Ua Lava le Alofatunoa o le Alii mo Tagata Uma

Elder Paul V. Johnson

O Le Fitugafulu

O Se Faasauga ma Elder Jeffrey R. Holland Saunoaga mo Faiaoga Faalelotu a le OAE • 6 Fepuari2015 • Tapeneko a Sate Leki

Ou te faafetai i le tatou faatasi ai ma outou o e o loo saofaga atu i lenei galuega maoae o le aoaoina o tagata talavou. Ua ou feiloai i le tele ma le anoanoai o faiaoga i le aluga o tausaga, e aofia ai ma nisi o outou. Ou te alofa ia te outou ma faafetaia lo outou tuuto ma faatosinaga ia i latou o loo outou galulue ma le filiga e aoaoina. O le avea ma se faiaoga e luitauina. O se tasi o luitau na ou matauina i nisi o faiaoga o le lilifa atu lea i lagona e faapea tatou te le lelei tele, le talenia tele, pe le lava foi le malosi e faia ai mea na talosagaina i tatou e fai. Tatou te tuuina atu a tatou taumafaiga sili ona lelei, ae o nisi o i tatou o loo tauivi ma lagona o le le atoatoa.

O nisi taimi e aliae nei lagona pe a tatou faatusatusa i tatou lava i isi faiaoga. Na ou matauina ao faitauina le tusi o Eteru lea na oo lava i le perofeta maoae o Moronae na foliga mai sa i ai ni lagona o le le atoatoa pe a ia faatusaina ana tusitusiga i [tusitusiga a le uso o Iareto]. Ao talanoa atu i le Alii, na ia faapea atu ai:

“O le a faatauemu Nuuese i nei mea, ona o lo matou vaivai i le tusitusi; aua le Alii e, ua e faamalosia i matou i le upu ona o le faatuatua, ae ua e le faamalolosia i matou i le tusitusi  … e pei o le uso o Iareto, ona ua e faia o ia ina ia malolosi mea ua ia tusia e pei lava o oe, seia oo ina lofituina ai le tagata e faitauina i latou. …

“…  O le mea lea a matou tusitusi ua matou vaai i lo matou vaivai, ma feseseai ona o le tuuga o a matou upu” (Eteru 12:23–25).

Pe a faatusalia i le mamana o le tusitusi o le uso o Iareto, na popole Moronae e lei lava le lelei o lana taulaga, o lana tusitusi—o le a tauemuina. Na i ai se taimi na oo ai ni lagona faapea ia te oe i le faatusatusa lea o au aoaoga ma isi faiaoga o loo siomiaina oe? Na e lagonaina sa lei lelei tele au aoaoga—ma e ono tauemuina?

Tatou te masani lelei lava i nisi o afioga a le Alii na tali atu ai ia Moronae. Na filifilia foi o se fuaitau o se mau tauloto. “Afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27).

Ua musuia i tatou taitoatasi e ala i afioga a le Alii ia Moronae. Ou te faafetai i le faamalosia foi o Moronae i nei upu ma na te lei faamutaina lana galuega ona o ona lagona vaivai po o le le mautonu. Ae faapefea pe ana fai, ina ua faailoa atu ia te ia tusitusiga a le uso o Iareto, ae faavaivai ai? Ae faapefea pe ana fai tatou te lei mauaina ni ana tusitusiga i le Tusi a Mamona? Leai se faaiuga i le tusi a lona tama, na faamaumauina ai le faaumatiaga mulimuli o lona nuu? Leai se tusi a Eteru? Leai se tusi a Moronae? Mo se tagata na te vaai ia te ia lava o se tagata vaivai i le tusitusi, na lava le alofa tunoa o le Alii, ma na sili atu. Ou te le iloa pe na oo le maualuga o tusitusiga a Moronae i le tulaga o tusitusiga a le uso o Iareto, ae na ou iloa o le faatasi mai o le Agaga, na tele se aafiaga o upu a Moronae ia te au ma le faitau miliona o isi o e na faitauina. Na ou faatoa vaai i se lipoti o le lomiga faafuainumera o tusitusiga paia, ma o mau e tolu o mau faamamafaina pito i luga e lima i tusitusiga faavae uma e mai tusitusiga a Moronae—e aofia aiEteru 12:27.

