Mour kōn juon Un: Aorōk eo an “Jibadbad Em̧ool”
Randall L. Ridd
Rikakpilōklōk eo Kein Karuo ilo Būreejtōnji eo Eutiej an Doulul eo an Likao ro
Juon Joteen ippān Būratōr Randall L. Ridd Nokon in Jota eo Ipeļaakin laļ in n̄an Rūm̧aan ded ro • Jānwōde 11, 2015 • Brigham Young University–Idaho
Ej juon iien ekabwilōn̄lōn̄ n̄an maron̄ pād ippāmi joteenin. Ej juon menin utiej bwe kōm̧ro kōrā eo ippa maron̄ pād ijin joteenin. Ikar ļōmņak ekar em̧m̧an bwe talboon eo aō ekar jeļā bwe ikar kōm̧m̧ane tūreep in n̄an Rexburg rainin ilo kōļanta eo aō. Ekar kwaļo̧k n̄an n̄a naaj kain mejatoto rot in im kar letok n̄an eō juon laajrak in im̧ōn jokwe ko an rūwaimāijet im im̧ōn m̧ōn̄ā ko ilo bukwōn in. Taļboon eo aō ekar bar kwaļo̧k n̄an eō elōn̄ m̧akūtkūt ko rej kōm̧m̧an ilo Rexbury jem̧ļo̧kin wiik in.
Āee! Kiiō ke ij ļōmņak kake menin—ekar jab kōlaajrake kōnono in aō āinwōt juon iaan m̧akūtkūt ko. Ijeļā bwe kom̧ jeļā bwe ej juon smart phone!
Men̄e smartphone eo nejūm̧ ekar jab ļōm̧ake waj menin, kajjojo iami ekar kālet n̄an joļo̧k juon awa ippa joteenin―juon awa eo me koban bar kōro̧o̧ltok. Kōn menin, ij en̄jake bwe ej juon eddo eļap n̄an kowōrtokjān. Ak ij barāinwōt jeļā bwe ta eo ij ba eban lukkuun aorōk jān ta eo Jetōb enaaj katakin eok, im bwe enaaj lukkuun aorōk ļo̧k ilo am̧ kallim̧ur n̄an mour kake im̧we kein.
Ijeļā bwe kom̧ij errā ippa bwe en̄in ej juon tōre ekabwilōn̄lōn̄ n̄an mour ie. Rimeletlet ro raar ņaetan epepen in aō Baby Boomers, mekarta naan in epen bar kōjerbale; raar ņaetan epepen eo tok juon generation X; im raar ņaetan epepen in ami Generation Y, ak Millennials. Jeļā kōn ami jeļā kōjerbal tecknology im ekōjkan ami kōjerbal social media, kom̧ jeļā im kom̧ meletlet ļo̧k jān epepen ko ļo̧k. Kadkad kein rejjab kōm̧m̧an wōt bwe kom̧win lukkuun aorōk ilo jukjukinpād in rainin ak rebarāinwōt ilo kōm̧m̧ane jerbal eo an Irooj.
Elōn̄ļo̧k kālet ko ami im iien ko rem̧m̧an n̄an kom̧ jān kar m̧okta. Āinwōt eobrak mour in kōn men otemjej, menin ej jim̧or juon kōjeram̧m̧an im juon lia. Ekanooj lōn̄ kālet ko im mijak n̄an kōm̧m̧ani kālet ko rebōd ekkā an tōl ļo̧k n̄an kālet eo eapan̄, eo emaron̄ juon iaan apan̄ ko ilo epepen in ami. Epenļo̧k jān kar m̧okta n̄an dāpdep wōt jān kar m̧okta! Kōn technology, iien eo kwoj wiaki juon men, iien eo wōt kwoj etal jān m̧ōn wia eo kōtmāne ko rem̧m̧an n̄an am̧ kōjerbali rej jem̧ļo̧k kitier. Elōn̄ armej rej mijak n̄an kalim̧m̧ur kōn jabdewōt men kōnke rej kajjitikin er eļan̄n̄e kālet eo ejim̧we epād bar juon jikin. Innām rej kōttar―im pād wōt im jab kālet juon men. Ilo jekjek rot in, epidodo an menin kōm̧ad ko iookļo̧k er āinwōt mejān kajjik eo. Jorāān eo n̄an menin in, ro jeiū im jatū, ej ta eo ikōņaan kōnono kake joteenin―mour kōn un: Aorōk eo an jibadbad em̧ool.
I. Un
Ļōmņak ium̧win jidik iien n̄e kwon kar pād ilo juon tim̧a ilo̧jet, eo ejjeļo̧k jabdewōt ie ak an̄jiwiwi in kōto ko ipeļaakin, jon̄an wōt an mej maron̄ loe. Tim̧a eo eobrak kōn aņōņ ko ie, ak ia eo kwonaaj kar aņōōņ n̄ane? Kiiō baj ļōmņak n̄e kwōn kar pād ilo juon āne. Kiiō kwojeļā ia eo kwoj etal ie ļo̧k. Am maron̄ loe āne eo ej ke lewaj n̄an eok jim̧or ikdeleel im un? Armej ro me rejjab lo juon un, ej alikkar ke rej pejpeto. Pejpeto ko rej kōtļo̧k bwe tarto tartak in bōkā ko an laļ in ren kāletļo̧k ijo ren ilo̧k ie ļo̧k.
Leo Tolstoy
Mour eo an juon rijeje ebun̄bun̄ jān Russian Leo Tolstoy, rijeje eo an War and Peace, ekar kōmeļeļeik meļeļe in. Ekar pen n̄an Leo Tolstoy ke ekar jodikdik. Ro jinen im jemān rekar mej ke ej bōlen 13. Kar dik im rūttoļo̧k ippān ro jein kōn dānin kadōk, kāāmbōļ, im jowan, Leo ekar jowan ilo ekkatak ko an. Ke ej 22 an iiō, ekar jino en̄jake bwe mour eo an ekar ejjeļo̧k lukkuun unin im kar je ilo jōnōōl eo an, “Ij mour āinwōt juon menin mour.” Ruo iiō tokālik ekar je, “24 aō iiō im ijan̄in kōm̧m̧an jabdewōt men.” Jab m̧ōņōņō eo an Tolstoy, ekar kareel en̄an jino juon ekkatak aolepān an mour, eļaptata ilo mālijjon̄ im bōd, kōn unin mour eo an―etke. M̧okta jen an kar mej ke ej 82 an iiō, ekar kajem̧ļo̧k ilo jōnōōļ eo an, “‘Meļeļe eo edipio im lan̄lōn̄ an mour,’ … epād ilo kappukōt wānōk im meļeļe ankilaan Anij” 1―im, inaaj kakkobaba, kōm̧anm̧an ankilaan Anij.
