faavaeina le lalolagi. O la tatou tisipenisione o le tisipenisione le mafaatoilaloina, lemataofia, lemafaatamaiaina o le atoagao le talalelei. E le manaomia e a tatou talavou ona fefefe pe le mautonu e uiga i le lumanai. O le mea e ao ona latou faia o le talitonu ma tulai ae ia faaaoga uma aso ofoofogia o loo tatou ola ai.

O le malosiaga lea na amata mai i se togavao i le setete o Niu Ioka i le lua seneturi talu ai o le a faaauau pea ona faataavale atu i luma ma le le masuia ma lē mafaafitia — le maa a Tanielu sa tofia mai le mauga e aunoa ma lima.⁵ O lena malo faatusitusiga paia o le a faatoilaloina [malo uma], ma o le a manumalo. E le pei o isi uma vaitaimi na muamua atu ia i tatou, o lenei tisipenisione o le a le oo i se liliuese tele; o le a levaaia se leiloa o ki o le perisitua; o le a le mafatia i se motusia o faaaliga mai le siufofoga o le Atua Silisili Ese. O le a liliuese tagata taitoatasi pe liliu ese foi se taliga tuli i le lagi, ae o le a le toe faapena lava le tisipenisione atoa. E maeu sea manatu mausali! E maeu lenei aso e ola ai! O se auala maeu lea e aveesea ai le fefe ma le lotovaivai.

E leitioa aoao mai le Perofeta o Iosefa e faapea o perofeta uma, ositaulaga, ma tupu i vaitausaga uma “e tulimatai atu lava ma le faamoemoe fiafia i le aso o loo tatou ola ai; ma musuia i faamoemoega faalelagi ma le olioli ua latou lagiina ma tusia ma valoiaina e uiga i o tatou aso; … o i tatou o tagata filifilia ua filifilia e le Atua ia aumaia le mamalu o Aso e Gata ai.”⁶

Ou te fiafia i lena folafolaga lea masalo ua taua e faiaoga uma o le OAE. Atonu ua outou siiina atu i a outou tamaiti aoga. Talosia. E “musuia” au “i faamoemoega faalelagi ma le olioli.” E faalotomaualaloina foi au o lo tatou tisipenisione o le tisipenisione lea ua filifilia e le Atua na te aumaia lena “mamalu o Aso e Gata ai”⁷ o loo ta’ua. Ua tele naua mea ua i luga o o tatou tauau, ae o le a avea ma se aafiaga mamalu. Afai e i ai soo se tasi o au tamaiti aoga e le atuatuvale, pe o oe foi o loo atuatuvale, ia toe faamautinoa atoa o le manumalo i lenei tauvaga faaiu ua uma ona folafola mai. O le manumalo ua uma lava ona i ai i totonu o tusi faamaumau—o tusi nei, o tusitusiga paia!

Ua tatou iloa ma le mautinoa afai e faatoilaloina pe faaumatiaina isi mea uma i aso e gata ai; afai e olopalaina malo, tamaoaiga, pisinisi, ma faalapotopotoga; afai e oo ina lamatia ma lē mautu malo ma aganuu, ae, e ala atu i ia mea uma o le a tu manumalo ma lē faaleagaina i le aao o le Atua le talalelei a Iesu Keriso ma Le Ekalesia a Iesu Keriso o le Au Paia o Aso e Gata Ai o loo tauaveina lea mea i le lalolagi, seia toe afio mai le Alo moni o le Atua Lava Ia e pule ma nofotupu o le Alii o Alii ma Tupu o Tupu. E leai se isi mea e sili atu ona mautonu. E leai se mea e sili atu ona mautinoa. E leai se isi vaifofo e sili atu mo le popole. E pei ona tautino mai le Perofeta o Iosefa, ma e pei ona taua ma le naunautai se tupulaga o faifeautalai: O le upumoni o le Atua o le a tafia ai atunuu uma, ma lagonaina i taliga uma. E leai se lima eleelea e mafai ona taofia mai le alualu i luma.⁸ O loo moni pea lea mea.

