61:17

En̄jake Meram eo

Elder Lynn G. Robbins

Jān Būreejtōnji eo an Jiljilimjuonn̄oul

Juon Joteen Ippān Elder Lynn G. Robbins

Nokon in Jota eo Ipeļaakin Laļ in n̄an Rūm̧m̧an Ded ro • Māe 3, 2015 • Salt Lake Tabernacle

Ro Jeiū im Jatū, ij karuwaineneik kom̧ n̄an Nokon in Jota an Aolep Rūm̧m̧an Ded ro Ipeļaakin Laļ in, im ij kōjenoļo̧k juon karuwainene eļap n̄an kom̧ ro renaaj kadiwōjļo̧k ilo iiō in jān jemenere—juon kōttōbar em̧m̧an im juon kam̧ool kōn tōmak eo ami im kōn iakwe eo ami n̄an Irooj. Ij kūr kom̧ n̄an ļoor waanjon̄ak ko an ro jet ijin ilo jotenin im wōnm̧aanļo̧k wōt kōn jerbal in ekkatak ko ami ilo jetōb emaron̄ ilo juon institute an kabun̄ ijo kom̧ij pād ie ak ak ilo university ko an Kabun̄. Ij kallim̧ur bwe kom̧ naaj wōnm̧aanļo̧k wōt im bōk tōl ko raorōk n̄an aolep kālōt ko ami raorōk ilo mour eo ami, barāinwōt jeļā kajjien ro me renaaj jipan̄ kōm̧m̧an oktak ko rem̧m̧an ilo mour ko ami.

Joteen in kom̧ naaj ron̄ aō kam̧ool kōn Irooj Jisōs Kraist im kōn gospel eo An. Kom̧ naaj bar ron̄ aō kōjerbal naan in “Ijeļā.” Ikōņaan kōmeļeļeik kom̧ wāween aō kar jeļā bwe E ej make wōt Nejin Anij, Ripinmuur im Rilo̧mo̧o̧r eo an Laļ, bwe gospel eo An em̧ool.

Ij barāinwōt kōņaan jipan̄ eok jeļā bwe naan in kam̧ool eo ami make ilo Irooj Jisōs Kraist im gospel eo An eļap an kajoor jān jon̄an eo kwōj watōke.

Ewi Naan in Kam̧ool Eo Aō ilo Kūrāāp in ilo Jon̄an Tōmak ko Ad?

Ikōņaan jinoe ilo aō kajjitōkin kom̧ n̄an kōm̧m̧ane juon ami make jerbal in etale. Lale ļain ņe laļ ilo kūraap ņe im kwaļo̧k ijo kopād ie ilo kūrāāp in kōn jon̄an naan in kam̧ool eo am.

Slide from a Powerpoint presentation given by Elder Lynn G. Robbins for May 3, 2015 CES Devotional.

Ilo laļ tata ej juon eo ejjab tōmak ilo Anij. Jon̄an eo epād ie im jenaaj leļo̧k n̄ane ej jiro̧. Ilo ilōn̄tata ej ņōmba 10, ak bōk juon jeļāļo̧kjen ewāppen kōn Jisōs Kraist im kōn gospel eo An. Ia eo kwon kar likūt eok make ilo kūrāāp in? Ij jeļā bwe elōn̄ iaami, renaaj kar leļo̧k n̄an e make jon̄an eo ediktata jān jon̄an eo me ekkar n̄an e.

Keememej jon̄an eo me kwar je kōn jon̄an tōmak eo am make bwe kwon loe eļan̄n̄e ewōr oktakin ilo tōreen aō kwaļo̧k, ilo ad kōmeļeļe kōn wāween ko rellōn̄ n̄an kōļapļo̧k tōmak ko me remaron̄ kōkajoorļo̧k juon naan in kam̧ool, im wāween ad kajjojo jipan̄ kōj make wōnm̧aanļo̧k ilo kūrāāp in im en̄jake aenōm̧m̧an im mōņōņo̧ eļap.

Alma ej kūr kōj kajjojo n̄an bōk bun̄tōn ne eo jinoin tata im m̧aanļo̧k ilo ļain in jon̄e tōmak eo “n̄an melijon̄i naan ko aō, im kōjerbal juon pilin̄ in tōmak, aaet, em̧ool eļan̄n̄e kom̧ maron̄ jab bar kōņaan tōmak”(Alma 32:27; eoon eo eaorōk kar kobaiktok).

Ikdeleel

Ļōmņak kein rej ellaajrak rej kwaļo̧k wāween jeļāļo̧kjeņ eo em̧m̧an n̄an kōm̧m̧ane bun̄tōn ne in kein kajuon n̄an bōk juon ikdeleel n̄an tōmak.

Ilo 1632 eaar ļotak juon rimālōtlōt in France, ikkijien bōnbōn, im juon riekkōn eo etan Blaise Pascal. Juon iaan men ko eaar loi ikkijien kōļmenļo̧kjeņ kōn bōnbōn ikijeen Wāween Jerbale, eo ejipan̄ science kōn wāween ko rem̧m̧an n̄an kōm̧m̧ani kālōt ko rejimwe—wāween eo em̧m̧antata n̄an kōm̧m̧ani kālōt ko rekkar. Kōn kōļmenļo̧jeņ in, rimālōtlōt Pascal eaar loe bwe ilo mour an armej rejjab maron̄ elļo̧k jān bet eo eļap ilo mour in: men̄e Anij emour ak jaab. Eaar erom juon men eo rej ņa etan Pascal Wager, kōn mour an juon armej—eļaptata kōn mour indeeo—ilo an waļo̧k ilo kūrāāp in:

Ilo jikin kane ilōn̄ ewōr ruo kālōt ko: Anij emour ak jaab. Ilo ļain kane jet ewōr bar ruo men ko kwoj kālōti: Imaron̄ kālōt n̄an tōmak ak jab tōmak.

Kobain uwaak ko rekkar rej ellaajrak āinwōt in:

Eļan̄n̄e Anij emour im ij tōmak im jerbal ekkar n̄an e, imaron̄ jolet e mour indeeo.
Eļan̄n̄e Ij tōmak ilo Anij im ejjab mour, ejjeļo̧k men iluuji.
Eļan̄n̄e ijjab tōmak im nōbar ak pokake Anij im E mour, ij kajejtokjān mour indeeo.
Eļan̄n̄e Ij jab tōmak ilo Anij im ejjab mour, ejjeļo̧k men imaron̄ bōke.
Bet eo an Pascal ej tōmak bwe kālōt eo em̧m̧antata ej n̄an tōmak bwe Anij emour im eo ejajeļo̧kjeņ emaron̄ kar bet n̄an jum̧ae Anij eo emour kōnke ewōr ippān men otemjej im ejjab kōņaan luuji im ejjeļo̧k men emaron̄ jolet e jān Anij.

Nejin eo ejerwaan enaaj kar ba bwe men ko mweien ej juon iien n̄an “kanooj, idaak, im lan̄lōn̄”(2 Nipai 28:7)—wōņeen eo edik n̄an jipan̄ ro rej luuj ilo iien jiāe ko n̄e kwoj ļōmņak kōn ta eo eluuji ak ewiini. Emaron̄ “wōr aer lan̄lōn̄ ilo jerbal ko iaar ilo jidik iien, [im] ej jab etto jem̧ļo̧k eo ej itok”(3 Nipai 27:11). Ettōņak eo an n̄an bōk lan̄lōn̄ im limo raar erom jet menin kamijak ko rekwaļo̧k mōjņo ko an ilo jetōb, ko ej en̄jaki ilo mour in im ej loe bwe “jerawiwi ejjan̄in kar mōņōņō”(Alma 41:10) im tokālik, ilo raan in ekajet eo, n̄e “naaj lo im jelm̧ae im naaj kwaļo̧k im̧aan Anij bwe ekajet ko An rejim̧we”(Mosaia 16:1). Ilo jem̧ļo̧kin, nejin eo ejerwaan, eaar ekkatak jān menin in bwe, devil eaar kabwebweiki kōn men bajjōk ko an im tōl e n̄an būrom̧ōj eļap. Āliktata, “būruōm̧ en jab bane ro ri kōm̧m̧an nana”(Jabōn Kōnnaan Ko 23:17).