Em̧ōj kadede kar ba bwe raan ko ruo rekanooj aorōk ilo mour eo am rej raan eo kwar ļotak im raan eo kwonaaj jeļā etke kwar ļotak. 2 Kōnke ewōr ippād gospel eo, jejjab aikuj joļo̧k aolep ad iien n̄an pukot unin. Ijjelo̧kin, jemaron̄ pedped wōt ioon ad reim̧aanļo̧k n̄an kakūrm̧ool un in.
Ilo Matu 5:48 jej riit, “Innām kom̧ naaj weepān āinwōt Jememwōj i lan̄ E weepān.”
Ij ļōmņak kōj kajjojo ewōr juon menin jolet ippād n̄an kōm̧anm̧anļo̧k. Ak kōnke jej aolep kōm̧m̧an bōd, elōn̄ iaadwōj rekar kwaļo̧k bōro bwe kōttōbar eo an wānōk epen tōpare. Im enaaj āindein eļan̄n̄e eban kar Pinmuur eo. En̄taan eo an ad Rilo̧mo̧o̧r ekar kōm̧m̧an bwe wānōk en pidodo: “Aaet, itok n̄an Kraist, im weppān ilo E, im karmejete kom̧ make jān aolep men ko rejjab em̧m̧an, im iakwe Anij kōn aolep am̧ maron̄, ļōmņak im kajoor, innām An jouj enaaj bwe n̄an kom̧, bwe jān An jouj kom̧ maron̄ weppān ilo Kraist” (Moronai 10:32; kakkobaba eo kar kobaiki).
Ad Rilo̧mo̧o̧r ekar letok n̄an kōj kōjatdikdik eo me eim̧we kōj n̄an erom̧ āinwōt Jemād ilo Ilan̄. Kwojeļā, āinwōt an kar Leo Tolstoy loe, bwe ewōr lan̄lōn̄ ilo iaļen wānōk. Un eo eļap ej waļo̧k ilo mour eo am̧ n̄e kwoj kōm̧m̧an bwe kwon ļoor ankilaan Irooj.
Elder Tad R. Callister ekar ba: “Etke epen n̄an bōk juon visōn eo ejim̧we kōn mejān kajjik in ekwojarjar eo me jeje ko rekwojarjar im kam̧ool ko jet rej lukkuun kam̧ool im kalikkare? Kōnke n̄e visōn ej ļapļo̧k ej ļapļo̧k ikdeleel.”3
Mijen
Ke ikar juon likao em̧m̧an dettan, ibaj jab kālet wōt n̄an etal n̄an juon mijen. Ālkin juon iiō ilo kaļōj im juon iiō ilo jikin tariņae, ekar wōr juon aō jerbal em̧m̧an ilo aujipitōļ āinwōt juon X-ray technician. Juon raan Dr. James Pingree, juon iaan rim̧wijm̧wij ro ilo aujpitōl eo, ekar kūr ļo̧k eō n̄an juon m̧ōn̄a in rālep. Ilo bwebwenato eo am̧, Dr. Pingree ekar jeļā ke iaar jab jeke ippa n̄an jerbale juon mijen im ekar kajjitōk etke? Ikar jiron̄ ļo̧k e ke irūtto jidik im emaron̄ rūm̧wij. Ekar jiron̄ eō ke ekar jab juon un eo elukkuun em̧m̧an im bwe eaar etal n̄an mijen eo an ālkin an kadedeļo̧k jikuuļ in taktō. Innām eaar kwaļo̧k an naan in kam̧ool kōn aorōk in mijen eo an.
Naan in kam̧ool eo an eaar jelet eō, im eaar kōm̧m̧an bwe in jar āinwōt iaar jab jar m̧okta ļo̧k―kōn jibadbad em̧ool. Imaron̄ kar ļōmņak kōn elōn̄ un ko n̄an jab etal n̄an juon mijen: Iaar ejjokook—kōn menin ejjokook eo n̄an kōnono ilo kweilo̧k in kwojkwoj eo eaar un eo n̄an jab etal. Ewōr aō jerbal em̧m̧an ippa. Ewōr juon jāān in jikuuļ eo me emaron̄ jab itok ālkin juon mijen. Men eo eaorōk tata, ewōr juon jera leddik eo ej kōttar eō ke iaar pād ilo tariņae―im iaar jeļā bwe eban bar kōttar ruo iiō! Iaar jar im bar jar n̄an bōk tōl bwe un ko aō ren jerbal im jejjet.
Kōn aō inepata, ikar jab maron̄ bōk uwaak eo epidodo aaet ak ekar jab uwaak eo ikar kōjatdikdik kake. Innām juon kōļmenļo̧kjeņ ekar itok n̄an eō: “Ta eo Irooj ekōņaan bwe kwon kōm̧m̧ane?” Iaar maron̄ kile bwe Ej kōņaan bwe in jerbale juon mijen, im ekar erom̧ juon jokālet ilo mour eo aō. In ke etal im kōm̧m̧ani ta eo ikōņaan in kōm̧m̧ani ak kōm̧anm̧an ankilaan Irooj? Ej juon kajjitōk ej aikuj emakijkij ad aolep kajjitōkin kōj make. Ta jon̄ak eo eļap n̄an ad kajjojo m̧ōkaj in kalōke ilo mour ko ad. Elōn̄ iien jej bōk bōklekōt in “Inaaj etal n̄an ijo Kwoj kōņnaan bwe in etal n̄ane, im inaaj kōm̧m̧ane ta eo Kwokōņaan bwe in kōm̧m̧ane, Irooj jitenbōro―toon wōt an āinwōt ijo ij kōnaan etal n̄ane im ta eo ij kōņaan kōm̧m̧ane.”