I le avea ai ma se faatomuaga i faaaliga o o tatou aso, sa fetalai ai ma le sa’olele le Alii e faapea:

“O nei poloaiga … ua moni ma faamaoni i latou, ma o le a faataunuuina lava valoaga ma folafolaga uma ua i totonu o i latou .

“O le mea ua fai atu ai A’u o le Alii ua Ou fai atu ai, ma Ou te le faatoese mai ai a’u lava ia; ma e ui ina mavae atu le lagi ma le lalolagi , e le mavae atu lava la’u upu,, ae o le a faataunuuina uma lava . …

“Aua faauta, ma tagai, o le Alii o le Atua lea, … ma e mau le upumoni e faavavau ma faavavau lava.”⁹

Ma afai e i ai ni faafitauli i luga o le ala a o faatalitali ia vaaia folafolaga uma ua tausia ma valoaga uma ua faataunuuina, ia faapena lava. E pei ona tusia e Eliza R. Snow ofoofogia:

E a, pe a e maua manuia o Amani,
Ae inosia pea oe e le lalolagi nei?
O faatali mai agelu e pale oe i manuia;
Tumau ua tonu o folafolaga;
Tumau ua tonu o folafolaga.”10

E tafiesea e le agaga le fefe e pei ona faia i taimi uma e le pelu o le upumoni e faataumaai uma itu e lua.¹¹

O lea, afai e te lei matauina lava, ou te lototele lava i aso e gata ai. E leai se mea e sili atu ona ou faatuatua i ai i lo le Atua le Tama Faavavau; ia Iesu Keriso; i le la talalelei togiola; ma i le la Ekalesia ua taialaina mai le lagi. O lea, o le a se mea o tatou nofoaitalafu ai i a tatou tamaiti aoga i lenei mea? Ua tatou nofoaitalafu ia i latou i se molimau faatusatusa ma se olaga “o le fiafia.”¹² Sa fesili le Faaola mo lena mea i le tele o taimi lea ou te mafaufau i ai o se poloaiga. Peitai, o le popole po o le fefe, masalosalo po o le atuatuvale e mafai ona faaumatiaina le fiafia o tagata uma—lou fiafia ma le fiafia o tagata o siomiaina oe. O lea ia tuu atu se ataata i ou foliga, ma faamemelo i aso uma o lou olaga! Mafaufau i lenei mea mai lena faifeautalai talavou ma le le fefe i le tele o loo talanoa atu nei mai le tulaga o le tele ma le tele o isi tausaga o aafiaga:

Peresitene Gordon B. Hinckley: “Ia aua nei o tatou fefefe. O Iesu o lo tatou taitai, lo tatou malosi, ma lo tatou tupu.

“O se vaitau lenei o le masalosalo. O la tatou misiona o le misiona o le faatuatua. I ou uso ma tuafafine i soo se mea, Ou te valaau atu ia te outou ia toe faamautu lo outou faatuatua, ia tulei i luma lenei galuega i le lalolagi atoa. E mafai ona outou faamalosia atili e ala i amioga o loo outou ola ai. Ia avea le talalelei ma a outou pelu ma tou talita. O i tatou taitoatasi o se vaega o galuega sili ona maoae i le lalolagi.”¹³

“O le a se mea o tatou faalogoina i le talalelei ua tatou mauaina?” sa fesili ai le Perofeta o Iosefa. Ona ia tali mai lea: “[Tatou te faalogoina] se siufofoga o le fiafia! … tala fiafia o mea lelei. …

