Va na iSolisoli e Sa Solia vei Iko o Jisu Karisito
Kemuni na taciqu kei na ganequ lomani, sa dua dina na gauna rekitaki oqo! Eda taleitaka na memela ni “Tou Mai Gole Vata”1 ka mai vakarokorokotaki Koya tu: o Jisu na Karisito—na gone duadua ga oya e Peceliema—“o Jiova sa Cecere ena Veiyalayalati Makawa [kei] na Mesaia ena ka Vou.”2
Ena bogi oqo meda vakasamataka vata na veivakalougatataki e sala vata mai nida vakanamata ena bula, ilesilesi, ivunau, kei na Veisorovaki ni Turaga o Jisu Karisito. Au sureti kemuni, me vaka e vakayacora na Tui o Penijamini vei ira na Yalododonu ena nona gauna, meda “vakasamataka na ituvaki ni bula kalougata ka mamarau e nodra ko ira era sa muria na ivakaro ni Kalou.” Na veivakalougatataki oqori e baleti keda ena gauna saraga oqo, ia e kena ikuri na yalayala ni “marau tawamudu.”3 Na kena rawarawa oqo, o ira na daumuri Jisu Karisito e nodra na madigi mera vakakila na reki sega ni tukuni rawa.
Au a vakananumi ena ka oqo ena siga ka dua niu a sotava e dua na agilosi na yacana o Lydia. A sega ni vakaisulu vulavula tu na agilosi oqo, ka a vakarawarawataka o koya na neirau veisotari ena nona gole mai ki na noqu valenivolavola. E sa yabaki 12 o Lydia. A tukuni vei au ni sa sotava tiko o koya e dua na ituvaki dredre ni kenisa ni mona.4 E sa irairai vaka-agilosi okoya ka sa ulabaleta na nona yabaki na nona imoimoi. Ni keirau veivosakitaka tu na nona bula kei na ka sa tu mai liu, e a yalomalua ka vakacegu voli o koya. Niu taroga ke tiko vua eso na taro, a sauma totolo o koya, “E vakacava tu mada o lomalagi?” Oqo a muataki ki na veivosaki ni loma-ki-na-loma ena inaki ni bula kei na veivakalougatataki sa solia tu na Tamada Vakalomalagi kei na Luvena Lomani kivei ira era dokai ka muri Rau.
A tarai au vakabibi sara na vakabauta nei Lydia kei na nona matavuvale! Dina ga ni sotava tu e dua na bolebole vakaitamera me vaka sa donui ena vuravura oqo, e sa vakasinaiti tu o Lydia ena vakabauta. Sa tiko vua na raitayaloyalo tawamudu. Sa kila o koya ni sa lomani koya na Turaga ka na vukei koya. Sa vakasinaiti tu na nona matavuvale veitokoni ena vakacegu kei na vakanauinui vataga e rawa duadua ga ni kauta mai na vakabauti ni Turaga.
A nuitaka tu o Lydia me sotava na Peresitedi ni Lotu ni Turaga, ia sa titobu vakaidina sara na nona gagadre mai na dua na ka a rawa ni sotava taumada ena bula oqo. Sa nona gagadre levu sara me na tiko vata vakadua kei na nona matavuvale ena ivakatabutubutu ni bula vakasilesitieli. Sa oka kina na nona gagadre me na tiko vata kei na Tamada Vakalomalagi kei Jisu ena veigauna.
Vakaidina, sa vakayarayarataki keda yadua na noda gagadre ena sala uasivi eso, sega ni gauna ga oqo ia na kena mai liu. Vakasamataka na vosa veiganiti oqo mai vei Alama: “Sa solia [na Turaga] vei ira na tamata me vaka na nodra gagadre.”5
Sa ka bibi na gagadre ena draki ni soli iloloma oqo, ni da sa qarauna vakavinaka na nodra gagadre o ira eda lomana. Donuya na gauna oqo, au sa sureti kemuni talega mo ni navuca na nomuni dui gagadre. Na cava so na nomu gagadre bibi? Na cava o vinakata tu mada mo sotakaya ka rawata ena bula oqo? O vinakata dina li mo na vakataki Jisu Karisito vakalevu cake sara? O vinakata dina li mo bula vata tu ga kei na Tamada Vakalomalagi kei na nomu matavuvale ka bulataka na Nona bula?
