Na iLoloma Vakalomalagi

Mai vei Elder Kevin R. Duncan

Ena Vitusagavulu

Cauravou Lailai

E sega ni dua na cauravou lailai e vakataki au me namaka vakalevu cake tiko na Siganisucu. Au dau taleitaka! Ka rau kenadau sara o rau noqu itubutubu me vukica na neitou vale me vakataka e dua na itikotiko totoka lailai ni veicevata. Na kena iukuuku totoka, nai vakatagi, na cina rarama, na veibisikete kamikamica, ka vakakina na iloloma. Isa, sa dua na ka na noqu dau namaka tiko na iloloma. Ena veiyabaki, au dau vola tiko e lomaqu na veika au gadreva vakalevu sara.

Me vaka ni keitou tiko ena qele ni teitei, ena veimataka ni Siganisucu ni bera ni keitou dolava na neitou iloloma, keitou vakaisulu katakata ka tadrava yani na draki batabata me ra laki laurai na manumanu. E sega tale ni dua na ka vinaka cake me vakataka na neitou sa vakacavara na neitou cakacaka ka lesu totolo i vale me vakanaulu ki na caka mana ni mataka o ya.

Au sa tekivu vulica tiko na tamata oqo, o Jisu Karisito, na nona siganisucu keitou a marautaka tiko. Ia e vaka me dua na veisolisoli totoka sara. E a Nona siganisucu, ia a neimami kece na iloloma. O cei na gone me sega ni vinakata o ya! Na Siganisucu sa baleta na veika vinaka kecega.

Au vakavinavinaka, ni toso na gauna, a vakalevutaki tiko na noqu kila vinaka na iVakabula—na Nona sucu mai kei na siganisucu, na Nona bula kei na caka mana, na Nona kaukauwa kei na solibula, na Nona Veisorovaki kei na Tucake Tale, ia vakabibi ga na Nona cecere kei na Nona loloma sega ni vakamacalataki rawa. Io, na Siganisucu sa veika vinaka kecega, ia e baleta walega ni o Jisu Karisito sa veika vinaka kecega. Se me matata sara, o Jisu Karisito sa ka totoka kece sara.

Veiqaravi ni Kaulotu

Me vakataki ira e vuqa na itabagone, au a namaka voli meu na laki kaulotu ena kena kakavaki cecere, ia na imatai ni noqu Siganisucu tani mai vale au a kurabui kina. Ena veivula ni sa roro tiko mai meu yabaki 19 kina, sa noqu vakanananu ga meu na laki kaulotu. Au a gone toka mai vei ira eso ena noqu kalasi kei na itokani, ka vuqa vei ira sa laki kaulotu, ka biu tu mai oi au. Au vakila niu sa tu vakarau meu sa daukaulotu talega. Na ka ga e vakatao tu e mataqu na noqu siganisucu.

Ni sa vaka me dua na gauna balavu, sa qai yaco mai na noqu gauna kau sa laki curu ki na KNK. Ena itekivu ni Tiseba, au a vodo sara ena waqavuka ena ilakolako ni kaulotu ki Santiago, Chile. Au sa qai lako dina tu, kei na kena e totoka cake sara, ni sa toka sara ga mai liu na Siganisucu. Au sa yalonuidei niu sa tu vakarau ki na noqu gauna ni bula lagilagi duadua.

Ia niu sa siro sobu mai na waqavuka, au siqema totolo sara ni duidui na veika e kea ni vakatauvatani mai vale e Utah. Io, sa roro voleka sara ga mai na Siganisucu, ia e vaka na draki ni loma ni vula ikatakata. Sa evei na uca cevata? Sa evei na kote kei na ivava vavaku?

Au sa kuitaki totolo sara ena ibolebole ni cakacaka. Au se wawale ena vuka vakabalavu ka so na gauna au se via moce ga ni keirau soli lesoni tiko. A duidui sara na itovo ni vanua e kea, sa duatani sara na kena vosa—e sega sara ga ni rogorogo vata kei na kena au a vulica ena KNK—ka totoka dina na kakana. Ni tukuni tiko na kakana, au a kania beka kei noqu itokani e dua na kakana ca baleta ni keirau a tauvimate bibi sara kina. Ena, dela ni veika kece oqori, ena dua na bogi mai Chile, keitou a sotava e dua na uneune.