“… Ia olioli o outou loto,” na ia saunoa mai ai, “ma ia matua fiafia.”¹⁴

Sei o’u lisi atua nisi o mea patino e tatau ona outou aoao atu i a outou tamaiti aoga ia fiafia ai ma tatau ai ona taofia le fefe. Ou te mataua, mo se faataitaiga, le faaipoipo, faia o aiga, ma le aumaia o fanau i le lalolagi. O i matou i aufono pulefaamalumalu o le Ekalesia e tele lava ina faalogoina—ma e masalo tou te faalogo foi i ai—o le toatele o a tatou talavou ma talavou matutua ua matua fefefe lava e faaipoipo. I tulaga ogaoga ua latou fefefe e faapea ua toeitiiti faaumatiaina le lalolagi i taua ma faalavelave—o se mea latou te le mananao e taitai atu i ai se toalua po o se tamaitiiti. I ni tulaga e itiiti ifo le ogaoga ma sili ona taatele, o loo latou fefefe o le a faateleina pea ona faigata le lalolagi, o le a faigata atu ona maua ni galuega, ma o le tasi e tatau ona uma le aoga, leai ni aitalafu, maua se galuega, ma umia se fale a o lei mafaufau e faaipoipo.

Oka! I lena tulaga semanu faapenei ma te lei faaipoipo lava ma Sister Holland! O le mea moni, ina ua ma faaipoipo ma te lei faauu uma i le BYU, faatasi ai ma le le mafai e o ma matua uma ona fesoasoani ia i maua i mea tautupe, sa leai ma se auala e mafaufauina ai le faauu mai le aoga sa i o ma luma atu, ma o lenei mea faatasi ma le ma $300 tala i le aso o le ma faaipoipoga! Ia atonu e le o se auala sili lea e amata ai se faaipoipoga, ae o se faaipoipoga matagofie ma le mea semanu ma te misia pe ana fai ma te faatalitali i se isi aso se tasi nai lo le aso lea na ma iloaina ai lava ua sa’o. E mautinoa lava, sa i ai le osigataulaga; e mautinoa lava, sa i ai aso, ma vaiaso ma masina na le maua ai se malolo; mautinoa lava, sa faigaluega e tau i le vaeluapo. Ae ou te gatete pe a mafaufau i le mea semanu ma te ma’umauina pe ana fai ma te faaaogaina “fautuaga mai lo ma fefefe,”¹⁵ e pei ona tau mai e Peresitene James E. Faust i se taimi mulimuli ane e le tatau lava ona ou faia pe faia lava e se tasi. Ae faapefea pe ana ma faatuai i se taimi umi atu? O le a se mea semanu ma te misia?

Ou te manatu pea o le faauigaga sili atu o le alofa faaleulugalii o le faauigaga a James Thurber, lea sa fai mai, “O le alofa o le mea lea lua te oo faatasi i ai.”¹⁶ O le a ou faafetai pea e faavavau mo mea sa loto Pat e oo i ai faatasi ma au—lea sa ia lei lagonaina ai sa ao ina maua so’u faailoga ma se taavale ma se fale ma se galuega i le taimi lava e tasi a o lei ma faaipoipo.

Ma sa ma mananao i se fanau i le vave ma te mafaia ai, lea i lo ma tulaga sa lei faigofie e pei ona sa ma mafaufauina. O le mea moni, ana faapea ma te lei naunau e fai lo ma aiga i le vave na ma mafaia ai, semanu faapenei o i maua o se ulugalii e leai se fanau, e pei o nisi o a ma uo ma nisi o outou, e le o sa outou mea sese, ua tou oo ai i se tulaga faapena i o outou olaga. E tolu lelei tausaga faatoa maua le ma tamaitiiti muamua, o le isi tolu tausaga faatoa maua le lona lua, ma le fa tausaga faatoa maua le lona tolu. Ona pau ai lea. Sa fafano le ma tamaitiiti lona fa ma tapunia ai lena faitotoa ia i maua e faavavau, o lea ua ma fiafia ai lava i le fanau e toatolu ua mafai ona ma tausia. Ae faamata e faape’i lo ma olaga pe ana fai sa ma faatalitali pe faatuai pe soona popolevale foi i le tamaoaiga o ia mea uma? O ai o le ma fanau semanu e le faamanuiaina ai i maua? O a ni manatuaga po o le alofa po o lesona faatasi ma i latou taitoatasi semanu ma te misia? Ou te gatete pe a mafaufau i ai.