Kam̧oolol bwe nejin eo ejerwaan eaar bar jepļaaktok—juon iaan katak ko rem̧m̧an im Rilo̧mo̧o̧r eo ekōņaan bwe jen ekkatak jān būrabōl in (lale Luk 15:11–32).

Katōk Ine eo—Jino Ekkatak

Alma ej kōmeļeļeik wāween an juon armej ewōr ikdeleel ippān maron̄ jino iaļen tōmak eo an:

“Kōtļo̧k bwe kōņaan in ej jerbal ilo kom̧, em̧ool m̧ae iien kom̧ij tōmak ilo wāween eo kom̧ maron̄ ņa jikin m̧ōttan naan ko aō.

“Kiiō, jenaaj keidi naan eo n̄an juon ine. Kiiō, eļan̄n̄e kom̧ij ņa jikin, bwe juon ine … en maron̄ kalbwini ilo buruōmi”(Alma 32:27–28; eoon eo eaorōk kar kobaiktok).

Katōk ine eo meļeļein emōj am jerbal ekkar n̄an ikdeelel eo am kōn kajjitōk ko reimwe ilo jerbal in etale in. Emōj am jino ekkatak kiiō.

Ekkar n̄an jeje ko rekwojarjar, wāween ekkatak in ej aikuj wōnm̧aanļo̧k wōt ilo wāween ko ruo: “Im kōnke aolep ej jab wōr aer tōmak, kom̧in kappukot ilo niknik im katakin doon naan ko in mālōtlōt; aaet, kom̧in kappukot jān bok ko rem̧m̧antata naan ko in mālōtlōt kappukot jeļā, em̧ool jān katak im barāinwōt jān tōmak”(K&B 88:118; eoon eo eaorōk kar kobaiktok).

Jeje ko rekwojarjar rej barāinwōt katakin kōj kōn ruo iaļ in ekkatak ko me Jetōb ej katakin kōj:

“Aaet, lo, I naaj ba n̄an eok ilo ļōmņak eo am im ilo būruōm, jān Jetōb Kwōjarjar eo, eo enaaj itok ioom̧ im eo enaaj pād ilo būruōm̧.

“Kiiō, lo, en̄in ej jitōbōn revelesōn”(K&B 8:2–3; eoon eo eaorōk kar kobaiktok).

Kajejjet Kilen Ekkatak ko im Iaļen Ekkatak ko

Mokta jen ami ro̧o̧l likļo̧k n̄an ļain in jon̄e tōmak eo, Ikōņaan bwe kwon kwaļo̧k men ko rej ippān doon ikōtaan kajejjet kilen ekkatak im iaļen ekkatak ko. Men ko rej jum̧aik doon rej lewōj jipan̄ kōn wāween ad wōnm̧aanlo̧k ilo ļain in jon̄e tōmak eo.

Ke Josep Smith eaar katak kōn jar itok jān an ekkatak, eaar riit jān Baibōļ eo, “A eļan̄n̄e jabdewōt iami ej aikwij meletlet, en kajitōk kin e iben Anij, eo Ej wujlep nōn armij otemjej, im jab enoik kake, im naj lelok n̄ōn e”(Jemes 1:5).

Josep eaar katak kōn jar jān tōmak ke eaar kōm̧m̧ane ekkar n̄an tōmak eo an im eaar etal im jar ilo bukwin wōjke ko rekwojarjar.

Ilo lōn̄ in kūraap in kwoj loe ruo iaļ in ekkatak ko—ilo bōro im ilo ļōmņak.

Kakobaik Ekkatak kōn Katak kōn Kōļmenļo̧kjen

N̄e jej pukōt jeļāļo̧kjen ilo ad ekkatak, Irooj ej kōņoņo ilo lōmņak ko ad ilo juon jekjek eo eim̧we. Ilubwiljin naan ko jet rekkar ikkijien jemjerā eo ikōtaan “katak” im “kōļmenļo̧kjeņ,” jemaron̄ kar kakobaik laajrak in naan kein, ko rej kōmeļeļeik wāween ejaake juon ine:

Katōk

Ļōmņak ko
Ikdeleel ko
Itok Limo
Etale
Katak
Kappukot
Ļōmņak
Kajjitōk ko
Kejōkļo̧kjeņ

Kajjitōk ko reim̧we rej kōm̧m̧an bwe juon en lukkuun lōmņak itok wōt jen tōl an Jetōb eo ej bōk eok n̄an ļābōļ in jeļāļo̧kjen eo juon, ijo lōmņak ko im en̄jake ko rej juon wōt ilo bōro.

Kakobaik Ekkatak kōn Katak Ippān Bōro eo

Ine eo ej jino an eddōk, im kwoj jino am̧ en̄jake im̧we ko jān Jetōb eo. Bōro wōt, ak en̄jake ko reim̧we, me remaron̄ ukōt juon ļōmņak n̄an juon tōmak.

Eddōk

En̄jake
Tōmak
Meļeļe
Enno̧
Bōro eo em̧weiūr
Kōļapļo̧k tōmak im kōjatdikdik
Im̧we n̄an m̧akūtkūt

Alma ej kwaļo̧k e ilo wāween in: “Eļan̄n̄e e lukkuun ine eo, ak ine eo em̧m̧an, eļan̄n̄e kom̧ij jab joļo̧k kōn jab tōmak eo ami, bwe kom̧ naaj jum̧ae Jitōbōn Irooj, lo enaaj jino ļapļo̧k ilo kom̧; im n̄e kom̧ij en̄jake an̄in ļapļo̧k kein an, kom̧ naaj jino ba ilo kom̧ make—E eaikuj bwe in ej ine eo em̧m̧an, ak bwe naan eo em̧m̧an, bwe ej jino n̄an ļapļo̧k ilo buruō; aaet, ej jino kōmeramļo̧k aō meļeļe, aaet, ej jino in kaijoļjoļ n̄an eō”(Alma 32:28; eoon eo eaorōk kar kobaiktok).

Ilo ad iminene kōn naan in meļeļe ilo kōļmenļo̧kjen ko ad, jeje ko rekwojarjar rej kobaik meļeļe n̄an bōro, āinwōt in: “Im burueer raar peļļo̧k im raar meļeļe ilo burueer naan ko Eaar jar”(3 Nipai 19:33). Ilo an kōnono kōnJemes 1:5, Josep ekar ba, “Ejjan̄in kar wōr jabdewōt eoon jān jeje ko rekwōjarjar enan̄in kar itok kōn eļap kajoor n̄an būruōn armej jān eoon in ilo iien in n̄an buruō”(Josep Smith—Bwebwenato 1:12).

Kōn en̄jake kein, Alma eaar ba, “Kiiō lo, eban ke ļapļo̧k ami tōmak? Ij ba n̄an kom̧, Aaet; mekarta ejjjan̄in kar eddek n̄an jeļāļo̧kjeņ eweeppān”(Alma 32:29; eoon eo eaorōk kar kobaiktok).

Ejjan̄in bōk juon jeļāļo̧kjeņ eweppān. Kōn menin, kōn bōro eo emōj un̄uri, ej im̧we kōj n̄an bar bōk juon bun̄tōn ne ilo ļain in jon̄e tōmak in. Ekkar n̄an Josep, emōj im̧we e n̄an kōm̧m̧ane im bōk kūr ko an jetōb bwe en kar jar. Ej bōk “ejjeļo̧k [juon] kam̧ool m̧ae ālkin mālejjon̄ in [tōmak] eo an”(Ether 12:6).