M̧ōņōņō, ikar kālet n̄an jerbale juon mijen im kar ijjitōn̄ n̄an jerbal ilo Mexico North Mission. N̄an kadikļo̧k jorrāān ko jet iaami remaron̄ en̄jake―Imaron̄ ba n̄an eok ke leddik eo jera ekar jab kōttar eō, ak iaar wōnm̧aanļo̧k wōt im m̧areki! Ej kōjeram̧m̧an eo eļaptata ilo mour e aō. Jeļā unin mour eo am̧ ej n̄an erom̧ āinwōt Jemed ilo Lan̄, ikar lo bwe eaar ejjeļo̧k university em̧m̧an ļo̧k jen menin m̧are im wōr juon baam̧le n̄an katakin kōm̧ iakwe eo an Anij n̄an ajri ro Nejin. Jeļā ta eo ijeļā, imaron̄ kōm̧m̧an aolep men imaron̄ in kōm̧m̧ane n̄an pād ilo university eļan̄n̄e en kar n̄a kwe. Ijeļā bwe ebbōk etan rijikuuļ n̄an deļo̧n̄e jikuuļ ej ijjino kiiō.
II. Jibadbad Em̧ool
Ke ļaddik eo nejūm̧ ej jino ekkatak kōnono, ekar lukkuun itok limoin. Naan eo em̧m̧antata ippān ilo aolep naan ko ejeļā ej “Etke?” Eļan̄n̄e ikar ba, “Iien kōbpopo n̄an kiki,” ej uwaak kōn naan in “Etke?”
“Ij tin jerbal.”
“Etke?”
“Jen jar.”
“Etke?”
“Iien etal n̄an m̧ōn jar en.”
“Etke?”
Eaar lukkuun em̧m̧an―kein kajuon an kar ba ekar 500 alen an kar ba. Ak ālkin an naan in waļo̧k im eaar jino kalulu, ikar kam̧m̧oolol kōn kakeememej in emakijkij n̄an lale etke (ilikin) aolep men ko ikar kōm̧m̧ani.
Ijjab jeļā n̄e ewōr leta en em̧m̧anļo̧k ilo Y āinwōt juon āt n̄an epepen in ami, ak ij ļōmņak ewōr men en em̧m̧anļo̧k ilo kōļmenļo̧kjeņ kōn kom̧ make āinwōt “etke” epepen in. Eaorōk, ilo laļ in rainin, n̄an karōk etke kwoj kōm̧m̧ane ta eo kwoj kōm̧m̧ane.
Mour kōn jibadbad em̧ool ej meļeļein meļeļe “etke” im ekkōļ kōn un ko ilōn̄in kōm̧m̧an ko ad. Socrates ekar ba, “Juon mour eo ejjeļo̧k idajon̄jon̄ ie ejjeļo̧k tokjān.” 4 Kejōkļo̧kjeņ wāween am̧ joļo̧k iien ko am̧, im kajjitōk ippām̧ aolep iien, “etke?” Menin enaaj jipan̄ eo ejaake maron̄ eo n̄an lo eļapļo̧k. em̧m̧anļo̧k n̄an pijaik ta eo enaaj waļo̧k tokālik im kajjitikōn eok make, “Etke in kōm̧m̧ane?” innām relikļo̧k im ba, “Etke, o, etke ikar kōm̧m̧ane?” Eļan̄n̄e un eo de eo etke ej bwe Anij ekōņaan bwe kwon, en̄in ej un eo ebwe.
Iju ko
Ikar katak aorōk eo an jibadbad em̧ool ke ikar juon rijikuuļ em̧m̧an dettan in jemeneri. Rūkaki eo am̧ ekar idajon̄jon̄e kōm̧ n̄an riiti Bok in Mormon. N̄an jipan̄ lale eddōkļo̧k eo am̧, eaar kōm̧m̧ane juon jaat āt ko etam̧ rej pād ie im elaajrak in bok ko ilo tulōn̄. Kajjojo iien am̧ riiti juon bok, juon iju naaj likūti kijeen etam̧. M̧okta ikar jab lukkuun itok limoin riit, im ekar jab to ikar lo aō make jabwābwe. Kar rōjan̄ jān juon jitbōn āliklik im jiāe, ikar jino riit. Kajjojo iien ij ebōk iju, ekar bun̄ būruwō. Iaar bōk elōn̄ ļo̧k iju, kōn eļap ikdeleel iaar riit―ikōtaan kūlaaj ko, ālkin jikuuļ, ilo kajjojo minit n̄e ewōr.
Enaaj juon bwebwenato em̧m̧an eļan̄n̄e inaaj kar kwaļo̧k n̄an kom̧ bwe n̄a eo m̧oktata ikar dedeļo̧k ilo kūlaaj―ak ikar jab. (ikar jab āliktata barāinwōt, ilo wāween in.) Kwojeļā ke ta eo ikar kōm̧m̧ane bwe in riiti Bok in Mormon? Ijeļā kwoj ļōmņake “juon naan in kam̧ool,” kwoj ke? Ak ikar jab. Ikar ebōk iju. Ikar ebōk iju etke kōnke ij riit. En̄in ekar jibadbad eo aō em̧ool.
Moronai eaar kalikare ilo an kōmeļeļeik wāween n̄an jeļā eļan̄n̄e Bok in Mormon ej m̧ool: “Im n̄e kom̧ naaj būki men kein, ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwojarjar” (Moronai 10:4; kakkobaba in kar kobaiktok).
Reilikļo̧k, imaron̄ lo bwe Irooj eaar lukkuun em̧m̧an n̄an eō. Etke iaikuj in bar kappukot jabdewōt men jen ta eo iaar pukote? Iaar jab lukkuun bōjrak im kar kajjitōkin eō make etke ikar riiti Bok in Mormon. Iaar peto-petak, kōtļok an laļ in tōl eō, n̄an idajon̄jon̄ bwe in riiti bok eo ejim̧we kōn juon un ebōd. Jibadbad em̧ool ej kōm̧m̧ane men eo ejim̧we kōn un eo ejim̧we.
Eaar jab m̧ae iiō ko tokālik, ke ikar kakkōt n̄an kālet ak jab kālet n̄an etal n̄an juon mijen, bwe in riiti Bok in Mormon kōn jibadbad em̧ool. Eļan̄n̄e ij itōn joļo̧k ruo iiō n̄an kwaļo̧k kam̧ool eo kōn bok in, ij aikuj in m̧oktata bōk juon naan in kam̧ool.
Ijeļā bwe Bok in Mormon eobrak kōn un ko rekwojarjar kōn mour eo em̧ool im mijen eo an Jisōs Kraist kōnke ikar riiti kōn jibadbad em̧ool.
Būrabōļ in Oraņ ko
Ikōņaan kwaļo̧k juon būrabōļ in raan kein me ij ņaetan “Būrabōļ in Oraņ ko.” Ilo am̧ ron̄jake, ļōmņake ta bwebwenato in ej katakin eok kōn kajoor in jibadbad em̧ool.