Uso e ma tuafafine, ou te manatu e ao ona tatou vave amata aoao a tatou tamaiti aoga i le nofoaga o le faaipoipoga ma le aiga i le fuafuaga sili o le fiafia. O le faatalitali seia oo i le vaitausaga e ono faaipoipo ai e tuu ai tatou i se mea mamao lava i tua o le laina. Ma ou te le tau ta’u atu ia te outou o tifiga faaleagafesootai, faaitiitia o tulaga faatonuina o le amio mama, ma “mafaufauga le aogā”¹⁷o faafiafiaga lauiloa o le a i ai pea e faatautee mai i lena aoaoga.

Mo se faataitaiga, e faateia i tatou i le 50 tausaga talu ai o le tausaga masani mo alii e faaipoipo ai ua siitia mai le 22 i le 28 tausaga! O fuainumera na a le lalolagi, ae le o le Ekalesia, ae ua iu lava ina tatou mulimuli atu i le lalolagi i le tele o ana tifiga faaleagafesootai. E faaopoopo atu i nei faatosinaga eseese i le autalavou a o faateleina avanoa o le fuafuaina o fanau, le faatupulaia o le faatamaiaga o le ola mama e ponokalafi, faateleina o le motusia o fesootaiga ma aoaoga faalelotu, o le sailiga lautele o mea faalelalolagi, o le faatupulaia o manatu faaonapo nei ma ona masalosaloga ma le faailogalanu ma tou te vaaia le tino mai o le popole ma le fefe e mafai ona lagonaina e le tupulaga faiae. Faatasi ai ma nei ituaiga o matagi o loo agi atu i o latou olaga, e mafai ona faatamaia ai i latou a o lei amatalia le olaga faatagata matua faaipoipo.

Ma le isi, ua toatele naua tagata talavou ou te talanoa i ai e fefefe faapea afai latou te faaipoipo o le a iu lava foi ina tete’a, o le isi tagata e ulu atu i le faaipoipoga ae iloa ai e le o se mea lena mo ia. O ulugalii e masalosalo i le manuia o faaipoipoga i le le amio mama, uiga masoa, ma tele lava ina taufaifai faatiapolo i le ola mama, faamaoni a’ia’i i le toalua ma le olaga faaleaiga ia ua masani lava ona faaali mai i tifaga ma televise ma ua outou vaaia le faafitauli.

O le a matua faigata lava mo i tatou ona faasāo ma faaauau pea le paia ma le fiafia o le faaipoipoga. E mafai ona outou amata e ala i le faaalia o faamanuiaga, o taui, ma le moni o se faaipoipoga fiafia i o outou lava olaga. E le faapea la e tatau lava ia te oe ona fiafia i le faaipoipoga e ui lava i faafitauli; o faaipoipoga uma e manaomia ai le galue, ma ia faapena foi outou. Ae, e pei lava o taimi uma, o au lesona muamua ma sili ona ulufiaina e avatu i au tamaiti aoga o lesona o lou lava olaga. E te faaali atu i upu ma galuega o lau faaipoipoga ma le aiga o mea uma ia ia te oe ona e tatau ai—e tatau lava. Fesoasoani i au tamaiti aoga ia “aua [le] matau, tau lava ina … talitonu”¹⁸i le faaipoipoga ma aiga i nei aso e gata ai. O le a matuai faafaigata e Lusifelo ona faia lena mea e ui lava ina faasolo avea atili ma mea sili ona taua e fai.

O nisi o outou sa faaali mai manatu e uiga i isi faafitauli faigata o nei aso—faafitauli o loo aumaia isi ituaiga o fefe, ma luitauina ai le talitonuga o o tatou talavou i ni auala maaleale i nisi taimi. Na faaupu e se tasi o outou i le ala lenei: “Ua faasolo faigata atu ona aoao le aoaoga faavae o le Ekalesia e aunoa ma le faatiga i tamaiti aoga o e ua soona taliaina manatu o le lalolagi. E faapefea ona tatou tumau faamaoni i le aoaoga faavae e aunoa ma le faatiga i a tatou tamaiti aoga?”