Afai tatou te lagona ua vaivai a tatou taumafaiga faafaiaoga ma ua le tutusa ma tomai o isi, e mafai ona tatou vaavaai i totonu ma luga, ae le o autafa po o luga ae o o tatou tauau. E le manaomia ona tatou faaaluina lo tatou malosi e atugalu ai pe faapefea ona faatusalia i tatou i isi. E mafai ona tatou faaalu lo tatou malosi e faalotomaualalo ai i tatou lava ma taulai atu i a tatou tamaiti aoga. Ua lava le alofa tunoa o le Alii mo i tatou, ua matua—lava ma totoe i le aoao atu mo a tatou taumafaiga mo le mauaina o le ola e faavavau.

O se fiafiaga tele lo tatou faatasi ai ma Elder Jeffery R. Holland i lenei afiafi. O le toatele o outou ua uma ona silafia o ou manatu i lenei afiafi na faatosinaina e ala i le avanoa e faasoa ai le pulelaa faatasi ma ia. O le a sou lagona pe afai na e lauga i le sauniga lava e tasi ma se tasi o failauga sili ona mamana ma sili ona alofagia i lenei tisipenisione, o ana upu ua matua mamana lava ma ua faamalosia ai i latou o e faalogo i ai (tagai Eteru 12:24)? E moni lava, ao ou vaavaai atu i faamatalaga o lona talaaga, ou toe mafaufau pe masalo sa i ai sona uso e igoa ia Iareto.

Na faauuina Elder Holland o se tasi o le Korama a Aposetolo e Toasefululua i le aso 23 o  Iuni, 1994. I le taimi o lenei valaauga, sa galue Elder Holland o se tasi o le Korama Muamua a Fitugafulu, lea na valaauina ai i le aso 1 o Aperila, 1989.

Mai le 1980 seia oo i lona valaauga o se Pulega Aoao i le 1989, sa auauna atu Elder Holland o se peresitene lona iva i le Iunivesite o Polika Iaga i Provo, Iuta. Sa avea o ia ma se komesina o aoga a le Ekalesia ma le pule o le Kolisi o Aoga o Mataupu Faalelotu i BYU.

O se tagata taalo i au sinia a le Aoga Maualuga a Dixie ma le Kolisi a Dixie i lona nuu o St. George, Iuta, sa ia mauaina ona faailoga o le tagata malaga ma le matuaofaiva i le gagana Peretania ma aoaoga faalelotu, mai le Iunivesite o Polika Iaga. Sa ia mauaina ni faailoga o le matuaofaiva ma le fomai faafilosofia i Suesuega o Amerika mai le Iunivesite o Yale.

O lo’u feiloaiga muamua lava ia Elder Holland o le taimi o avea au ma se faiaoga fou i le seminare, ma sa ia asiasi mai i le matou eria i Arisona ao ia galue o se komesina o aoga. Sa lofituina au i le mamana o ana aoaoga ma e ala i ona auala faafiafia ma le alofa i tagata. O le taimi nei, ina ua mavae le tele o tausaga o vaavaai atu ia te ia, ua sili atu ona musuia au e ala i lona pai mai patino ma e ala i lona mana o se failauga ma faiaoga. Tau ina ia tatala o tatou taliga, o tatou mafaufau, ma o tatou loto ao ia aoaoina i tatou, i le suafa o Iesu Keriso, amene.

© 2015 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 12/14. Faamaonia le faaliliuga: 12/14. Faaliliuga o le “The Lord’s Grace Is Sufficient for All.” Samoan. PD10053224 890