Ewōr juon ļaddik eo ekar kōņaan jerbal ilo juon kom̧bani kōnke em̧m̧an wōņāān im elukkuun bun̄bun̄. Ekar kōpooj rejimi eo an im jet intōrpiu ko. Ilo m̧ool ekar bōk jerbal eo. Innām leļo̧k kōņaan eo an n̄an jibadbad eo an juon, juon jerbal eutiej ļo̧k―juon jerbal in supervisor eo me em̧m̧an im eļap wōņāān. Kōn menin ekar kadedeļo̧k jerbal ko kar liļo̧k. Juon jibbon̄ ekar m̧okaj tok im to an pād kōnke booj eo en lo an jerbal ilo awa ko raitok.
Ālkin ļalem iiō juon jerbal in supervisor ekar peļļo̧k. Ak, kōn ilbōk eo an ļaddik in eļap, bar juon rijerbal, eo ekar jerbal n̄an kom̧bani in kōn jiljino wōt allōn̄ ko, ekar utiej ļo̧k jerbal eo an. Ļaddik eo ekar lukkuun illu im kar jibadeļo̧k booj eo an im kwaļo̧k an abōņōņō.
Booj eo emeletlet ekar ba, “M̧okta jen aō uwaaki kajjitōk ko am̧, komaron̄ ke kōm̧m̧ane juon men n̄an n̄a?”
“Aaet, em̧m̧an,” rijerbal eo ekar ba.
“Komaron̄ ke etal n̄an im̧ōn wia en im wiaik jet oraņ? Kōrā eo ippa eaikuj.”
Likao eo ekar errā im iļo̧k n̄an im̧ōn wia eo. Ke ej jepļaaktok, booj eo ekar kajjitōk, “Kain oraņ rot ne kwar wiaiki?”
“Ijaje, “ļaddik eo em̧m̧an dettan ekar uwaak, “Kwar ba wiaiki wōt oraņ, im oraņ men kein. Erro.”
“Jete wōnāāer?” Booj eo ekar kajjitōk.
Ekwe, ijab jeļā,” ekar uwaak. Kwar letok $30 tala. Rijiit eo, im bwe ko am̧ ko.”
“Kom̧m̧ool,” booj eo ekar ba. “Kiiō jouj im jijet im lukkuun ron̄jake.”
Innām booj eo ekar kūr tok rijerbal eo me ekar bōk jerbal eutiej ļo̧k im kar kajjitōk ippān n̄an kōm̧m̧ane ejja jerbal eo. Ekar errā im iļo̧k n̄an im̧ōn wia eo.
Ke ej jepļaaktok, booj eo ekar kajjitōk, “Kain oraņ rot ne kwar wiaiki?”
Eaar uwaak, “em̧m̧an,” “elōn̄ kain oraņ ilo im̧ōn wia en―ewōr navel oraņ, Valencia oraņ, blood oraņ, tangerines, im ko jet, im iaar jaje men rot in wiaiki. Ak ikar keememej ke kwar ba kōrā eo ippam̧ eaikuj oraņ, kōn menin ikar ko̧o̧le. Ekar ba ewōr juon bade enaaj kōm̧m̧ane im eaikuji oraņ ko n̄an kōm̧m̧an oraņ juuj. Kōn menin ikar kajjitōk ippān rijerbal eo ilo m̧ōn wia eo ewi iaan aolep oraņ renaaj em̧m̧an n̄an kōm̧m̧an oraņ juju. Ekar ba Valencia oraņ ej juuj eo enno tata, kōn menin ikar wiaiki. Ikar juļo̧ki ilo m̧weo im̧ōm̧ ilo iaļ eo aō tok n̄an opiij in. Kōrā eo ippam̧ ekar lukkuun laudin̄din̄ kaki.”
“Jete wōnāāer?” booj eo ekar kajjitōk.
“Em̧m̧an, ekar wōr jidik jorrāān. Ikar jaje jete n̄an wiaiki, kōn menin ikar bar ko̧o̧le kōrā eo ippam̧ im kajjitōk ewōr jete an rilo̧tok. Ekar ba 20. Kōn menin ikar kajjitōk ippān rijerbal eo emaron̄ jet oraņ aikuji n̄an kōm̧m̧an juuj n̄an 20 armej, im ekar kanooj ļap wōnāān. Kōn menin ikar kajjitōk ippān rijerbal eo bwe en letok juon dikļo̧k eo em̧m̧an, im ekar letok! Wōnāān oraņ kein ekkā an 75 jāān, ak iaar būk kōn 50 jāān wōt. Bwe eo am̧ eo im rijiit eo.”
Booj eo ekar etōn̄dikdik im ba, “Kom̧m̧ool; komaron̄ etal.”
Eaar kalimjōk ļaddik eo me ekar waate wāween eo. Ļaddik eo ekar jutak, kōm̧akūt aeraņ im ba, “Imeļeļe ta eo kwoj ba,” ekar diwōj jen opiij eo.
Ta oktak eo kōtaan ļaddik rein ruo? Kar jim̧or kajjitōkin erro n̄an wiaiki oraņ ko, im raar kōm̧m̧ane. Komaron̄ ba eaar etal etto ļo̧k, ak ebolel, ak wia ekkar n̄an wōnāān eo, ak juon ekar lukkuun leļo̧k an n̄an meļeļe eo. Ak oktak eo eaorōk tata eaar waļo̧k jān jibadbad em̧ool ijjelo̧kin jen baj etal wōt im kōm̧m̧ane. Ļaddik eo jinoin ekar em̧akūt kōn jāān, jerbal, im kautiej. Ļaddik eo kein karuo eaar em̧akūt kōn juon jibadbad n̄an kam̧ōņōņōik rijerbal ro an im juon kallim̧ur n̄an rijerbal eo em̧m̧an tata me emaron̄ ekkar―im jekjek eo ekar jejjet.
Ekōjkan am̧ maron̄ bōk būrabōļ in ilo mour ko am̧? Ekōjkan kijejeto ko am̧ ilo baam̧le eo am̧, ilo jikuul, ilo jerbal, im ilo Kabun̄ in, maron̄ oktak eļan̄n̄e kwoj aolep iien pukōt n̄an kam̧ōņōņōik Anij im kōm̧anm̧an Ankilaan?