Kakobaik Ekkatak kōn Katak kōn Kōļmenļo̧kjen

Ekkatak ilo ad tōmak emenin aikuj bwe en jerbal ekkar n̄an en̄jake ko im tōmak ko.¹ Rilo̧mo̧o̧r eo eaar letok kūr in n̄an katak ilo ad tōmak ke Eaar ba, “Eļan̄n̄e jabdewōt armej e kōņaan kōm̧m̧ane ankilaan, enaaj jeļā kōn naan in katak eo, eļan̄n̄e e jān Anij, ak ij kōnono kōn N̄a wōt”(Jon 7:17 eoon eo eaorōk kar kobaiktok). Ilo eoon in Rilo̧mo̧o̧r eo ej katakin kōj bwe kōm̧m̧ane ej jerbal in tōmak eo me ej ukōt juon tōmak n̄an jeļāļo̧kjeņ. Bwe Ej rōjan̄, “Men̄e kom̧ jab tōmak Eō, kom̧win tōmak jerbal ko: bwe kom̧win jeļā, im meļeļe bwe Jema ej ilo N̄a, im N̄a ilo E”(Jon 10:38; eoon eo eaorōk kar kobaiktok).

Ilo kōnono kōn naan in jeļā, Alma ej ba:

“Im kiiō, lo, kōnke kom̧ ar kajjion̄ mālejjon̄e, im kalbwini ine eo, im ej juļ im eo̧n̄, im ej jino eddek, kom̧ij aikuj jeļā bwe ine eo em̧m̧an.

Im kiiō, lo, eweeppān jeļāļo̧kjeņ eo ami ke? Aaet, ami jeļāļo̧kjeņ e weeppān ilo men in, im ami tōmak ej jerbal; im men in kōnke kom̧ jeļā, … kom̧ jeļā bwe naan eo eaar juļ ilo kom̧, im kom̧ barāinwōt jeļā bwe eaar eo̧n̄ļo̧k”(Alma 32:33–34; eoon eo eaorōk kar kobaiktok).

Am jerbale tōmak eo am̧ ekar lewaj n̄an eok jeļāļo̧kjeņ.

Ilubwilijin naan ko jet jemaron̄ ippān doon ilo ekkatak ilo tōmak im kōn kōļmenļo̧kjeņ, jemaron̄ kobaiktok laajrak in:

Eddōkļo̧k

Kōm̧m̧ane
Jeļāļo̧kjeņ (wāppen ilo men eo)
Jar
Ukweļo̧k
Ukōt Mwilid
Pokake
En̄jake
Nemake

Alma ej kōjerbal naan in nemake ilo elōn̄ wāween ko rej make wōt ilo an kōnaan kōn nemake meram eo. Ron̄jake:

“O innām, ejjab m̧ool men in ke? Ij ba n̄an kom̧, Aaet, kōnke en̄in ej meram, im jabdewōt men eo ej watōke meram, kōnke maron̄ kile, kōn menin kom̧ij aikuj jeļā bwe ej em̧m̧an, im kiiō lo, ālkin ami kar nemake meram in ej jeļāļo̧kjeņ eo ami ewāppen ke?

“Lo ij ba n̄an kom̧, Jaab; im kom̧in jab aikuj in kajekdo̧o̧n tōmak eo ami, bwe kom̧ ar kōjerbal ami tōmak n̄an kalbwini ine eo bwe kom̧in maron̄ kajjion̄ mālejjon̄e n̄an jeļā eļan̄n̄e ine eo eaar em̧m̧an”(Alma 32:35–36; eoon eo eaorōk kar kobaiktok).

En̄jake meram eo im m̧ōņōņō kake kar lewaj n̄an kom̧ juon jeļāļo̧kjeņ ewāppen ilo men eo, ak jeļā bwe ine eo em̧m̧an. Meram eo ej kūr kom̧ n̄an itok n̄an Jisōs Kraist, “im kajoor eo an Anij [ej] jerbal menin bwilōn̄ ko ilo [kom̧] … im [ukōt tok kom̧] n̄an Irooj”(Alma 23:6).

Kakobaik Ekkatak kōn Katak kōn Bōro

Alma ej wōnm̧aanļo̧k wōt im ba: “Im lo, ke wōjke eo ej jino eddōk, kom̧ naaj ba: Jen kōņin kōnke eļap kōjparok, … kōn niknik eļap, im kōn kijejeto, reim̧aanļo̧k n̄an le eo leen. …

“… Lo, jidik wōt iien im kom̧ naaj bōk [ak nemake] leen eo, etōn̄al ilōn̄in men otemjeļo̧k eo etōn̄al”(Alma 32:37, 41–42; eoon eo eaorōk kar kobaiktok).

Kōņin im Nemake

Oktak
Erom
Oktak eo ekajoor an bōro
Peptaij
Jetōb Kwojarjar
Kōjeraam̧m̧an ko
Lan̄lōn̄ im Mōņōņō
Kōņaan in kwaļo̧k
Erom āinwōt Jisōs Kraist

Nemake leen eo ej bōkļo̧k kōj n̄an ijo jej ekkatak ilo ad tōmak im būruwōd rej ippān doon. Ijin jej lo kōj make bwe le eo leen ej, ilo m̧ool, etōn̄al im eaorōk. Ļoor Jisōs Kraist, im kōm̧m̧an Ankilaan, ej kōtļo̧k ad en̄jake Pinmuur eo An im gospel eo ilo elōn̄ wāween ko. Moktaļo̧k ilo jekjek in bōro ko ad rekar lukkuun in m̧weiūr. Kiiō “juon oktak ekajoor [ilo] būruwōn” ej waļo̧k, ilo an Alma kōmeļeļeik(Alma 5:12), im Jetōb eo ej ukōt en̄jake ko ad im jeļāļo̧kjeņ eo n̄an juon oktak eo em̧ool.

Ke jekar “oktak tok n̄an Irooj”(Alma 23:8), jej ļoor Rilo̧mo̧o̧r eo jān ad kar peptaij im bōk menin letok eo an Jetōb Kwojarjar. Ilo ad “nemake leen ko” gospel eo, jej en̄jake kōjeraam̧m̧an ko im kain lan̄lōn̄ im m̧ōņōņō eo jekōņaan in kwaļo̧k ippān ro jet, āinwōt Liai ekar kōm̧m̧ane: “Im ke iaar m̧ōn̄ā leen wōjke eo eaar kobrak aō kōn eļap otem ļap lan̄lōn̄; kōn menin, iaar jino aō ikdeelel bwe baam̧le eo aō en m̧ōn̄ā barāinwōt; kōnke iaar jeļā bwe eaar enno̧ļo̧k jān jabdewōt leen otemjeļo̧k”(1 Nipai 8:12).

N̄an “oktak tok n̄an Irooj,” ilo juon wāween em̧ool, ej juon oktak ekajoor im ej ukōt nememe eo n̄an erom āinwōt Jisōs Kraist, jān “[kōtļo̧k] e n̄an karreelel ko an Jetōb Kwōjarjar, im [utūkļo̧k] armej eo ilo lukkuun biktokin im [erom] rikwōjarjar kōn pinmuur eo an Kraist Irooj”(Mosaia 3:19). Ilo lukkuun meļeļein naan in, oktak ko ad reban lukkuun dedeļo̧k m̧ae iien jej eddōkļo̧k ilo jetōb “m̧ae adwōj tōpare juon wōt tōmak n̄an jon̄an rūttoun an Kraist obrak”(Epesōs 4:13). Menin enaaj juon jibadbad eaitok kitien im ito itak kōn tōmak ilo E im kōn jouj eo An ak jipan̄ eo jān lan̄ (lale 2 Nipai 25:23).