O ya na imatai ni noqu Siganisucu tani mai vale, kau sa tauvimate bibi sara ga. Au sa davo tauvimate tu ena dua tani tale na matanitu, kau saga meu kila na kena vosa au sega ni fikataka rawa, kau tiko vata kei na dua au sega ni kilai koya vinaka. Sai koya beka oqo na cakacaka ni kaulotu, ka cava na vuna au vakatotolo mai kina ?

Ia e dina ni yaco na ibolebole oqo, au sa tekivu meu taleitaki ira na lewenivanua e Chile ena yaloqu taucoko. Era sa tamata totoka ka rawarawa me ra lomani—ka vuqa vei ira era sa via rogoca na neirau itukutuku. Ena vuravura umauma, dina oqo, era sa guta vakaukauwa na tamata me ra rogoca na itukutuku ni iVakabula, na vunikau ni Siganisucu kei na sitokini vakautona era sa voleka ni sega ni ka bibi me vakataka na gauna e liu. Ke sa biuta mai na Karisito na Nona itikotiko mai lomalagi ka tadu mai ki vuravura me vakararawataki ka mate ena vukuda taucoko, sa rawa talega meu biuta na noqu itikotiko ka tadrava na veika rarawa meu mai wasea ga na Nona itukutuku totoka.

Na Siganisucu o ya a vakatavulica vei au na reki savasava ni nodra vukei na tamata me ra taura na iloloma cecere duadua vei ira taucoko nei Tamada Vakalomalagi, na Nona ituvatuva lagilagi ni marau—kei na marau, au sa kunea, sai koya ga na veika era vinakata taucoko na tamata, sega walega ena gauna ni Siganisucu, ia ena veigauna.

Na Yada Gone kei na Vakamau

Ni oti e vica na yabaki ni noqu kaulotu, sa tu e mataqu e dua na iboleboole vou. Au sa lomaocaoca, wale, ka galili sara ga. E vica na vula yani e liu, na watiqu ni rua walega na yabaki a mate ena dua na vakacala-ka e gaunisala, ka biuti au tu mai kei na luvei keirau yalewa vula 7.

Au a gonevuli tiko ena univesiti, vuli, cakacaka, ka sasaga bula tiko meu vulica na itubutubu taudua. Sa roro tiko mai na Siganisucu, ni so era sa biubiu me ra sa lesu ki na nodra itikotiko ki na nodra matavuvale kei na daulomani ena gauna ni holidei, ena vuku ga ni ilesilesi vakavuli, au sa na tu ga e koronivuli. Au sa galili ka yalorarawa sara. A yaco mai na Siganisucu ka oti yani, ka sa toso tikoga na gauna.

Ni oti toka ga e dua na yabaki, ka sa voleka tale toka mai na Siganisucu, kau se cauravou tikoga. E kaya na ivolanikalou ni sega ni vinaka vua e dua na tagane me tiko duadua ga (raica na Vakatekivu 2:18), kau sa duavata sara kina. Au sa gadreva e dua na itokani, ka sa gadreva o luvequ yalewa lailai me dua na tinana.

Au sa mani vakadeitaka, “Au sega beka ni tamata rairai vinaka, ia o cei beka na yalewa me sega ni vinakata e dua na gone lailai dina me iloloma ni Siganisucu? Sega ga ni dua na mataka—ia na ka dina?” Kau vakavinavinaka, ke dua e vinakata na gone lailai oqo, au sa na wili talega kina.

Au sa raica tiko e duya na goneyalewa na yacana o Lucy ena noqu kalasi ni baiolaji, ia sa voleka me oti na semeseta kau se bera ga ni yaloqaqa sara meu laki vosa vua. A rairai tokoni au beka o lomalagi baleta ni dua na siga, a vakidacala, na neirau a biubiu vata mai ena valenivuli ni veitarogi. Sa noqu madigi sara ga oqo. Au sa tekivu vosa, ni qai yaco mai na bogi au a qiriti Nancy, ka kerea me keirau gade vata. Keirau sa tekivu veigadivi sara, ka veitarataravi yani. Ia, au a kila ni sa voleka mai na Siganisucu, ka sa na gole i nodratou o Nancy. Na cava beka meu na cakava me caudre tikoga na lidi o ya ka sa tekivu me tubu tiko ena neirau veimaliwai?