Mea muamua lava ou te faapea atu o le faatiga e pei e sau i le aualatatou te tuu atu ai le aoaoga faavae nai lo le aoaoga faavae lava ia. E le fou la tatou aoaoga faavae; e le faapea ua le o iloa atoatoa e tamaiti aoga lo tatou tulaga o le a oo i ai toetoe lava o solitulafono taatele uma e oo mai. O lea la o le mea e ao ona faia e se faiaoga atamai ma mataala po o se taitai po o se matua o le mautinoa lea, o lo tatou naunautaiga ia amiotonu e le faaalia o se faafiaamiotonu ona o le a vave lava ona vaaia e tamaiti aoga le eseesega. O le mafuaaga lena ou te fai atu ai o a tatou amioga, a tatou metotia, o tatou uiga ma le faanaunautaiga, o le taimi lava e malamalama i ai o tatou tamaiti aoga, o le a faatagaina ai i tatou ia tuu sao atu ma ia mausali e pei ona tatou tatau ai i le folafolaina o poloaiga a le Atua.

Ma le isi, ou te fai atu ia te outou ia le faatuai lava ona aoao atu aoaoga faavae moni ma le faigofie ona e te fefe ina nei e faatiga i se tasi. E pei ona tautino mai le vaega 50 o le Mataupu Faavae ma Feagaiga, afai tatou te aoao atu le upumoni e ala i le Agaga ma maua e tamaiti aoga le upu e ala i le Agaga, “o ia o le e talai atu atoa ma ia o le e mauaina, e malamalama i le tasi, ma e faagaeetiaina ma olioli faatasi i laua uma.”¹⁹

I sea faafesuiaiga atonu ua outou faafofoga o faapea mai tamaiti aoga i mea na ou faalogo o latou fai mai ai, “Ou te iloa le auala e tatau ona ola ai, ae faamata e ao ona tatou faamalosia lena tulaga faatonuina po o lena amio po o na talitonuga i isi?” Ma o le mea moni o le tali i lena fesili o le, “Leai, tatou te le faamalosia ni tulaga faatonuina po o se amio po o ni talitonuga i soo se tasi.” Ae o lenei Ekalesia, ma i le avea ai o ni faiaoga i le ekalesia, ua i lalo o le feagaiga e aoao atu tulaga faatonuina o le amio, e faailoga ai le ala mautinoa, e faailoa ai le auala saogalemu, e faatu ae ai se tagavai o le upumoni i malo.

E manatua e faiaoga uma i lenei aofia le tala logologoa o Brother Karl G. Maeser na aveina se vaega o faifeautalai i se Atumauga i le mulimulitaia o se seti o fasilaau masani na faatutu i vaega taua i luga o le auala, na faailoga ai le ala o le saogalemu. O fasilaau sa le o ni vaaiga mataina—sa le tutusa uma, o nisi ua pala ma leaga, e leai ma se laau e fia talanoa ai se isi pe a oo i le fale—ae o lo latou faatutuūga, o le auala na latou faailogaina ma le sāvali leleoa na faafesootaia e o latou foliga o le eseesega lena i le va o le ola ma le oti. O le lesona i lena aso a Maeser e faapea o nei fasilaau sa pei lava o le Usoga pulefaamalumalu o le Ekalesia—o nisi e uumi, o nisi e pupuu, e le mata’ina uma pe a faatusatusa i se tauvaga lalelei—ae o le mulimuli ai i lo latou auala o le mulimuli lea i le ala o le saogalemu.²⁰ O lo’u manatu i le po nei o le mea lenei o loo faia moni e le aoaoga faavae mo i tatou, i le aso atoa, i aso uma (le mea lea e aoao mai e le Usoga). E ao i se tasi ona totoina na pou o taiala o aoaoga faavae. E ao ona fai mai se tasi, “O le upumoni lenei, ma o le saogalemu lenei.” E ao i se tasi ona taialaina le ala mo i latou o loo malaga i ala vaapiapi, ma tele ina lamatia, masalo mo le taimi muamua, e pei ona faia e le toatele o a tatou tamaiti aoga i aoga maualuluga ma kolisi. I Le Ekalesia a Iesu Keriso o le Au Paia o Aso e Gata Ai, ua tulagaese lava outou i lo “isi tagata” ua talosagaina e le Atua ia faailoga le ala o le faaolataga.