Oktak in eaitok kitien enaaj kallikar aikuj ko n̄an wōnm̧aanļo̧k ilo naajdik jān jo koņaad n̄an kōjekdo̧o̧n jorrāān ko me Alma ekar kōmeļeļeiki: “Ak eļan̄n̄e kom̧ij jab kōjparok wōjke eo, im jab ļōmņak kōn kōņin, lo ejjāmin naaj le okran, im n̄e bwil jān aļ ej itok im tile, … ej m̧ōņakņakļo̧k”(Alma 32:38).

“Kōn menin, kom̧ aikujbun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e kom̧ naaj bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo: Kom̧ naaj bōk mour indeeo”(2 Nipai 31:20; eoon eo eaorōk kar kobaiktok).

Oktak in ekajoor im lukkuun in oktak n̄an Irooj ejjab meļeļein eban bar wōr ad kajjitōk. Ijoke, nemake jen en̄jake meram eo, kajjitōk ko rej katakin kōj kōn ikdeleel n̄an ekkatak ijjeļo̧kin am pere bwe emaron̄ bōbrae kōj jān ad eddōkļo̧k ilo tōmak. “Im jabdewōt eo ej tōmak ilo Eta, impere ejjeļo̧k ippān, n̄an e Inaaj kapene aolep naan ko Aō, em̧ool n̄an jeban ko in laļ”(Mormon 9:25).

Em̧m̧an kajjitōk. Rej kōm̧m̧an bwe jen lukkuun ļōmņak, kappukot, im jar. Josep Smith ekar wōr wōt an kajjitōk ilo aolepān mour eo an. Eiten aolepān jepta ko ilo Katak im Bujen ko rej kwaļo̧k tōprakin kajjitōk ko an ilo jar ko an n̄an Irooj, ļain im bar ļain, naan in kain̄i im bar naan in kain̄i. Ejja wāween eo wōt in im Rilo̧mo̧o̧r eo ekar katak: “Im Eaar jab bōk tarlep eo ilo jinoin, a ar wōnm̧aanļo̧k jān jouj n̄an jouj, m̧ae An kar bōk tarlep eo”(K&B 93:13).

Juon Jelāļo̧kjeņ Ewāppen

Bar ro̧o̧l n̄an Ļain in jon̄e tōmak in, jej kōkaļļeiki ilōn̄tata kōn juon “jeļāļo̧kjeņ eweppān kōn Jisōs Kraist im kōn gospel eo An.”

Jen etale naan in “jeļāļo̧kjeņ eweppān.” Ej kōņaan kōn “nemake meram,” Alma ekar katakin bwe “ami jeļāļo̧kjeņ e weeppān ilo men in”(Alma 32:34). Ilo eoon in ej elaajrak, lale ejja naan in wōt rikanaan Mormon eaar kōjerbale, “jeļāļo̧kjeņ eweppāņ,” ilo an kakobaik kam̧ool eo an kōn ejja meram in wōt:

“Bwe lo, ro jeiū im jatū, em̧ōj lewōj n̄an kom̧ n̄an ekajet, bwe kom̧in maron̄ jeļā em̧m̧an jān nana; im wāween eo n̄an ekajet ej kanooj alikkar, bwe kom̧in maron̄ jeļā kōn juonjeļā eweeppān, āinwōt raan leplep jān bon̄ nijōk.

“Bwe lo, Jetōb in Kraist em̧ōj leļo̧k e n̄an aolep armej, bwe en maron̄ jeļā em̧m̧an jān nana; kōn menin, ij kwaļo̧k wāween eo n̄an ekajet; bwe men otemjeļo̧k ej karuwainene n̄an kōm̧m̧an em̧m̧an, im n̄an karreel n̄an tōmak ilo Kraist, kar jilkinļo̧k e jān kajoor eo im mennin leļo̧k eo an Kraist; kōn menin kom̧ maron̄ jeļā kōn juonjeļāļo̧kjeņ eweeppān e ej jān Anij. …

“Im kiiō, ro jeiū im jatū, kōnke ij lo bwe kom̧ jeļā meram eo kom̧ij maron̄ ekajet jān e, meram eo ejmeram an Kraist, lale bwe kom̧in jab ekajet ilo bōd”(Moronai 7:15–16, 18; eoon eo eaorōk kar kobaiktok).

Rikanaan ro jimo̧r rej kam̧ool bwe ej Meram eo an Kraist ej letok n̄an kōj juonjeļāļo̧kjeņ ewāppen kōn m̧ool eo. Bar armej ro ipeļaakin laļ in rej kile bwe ewōr ippāier jeļā kōn jim̧we im bōd. Rej kile bwe Meram eo an Kraist ilo ad kōjerbal naan in conscience, eo me ej itok jān kajin Latin conscientia, ak “jeļāļo̧kjeņ eo an juon make.”²

Kōn meram in ej tōl kōj ilo m̧ool, jej wōnm̧aanļo̧k im eddōkļo̧k ilo ļain in ej jon̄e tōmak eo ļain im bar ļain, naan in kain̄i im bar naan in kain̄i (lale 2 Nipai 28:30;K&B 98:12; 128:21), “im jān kajoor eo an Jetōb Kwōjarjar kom̧ maron̄ jeļā m̧ool eo an men ko otemjeļo̧k”(Moronai 10:5; eoon eo eaorōk kar kobaiktok).

Ilo juon iien eo ekadu jenaaj kajjieon̄ kōm̧m̧ane etale in an Alma bwe kom̧in maron̄ kakeememej kōn wāween ad en̄jake meram im wāween an letōk n̄an kōj juon jeļāļo̧kjeņ eweppān.

Jum̧ae ej Kwaļo̧k Mool eo

Mokta jen ad wōnm̧aanļo̧k kōn etaļe in, eaorōk n̄an kakememej bar mōttan ko raorōk ilo jerbal in. Jej katak ilo 2 Nipai 2 bwe emennin “aikuj an wōr … jum̧ae ilo men otemjej”(2 Nipai 2:11). Armej rej “edjon̄e m̧eo eo, bwe ren maron̄ jeļā wōņāān men eo em̧m̧an”(Moses 6:55). Ājmour, n̄an waanjon̄ak, ej ekkatak eo mokta kōn oktōn ikkijien nan̄inmej ko; aņemkwoj, ekkatak ko ikkijien kakkure ak kamakoko; mōņōņō, ekkatak ikkijien būromōj, im ko eirļo̧k wōt. Im āinwōt kabwilōn̄lōn̄ in ļon̄ fireflies ko, ilo an jab m̧ōņōņō kōn meram n̄e ejjeļo̧k marok.

Jum̧ae ejejjet n̄an jeļāļo̧kjen ko ad im ad mōņōņō. Ilo an ejjeļo̧k, m̧ool eo ettino an waļo̧k, āinwōt kwoj kajejtokjen kōto m̧ae iien eo wōt ej jepjep menwam̧ im kwoj aikuji. Kōnke Meram eo an Kraist ej waļo̧k aolep iien, elōn̄ armej rejjab kile Jetōb ilo mour ko aer, āinwōt ri Leman ro ilo 3 Nipai 9:20 ro me “kar peptaij kōn kijeek im kōn Jetōb Kwojarjar, im rejjab jeļā kake.”

Jum̧ae ejjab waļo̧k wōt ak ej kalikkar m̧ool eo ak kwaļo̧k aorōkin kajoor, lan̄lōn̄, im mōņōņō. N̄an waanjon̄ak, eaar nemak meo̧ ak en̄jake nana in mour kōn nejin eo ejerwaan eo eaar kile bwe eaar kajejtokjen im jerwaane mour eo em̧m̧an im etōn̄al ilo an em̧m̧an dettan.

