O Se Meaalofa mai le Tama: Talia pe Teena
E maoae le matagofie o musika ma se savali matagofie mai ia Sister Eubank. E maeu lena alofa togiola! Ia, ua oo mai Tesema. Ua malulu le ea ma ua tatou maua sina kiona. Mo le toatele o tagata, o le uiga o lenei mea ua latalata mai lava le Kerisimasi. Ae mo a’u, e le o lagona ia o le Kerisimasi.
I lou olaga atoa, o aso umi, vevela lea e ta’u mai ai o le vaitau o le Kerisimasi. Ona o Tesema o le tau mafanafana i Ausetalia. Ma i Aferika i Sisifo, lea sa ma nonofo ai ma lo’u toalua mo le lima tausaga talu ai, e vevela i taimi uma.
O lea la o Tesema e masani lava ona aumaia aso e faaaluina i le matafaga, faase’e i le sami, ma papakiu. I le Kerisimasi, e ave atu e lo matou fale le manogi o mago ma leo o taliega. Ae o le agaga o le Kerisimasi e tutusa lava i soo se mea. Pe o i ai i Sini, Sate Leki, po o Sierra Leone; pe o i ai i Nukualofa, Newfoundland, po o Nigeria, o le soifua mai o lo tatou Faaola e uunaia ai tagata ina ia faia mea lelei.
I le tele o nofoaga, e fefaasoaa’i ai e tagata meaalofa, asiasi atu i isi, ma faia galuega lelei e faamanatuina ai le agaga o le Kerisimasi. E i ai se tu masani o a ma uo i Samoa faapea i le aso pe a mavae le Kerisimasi, latou te tuua ai meaai ma isi meaai suamalie i pusa ma avatu i aiga e sili ona manaomia, e le gata i a latou lava uarota, ae i isi tagata i o latou nuu. E i ai foi sa latou togalaau fai sua e lua eka, ma o le tele o ona fua e tuuina atu i tagata o loo manaomia le fesoasoani.
O se uo e pele ia i maua mai Senegal i Aferika i Sisifo sa ta’u mai ia te a’u e faapea i lona nuu i Ivory Coast, i po o le Vaeluaga o le Kerisimasi, nai lo le aumaia o meaalofa, e avatu e tagata o le nuu soo se feteenaiga e le’i faaleleia i o latou taitai. Ona faaalu lea e na taitai le aso o loo totoe e galulue ai ma aiga ina ia foia ia feteenaiga. E manaomia e tagata o le nuu le i ai o le filemu ma le lotogatasi i aiga uma i lena nuu i le Kerisimasi, aua latou te faamanatuina le soifua mai o Keriso—o Ia o le na soifua mai mo le faamoemoega lava lea o le aumaia o le filemu i le lalolagi.
I le amataga o lenei tausaga, sa ma feiloai ai i se faifeautalai talavou, o Sister Jeanne Ingabire mai Rwanda, o loo auauna atu i lana misiona i Liberia. Sa ia faasoa mai ia te a’u le aafiaga na oo ia te ia i le tala faaootia loto o le faasiotiga i Rwanda i le 1994 O lona tama sa sau mai le ituaiga o le Hutu, o e na faatumulia i le ita i tagata o le ituaiga o Tutsi. Ae o lona tina o se sui o lena ituaiga o Tutsi. Ina ia faasaoina le ola o lona toalua ma ola o a laua fanau teine e toafa, sa mamao le mea na nana ai e lenei tama lototoa lona aiga ma toe foi atu na o ia i lona nuu. Sa le’i toe vaaia o ia e lona toalua ma afafine ma sa tauivi e tau lava ina ia feola. Sa iu ina latou toe foi ane i le mavae ai o le iva tausaga e auai i se fonotaga e faalelei ai sa faatulagaina e le malo, lea sa latou iloa ai o lo latou tane ma le tama sa fasiotia ina ua toe foi ifo i lona nuu. Peitai, o le mea e ofo ai, sa faamagalo e le tina o Sister Ingabire ma lana fanau i latou sa faamutaina le ola o lo latou tane ma le tama.
I se taimi lea sa mafai ai e Iosefa Samita ona faatumulia i le ita, i le lokaina e aunoa ma se sala i le falepuipui i Liperate mo le tele o masina i le aluga o le Kerisimasi o le 1838, sa faaali atu ai e le Alii le vaega 121 o le Mataupu Faavae ma Feagaiga. I lenei faaaliga sa fesoasoani le Alii ia Iosefa ina ia faatoilalo lagona o le ita lea na iloatino i le amataga o lenei vaega ma aoao le Perofeta e faapea o le agalelei, tali tiga, agamaualalo, agamalu, ma le alofa faamaoni o uiga faaKeriso ia e taua mo le avea ai ma soo.
E i ai manatuaga taua faaleaiga o le Kerisimasi mo a’u. Ae peitai, e le o manatuaga uma o ni manatuaga lelei. Ao ou tamaitiiti lava, ou te manatua le mauaina o se taavale tutu’u laitiiti faapelepele mai i lou tama. O i matou o se aiga mativa, ma sa ou fiafia i lena meaalofa. Ae peitai, i se tasi aso sa ou ita ai i se mea faatauvaa, sa ou togiina le taavale meataalo i totonu o le pa sa mafiafia i le vao lea sa sosolo ai i luga. Sa vave ona ou faanoanoa, e le gata sa ou togi ese le meataalo ae ona sa ou lagona o se faatusa o le teenaina o le faailoga o le alofa o lou tama. Sa ou saili ma saili mo le meaalofa, ae sa le faamanuiaina. Ina ua oo mai le tau malulu ma sa leai ni lau o le pa laau, sa ou toe sailia, ma sa le faamanuiaina. Ou te lagona pea le tiga o le faatiga i lou tama. O loo tiga pea.