O lea, e tatau lava ona tatou faasoa atua ma le atamai ma le agaalofa i se tamaitiiti toatasi, po o le malo atoa lena auala o le saogalemu, lea i nisi taimi e faavaapiapiina le auala o le upumoni, lena faavae mautu ma le fuativae mausali lea afai latou te tutu ai e le mafai ona latou pauu. Ma e le mafai e se tamaitiiti aoga ona tu i luga o sea eleele mautinoa pe afai na te le o iloaina po o fea e maua ai, ma e le mafai ona latou iloaina le mea o i ai vagana ua tautino atu e matua, taitai, ma faiaoga e pei o outou ma au, taitai atu i latou i ai, ma savalia lena ala ma i latou.

O se faavae mautu? O le ala mautinoa? “O luga lava o le papa o lo tatou Togiola, o Keriso lea, le Alo o le Atua”²¹ e tatau ona atiae ai i tatou uma taitoatasi, talavou pe matutua foi. Aisea? O le a le taunuuga? “Ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te [outou] [ma a outou tamaiti aoga ma tou malo ma o outou lava faamoemoega ma miti, o ia, o le tiapolo], o le a leai sona mana i luga o [outou] e toso ifo ai [outou] i lalo i le to o le pagatia ma le malaia e le gata, ona o le papa lea ua [outou] atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”²²

O lena malosiaga ua lagolagoina ai lo tatou tulaga i fesili uma e uiga i aoaoga faavae, talafaasolopito, po o faiga masani a le Ekalesia ia e mafai ma e tele lava ina aliae a o faataunuu le galuega. Ua outou faafofoga i na fesili. E le fou. Na muamua lava aliae i le nuu o Palamaira ina ua muai lipotia e Iosefa e 14 tausaga le matua lana faaaliga faalelagi, ma o loo faaauau ai pea i ituaiga eseese e oo mai i le taimi nei. Talu ai nei na matou talanoaina ai le tele o na faafitauli i se soloaiga o talatusi, ma talosagaina ai ia sa’o lelei ma lē faaituau i totonu o le auivi o le faatuatua. E le o fesili uma o le talalelei e i ai ni tali—ae—o le a oo mai lava.

Ae i le taimi nei, e i ai sa’u fesili. O le a se faafitauli faigofie faasolopito pe faaleaoaoga faavae pe ua masani ai e ono aliae ma mafai ona taotaomia pe feteenai ma se talitonuga maumaututu faaleagaga o se tasi e tusa ma le fuafuaga alofa mutimutivale o le faaolataga a le Tama; o le soifua mai, misiona, Togiola, ma le Toetu o Lona Alo e Toatasi na Fanaua; le moni aiai o le Uluai Faaaliga; le toefuataiga o le perisitua; o le taliaina o faaaliga faalelagi, i tulaga uma faaletagata lava ia ma faavaega; le agaga e suia loto ma le mana faagaeetia o le Tusi a Mamona; le maofa ma le mamalu o le faaeega paia o le malumalu; aafiaga faaletagata lava ia i vavega moni; ma isi uma mea faapena? O se mealilo ia te au o le mafai lea ona tuuese e nisi pe aveesea atoa na upumoni mamalu ma faavavau o le tulaga silisili ia e tutotonu i le mamalu silisili o le savaliatoa o le talalelei, ona e fiafia e faananau i fasimea o vaega lona lua-po o le tolu-po o le lona fa o lena mea atoa. Ia te au, o le mea lenei sa faamatalaina e Edith Wharton, o le saisaitia i “le mafiafia o mea manifinifi.”