III. Abūļkejōn ko
Eļļo̧k jān Menin Kōm̧ad ko―Aorōk eo n̄an Mije
Ewōr jete alen am̧ jijet ilo kam̧putōr eo im kōm̧m̧an homework ak juon jerbal, n̄e ekaju waļo̧k kareleel āinļo̧k wōt men eo kwar pukote inne? Innām, ilo am̧ alwōje ilo online store ko, kwoj lo bwe ewōr ro m̧ōttam̧ rej online, kōn menin kwoj jino bwebwenato ippāer. Innām kwoj bōk juon men me eo m̧ōttam̧ ekar likūti ilo Facebook, im kwokōņaan lale ta eo. M̧okta jen am̧ jeļā, em̧ōj am̧ jerwane iien eo eaorōk im meļo̧kļo̧k etke kwar tin pād ilo kam̧puter eo. Elōn̄ alen jej po ilo menin kōm̧ad ko n̄e jej aikuj in kar jab. Menin kōm̧ad ko rej koote iien ko am̧ me ren kar kōm̧m̧an men eo em̧m̧an. Maron̄ eo n̄an mije ejipan̄ kōj n̄an eļļo̧k jān menin kōm̧ad ko.
Ijeļā kom̧ aolep kōņaan būki teej ko. Kōn menin, jotenin inaaj lewaj n̄an kom̧ juon teej e maron̄ eo am̧ n̄an mije. Kwonaaj lo ruo tiim ko: juon ej kōņak mouj im juon ej kōņak kilmeej. Rej aikuj in peeje juon bo̧o̧ļ in basket, im ikōņaan bwe kom̧win bwine oraņ an tiim mouj eo kōm̧m̧ani peej ko.
[Pija in n̄an teej.]
Ewōr jete peej kwar bwine?
Kajutak peiūm̧ eļan̄n̄e kwar bwine 19 peej ko, Jet raar bwine 20 peej ko, Jete raar bwine 21 peej ko, jete raar bwine 22 peej ko?
Uwaak eo ejim̧we ej 21.
Ro raar jibwe 21, kajutak peiūm̧i. Kotak wōt peiūm̧ eļan̄n̄e kwar lo juon leļļap ej etetaļ, innām etetaļ ioon piļo̧o̧r ņe. Kiiō, kotak wōt peiūm̧ eļān̄n̄e kwar lo juon ninja eo ej bōk jikin juon iaan rikkure ro rej nuknuk kilmeej. Kwar ke lo an ukōt jen juon football n̄an juon basketball? Kwar ke lo an rikkure ro ilo tiim eo ekōņak kilmeej im kōņak at ko?
Bar lale m̧ōk, im mije ta men ko kwar jab loe jinion.
[Bar kōjo Pija eo n̄an teej.]
Jenaaj kwaļo̧k pija in ippām̧i tokālik ilo via social media.
Mije eo ad ilo mour in elukkuun aorōk. Ilo an teej in kōmeļeļeiki, jej lukkuun lo ta eo jej pukote. Ak, ilo an jeje ko ba, “kappukot, im kom̧ naaj loe” (Luk 11:9).
Eļan̄n̄e kwoj mije men ko an laļ in, jemaron̄ luuji jetōb eo an laļ in eo ej pād ipeļaakid. Jemaron̄ jab kile im̧we ko an jetōb me Jetōb Kwojarjar ej kijōrjōr in letok n̄an kōj n̄an tōl mour ko ad im kōjeram̧m̧an ro jet. Ilo m̧ool, eļan̄n̄e jej mije men ko an Jetōb im rej “erreeo, iakwe, ak men ko rem̧m̧an ak rerreeo” (Laajrak in Tōmak 1:13), innām enaaj dikļo̧k ad m̧ad ilo kapo ko im lōkapokpok ko an laļ in. Wāween eo em̧m̧an tata n̄an eļļo̧k jān kōm̧ak ko ej n̄an mije wōt jibadbad eo ad im ad im kijōrjōr in bōk kūņaad ilo men ko rem̧m̧an. Lukkuun kōjparok mije eo am̧―jab joļo̧k am̧ iien n̄an mije taļļōn̄i to̧l ko n̄an wōt lale n̄e kwar taļļōn̄e toļ eo ebōd.
Kajoor eo an Men ko Reddik
Jiln̄uuļ ļalem iiō rem̧ootļo̧k ālkin aō “kōkōm̧anm̧anļo̧k jibadbad eo aō” im kar kālet n̄an jerbale juon mijen, ļaddik eo nejū eaar rōjan̄ eō n̄an loļo̧k Mexico ippān im, kōjatdikdik, pukot jet iaan armej ro iaar katakin er. Kōm̧ kar kobaļo̧k ilo juon kweilo̧k in kwokwoj ilo jikin eo edik ijo iaar jino mijen eo aō, ļōmņak imaron̄ kar jeļā kajjeen ro jet—Ak ekar ejjeļo̧k juon. Ālkin kweilo̧k eo, kōm̧ ar kajjitōk ippān bisop eo eļan̄n̄e ejeļā kajjeen jabdewōt jān laajrak in armej ro kōm̧ ar katakin im peptaijier. Ejjeļo̧k juon. Eaar ba bwe eaar membōr ium̧win wōt ļalem iiō ko. Eaar ba kōm̧win kōnono ippān em̧m̧aan ro jet me raar membōr ium̧win 27 iiō―eaar juon iien eaitok, ak eaar juon kajjieon̄ eo ewōr tokjān. Iaar etale laajrak eo aō ippān kōn ejjeļo̧k tōprak m̧ae iien eo kōm̧ij etale kōn last name: Leonor Lopez de Enriquez.
Eaar ba, “O, aaet.” “Baam̧le in repād ilo bar juon ward, ak rej pād ilo im̧wiin. Kweilo̧k in kwojkwoj eo ej kiinļo̧k; m̧ōttan jidik reitok.”
Kōm eaar maron̄ kōttar 10 minit m̧okta jen an Leonor deļo̧n̄ tok ilo im̧ōn jar eo. Men̄e 70 an iiō, eaar m̧ōkaj aō kile e, im eaar jeļā kajjeeō. Kōm̧ eaar atbokwoje doon kōn dānin kōmjaļļaļ.
Eaar ba, “Kōm̧ eaar jar ium̧win 35 iiō ko bwe kwon bar ro̧o̧l tok bwe kōm̧win kam̧m̧oolol eok kōn am̧ kar bōktok gospel in n̄an baam̧le eo am̧.”