Ke sa vakakina, o na vinakata mo ciqoma na isolisoli e vuqa ni Turaga me vukei iko kei au ena nodaru gauna ni tiko vakawawa ena bula oqo. Me da sa vakanamata ki na va na isolisoli sa solia o Jisu Karisito kivei ira kece sa lomasoli mera ciqoma.6
Matai, sa solia o Koya vei iko kei au na ivakarau tawayalani ni loloma. O ya e oka kina na ivakarau ni lomani ira na tawalomani kei ira ka sega walega ni sega ni lomani iko ia era vakalialiai ka vakacacani iko.7
Ena veivuke ni iVakabula, sa rawa ni da vulica meda loloma me vakataki Koya. Ena rairai gadreva na veisau ni yalo—vakaidina na vakamalumalumutaki ni lomada—ni sa vakavulici keda na iVakabula meda veivukei dina sara vakaikeda. Na taciqu kei na ganequ lomani, sa rawa ni da veiqaravi vakaidina ena sala ni Turaga ni da ciqoma na Nona isolisoli ni loloma.
Kerea na veivuke ni Turaga mo lomani ira sa gadreva o Koya mo lomana, vakakina o ira ka sega ni dau kauwaitaki tu vakarawarawa. O na rairai vinakata beka mo kerea na Kalou mera lako vata kei iko na Nona agilosi ena vanua o sega ni via butuka tu.8
Nai karua ni solisoli sa solia vei iko na iVakabula oya na rawati ni veivosoti. Mai na Nona Veisorovaki vakalou, sa rawa ni o vosoti ira na vakamavoataki iko ka ra na rairai sega ni kauwaitaka na nodra vakacacani iko.
Sa dau rawarawa tu meda vosota e dua ka qara vakaidina kei na yalomalua na nomu veivosoti. Ia na solia vei iko na iVakabula na igu mo vosota e dua ga ka sa vakatotogani iko ena sala cavaga. Ka na sega tale ni lawakitaka rawa na nomu bula na nodra ivalavala mosimosi.
Ai katolu ni solisoli ni iVakabula oya na veivutuni. E sega ni dau kilai vakamata tu na isolisoli oqo. Me vaka o sa kila, a volai taumada na Veiyalayalati Vou ena vosa va-Kiriki. Ena veitikina a gadreva kina na iVakabula mera veivutuni na tamata, na vosa e vakadewataki me “veivutunie sa vosa va-Kiriki metanoeo.9 Oqo sa dua na vosayaco kaukauwa ni Kiriki. Na iliu ni vosa meta sa kena ibalebale na “veisau.” Eda sa vakayagataka talega Vakavalagi na iliu ni vosa oya. Me ivakaraitaki, na vosa metamorphosis sa kena ibalebale na “veisau ena ituvaki se irairai.” Na imuri ni vosa noeoe sa baleta na vosa va-Kiriki e kena ibalebale na “vakasama.”10 E sa baleta talega eso tale na vosa va-Kiriki e kena ibalebale na “kilaka,”11 “yalo,”12 kei na “icegu.”13
Eda sa rawa li ni raica na raba kei na titobu ni ka e sa soli tiko vei keda na Turaga ni sa solia o Koya na isolisoli ni veivutuni? Sa sureti keda o Koya meda veisautaka na noda vakasama, noda kilaka, na yaloda, kei na noda icegu. Me ivakaraitaki, ni da sa veivutuni, eda cegu ena vakavinavinaka kivua na Kalou, ka sa solia vei keda na icegu ena veisiga.14 Ka da sa gadreva ni vakayagataka na icegu oya ni qaravi Koya kei ira na Luvena. Sa isolisoli vakasakiti na veivutuni. E sa dua na ivalavala meda kakua ni rerevaka. E sa isolisoli kivei keda meda ciqoma ena reki ka vakayagataka—mokota saraga—ena veisiga ni da saga meda vakataka cake na noda iVakabula.
Sa raica rawa na tamai Tui Lamonai na ka sa tu mai liu kivei ira na sa vakabauti Karisito ka muri Koya. A cauraka o koya ni na solia tani na nona ivalavala ca taucoko me guta ni kila na iVakabula.15 Na veivutuni dina e sega ni mai dua na soqo. E sa dua na igugu tawayalani. E sa ka bibi ki na toso ki liu kei na rawati ni yalo vakacegu, lomavinaka, kei na reki.