Ou te faamamaluina ma le naunautai fesili faamaoni a le toatele e matuai faamaoni atoatoa i le loto. Ou te faamamaluina foi ma le naunautai o loo i ai i tagata uma ni nai fesili o le talalelei po o isi foi fesili e lei taliina. Ae ui i lea, matou te faamoemoe, mo ē le talitonu, o ē talitonu, ma ma tagata uma e i le va, e faapea o le lotomaualalo, faatuatua, ma le faatosinaga a le Agaga Paia o le a avea pea ma elemene o sailiga uma mo le upumoni, ma o le a avea pea upumoni faavae ma vaega e faasino i ai lena sailiga, ma o isi uma faafitauli o loo manaomia ona foiaina ia taulimaina “e ala lava lea i le suesue ma le faatuatua foi.”²³ I le faaiuga o le aso, e tatau ia i tatou uma ona iloa le eseesega i le va o elemene tetele atu ma laiti ifo o a latou molimau. Mo au lava o poutu tetelē atu ua aofia ai na upumoni mamalu na taua i le taimi ua fano, lo latou totonugalemu lemasuia i lo’u olaga, ma le iloaina e le faigofie ona ou ola, e le mafai ona ola pea e aunoa ma na mea pe aunoa foi ma faamanuiaga ua ou iloaina pe aunoa ma folafolaga ua tatou maua uma i Le Ekalesia a Iesu Keriso o le Au Paia o Aso e Gata Ai.

O lea la, a o tatou talanoa i fesili, tusi i lalo le tasi lea mai le Aposetolo o Paulo i luga o le laupapa o lou mafaufau ma tāmau ai i loto o au tamaiti aoga: “A faapefea? Afai ua le faamaoni nisi, pe faaleaogaina ea le faamaoni o le Atua i lo latou le faamaoni?²⁴ O le tali i lena fesili o le “Leai!” E le i ai i lo’u olaga! E le i ai i lou olaga atoa! E le mo au ma lou aiga! E le mafai ma o le a le mafai lava e se lē talitonu o se tasi—ona—“faaleaogaina” lo’u faatuatua i le Atua, lo’u alofa ia Keriso, lo’u tuuto i lenei Ekalesia ma lenei galuega o aso e gata ai. O le moni o lenei galuega i aso e gata ai “e aoga,” ma o le a tumau pea “le aoga” e tusa ai ma le susulu o le la ma le tafe atu o vaitafe i le sami, ma faavavau ai lava. Aua nei misia na faamanuiaga!

I le taua ai o lena mea, ou te faaopoopo atu le molimau a lena tamaitiiti aoga inisitituti talavou o le vaitausaga o le kolisi na soifua ae ma avea ma Peresitene o le Ekalesia ua tatou ta’ua, sosoo ai ma le molimau a le tamalii ofoofogia na suitulaga ia te ia, la tatou Peresitene pele o Thomas S. Monson.

Peresitene Gordon B. Hinckley: “O loo i ai le Atua i le foeuli. Aua lava nei masalosalo. A faafetaiaia i tatou e mea faafeagai, o le a Ia tatalaina le ala pe a foliga mai ua leai se ala. …

“Ia aua lava nei tuu atu i soo se leo lē faamalieina e faalavelave ia te oe. Aua nei tuu atu i faitioga e faapopoleina oe. E pei ona tautino mai e Alema i se taimi ua leva: ‘Ia outou le faalagolago i se tasi e avea ma o outou aoao po o so outou faifeau, vagana ai o ia o se tagata o le Atua, o loo savali i ona ala ma tausi i ana poloaiga’ (Mosaea 23:14).

“O le upumoni o loo i ai i totonu o lenei Ekalesia. … E pei ona tautino mai e le Fai Salamo: ‘Faauta, o lē leoleo ia Isaraelu, e le tulemoe ia, e le moe lava’ (Sal. 121:4).

