Ia Saunia Loto Uma e Talia Nei o Ia
I le na o le silia ma le vaiaso talu ai, na faamumu ai moli Kerisimasi i le Lotoa o le Malumalu, e faaauau ai pea le tu masani o le 53 tausaga ma, mo le toatele, e faailogaina ai le amataga o le vaitau o le Kerisimasi. I le Kerisimasi tatou te faamamaluina ai le fanau mai, soifuaga, ma le malamalama o Iesu Keriso, o le Alo moni o le Atua ma le Faaola o le lalolagi. Tatou te maua le faamoemoe i le folafolaga lea na o faatasi ma Lona fanau mai: “O le viiga i le Atua i mea aupitoaluga, ma le manuia i le lalolagi, o le finagalo alofa i tagata.”1 O musika, le fanau fiafia, meaalofa e tuuina atu ma taliaina, laau Kerisimasi, teuga, ma moli o ni vaega uma ia o lo tatou faamanatuina fiafia.
Pe a e mafaufau i le Kerisimasi, o a ni manatuaga pele e oo mai i lou mafaufau? Mo a’u, o lenei taimi o le tausaga e masani lava ona aumaia ni manatuaga o faafiafiaga o le Kerisimasi mai lo’u laitiiti.
Ou te manatuaina pea le tele o meaalofa sa ou mauaina. Ou te manatua se polo lakapi ma se polo pasiketi, meaalofa ma ofu. O le tele o na meaalofa ua le o toe i ai nei ma ua galo; ua masaesae ma le toe ofi ofu. Ae o le mea sili ou te manatuaina e uiga i Kerisimasi ua tuanai—o o’u manatuaga sili ona taua ma ou fiafia i ai—e lei faatatau i mea sa ou mauaina ae o mea sa ou tuuina atu.
Sei ou faamatala atu. O tausaga taitasi, i le Aso Toonai ao lumanai le Kerisimasi, e faapotopoto ai le autalavou a le matou uarota i lo matou falesa. Matou te faatumuina ato i moli, fa’i, ma kuki ma keke na taoina e tiliva atu i fafine ua oti a latou tane o e nonofo lata ane. Matou te o i o latou fale, usu pese o le Kerisimasi, ma tuuina atu ato o le Kerisimasi. Ou te manatuaina pea a latou ataata lotofaafetai. O nisi o i latou o ni tagata faimalaga mai o le augatupulaga muamua po o le lona lua na faaalia lo latou lotofaafetai i le mamafa o le gagana Igilisi: o Sister Swartz, Zbinden, Groll, ma Kackler. O le a le galo lava ia te a’u le lagona mafana na tamauina e lenei mea i lo’u loto.
Ina ua avea i ma’ua ma Lesa ma ni matua, sa ma amatalia se tu masani o le foai atu o meaalofa Kerisimasi i se aiga e le tagolima. E tele ina ma mauaina le igoa o se aiga mai se faalapotopotoga alofa a le afioaga, faatasi ai ma tausaga o tamaiti. Matou te faaaluina le tele o le taimi ma le taumafaiga e saili ai ni meaalofa sa’o mo i latou. Na foliga mai na fiafia le ma fanau tama i lenei mea e pei lava o le mauaina o a latou foi meaalofa i le Aso Kerisimasi! O lenei auaunaga masani faaleaiga na fesoasoani e tausisia ai pea le agaga moni o le Kerisimasi i o matou loto.
I lo’u olaga faalegaluega, sa ou aofia i le atiaeina, gaosiga, ma le maketiina o masini koleni i le lalolagi atoa. O masini e pei o le masini e savali ai i luga, uila koleni, ma masini toleni ua mamanu faapitoa lava e faamalosia ai le fatu. O le mea moni, i lo matou kamupani sa matou galulue malosi e faamautinoa e mafai e tagata e faaaogaina masini ona fuaina le tulaga ma le maualuga o gaoioiga o o latou fatu e ala i mataitu ai le saoasaoa o le fatu. I le aso, o le toatele o i tatou e taulimaina ia tekinolosi i o tatou tapulima e fuaina ai o tatou fatu ma faamalosia ai gaoioiga e faamalosia o tatou fatu.