Ke member baam̧le eo jet rej deļo̧n̄e tok im̧ōnjar eo, kōm̧ kar atbokwoje doon kōn dānin kōmjaļļaļ. Ilo imeja, imaron̄ lo ļaddik eo nejū ej jutak ippān mijinede ro rej jerbal aolep raan ro raar barāinwōt id mejāer kōn tae ko aer.
Ilo am kar pād kweilo̧k in kwojkwoj, ekar kabwilōn̄lōn̄ n̄an jeļā bwe bisop ej juon ļaddik eo nejin Leonor, ļaddik eo jibwin ej rio̧kwōn eo, leddik eo jibwin ej ritōl al eo, ewōr jet ļaddik ilo Priesthood eo an Aaron raar jibwin. Juon iaan leddik ro jibwin eaar m̧areik juon iaan rikakpilōklōk eo ilo stake būreejtōnji eo. Juon iaan leddik ro jibwin eaar m̧areik bisop eo ilo ward eo juon. Enan̄in ajri ro nejin Leonor raar etal n̄an mijen ko, im ļaddik ro jibwin raar barāinwōt jerbali mijen ko.
Kōm̧ kar jeļā bwe Leonor eaar juon mijinede em̧m̧an ļo̧k jen kar kōm̧. Rainin, ajri ro nejin rej lukkuun m̧ōņōņō kōn kijejeto ko an n̄an katakin er gospel eo: aorōk eo an juon m̧ōttan jon̄oul, tam̧peļ ko, ekkatak jeje ko rekwojarjar, im jar, im tōmak n̄an leke. Eaar katakin er elōn̄ men ko reddik an kajjojo kālet me juon iien enaaj wōr tokjen, jim̧we, im mour lem̧ōņōņō, im raar katakin men kein n̄an ro jet. Kobaik aolepān im eaar wōr elōn̄ ļo̧k jen 500 armej raar itok n̄an Kabun̄ in kōn baam̧le in em̧m̧an. En̄in ej juon iaan un ko etke Irooj ekar kōņaan bwe in etal n̄an juon mijen. Ekar katakin eō jekjek ko an indeeo ilo pukōt n̄an kōm̧m̧ane ankilaan Irooj.
Ekar jino waļo̧k ilo juon iien kōrālep ilo juon bwebwenato eo edik. Ekkā aō ļōmņak bwe eļan̄n̄e Dr. Pingree eaar lukkuun mije kōttōbar eo an ak men ko jet an laļ in, emaron̄ kar jab kajjitōk etke ijjab jerbale juon mijen. Ak jibadbad eo an kōn men ko jet im kōwōnm̧aanļo̧k jerbal eo an Irooj. Eaar katōk juon ine me eaar eddōk im kar kwaļo̧k leen rem̧m̧an im wōnm̧aanļo̧k n̄an dāpiji, ak kalōn̄iļo̧k. Ļōmņak ko reim̧we rej kwaļo̧k jerbal ko rem̧m̧an, jerbal ko rem̧m̧an rej kwaļo̧k jerbal ko jet rem̧m̧an, im āindein an wōnm̧aanļo̧k, n̄an indeeo.
Mark 4:20 ej ba, “Im ro ar kallib ioon bwidej em̧m̧an, ro rej ron̄ naan im bōke im jebar leir, juon jiln̄uul, juon jijinon̄oul, im juon jibukwi.”
Ļōmņak eo kōn dik, men eo dik ak ewōr tokjen ej maron̄ jerbal kōn jekjek ko retinkwadik rem̧m̧an kwaļo̧ki ilo jeje ko rekwojarjar. Alma eaar katakin ļaddik eo nejin Hilamōn:
“Jān men ko redik im relam waan men ko reļļap rej kūrm̧ool. …
“… Jān lukkuun wāween kein redik Irooj ej kapouk eo emeletlet im bōktok lo̧mo̧r an elōn̄ armej” (Alma 37:6–7).
Juon iaan katak ko an mour tōre ko m̧okta bwe ewōr kajoor eļap ilo wāween aer jelet men ko reddik ko jej kōm̧m̧ani kajjojo raan. Men ko reddik im reļam waan ilo jikin jerbal ilo mour eo am̧ kiiō—rej jerbal bōlen n̄an eok ak jum̧aeik eok. Āinwōt an Irooj kōjerbal men kein n̄an kalōk eok, Satan ej kōjerbali n̄an kōm̧ad eok im tōl eok jidik, nan̄in jideļo̧k wōt jidik, im jaaļ jān iaļ eo.
Apan̄ eo ad ej bwe n̄e jej lo juon baam̧le eaiboojoj ak juon armej eo em̧weiie ak juon eo eļap mour in jetōb ippān, jejjab lo m̧akūtkūt in aolep men ko reddik im relam waan raar kōm̧m̧ani. Jej alooje rikkure in Olympic ro, ak jejjab lo iiō ko in aer kaminene me ekōm̧m̧an bwe ren wiin. Jej iļo̧k n̄an im̧ōn wia ko būki leen wōjke ko rekāāl, ak jejjab lo katōk in ine ko im wāween aer eddōk. Jej lo Būreejtōn Monson im Routiej ro jet an Kabun̄ in, im jej lo jetōb in kajoor eo aer im em̧m̧an eo, ak jejjab lo katak ko aer reddik im relam waan rāliij in men. Men kein repidodo n̄an kōm̧m̧ani, ak rebarāinwōt pidodo n̄an jab kōm̧m̧ani―eļaptata kōnke tōprak ko rejjab m̧weiir.
Jej mour ilo juon laļ eo em̧weiir. Jekōņaan etal jen kajju ekkat n̄an kale. Jeminene kōn tōprak ko―jabdewōt iien jej kōttar jet minit bwe Google en letok uwaak n̄an kajjojo kajjitōk ko ad, jej illu―ak jej meļo̧kļo̧k bwe tōprak kein rej dāpij jekjek ko an epepen in jerbal im wūjļepļo̧k in.