Au sa qai cakava e dua na ituvatuva. Ena veivuke nei taci Nancy kei na nona itau, au na solia vakavuni vei Nancy e dua na iloloma ena veisiga 12 yadua me yacova na Siganisucu.

A mana na noqu ituvatuva. Sa taura tiko o Nancy na iloloma oqo, ka sega sara ga ni kila o koya o cei e solia tiko mai. E ratou sa vakilakila tiko na nona matavuvale taucoko me ratou kila rawa vakacava. Rau sa yalataka tu o taci Nancy kei nona itau me rau kakua ni vakaraitaka na nodrau vakaitavi tiko kina. Sa dua dina na cakacaka vuni—ena kena inaki savasava ga.

Ia, dua na bogi e ratou sa raica na matavuvale e dua na ivakatakilakila. Sa rogo mai na lali ni katuba, e ratou cici na matavuvale ki na katuba, ka ratou raica ni sa tasiri sarae dua na motoka. Ratou a vola sara na naba ni motoka, kei na siga e tarava e ratou a qirita sara na valenivolavola ni naba ni laiseni me kilai o cei na itaukei ni motoka. E ratou sa kila sara ni nona e dua ena matavuvale ni itau nei tacina. Sa kilai rawa na ivunivuni. Rau sa mani gole mai o taci Nancy kei nona itau ka vakadinadinataka na nodrau vakaitavi tiko kina. Au a marau lo niu sa mai kilai baleta keirau a qai marautaka vata kei Nancy na Siganisucu, ka tomani mai kea na neirau veimusumusuki tiko.

Me vaka ga au a nuitaka tiko, a gadreva sara ga o Nancy e dua dina na gone lailai ena Siganisucu. A lomana dina sara na luvequ yalewa lailai me vaka ga me luvena dina. Ka marautaki sara, niu a wili talega kina. Keirau a qai vakamau ena vula ikatakata e tarava. Sa qai dua dina na iloloma uasivi duadua au se qai bau taura.

Au sa sotava tiko na ituvatuva cecere ni bula marau nei Tamada Vakalomalagi. A dua na noqu matavuvale tawamudu, ka keitou a vauci tawamudu vata. Na iloloma ni vakamau tawamudu kei na matavuvale sa iloloma era sa nuitaka tiko na yalodina taucoko, ena bula oqo se ena bula e tarava. Na iloloma cecere cava tale beka e tiko?

Niu vakananuma lesu na noqu veisiga galili kei na rarawa, au sa kila kina ni dua na gauna a biu duadua tuo Jisu Karisito ka galili talega, ka sai Koya duadua ga, e kila vakalevu cake na noqu mosi. E kila vakalevu cake o Koya na noqu mosi mai vua e dua tale. Ena gauna mada ga ni noqu veigauna galili tara bi, au a vakila ni sega vakadua ni biuti au o Koya. A sega walega ni noqu iVakabula; e a taciqu ka noqu itokani vinaka duadua.

Tama Cauravou

Sa tekivu tubu na neitou matavuvale, ni oti e vica na yabaki au sa tadrava tale tu e dua na ogaoga levu. Ni sa roro tiko mai na Siganisucu, keirau a veiraici kei Nancy ka kila ni sa sega na ilavo vakarautaki me so kina na iloloma vei iratou na luvei keirau lalai ena yabaki o ya.

Au se qai tauri vola walega mai na koliji, ka keirau se saga tiko mada ga me keitou tiko vinaka. E dina ga niu cakacaka vinaka tiko, sa laurai levu tiko ni sa sau levu na bula ka sa sega ni veiraurau ki na neitou ilavo vakarautaki. Na ka duadua ga sa tu vei keirau o ya ni keirau sauma vakataucoko tiko na neirau ikatini. Dina ga ni sega tale e dua e kila na neitou sasaga bula tiko, na Tamada Vakalomalagi kei na iVakabula duadua ga, ka Rau sa tekivu vakauta tiko mai na cakamana lalai ni Siganisucu.