Ae a pe ana faapea e i ai se auala e fua ai le tulaga o lou fatu mai se vaaiga faaleagaga—o se fua faaleagaga o le loto, pe a e mafaufau i ai faapena? O le a se mea o le a tau mai e lau fua faaleagaga o le loto? O le a le malosi faaleagaga o lou loto? O le vaitau o le Kerisimasi e foliga mai e pei o se taimi lelei lea mo i tatou taitoatasi e mafaufau loloto ai i le tulaga o o tatou lava loto.
Mo se faataitaiga, e mafai ona e fesili ifo ia te oe lava ia, “Ua saunia ea lo’u loto e talia le Faaola?” I le taimi o le Kerisimasi e tele ina tatou usuina, “Ia sauni loto uma e talia nei o Ia.”2 E mafai faapefea ona e saunia lou loto mo Keriso, aemaise lava i le taimi pisi ae matagofie lenei o le vaitau?
Ua tumu tusitusiga paia i faamatalaga ia e mafai ona fesoasoani ia i tatou e iloilo ai le tulaga o o tatou loto. O nisi o fuaitau e aofia ai upu e pei o le “mama,”3 “agamalu,”4 “maualalo,”5 “momomo,”6 ma le “nutimomoia.”7 O nei upu, ma le tele o isi i tusitusiga paia uma, e aumaia ia i tatou se malamalamaaga i le loto o le Faaola. Ina ia mafai ona taliaina o Ia i totonu o o tatou loto, e tatau moni lava i o tatou loto ona mama ma maualalo e pei o Ia.
Ina ia toe faaupuina upu a Paulo, e mafai ona tatou taumafai ina ia maua upu ma uiga o Iesu Keriso na tusia e pei o se “tusi … i o matou nei loto, ua iloa ma faitaulia e tagata uma: … o le tusi a Keriso … e lei tusi i le vaitusi, a o le Agaga o le Atua soifua; ua le tusia i papatusi maa, a o papatusi aano o le loto.”8 O lenei mea e manaomia ai le sili atu nai lo na o le faafeiloaiina o le Kerisimasi lea e pau mai o tatou laugutu. Na lapatai mai le Alii e faasaga ia i latou o e, “faalatalata mai ia te a’u i o latou laugutu, a o o latou loto ua mamao mai ia te a’u.”9 I lenei Kerisimasi ma le gasologa o le tausaga, o a tatou galuega agalelei ma lelei o ni faailoaga sili lea o le tusia o lo tatou alolofa i le Faaola i o tatou loto.
Ao ou mafaufau i le tulaga o lo’u lava loto, ou te maua se uunaiga ma ni faataitaiga maoae ina ia mulimuli i le manaoga e ositaulaga mo isi ma le malosi o i latou o e na fesoasoani e faatulaga le Ekalesia a Iesu Keriso i aso anamua o lona Toefuataiga. Ou te fia faasoa atu se tala o le Kerisimasi e uiga i se uluai tagata liliu mai o le Au Paia o Aso e Gata Ai mai Immingham, Egelani: o Mary Wood Littleton.
E lei i ai se mafaufau o Mary ma lona toalua, o Paul o le a latou tuua lo latou fale i Egelani. Ae sa latou faalogo i le savali o le talalelei toefuataiina ma sa mauaina se molimau o lona moni. Na la papatiso, ma i le na o le lua masina mulimuli ane, na tuuvaa atu ai Mary ma Paul, faatasi ma le la fanau i Amerika e faapotopoto faatasi ma le Au Paia. Sa latou taunuu i Niu Ioka i le aso 20 Tesema, 1844. O le lima aso mulimuli ane, ua latou malaga atu i taavale solofanua i Navu, Ilinoi. Sei vaai faalemafaufau atu—o le malaga i le tau malulu i luga o auala maamaa ma faigata, sa latou faamanatuina ai le latou uluai Aso Kerisimasi i Amerika.
E ui i nei suiga uma, na tumau pea le faamoemoe o Mary i lona loto o le a i ai se aso o le a faamanatuina ai e lona aiga le Kerisimasi e pei ona latou faia i Egelani, faatasi ai ma mea teuteu, Tama Kerisimasi, ma pesepesega. Ae paga lea, o le latou Kerisimasi lona lua i Amerika, i le 1845, e lei lelei foi—sa latou faaaluina i totonu o le pusa o le taavale toso lea na faaliliuina e Paul i se tamai fale ao tauivi ai le aiga e faamautu i latou i Navu. Na fai mai foi Mary, faatasi ai ma se loto ua tumu i le faamoemoe, “O le tausaga a sau, o le a ese le Kerisimasi.”