Ej metak wōt im nan̄inmej me jemaron̄ lo aorōk in ājmour ko ad. Eļan̄n̄e en kar kōj juon armej eo ejjab m̧ool, jej kaorōk m̧ool. En̄jake jerbal in riab ak lej, jej kaorōk iakwe im jouj—aolep kōn juon “jeļāļo̧kjeņ ewāppen,” ilo aer nemake leen ko kajjojo kōn meram eo epād ilo kōj. Jeļāļo̧kjeņ ewāppen ej itok jān leen eo leen, kōn jum̧ae ilo men otemjeļo̧k. Pokake kien ko an Anij ej kalim̧ur kōn mōņōņō eo ejjeļo̧k jem̧ļo̧kin, eddōkļo̧kjān jum̧ae, jabeļļā jān e. “Juon rijjerakrōk eo ekapāāl ejjab aikuj in ejjerakrōk ilo lom̧alo eo eļae.”³

Ļōmņak kōn naan in jān Rikanaan Josep Smith: “N̄an kam̧ool jum̧ae ko, m̧ool enaaj waļo̧k.”⁴

Im menin juon jān Brigham Young: “Aolep m̧ool rej kwaļo̧k kam̧ool itok jān menin jum̧ae ko.”⁵

Jerbal in Etale Tōmak

Kiiō—jen kōtļo̧k bwe kom̧ en erom ro rej bōk koņaer ilo etale in ilo am ļōmņake jejjo “n̄an erom” kien ko, ak mwūl ko an Kraist, im kōn oktōn men kein. Ilo am ļōmņak kōn kajjojo iaier, Meram eo an Kraist ilo kwe ej aikuj kam̧ool ilo ļōmņak ņe am̧ im būruōm̧ bwe kajjojo m̧wil ko an Kraist rem̧man, im oktōn ej nana:

Iakwe ej oktan Kōjdat, illu, jum̧ae
M̧ool ej oktan Riap, mo̧n, ko̧o̧t
Jeorļo̧k bōd ej oktan iden oņe, ilulu, matōrtōr
Jouj ej oktan lej, illu, jememe
Kijenmej ej oktan jidimkij in illu, iakweļeel, jaje kōm̧m̧aanwa
Ettā bōro ej oktan Utiej Bōro, dike katakin, kōnkōm̧m̧an
Rikōm̧m̧an Aenōm̧m̧an ej oktan poktak, jepel bōro, kūtōtō
Tiljek ej oktan jowan, ebweer, aineļap

Erkein rej jet iaan m̧wil ko an Kraist, ak ebwe n̄an ad etale n̄an kallikar wājepdik eo an ine in.

Ilo ad lukkuun ļōmņak kake laajrak in kwoj kile bwe emōj am jeļā kōn kajoor eo, m̧ool eo, im em̧m̧an ko an kajjojo m̧wūl, juon ļo̧k juon, kōn elōn̄ iminene ko emōj kapene. Leen ko rem̧m̧an rej itok jān kam̧ool im errā—nem eo neman. Kam̧ool eo ej itok jān am m̧ōn̄ā, leen kōn leen im ļain im bar ļain, kajjojo kōn juon “jeļāļo̧kjeņ ewāppen.” Bōlen en̄in ej meļeļein an Rijilōk Paul ba, “Kom̧in melejon̄ men ko otemjeļo̧k; kōjparok wōt men ko remōn”(1 Tessalonika 5:21; eoon eo eaorōk kar kobaiktok). Eļan̄n̄e kwon kar kakobaik men kein im m̧wil ko jet ilo mour eo am, eļapļo̧k am ettoļo̧k ilo ļain in jon̄e tōmak eo in jān jon̄an eo kwoj ļōmņak kopād ie.

Ijoke, en̄in men eo wōt inkar ņa etan naan in kam̧ool an ro ilo terrestrial, ak aibojooj an allōn̄. Juon armej eo em̧m̧an im emijak Anij ilo kabun̄ ko jet ewōr ippān ejja naan in kam̧ool in wōt kōnke epād ippān Meram eo an Kraist, eo me Mormon ej kōnono kake, im emōj an bōk jidikin gospel eo An.

Jerbal in Etale Tōmak in—Ļābōļ Eo Tok Juon

Naan in kam̧ool eo an ro ilo celestial ak aibojooj an al ej itok ilo an juon pukōt “aolep men ko an Jemān (lale K&B 76:75–78; 93:19). N̄e juon armej ej peptaij im erreo n̄an bōk menin letok eo an Jetōb Kwojarjar, emaron̄ bōk juon Meram Eļap an Kraist, āinwōt kar je ilo eoon eo ilo bok in Mormon: “eļan̄n̄e en̄in ej ikdeelel eo an būruōmi, ta ippemi ņae peptaij ilo etan Irooj, … bwe E en maron̄ lutōkleplep eļapļo̧k Jetōb eo An ioomi ”(Mosaia 18:10, eoon eo eaorōk kar kobaiktok).

Būreejtōn Dieter F. Uchtdorf eaar katakin kōj bwe jej eddōk ļo̧k ilo meram. “Ilo ad kōpeļļo̧k būruōd im ad lōmnak n̄an Anij, enaaj ļapļo̧k an meram in lan̄ un̄ūr mour ko ad.”⁶

“Im e eo ej bōk meram, im wōnm̧aanļo̧k wōt ilo Anij, ej bōk eļapļo̧k meram; im meram in ej meramļo̧k im meramļo̧k m̧ae raan eo eweeppān.”(K&B 50:24).

Ijjab aikuj ba n̄an kom̧ bwe ilo an ļapļo̧k meram ej kōkm̧anm̧anļo̧k ad loļo̧kjen—kwojeļā men in. Rikanaan Josep Smith eaar ba juon armej erreo mour eo an ej kwaļo̧k jim̧we, im ealikkar an loļo̧kjen, im eļapļo̧k an mōņōņō.”⁷

Kōn ļapļo̧kin meram eo me kwoj loe, jen kōjerbal etale in n̄an ļābōl eo an celestial, im lale oktakin jet iaan katak ko me rejeņoļo̧k ilo Kabun̄ eo an Jisōs Kraist im Armej ro Rekwojarjar ilo Raan ko Āliktata ippān ro jet ejjeļo̧k meram ippāer:

Anij ej Jemād, im jaar kōm̧anm̧an ilo nememein wōt E im oktan ej Ejjab lukkuun Jemād epen meļeļe kōn E, jejjab jeļā kajjien
Kōlaajrak ko An kōn rikanaan ro im rijilōk ro im oktan ej kōjejtokjen kōlaajrak ko An Ekar ejaaki
Irooj ej juon Anij in kōlaajrak, ej letok tōl n̄an ro rej kabwijer kii ko an priesthood im oktan ej Pok, ainikien ko roktak, “jetōb ko renana”(K&B 50:2)
Malim eo an Priesthood im kūr jān Anij im oktan ej juon tiikree ikkijien kabun̄; ekkāleel in armej, ak kile er make
Kain̄i ko im bujen ko im oktan rej mour ilo an ejjeļo̧k an inepata.
Ajri ro ejjeļo̧k aer jeļā im oktōn ej peptaij nin̄nin̄
Bok in Mormon, kam̧ool eo kein karuo im oktan ej Baibōļ eo, juon wōt kein kam̧ool
Jerbal n̄an ro remej ilo Tam̧peļ im oktan ej tile juon kāāntōl im jar kōn ro remej.
M̧are im baam̧le ko n̄an indeeo im oktan ej mej wōt emaron̄ kōjepel kōj

Ekamōņōņō ilo ad keidi m̧ool eo ippān menin jum̧ae ko. Ej jipan̄ kwaļo̧k men eo ealikkar, bwe men eo ettino̧ en pidodo ad loe. Jej loe bwe eļapļo̧k ad jeļā jān jon̄an eo jej ļōmņak jejeļā. Ej aikuj imwe kōj n̄an wōnm̧aanļo̧k wōt n̄an “kappukot ilo niknik meram eo an Kraist … im … ekkejel pen ioon men otemjej em̧m̧an”(Moronai 7:19).