Dua na siga a rogo mai na lali ni katubaE a dua na neiba ka roqo tu e dua na kateni ni iyaya ni vakatatalo. A kaya mai, “Keitou a sasamaki tiko e vale ka keitou raica kina na iyaya ni vakatatalo oqo e ratou sa sega ni vinakata na luvei keirau. Keitou a vakasamataka tiko de ratou vinakata na luvemudrau.” Ena rawa beka!

Dua tale na siga a baci rogo mai na lali ni katuba. Oqo eso na lewenilotu mai na neitou tabanalevu. E ra sa tucake tu e kea kei na dua na basikeli ni goneyalewa lailai. Era a kaya, “Keimami sa sega ni gadreva tale na basikeli oqo ka keimami sa nanumi kemudou mai. Ena vinakata beka me vakayagataka o luvemudrau yalewa?”Keirau sa luvuci ena reki!

Ena vica na macawa yani e liu a veisisivi droini o luvei keirau tagane ena dua na sitoa levu e kea. Dua na siga keirau a qiriti mai ena dua na itukutuku marautaki ni sa qaqa o koya ena veisisivi o ya. A nona icocovi e dua na vidio rogolevu ni gone. Keirau a kurabui sara ga!

Na caka mana lalai oqo eratou sa mai yavica kina na luvei keirau ena iloloma ni Siganisucu. Keirau sauma tiko na neirau ikatini, ka Rau sa dolava mai na Tamada Vakalomalagi kei na iVakabula na katuba kei lomalagi ka sovaraka mai na Nodrau veivakalougatataki—vakadodonu mai loma ni vale.

Au nanuma kina ni a sucu na Karisito ena ituvaki vakaciriloloma dina, ia era a kunei Koya ka solia na iloloma vakamareqeti talega. Niu dua na tama vakavuravura, au a gadreva vakabibi meu solia vei iratou na luvequ na kena au rawata rawa.

Sa yalo vakakina na Tamada Vakalomalagi. Ia na Nona loloma sa uasivi sara, ka sa gadreva me solia vei keda na ka kece sa tu Vua. Oqo na iloloma sa sega ni vakamacalataki rawa.

iTinitini

Taciqu kei na ganequ, oi keda kece ena so na gauna eda sa galili, tauvimate, lomaocaoca, dravudravua, se yawa sara mai vale. Meda sa vakavinavinaka, ni sa kilai keda vinaka tu na Tamada Vakalomalagi kei na iVakabula. Ni da gole yani vei Rau, e Rau na taura na ligada ka vukei keda meda curuma vata yani na ibolebole yadua.

Taciqu kei na ganequ, ena yaco tiko na gauna eda na kila taucoko kina e dua e galili tiko, tauvimate, lomaocaoca, dravudravua, se yawa mai vale. E rawa me Rau dusimaki keda meda vukei ira na tamata, ka sa na kena madigi kina me da cakava.

Niu se gone, au dau nanuma ni lako ga mai vakadua na Siganisucu ena dua na yabaki. Niu sa qase mai, au sa kila kina ni Siganisucu sa veisiga ga. Ena vuku ga ni dau lomavinaka na Tamada Vakalomalagi kei na noda iVakabula dauloloma, o Jisu Karisito, eda sa taura vakayauyau kina ena veigauna na iloloma vakalomalagi—ena veisiga. Ena sega ni wiliki rawa na levu ni iloloma vakalomalagi.

Sa rui vakaitamera ka bibi na noqu vakavinavinaka vua na Tamada kei na Luvena, me vakataki Amoni ena gauna makawa, “Au sega ni rawa ni tukuna na kena matailalai au sa [mai] vakila” (Alama 26:16).

Io, sa siganisucu i Jisu Karisito eda sa marautaka ena veigauna ni Siganisucu, ia ena vuku ni Nona vinaka na Tamada kei na Luvena, eda sa taura tikoga kina na iloloma kecega. Au vakadinadinataka oqo ena yaca i Jisu Karisito, emeni.