“O Ia o lo tatou Faaola e le tulemoe, e le moe lava a o Ia leoleo i Lona nei malo.”²⁵

Peresitene Thomas S. Monson: “Ou te molimau atu ia te outou o o tatou faamanuiaga folafolaina e le mafuatiaina. E ui e faaputuputu ao o matagi, e ui e toulu mai uaga i o tatou luga, ae o lo tatou malamalama o le talalelei ma lo tatou alofa i lo tatou Tama Faalelagi ma lo tatou Faaola o le a faamafanafanaina ma tausia i tatou ma aumaia le olioli i o tatou loto pe a tatou savavali ma le sa’o ma le tausia o poloaiga. O le a leai lava ma se mea i lenei lalolagi e mafai ona faatoilaloina i tatou.

“Ou uso e ma tuafafine, aua le fefefe. Ia fiafia. Ua tutusa lava le susulu o le lumanai ma lo outou faatuatua.”²⁶

Faatasi ai ma le talitonuga maumaututu i lo’u loto ma le lotofaafetai e faavavau i lo’u agaga mo le moni o le talalelei toefuataiina a Iesu Keriso, sei ou faamaea atu la’u lava tautalaga i le fautuaga ua tuuina mai e le Atua ia i tatou e silia ma le faaselau i tusitusiga paia—ia aua nei fefefe; ia fiafia. O la’u savali lena ia te outou ma le savali ou te talosagaina outou e faasoa atu i a outou tamaiti aoga.

“[Faauta,] o outou o ni fanau iti, ma tou te lei malamalama lava i le tetele o faamanuiaga o i ai i le Tama … ua saunia mo outou.”²⁷

“Aua le matatau, … ona o outou o ā a’u, ma ua Ou manumalo i le lalolagi, ma o outou o ni o i latou o e ua tuuina mai e lo’u Tama ia te a’u.”²⁸

“E le mafai ona outou gafatia mea uma i le taimi nei; e ui i lea, ia fiafia, ona o le a Ou taitaia outou i le ala. O le malo ua ia outou ma o ona faamanuiaga ua ia outou, ma o oa o le faavavau ua ia outou ia.”²⁹

“O le mea lea, ua Ou i ai i lo outou lotolotoi, … o A’u o le leoleo mamoe lelei, ma le maa o Isaraelu. O ia o le e ati ae i luga o lenei papa o le a le pa’u lava.

“Ma e oo mai le aso o le a outou faalogo ai i lo’u leo ma vaai mai ai ia te a’u, ma iloa ua Ou i ai.”³⁰

O lena faamanuiaga na fetalaia e le Faaola o le lalolagi ua ou toe taua i le po nei ma faaleoina atu i luga o outou taitoatasi e peiseai o loo tuu ou lima i luga o o outou ulu. I le avea ai o le Atua ma a’u molimau e tusa ai ma le paia o lenei galuega, e faapena foi le avea o a’u ma Ana molimau o le galuega. O le upumoni lenei. I lenei Ekalesia, ua tatou punouai ai i le togiolaina, faanatinatiina o le galuega o le talalelei a Iesu Keriso. O loo iinei aoaoga faavae, o loo iinei sauniga, o loo iinei faaaliga, o loo iinei le lumanai. Ua na o le pau lava lea o le ala mautinoa ma saogalemu mo le fanau a le Atua e malaga ai, e aofia ai Ana faiaoga o le OAE ma a latou tamaiti aoga. Ou te fiafia i le avanoa o le agai i luma ma le soosootauau ma outou i ia eleele mautinoa ma paia. “Aua e te matau; tau lava ina e faatuatua.”³¹ I le suafa o Iesu Keriso, amene.

© 2015 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 12/14. Faamaonia le faaliliuga: 12/14. Faaliliuga o le “Be Not Afraid, Only Believe.” Samoan. PD10053224 890