“E Mōņōņō Ro Raar Jab Lo, im Rej Tōmak”(Jon 20:29)

Jen mōk bar etale juon kein kam̧ool ekabwilōn̄lōn kōn tōmak im naan in kam̧ool.

Unin Tōl eo n̄an Jeje Ko ej kwaļo̧k bwe “[tōmak] tōmak eo em̧ool ej aikuj pedped wōt ioon Jisōs Kraist bwe en maron̄ tōlļo̧k juon armej n̄an lo̧mo̧o̧r. …

“[Ej] āinwōt lōke kōn men ko jej kōjatdikdik kōj kaki, reel būruōd kōn men ko je jab loi m̧ool [Hibru 11:1].”⁸

Āinwōt ekabwilōn̄lōn̄ bwe m̧ool in tōmak ilo Jisōs Kraist ej “tōmak ilo ad jab loe” ilo an laļ in tōmak ke men eo kwoj “loe ej m̧ool in tōmak.”

Piktokin armej ej lo laļ in kōn en̄jake ko, kōkalļe ko repen n̄an kam̧ooli. Im kiiō jeje ko rekwojarjar rej obrak kōn waanjon̄ak ko kōn ro emōj aer bōk kam̧ool jen aer kar lo Anij im kajoor eo an kōn en̄jake ko aer make ilo aer jab oktak tok n̄an Irooj.

Leman im Lamuel rekar loe juon enjeļ (lale 1 Nipai 3:29). Rekar ron̄ ainikien Irooj eo me “kar kanooj kauweik er”(1 Nipai 16:39). Rekar en̄jake kajoor eo an Anij ke Nipai ej eļo̧ke pein m̧aanļo̧k im “Irooj eaar kawididdid er”(1 Nipai 17:54). Rekar nemake im etun̄i: “Inaaj kōm̧m̧an bwe m̧ōn̄ā eo kijōmi en tōn̄al, bwe kom̧in jab kōmat e.”(1 Nipai 17:12). Ejjelo̧kin an lōn̄ kōttan an waļo̧k im rej loe im ron̄, ak rōļakkar karmejjete. Ilo aer kar loe raar ke tōmak?
Ke Moses eaar tōl ro nejin Israel jān āneen Egypt, raar kam̧ool kōn mejāer nan̄inmej ko, mōttan kijeek ko, ilo an kar kōjepel Lomalo Ekilm̧ur, ilo aer kar edjo̧n̄e manna—raar loe im en̄jaki kōn aolep en̄jake ko ļalem. “Men̄e kar tōl er, Irooj aer Anij, aer Ripinmuur, ej ilo̧k im̧aer, tōl er ilo raan im kōmeram er ilo bon̄, im kōm̧m̧ani aolep men ko raar ekkar n̄an an armej būki, raar kapene burueer im pinej koļmānļo̧kijeņ ko aer, im kōnono ņae Moses im ņae Anij em̧ool im emour”(1 Nipai 17:30). Rejjab tōmak kōn men eo rej loe kōn mejāer!
Ebar lōn̄ waanjo̧n̄āk ko rej āinwōt juon ilo jeje ko rekwojarjar, ak waanjon̄ak eo ekar reilikļo̧k kōj ej kōn juon eo ejjeļo̧k an tōmak eo ekar jum̧ae Rilo̧mo̧o̧r eo men̄e eaar loi menin kabwilōn̄lōn̄ ko eaar kōm̧m̧ani im̧aan Mejān. “A men̄e Ear kōm̧m̧an elōn̄ kakōļļe im̧aan mejeir, re jab tōmak E”(Jon 12:37; barāinwōt lale K&B 138:26).

Ekanooj lōn̄ waanjon̄ak ko rejjab kam̧ool katak ko ilo an ba bwe men eo kwoj loe kwoj tōmake. Ro rej kōjatdikdik kōnjuon en̄jake eo ekabwilōn̄lōn̄ n̄an jipan̄ kōmeļeļeik naan in kam̧ool ko aer rejjab kile bwe kam̧ool eo eļap im kam̧ool eo an Jetōb ej itok n̄an kōj aolep raan, ilo elōn̄ wāween ko reddik, iien eo āliktata kwar kōkaļeiki eoon ko am. Ļōmņak kake menin. Unin am kōkkaļļeik eoon ko ej kōnke ewōr juon en̄jake kwar en̄jake ilowa, im “mōņōņō!” Juon Ļōmņak ekar im̧we kōj ej revelesōn.

Bar juon waanjon̄ak kōn revelesōn ej ilo am bōk imwe n̄an jouj ak kōm̧mani jerbal ko rem̧m̧an, “bwe men otemjej ej karuwainene n̄an kōm̧m̧an em̧m̧an … kar jilkinļo̧k e jān kajoor eo im men in leļo̧k eo an Kraist”(Moronai 7:16). Meram eo an Kraist ej waļo̧k aolep iien! Kwoj nemake aolep raan. Im jān unoojdikdik kein, men ko reddik “ jān men ko reddik ej jebarļo̧k men eo eļap”(K&B 64:33).

“Im jān kajoor eo an Jetōb Kwōjarjar kom̧ maron̄ jeļā m̧ool eo an men ko otemjeļo̧k”(Moronai 10:5)

Komaron̄ ke ļōmņak kōn juon eo ilo bok in Mormon eo eaar lo juon enjeļ im eaar tōmak? Ejim̧we ke kwoj ļōmņak kōn Alma eo edik. enjeļ an Irooj eaar waļo̧k n̄an er; im eaar wanlaļtak āinwōt n̄e eaar pād ilo juon kōdo̧; im eaar kōnono āinwōt n̄e eaar kōn ainikien jourur”(Mosaia 27:11). Kwojeļā aolepān bwebwenato ne—ukwelo̧k eo an Alma im an kar kwaļo̧k naan.

Alma ekar tōmak ke ekar loe? Jaab! Etke? Kōnke ejjan̄in kar kōjerbal anemkwoj in kālet eo an ilo an ekkatak im tōmak im ejjan̄in kar jar n̄an jeļā m̧ool eo. Juon men eo kwoj loe kōn mejem ejjab meļeļein kwonaaj kajju tōmak ak bōk juon naan in kam̧ool, āinwōt an kam̧ool ilo elōn̄ waanjon̄ak ko ikar kwaļo̧k m̧oktaļo̧k. Alma make ej kōmeļeļeik wāween an kar ejaake naan in kam̧ool eo an, im ejjab kōn an kar enjel eo waļo̧k n̄an e. Ilo m̧ool, ejjeļo̧k men ej kwalo̧k ilo naan in kam̧ool eo an kōn an kar lo juon enjeļ.

“Im ej jab aolepān in. Kom̧ij jab kōtmāne bwe I jeļā men kein make ke? Lo, ij kam̧ool n̄an kom̧ bwe I jeļā men kein ko iaar kōnono kaki re m̧ool. Im ekōjkan ilo ami kōtmāne bwe I jeļā kōn aer m̧ool?

“Lo, ij ba n̄an kom̧ men kein kar kwaļo̧k n̄an eō jān Jetōb Kwojarjar an Anij. [Meram eo.] Lo, iaar jitlo̧k im jar elōn̄ raan ko bwe in maron̄ jeļā men kein n̄an eō make. Im kiiō i jeļā make bwe rem̧ool; bwe Irooj Anij Eaar kwaļo̧ki n̄an eō kōn An Jetōb Kwōjarjar; im en̄in ejjitibōn revelesōn eo ej ilo n̄an”(Alma 5:45–46; eoon eo eaorōk kar kobaiktok).