O le tausaga na sosoo ai i le 1846, o le Kerisimasi lona tolu lea a le aiga i Amerika, na i ai Mary ma lana fanau i Uinita Kuota, o sauniuni mo le savaliga umi i sisifo i le tautotogo. Na tulieseina i latou e le au faatupu faalavelave mai Navu, ma na savavali Paul agai i sisifo faatasi ma le autau Mamona—i le fia selau maila le mamao ese. Ma sa le toe i ai foi ni pesepesega ma leai se Tama Kerisimasi. Ae, sa i ai le anapogi ma le tatalo faamaoni mo le tama tama e valu tausaga a Mary, o le na talioti i le le lava o meaai. Sa faasaoina o ia, ae na maliliu le isi toa 25 i Uinita Kuota i lena lava Aso Kerisimasi.
Pe ana le oo lava i lana Kerisimasi lona fa i Amerika, i le faatoa taunuu ai i le Vanu o Sate Leki, lea na faamanatuina ai faatasi e Mary ma lona aiga le Kerisimasi ma le filemu. Na oo lava i lena taimi, sa le o se ituaiga o faamanatuina sa ia lagonaina i Egelani. Ae, i nisi auala, sa sili atu. I le faamanatuina o le Kerisimasi i le aso Sapati, o le aso ina ua mavae le Kerisimasi i le 1847, na potopoto le Au Paia e tatalo, faaalia upu o le lotofaafetai, ma usu pese o viiga i le Atua mo le laveaiga o i latou i Siona. O se tasi o nei pese o se fatuga faamomoiloto mai le “O Mai Outou o le Au Paia,” o se viiga na tusia i luga o le auala a paionia lea na avea ma se pese o le faatuatua i nei Au Paia paionia anamua. Mulimuli ane, na tumau pea ona avea le “O Mai Outou o le Au Paia” ma se viiga e fiafia i ai, e oo lava i se pese o le Kerisimasi, i faafiafiaga o le Kerisimasi faapaionia.10
Ou te talitonu o luitau o Mary i le gasologa o tausaga na avea ma se mea na suia ai lona loto. Na foliga mai na ia vaai atu i le Kerisimasi ma le manino tele, faatasi ai ma ni tu masani o le Kerisimasi ma se pese fou i lona loto. Na ia matuai atinaeina se loto o le taulaga, faatotonugalemu i lona faamoemoe ma le alofa mo Iesu Keriso.
O le vaitau o le Kerisimasi ua foliga mai o se taimi talafeagai e mafaufau loloto ai pe o faapefea le ola maloloina o o tatou loto faaleagaga, ma o lea ou te faaiuina ai i se fautuaga faigofie atonu e mafai ona fesoasoani ai ia i tatou e mataituina ma faamalosia ai o tatou loto faaleagaga: Ou te valaaulia i tatou taitoatasi ina ia filifili e faia se mea lea e faaali atu ai, i se auala i fafo atu, o tatou lagona i totonu e uiga i lo tatou Faaola, o Iesu Keriso, e avea o se meaalofa tatou te tuuina atu ia te Ia i lenei tausaga.
E pei o Mary Littleton, ua tatou potopoto i lenei afiafi o ni soo faamaoni o Iesu Keriso e tapuai ia te Ia. Sei o tatou faalogologo atu nei ao auai le aufaipese ma “pese [a] agelu” i se viiga matagofie ma le faatauanau e valaauliaina atu ai “outou faamaoni” ina ia “o mai ma vaai [i] le Tupu ua fanau mai.” Pe o fea lava o tatou nonofo ai i le salafa o le lalolagi, e mafai ona tatou taitasi ma “o mai, … fiafia … [i] Peteleema”—e tusa lava pe na o o tatou loto—ina ia vivii ma faamanu atu ia te Ia.11
Ou te tuuina atu la’u molimau ia Iesu Keriso, o le Faaola o le lalolagi. Tau ina ia tatou tusia le Agaga o Keriso i o tatou loto i le vaitau o aso malolo ma i le tausaga fou o la’u tatalo lea i le suafa o Iesu Keriso, amene.