Ai kava ni solisoli mai vua na noda iVakabula e sa dua vakaidina na yalayala—sa iyalayala ni bula tawamudu. Oqo e sega ni kena ibalebale wale na bula voli me dua na gauna balavu sara. Ena bula tu ga na tamata kecega ni oti na mate, se vakacava na matanitu se lagilagi era na rairai rawata. Eda na vakaturicake taucoko ka sotakaya na bula tawamate rawa. Ia na bula tawamudu e sa ka levu cake mai na dua ga na ivakatagedegede ni gauna. Na bula tawamudu esa mataqali ka ivakarau ni bula e bulataka na Tamada Vakalomalagi kei na Luvena Dau Lomani. Ni sa solia vei keda na Tamada na bula tawamudu, sa kaya dina tiko o Koya, “Kevaka o sa digitaka mo muria na Luvequ—ke sa nomu gagadre vakaidina mo vakataki Koya vakalevu cake—ena yaco na gauna ko na bula me vaka keirau sa bula ka vakatulewa ena vuravura kei na matanitu eso me vakataki keirau”
Ena kauta mai vei keda na va na isolisoli vakasakiti oqo na reki vakaitamera ni da vakadonuya. Era sa yaco vakakina baleta ni a navuca o Jiova me lako mai ki vuravura me vaka na gone o Jisu. E a sucu mai vua e dua na Tama tawamate rawa kei na dua na tina vakaygo. A sucu o Koya e Peceliema ena ituvaki vakaciriloloma sara. Sa Nona na vakasucu tabu era a raitayaloyalotaka na parofita mai na gauna i Atama. Sai Jisu Karisito na isolisoli cecere duadua ni Kalou—na isolisoli ni Tamada kivei ira taucoko na Luvena.16 Na vakasucu oya eda marautaka vakayadua ena Siganisucu.
Ni sa vakanamata na noda vakasama kei na vakanananu kivua na iVakabula kei vuravura, na cava ga, sa dodonu meda cakava ni ciqoma kina na veisolisoli oqo ka sa lomasoli tu ni solia vei keda o Jisu Karisito? Na cava na usutu ni loloma voli me vakataki Koya, vosota voli vakataki Koya, veivutuni voli meda yaco ni vakataki Koya, ka kenai tinitini bula voli vata kei Koya kei na Tamada Vakalomalagi?
Sa usutu na caka kei na maroroi ni veiyalayalati tabu. Eda sa digitaka meda bula ena salatu ni veiyalayalati ni Turaga ka toka dei kina. E sa sega ni dua na ka e buli vakatamata. Sai koya na sala ki na reki dina ena bula oqo kei na bula tawamudu ena gauna muri mai.
Kemuni na taciqu kei na ganequ lomani, sa noqu gagadre bibi me rawa ni ra rogoca na kosipeli i Jisu Karisito na luvena taucoko na Tamada Vakalomalagi ka tugana na Nona ivakavuvuli ka me vakasokomuni o Isireli me vaka sa yalataki ena iotioti ni gauna oqo. Sa noqu masu ni da na vakadinata ka ciqoma na loloma sa tiko vua na iVakabula me baleti keda yadua. Sa vakavuna kivua na Nona loloma vakalou uasivi me sorovaki iko kei au. Na isolisoli oya—Nona Veisorovaki—e sa vakatara kina me noda na Nona isolisoli taucoko tale eso me noda.
Ena dua na siga mai oqo—ena Yabaki Dua na Udolu eda sa vakavakarau tiko kina—”ena tekiduru na duru kecega, ka na vakatusa na yame kecega”17 ni sa Karisito o Jisu. Ka na sega walega ni Matasere ni Tabernacle totoka e Temple Square ena lagata voli na “Aleluia.”18 Na tamata taucoko ka sa digitaka me muri Jisu Karisito ena lagata ka kailavaka: “Aleluia: sa lewa na Turaga na Kalou Kaukauwa sara.”19 “Na matanitu kei vuravura oqo sa qai yaco me nona na noda Turaga, a nei koya na nona Karisito; ia ena lewa ko koya ka sega ni mudu,”20A nodra Tui na tui, kei na nodra Turaga na turaga.”21
Au vakadinadinataka ni sa bula na Kalou! Sa Karisito o Jisu—na Mesaia. Oqo na Nona Lotu, ka sa dusimaka ena vukudra na Nona parofita. Ena yalomalumalumu, keitou sa vatonaka na Nona veivakalougatataki kivei kemuni yadua, oka kina na gagadre kei na igu me ciqomi na isolisoli taucoko sa solia vei kemuni na iVakabula, ena yaca i Jisu Karisito, emeni.