Tou te silafia, e talitutusa lena mea i lo tatou teenaina i nisi o taimi o le alofa o lo tatou Tama Faalelagi ma Lana meaalofa ia i tatou, o le meaalofa silisili o Lona auina mai o Lona Alo e pagatia ma togiola mo i tatou. O se tulaga matautia pe a tatou teena Lana taulaga togiola po o feagaiga ma sauniga o Lana talalelei!
Maimau pe ana mafai ona tatou avea atili i taimi uma e pei o i latou o e galulue e faaali atu le alofa i isi. Talu ai nei, e toatele tagata sa galulue e fesoasoani i tagata nuu o Florida ma Carolina o e sa aafia i afa faataumaoi pe e o mai e fesoasoani i isi o e na tutusa le mafatia i le lalolagi atoa.
I le aso 25 o Tesema, 1974, sa faaleaga ai le aai o le Teritori i Matu o Ausetalia. I le taeao po o lena Aso Kerisimasi, sa taia ai e le Afa o Tracy le aai o Darwin. E toatele na maliliu, ma o le toatele o tagata o Darwin sa tuua e leai ni fale. O ata o le faatamaiaga talu ai nei i Florida na atagia ai le tulaga o Darwin i lena taimi. Ae o le agaga o le Kerisimasi sa faatoilaloina le faanoanoa. Sa maua foai mai i tagata i Ausetalia atoa, ma o le toatele o tagata sa tuu mea uma ma faimalaga atu i Darwin e fesoasoani ina ia toefausia.
O le tele o tausaga talu ai, ina ua faatoa lua tausaga o le ma afafine ulumatua, sa gau lona vae ao lei oo i le Kerisimasi ma sa faaaluina ai le tele o vaiaso i le falemai ma lona vae i togafitiga. O se Kerisimasi faigata tele lena. O se aiga i la matou uarota o e sa le lava le tamaoaiga na o mai e asiasi ia te ia i le Aso Kerisimasi. O a latou fanau laiti taitoatasi sa aumaia a latou lava meaalofa e sili ona fiafia i ai, na maua i lena lava taeao, e tuuina atu i lo ma afafine o sana meaalofa mai ia i latou. Sa ma ootia ma fetagisi ma lou toalua, o Kay ona o le agalelei limafoai o nei fanau ma o latou matua.
O le agaga moni lenei o le Kerisimasi—o tagata taitoatasi e fesoasoani atu i isi. E ui i lea, o se vaega taua o le talatuu a le Faaola ma Lana auaunaga i le “toatasi.” O se mataupu faavae moni lenei na opomauina ma faaaogaina e tagata o Lana Ekalesia i Aferika, ma o mea e Na te manaomia mai ia i tatou iinei.
Na saunoa Peresitene M. Russell Ballard o le Togiola o le faatinoga tupito lea a le Faaola o le faia o lenei mea mo i tatou “taitoatasi”. O upu a Peresitene Ballard:
“Afai tatou te malamalama atoatoa i le Togiola ma le taua e faavavau o agaga taitasi, o le a tatou saili atu … i fanau uma a le Atua ua se ese. O le a tatou fesoasoani ia i latou ia iloa le alofa o Keriso mo i latou. O le a tatou faia mea uma tatou te mafaia e fesoasoani e saunia ai i latou mo le mauaina o sauniga faaola o le talalelei.
“Afai e pito i taua i mafaufau o taitai o uarota ma paranesi le Togiola a Keriso, e leai se tagata fou liliu mai pe ua toe faatoaga mai, e tuulafoaiina. …
“… O le faaupuga taufeagai o le Togiola o le leai se iuga ma le faavavau, ae peitai o loo faatatau i tagata taitoatasi, e tasi le tagata i le taimi. …
Uso e ma tuafafine, aua, aua lava ne’i manatu faatauvaa i le “toatasi.”1
Pe le matagofie ea pe a tatou mulimuli uma i lenei fautuaga ma lena fautuaga a lo tatou perofeta, o Peresitene Russell M. Nelson—ina ia ola i poloaiga sili e lua i se auala maualuga atu ma paia atu. Ma afai e te masalosalo i lou tomai e maua se aafiaga e faia ai lea mea, ona mafaufau lea i le faataoto Aferika lenei: “Afai e te mafaufau ua e laitiiti tele e faia se eseesega, e te le’i faaaluina la se po ma se namu.”
E le manaomia ona tatou malaga atu i le Laueleele Paia e faia ai se eseesega pe ia latalata atili ai i lo tatou Faaola. O le Kerisimasi o se taimi lea e mafai ai ona tatou taulai atu i la tatou meaalofa patino i le Faaola e ala i le faaauau pea ona alolofa ma fesoasoani atu i isi. E le o mamao tele la i Peteleema mo soo se tasi o i tatou. O la tatou filifiliga le avea o Keriso ma se vaega o o tatou olaga—ina ia talia meaalofa ua Ia tuuina mai ia i tatou ma tuuina atu ia te Ia le meaalofa o lo tatou loto. Ou te alofa ia te Ia ma ou te molimau atu i Lona alofa e lē i’u mo i tatou taitoatasi i le suafa o Iesu Keriso, amene.