Juon “kakkōl n̄an oktak” im juon naan eo ekadu n̄an ukōt m̧wūl emaron̄ waļo̧k eo jān ijoko lik, ilo ad en̄jake, ak aitok an pād, āinwōt Laman im Lemuel. Juon naan in kam̧ool epen emaron̄ itok jān ijoko tulik tulowa, ilo an juon bōk jeļālo̧kjen itok jen an katak im an tōmak kōn Jetob Kwojarjar eo ej kōddōkļo̧k gospel eo “kōn mōttan ko ilowa, im [je] ilo būruōer”(Jeremaia 31:33). En̄ņe ej unin an RiNipai ro, raar jab kam̧ool ilo aer loe, ron̄, im en̄jake Rilo̧mo̧o̧r eo ilo iien eo Ekar loļo̧k er, im barāinwōt ilo aer kar edjon̄e im ettun̄ipilawā eo im wine ko Eaar kōpooji (lale 3 Nipai 20:3–9), ijoko, “[raar jar] kōn men eo raar kanooj kōņaan; im raar kōņaan bwe Jetōb Kwojarjar ren leļo̧k n̄an er”(3 Nipai 19:9).

Jet iiō ko rem̧ootļo̧k, juon rūtto, mijinede, ekar kwaļo̧k bwebwenato in n̄an n̄a. Ekar waļo̧k n̄an e ke ekar juon likao ilo 1960 ko im ekar barāinwōt kalikkar bwe kōn ekkatak im jar, Jetōb Kwojarjar ekar kwaļo̧k n̄an kōm̧ juon kam̧ool kōn m̧ool eo. Eaar ba:

“Iaar jokwe ippa make ilo Provo, Utah, ilo juon apaatmen jidikdik epaake ļo̧k town. Iaar jerbal āinwōt juon riwia kake mweiuk ilo juon mōn wia jidikdik ilo Provo, im lak baj juon wiiken epaake raan in kakkije eo ilo New Year eo men in eaar bōk jikin.

Ekar juon week end eaitok n̄an kōm̧. Ekar Taije, Tijem̧ba 31, Raan eo m̧okta jān New Year. Emōj kar letok n̄an kōm jān Taije eo n̄an Jabōt bwe kōm en kakkije jān jerbal, im Iaar pād ilo apaatmen eo aō ilo an ejjeļo̧k aō kar pūļāān n̄an kamōņōņōik eō. Iaar kōpooj kōjota eo aō, im kōttar an mat, im iaar kōņaan bwe in riit. Ilo an ejjeļo̧k jabdewōt ilo apaatmen eo, Iaar etal n̄an apaatmen eo juon im kajjitōkin jet likao ro rej jokwe ijo (rijikuul in BYU) eļan̄n̄e ewōr ippāier—kōjatdikdik bwe ewōr ippāier kape in juon bok Field & Stream,ak men ko jet. Rekar ba ejjeļo̧k ippāer jabdewōt kain māākjiin, ak ewōr ippāer juon bōk ij aikuj in riiti. Raar letok n̄an n̄a juon kape in Bok in Mormon.

“Ke Iaar ron̄ kōn Kabun̄ eo an Mormon (aolep ilo Utah emōj aer ron̄ kake), Ijjan̄in kar ron̄ kōn bok in. Iaar kam̧m̧oolol er im iaar bōke n̄an apaatmen eo aō. Iaar jino riit jān bok in ilo iien eo ij kōjota. Ij kwaļo̧k m̧ool ke iaar ekairiri wōt ke ij etaļe peij ko ilo bok eo, n̄an pukōt bwebwenato ko ie. Ewōr et ko ie im jikin ko me ijjan̄in kar ron̄ kaki mokta, im iaar jab meļeļe kake. Kōn menin, ālkin aō kōjota, iaar bar bōk Bok in im bar karo̧o̧l e ba ļo̧k n̄an er “ej em̧m̧an wōt, kom̧m̧ool.”

“Kwar ke jar kake?’ juon iaan laddik ro ekar kajjitōk. ‘Jar kake?’ Ikar uwaak. ‘Ikar kōņaan wōt riit, ejjab kōn juon men eo iaar tin jar kake.’ Menin ekar jino juon kōm̧ao eo em̧m̧an kōn kobban Bok in Mormon eo. Raar ba n̄an n̄a bwe Bok in Mormon ej mōttan ļo̧k jeje ko rekwojarjar, juon bok me n̄e Inaaj jar kake im riiti kōn juon bōro em̧ool n̄an jeļā eļan̄n̄e em̧ool ak jaab, bwe Anij enaaj kwaļo̧k m̧ool eo n̄an n̄a kōn kajoor eo an Jetōb Kwojarjar.

“Iaar rūttoļo̧k ilo kabun̄ eo an Katlik, im men̄e iaar jab lukkuun kajoor ilo tōre eo, iaar dāpij wōt eta ilo kabun̄ eo an Katlik kōnke ede ko men iaar jeļā kaki. Jar eo wōt emōj aō kar kōm̧m̧ane eaar jar eo an Irooj, jar eo an Meri, im aō riit jān bok in jar eo an Katlik—im eto ijjan̄in kar bar kōm̧m̧ane. Im kiiō jet likao raar kajjitōkin eō bwe in jar n̄an juon Anij eo Ijjab kar lukkuun jeļā kake im bwe in kajjitōkin E n̄an kwaļo̧k n̄an n̄a eļan̄n̄e bok in ej m̧ool ak jaab. Ekwe, ejjeļo̧k men ij aikuj kar kōm̧m̧ane, im enaaj kar lukkuun aitok week end in aō. Iaar bar bōk bok eo n̄an mweo, kōpeļļo̧k juon kāān in biia, tile jikka eo kijō, im bukweļōlō im jar im kajjitōk ippān Anij bwe en kwaļo̧k n̄an eō eļan̄n̄e bok in em̧ool. Innām ikar jino riiti: ‘N̄a, Nipai, āinwōt ke iaar ļotak jān jema im jinō ro rōm̧m̧an.’

“Et ko im jikin ko ejja et ko wōt ke iaar riiti jinoin jet awa ko rem̧ootļo̧k. Oktak eo iaar en̄jake ilo iien eo ej ‘juon en̄jake eo eaar itok ippa im iaar tōmak. Iaar lukkuun leļo̧k aō n̄an bok in! Iaar pijaikļo̧k Nipai; Iaar pijaikļo̧k ļōmaro jein, im eaar kalluiki eō ke eaar nana aer kōm̧m̧an n̄an e. Ekar em̧m̧an ippa Nipai! Ikar m̧ōņōņō kōn armej ro rem̧m̧an, im kar būrom̧ōj kōn armej ro renana. Ikar riit ium̧win awa im awa, im ikar jab maron̄ likūt bok eo. Ke ikar lale awa eo, epaak an ļalem awa jibbon̄. Ikar kōjeraam̧m̧an eō make Happy New im etal im kiki.

““Ke ij rūj emaron̄ 8:30 im iaar bar jibwe tok bok in. Im kar eindein aō kar riit aolepān week end eo. Āinwōt Brother Parley P. Pratt, lōmņak eo an kōn m̧ōn̄ā eaorōk, iaar jab kōņaan bwe juon en kaboņōņōiki eō. Iaar bōk taļboon eo nejū im kuņe im riit aolepān raan eo, bōjrak jidik n̄an m̧ōn̄ā jidik snack ekar men eo de eo ekar kabōnōņōik eō. Āinwōt bon̄on eo jinointata, ij kab jeļā ke ejibbon̄, kiki jejjo wōt awa im bar bōk bok eo im riiti, im wōnm̧aanļo̧k kōn juon aō kōttōbar eaitok kitien. Āliktata, ke ej laļem awa jibbonin M̧ande, iaar kōjem̧ļo̧k bok eo im jujen kiki—iaar lukkuun mōk.