Alma eaar leļo̧k kapilōk n̄an Hilamōn me em̧m̧anļo̧k n̄an kōj rainin. Kōnono kōn Liaona eo im “kabwilōn̄lōn̄ ko jet” me eaar tōl baam̧le eo an Liai “jen raan n̄an raan,” Irooj eaar ba:
“Kōnke men in bwilōn̄ kein kar jerbali jān wāween ko redik eaar kwaļo̧k n̄an er jerbal ko rekabwilōn̄lōn̄. Er raar jowan, im kar meļo̧kļo̧k n̄an kwaļo̧k aer tōmak im niknik innām jerbal ko rekabwilōn̄lōn̄ raar bōjrak, im raar jab wōnm̧aanļo̧k ilo ito itak eo aer. …
“O nejū m̧aan, jab kōtļo̧k bwe jen jowan kōn pidodo in iaļ eo; bwe āindein eaar ippān ro jemād; bwe āindein kar kōpooje n̄an er, bwe eļan̄n̄e ren kar reilo̧k renaaj kar mour; em̧ool āindein ej ippād. Iaļ eo epojak, im eļan̄n̄e jenaaj reilo̧k jemaron̄ mour indeeo.
“Im kiiō, nejū m̧aan, lale bwe kwōn kōjparok men kein rekwojarjar; aaet, lale bwe kwōn reilo̧k n̄an Anij im mour” (Alma 37:40–41, 46–47).
Men ko Jilu Reddik im Relam Waan
Ikōņaan kwaļo̧k wāween ko jilu reddik im relam waan n̄an “reilo̧k n̄an Anij” me enaaj jipan̄ kōj jerbale mije eo ad ioon jibadbad eo an indeeo. Ejjeļo̧k iaer enaaj kabwilōn̄ eok―elōn̄ alen am̧ ron̄jaki. Ak ij kam̧ool bwe kōm̧m̧ani men kein rejejjet im kōn jibadbad em̧ool reban wōt kōm̧m̧an juon oktak, ekōm̧m̧an aer aolep oktak. Eļan̄n̄e komeļeļe―Ij ba lukkuun meļeļe―etke ilōn̄in katak kein relam waan, ilo ejjeļo̧k kajjitōk, komaron̄ kōm̧m̧an bwe ren im̧aan tata ilo mour eo am̧.
M̧oktata, ilo ad bōk m̧ōttan kwojkwoj eo, ekkā ad ke etaļ kōn kōm̧m̧an ko. Ilo am̧ lale pija in, kile mije eo me ej pedped ioon keememej, im ļōmņake etke eaorōk.
Elder Jeffrey R. Holland: “Āinwōt an dedeļo̧k im pojak Kwojkwoj in kijoone eo kar jem̧ļo̧k eo, Jisōs ekar bōk pilawe, kōjeram̧m̧ane im ruje, im kar leļo̧k n̄an Rijilōk ro An, ba:”
Jesus Christ: “Men in ānbwinnū eo leļo̧k kōn kom̧; kom̧win kōm̧m̧an men in ilo ememej Eō.”
Elder Holland: “Jān ilo ruum̧ eo ilōn̄, en̄jake eo ilo raan eo m̧okta jān raan eo ilo Gethsemane im Golgotha, ajri ro kōn kalim̧m̧ur eo raar pād ium̧win bujen n̄an keememej katok eo an Kraist ilo juon wāween ekāālļo̧k, eutiej, kwojarjarļo̧k. kōn juon kab edik kōn dān, jej kakeememej to̧o̧rļo̧k in bōtōktōkin Kraist im m̧wilaļ in en̄taan eo An ilo jetōb.
“Kōn juon pilawā em̧ōj ruje, aolep iien kar ruje, kōjeram̧m̧ane, im leļo̧k m̧okta, jej kakeememej kinej ko Ānbwinnin im an Būruwōn rub.
“Ilo kajin eo eļam waan im aiboojoj an jar ko an kwojkwoj eo pris ro rem̧m̧an dettāer rej jari, pedped in naan in katak eo jej ron̄jake ekar keememej.
“Eļan̄n̄e ememej ej jerbal eo im̧aad, ta eo emaron̄ itok n̄an ememeļo̧kjān eo ad n̄e kōkkaļļe kein repidodo im aiboojoj rej itok n̄an kōj?”
Jesus Christ: “Im men in kom̧ naaj kōm̧m̧an. Im enaaj juon kam̧ool n̄an Jemān bwe kom̧ij kememej Eō iien otemjej. Em eļan̄n̄e kom̧ij kememej Eō iien otemjej kom̧ naaj bōk Jetōb eo Aō bwe en pād ippāmi.”
Jeje ko ioon screen eo: Ewi wāween am̧ naaj “iien otemjej kememej” E?5
Ilo ad iien otemej kememej E im kōjparok kien ko An, ļōmņak ewi wāween naaj jelet in ilo aolep iien bōk Jetōb eo An ippād naaj jelet aolep eria ko jet ilo mour ko ad. Kōļmenļo̧kjeņ ewi wāween an naaj kareel jokālet ko ad aolep iien im ad ļōmņak kōn aikuj ko an ro jet.
Ewōr wāween ko jemaron̄ iien otemjej keememej Rilo̧mo̧o̧r ilo juon jerkan raan. Ekōjkan am̧ naaj keememej E iien otemjej?
Elōn̄ renaaj ba, “Jar, im ekkatak jeje ko rekwojarjar.” Im komaron̄ jim̧we, eļan̄n̄e, im bwe n̄e juon men eļapeļan̄n̄e, rej kōm̧m̧ani kōn jibadbad em̧ool.
Jar im ekkatak jeje ko rekwojarjar rej men ko ruo reddik im relam waan me ikōņaan kwaļo̧ki.
Irooj eaar kalikare kōn wāween an jab polel ad jar n̄e jej jar kōn imminene: “Im [āindein] barāinwōt ej waļo̧k enana n̄an armej eo, eļan̄n̄e enaaj jar im jab kōn lukkuun m̧ool in buruōn; aaet, im aorōk in n̄an e ejjeļo̧k, bwe Anij ej jab bōk rein” (Moronai 7:9).
Jibadbad em̧ool an jar ej kōpeļļo̧k ruo wāween kōnono ippān Jemād ilo Lan̄, kōn jekjek eo n̄an ļoor kapilōk eo Ej letok. “Pepe ippān Irooj ilo aolep kōm̧m̧an ko am̧, im Enaaj tōl eok n̄an aenōm̧m̧an; aaet, n̄e kwōj babu ilo bon̄ kwōn babu n̄an Irooj, bwe En maron̄ oņaake eok ilo am̧ kiki; im n̄e kwōj jerkak ilo jibon̄ buruōm̧ en obrak kōn kam̧m̧oolol ko n̄an Anij; im eļan̄n̄e kwōj kōm̧m̧an men kein, naaj kotak eok ilo raan eo āliktata” (Alma 37:37).
Jar im ekkatak jeje ko rekwojarjar rej etal ippān doon. N̄e jej ekkatak jeje ko rekwojarjar im naan ko an rikanaan ro raan kein rej letok revelesōn eo an juon make. Waanjon̄ok im kakkōļ ko kar loi ilo jeje ko rekwojarjar rej katakin ikdeleel ko ad. En̄in ej wāween eo jej eddōk ļo̧k n̄an jeļā An ļōmņak im ankilaan Irooj.
Rikanaan ro etto im kiiō rej akweļap n̄an kōj n̄an kōm̧m̧ani men ko reddik im relam waan āinwōt jar im riiti jeje ko rekwojarjar. Kōn menin, etke aolep rejjab kōm̧m̧ane? Bōlen juon un kōnke jejjab lo jekjek ko rem̧m̧an eļan̄n̄e jej jerwane juon raan ak ruo―āinwōt an n̄ii ko n̄iim̧ tuum̧ im wōt ļo̧k eļan̄n̄e kwoj meļo̧kļo̧k in būraaj. Enan̄in aolep jekjek kein, nana im em̧m̧an, naaj waļo̧k tok ālik, aolep iien. Ak renaajitok.
Iiō ko ļo̧k iaar katōk ruo wūt ko jon̄an wōt juon ilo jikin kallib eo aō. Iaar katōk juon ijo edik an bōk meram in al, im iaar katōk juon ijo eļap an bōk meram in al. Iiō eo tok juon iaar jab jeļā oktak ko aer jen doon ilo an wūt kein ruo eddōk, ak kōrā eo ippa im n̄a kar etal n̄an juon mijen 3 iiō aetokan. Ke kōm̧ij ro̧o̧l tok, ikar bwilōn̄ kōn oktak eo eļap! Dāpdāp eo ejelet an bōk jidik al eaar kōm̧m̧an juon oktak eļap―aolep iien―ilo eddōkļo̧k eo an wūt ko. Ejja menin wōt ej waļo̧k ilo mour ko ad ilo ad leļo̧k kōj make kajjojo raan n̄an aolep unjen meram. Jemaron̄ jab jeļā juon oktak eo em̧ōkaj, ak jej jeļā bwe juon oktak ej waļo̧k ilowaad, im tōprak ko naaj waļo̧k ilo tore eo ekkar.
Ļōmņak in elam waan n̄an dāpij ekkatak ko rejelet kajjojo raan, kōn un im jibadbad em̧ool, maron̄ kōm̧m̧an juon oktak eļap ilo aoleperia ko in ami mour. Emaron̄ oktak ikōtaan apan̄ ilo juon mour jokene ak ineam̧m̧an im keidi kōm̧anm̧an eo am̧.
Emākijkij aō reilikļo̧k kōn mour e aō im ļōmņak etke ekar pen n̄an aō kālet n̄an etal n̄an juon mijen. Iaar m̧ad kōnke iaar luuji errem̧aanļo̧k eo aō kōn indeeo eo aō. Ikdeleel ko aō im aō raar jab juon wōt ippān ankilaan Irooj; ijoke, kālet eo eaar pidodo. Im etke raar jab juon wōt? Iaar ilo̧k n̄an im̧ōn jar eo im bōk m̧ōttan kwojkwoj eo ilo kajjojo Jabōt ―ak ikar jab mije wōt meļeļe eo an. Iaar jar, ak iaar baj etal wōt kōn kōm̧m̧an. Iaar riiti jeje ko rekwojarjar, ak jidikd wōt im ejjeļo̧k jibadbad em̧ool.
Ilo am̧ ron̄jake rainin, ij kōjatdikdik kwaar en̄jake, kōn unoojdikdik ko an Jetōb, ta eo kwoj aikuj kōm̧mane n̄an mour juon mour ewōr jibadbad in. Ij rōjan̄ kom̧ n̄an ļoor im̧we kein. Jab ebweer kōn ļōmņak ko kwar kōm̧m̧ani ak jab kōm̧m̧ani bwe ta eo Irooj ekar ba “A jon̄an emmakijkij in aer ukweļo̧k im kappukot jeorļo̧k bōd, kōn jibadbad em̧ool, kar jeorļo̧k aer bōd” (Moronai 6:8; kakkobaba eo kar kobaiktok).
Jino kiiō. Mour juon mour kōn eļap unin. Likūt kajoor eo n̄an dāpij katak ko kajjojo raan ilo jikin eo eaorōk ilo mour eo am̧. Ij kallim̧ur bwe juon iiō jen kiiō kwonaaj bōlen m̧ōņōņō bwe kwar jinoe ak kwoj kōtmene n̄an jinoe.
Ikōņaan bwe kwōn kejōkļo̧kjeņ kōn kajjitōk kein jilu. I kajjitōk ippām̧i bwe kom̧win kwaļo̧ki ilo social media, kōjerbal #ldsdevo.
M̧oktata: Komaron̄ ke kōm̧m̧ane? Komaron̄ ke kōm̧m̧ane men kein jilu reddik im relam waan? Komaron̄ ke kōjparok wōt bujek ko am̧ n̄an aolep iien keememej E (D&C 20:77, 79)? Komaron̄ ke kōm̧m̧ane iien n̄an jar kōn jibadbad em̧ool im ekkatak jeje ko rekwojarjar raan otemjej?
Kein Karuo: Enaaj ke jerbal? Kwoj tōmak ke kallim̧ur eo an Irooj? Kwoj tōmak ke bwe dāpij jekjek eo n̄an aolep iien bōk Jetōb eo an ippāmi naaj wōr oktak ilo mour eo am̧?
Āliktata: Ewōr ke tokjān?
Ij kam̧ool bwe ewōrtokjān im ej kōm̧m̧an eļap oktak. Ilo am̧ kōm̧m̧ane men kein, kwonaaj loe bwe men eo eaorōktata “etke” ijjelo̧kin men otemjej kwoj kōm̧m̧ane ej bwe kwōn iakwe Irooj im kile iakwe eo An eļap n̄an kwe. Kōm̧m̧an bwe kwōn loe lan̄lōn̄ eo eļap ilo am̧ pukōt wāppen im ilo meļeļe im kōm̧m̧ane Ankilaan. Ilo etan Jisōs Kraist, amen.
© 2015 jān Intellectual Reserve, Inc. Aolep jim̧we rej pād ippān. Kōmālim ilo kajin English: 12/14. Kōmālim an Ukook: 12/14. Ukook eo an “Living with a Purpose: The Importance of ‘Real Intent.’” Marshallese. PD10053116 874