“Mokta jān kar kūriijm̧ōj ilo iiō eo, iaar wia kake juon rak ekilep ilo bukwon ko ilo American Fork. Eaar juon karpet eo ejejja im em̧m̧an, im boss eo aō eaar kōņaan bwe jerbal eo aō en lali rak ko. Boss eo aō eaar juon bisop ilo jikin ko ilo Provo im eaar kōnono n̄an n̄a kōn Kabun̄ in jet iien ko, ak Eaar ejjeļo̧k aō iien n̄an men kein. Eaar juon boss eo em̧m̧an, ak kwojjab kōņaan kaļļuiki bwe emōkaj an illu. Baj juon jibbon̄ in M̧ande, rualitōk awa, ke ikar aikuj etal im lali rak ko rej kōm̧m̧ani. Awa eo emōj kappeiki eō bwe in pād ijen, iaar jab jade; ruatimjuon awa, innām jon̄oul.

Āliktata, ke ej 10:30, boss eo aō, eaar lukkuun illu āinwōt juon lolo eawia, ekar itok n̄an apaatmen eo aō, deļo̧n̄ tok ilo kōjem̧ eo aō āinwōt n̄e etin lukkuun no̧ bōra, im eaar lo aō babu ioon jea eo aō kōn Bok in Mormon ioon ubō, im kajju oktak an ļōmņak. Eaar kadikdik an kili kōjem eo im bar ro̧o̧l n̄an mōn wia eo, ilo an kōjatdikdik ke emaron̄ jino kōm̧m̧ani rak ko. Ālikin 11:30 iaar rūj (ilo aō jab jeļā ke eaar itok n̄an apaatmen eo), ke ij lale awa eo, im ruo kōttan, ilo juon iien ejidimkij iar ron̄ aer ba kwon bar jar. Iaar kōkairiri kōm̧m̧an aō nuknuk (ilo aō jeļā bwe n̄e itōpar ijen emaron̄ dedeļo̧k aolep jerbal), etal n̄an wa eo, im kaiim n̄an jikin jerbal eo.

“Iaar lo boss eo aō ijen im etal im joļo̧k aō bōd ippān. Eaar oktak tok; ilo an mejen ettōn dikdik im eaar kajjitōkin eō, ‘Ejet bok eo?’ Eaar en̄jake ke bolen eaar itok n̄an mweo imō, kōļmenļo̧kjeņ eo aō eaar ro̧o̧l likļo̧k n̄an weekend eo, im ilo an obrak meja kōn dān in kōm̧jalaal iaar ba juon wōt men imaron̄ kar ba: ‘Bok in emool. Bok in Mormon ej naan ko an Anij. Iaar jino aō jan̄, im eaar letok pein im bokwōj eō. Iaar peptaij im erom juon eo uwaan kabun̄ eo an Jisōs Kraist im Armej Ro Rekwojarjar ilo Raan-ko Āliktata ilo 22nd raan in Jānwōde 1965.”

Iaar ioone būratōr in aō em̧m̧an jet iiō ālkin iien eo eaar oktak ke eaar kōm̧m̧ane jerbal in mijinede eo an ippān kōrā eo ippān ilo San Diego Mormon Battalion visitors’ center. Unin an em̧m̧an ippa bwebwenato in ej kōn oktan ko ilo jekjek ko ruo n̄an riiti Bok in Mormon. Jinoin an kar riiti,, eaar jab kōn juon bōro em̧ool ak jar. Ilo jekjek eo kein karuo, kōn ikdeleel im jar, eaar juon en̄jake eo eļap an oktak.

Ewōr wōt juon iaļ n̄an jeļā eļan̄n̄e Bok in Mormon im gospel eo rem̧ool, im ebōk elōn̄ kajjitōk ko im en̄jake ko. Ej itok ilo ad lukkuun kōjerbal anemkwoj in kālet eo ilo m̧ool im kōm̧m̧ane kōn juon ikdelel n̄an jeļā:

“Im n̄e kom̧ naaj būki men kein, ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwōjarjar.

“Im jān kajoor eo an Jetōb Kwōjarjar kom̧ maron̄ jeļā m̧ool eo an men ko otemjeļo̧k”(Moronai 10:4–5).

Kallim̧ur in ejjab aorōk ilo kōjerbal naan kein “Emaron̄” ak “bolen.” Kallim̧ur in ej, “E naaj m̧ool in n̄an kom̧, jān kajoor eo an Jetōb Kwojarjar.”

Bar juon katak jej loe ilo bwebwenato in ej bwe kwojjab aikuj riiti aolep Bok in Mormon mokta jen am bok juon kamool. Kōn emm̧aan in ilo bwebwenato in, eaar en̄jake meram eo ilo peij juon. Eaar jab aikuj mōn̄āiki aolepān pizza eo mokta jen an jeļā ke eņņo. N̄an ro jet, emaron̄ ļapļo̧k am edjo̧n̄e āinwōt juon meram eo eņņoļo̧k kajjojo iien. Men eo Alma eaar ba ilo eoon in: “Aaet, ej jino kōmeramļo̧k aō meļeļe, aaet, ej jino in kaijoļjoļ n̄an eō.”(Alma 32:28).

Naan in Kam̧ool eo Am Ekajoorļo̧k jān Jon̄an eo Kwoj Ļōmņake

Ke jaar jinoe iaar kajjitōkin kom̧ n̄an jon̄e naan in kam̧ool ko ami ilo ļain in jon̄e tōmak in. Ij kōjatdikdik bwe emōj am loe bwe naan in kam̧ool eo am eļap an wōnm̧aanļo̧k jān jon̄ak eo kwar antoone. Kōn Jetōb Kwojarjar āinwōt juon rūkaki, emōj am bōk juon jeļāļo̧kjen ewāppen kōn leen ko rellōn̄ an gospel in, im ļain im bar ļain, naan in kam̧ool eo am̧ ej kajoorļo̧k kajjojo raan.

N̄e eļap an juon ekkatak im mour kōn gospel in, enaaj ļapļo̧k aer bōk meram im kōn an naaj ļapļok karōk ko an Jemād enaaj ļapļok am meļeļe gospel in. Jej katak jān en̄jake ko ad bwe leen wojke in mour eo ej, ilo m̧ool, aorōk im “lukkun tōn̄al, ilōn̄ļo̧k aolep men ko emōj [ad] edjon̄i” im bwe ej kobrak buruwōd kōn “lan̄lōn̄ eļap”(1 Nipai 8:11–12) Jej eddōļo̧k ilo an lōn̄ iakwe ippād kōn kōjeram̧m̧an ko, lan̄lōn̄, im wāween an tōl kōj ej letok n̄an kōj tōprak ko rem̧m̧an ilo mour ko ad im juon kōjatdikdik kōn mour eo ekamōņōņō im ejjeļo̧k jem̧ļo̧kin āinwōt baam̧le ko ad n̄an indeeo.

Ij kwaļo̧k aō kam̧ool bwe Ijeļā, im Ijeļā bwe Ijeļā, kōn jetōb kwojarjar, bwe Bok in Mormon ej naan ko an Anij. Etōn̄al im aorōk n̄an nemake. Ij iakwe im kaorōki ņem ko nemen. Ij kwaļo̧k aō kam̧ool bwe Jisōs Kraist ej Nejin Anij im bwe E eaar mej im en̄taan kōn jerawiwi ko an Laļ in. E ej ad Rilomo̧o̧r im ej wōnm̧aanļo̧k wōt n̄an tōl Kabun̄ eo An im aelōn̄ in kiin̄ eo an ioon laļin kōn rikanaan ro remour im rijilōk ro. Ij kwaļo̧k aō kam̧ool bwe Etan im kōn aolep m̧ool kein ilo et eo etan ekwojarjar Jisōs Kraist, amen.