Bogi Buto, Nai Serau ni Kalou
Au via talanoataka e rua na italanoa ka yaco vei au ena vica vata na yabaki sa oti, ia e tiko vinaka ena noqu vakanananu ka vakavulici au tiko me yacova mai oqo.
Nai matai e yaco vei au niu se yabaki 6. Na neitou qasenivuli ni vakatagi ena Tabanalevu na Hunter 5 o Sister Beverly Whitley. Au raica ni a sega madaga ni yabaki 40 o koya, ia era yabaki tini vakacaca eso na luvena ka yalomatua sara ka vuku na kena irairai vei keimami na Lalai. Keimami dau veilasamaki kei koya ka keimami vakila ni keimami vaka na tabaqase cake, ka keimami taleitaka sara. Keitou dokai koya, ka dau vinakata me keimami vakamarautaki koya. E dau tukuna vei keimami o koya me rogolevu na neimami laga sere me rawa ni rogoci keimami o ira na neimami tubutubu ena rumu ka dua. Kakua ni kaikaila—me laga ga sere vakaidina! Ka keimami lagasere ena yaloi keimami dina. E vakavulici keimami o koya me keimami lagata e dua na sere mai na ivolanisere ni qase, ni kaya sa kila vinaka tu o koya ni keimami sa yalomatua tu ena sereivakatagi me rawa ni keimami cavuqaqataka na qaqana dredre. E vakamacalataka vei keimami o koya na ibalebale kece ni vosa me rawa ni keimami kila na kena ibalebale. E vakavulica vei keimami o koya ni sere kece e tiko na kena ibalebale talei me baleti keimami yadua, ka kevaka keimami vakasamataka na qaqana, keimami na kunea na itukutuku e baleta na neimami bula.
Ena Siganisucu koya, au tovolea meu bulataka na veika e vakatavulica vei keimami o Sister Whitley, ena noqu vulica na qaqana kece ni “Silent Night.” Au, sa kere veivosoti rawa oqo vei ira na dauvakadewa belata ena verevereya na kena oqo. Niu se qai yabaki 6, au vakasamataka vagumatua na qaqanisere ena ikatolu ni wase ni sere, niu sega ni kila vinaka na ibalebale ni yatuvosa oya. Au lagata tu na “Son of God, love’s pure light,” niu nanuma ni kena ibalebale na rarama e vakadewai mai ena loloma uasivi, vei au e kena ibalebale ni lomana na Luve ni Kalou na rarama uasivi—e taleitaka o Koya na veika e caka mai na rarama uasivi. Niu vakasama tu vakai Sister Whitley, au saga meu kila ena rawa vakacava niu vakai Jisu meu tu “nai serau ni Kalou”.
E yaco na ikarua ni talanoa niu se qai yabaki 9. Me vakai ira na gone ena yabaki ni bula oya, au vuli piano tiko. E sega soti ni veiganiti na noqu taledi ena ka oqo, ia, me vakayaloqaqataki au, e kerei au o noqu bisopi meu tabaka na ivakatagi ni dua na sere ni Siganisucu ena soqoni ni sakaramede ena Siga ni se bera na Siganisucu. Au sa nanuma sara meu vakatagitaka na “Bogi Buto.” E vukei au o noqu qasenivuli meu vakavakarau. E rau vakarogoci au tu na noqu itubutubu niu vakatagitaka tu me sivia ni 100 na gauna ena nodrau piano ena tabavale e ra. Dua a tukuna vei au meu wiligusutaka na sereau rere niu na qiria na ivakatagi ena matadra na lewe ni noqu tabanalevu ni sega na draunipepa ni sere, kau sega ni rawa wiligusutaka na sere. Au sa vakasamataka mai e dua na noqu ituvatuva. Au na kauta ga kei au na noqu draunipepa ni vakatagi, ia au na sega ni biuta mai e dela ni piano au na biuta ena delani noqu liku. Au na rawa ni raica sobu ga mai na ligaqu kau raica sara na kabakaba ni vakatagi. E lako vinaka tu na ituvatuva oqo me yacova ga e 20 na sekodi. Au tokara na draunipepa ni vakatagi ena dela ni noqu liku ni Siganisucu ka tekivu meu tabaka sara, e sisisi na noqu liku, ena lomadonu ni matai ni qaqana, e sisi mai na dela ni noqu liku na draunipepa ni vakatagi ka mai yali yani e ruku piano. Au sa mani tao tu. E sega tale ni dua na gaunisala meu taura mai na draunipepa oya, ka sega ni dua na ka au vakasamataka rawa. Au katia na batiqu kau tovolea sara ena noqu igu. Sa dua na gauna e veivakacacani sara.
Au na qiria na noti cala au rawa ni raica yani na nodra mata veveku ena matadra na sarasara tiko. Au qiria cala na karua ni qaqana. Au sega ni vakatagitaka na ikatolu ni qaqana kau vakatotolo yani meu dabe ni wadadamu tu na mataqu kau saga meu kua ni tagi. E rau vakasolokakana mai na noqu itubutubu “Na Cava e Yaco? O kila vinaka tu na sere oya.” Au sega ni rawa ni wawa meu lako tani mai valenilotu. Au sega ni via raica se vosa vei dua; au sa madua saraga. Ni sa cava na soqoni, e lako mai vei au na noqu qasenivuli ni Wilivola ni Sigatabu, o Sister Alma Heaton. Au saga meu levei koya, ia e taura o koya na ligaqu. E sega ni tukuna o koya vei au na kena rogo vinaka, era sa kila kece ni lasu oya, e kaya o koya e dua na ka au na dau nanuma tu ga ena noqu bula kece. “E sega saraga ni dua na ka na kena vakavotukana, Sharon. Keimami raica kece na sasaga kei na igu e biuta kina, ka keimami lomani iko kevaka o rawa ni tabaka na piano se sega.”
Ya na dina dodonu. Ia, e sega ni veivakacacani me vaka au a namaka. Na dina oya, niu sa cakacaka vakaukauwa, ka ra na lomani au, e dina ga niu sega ni kila na taba piano. Au dredre yani vakamalua ka mokoti au sara ena nodra imoko na biunigone kau sa vakila ni sa vinaka tale na ka kecega.
E sega beka ni vakasakiti na veika e rau vakayacora o Beverly Whitley kei Alma Heaton. E sega talega ni rau vola e dua na ka ena nodrau vola ni veisiga ena bogi oya. E sega ni dua ena nodrau vuvale e kila nai talanoa oqo. Erau vakavulici ira tiko na gone lalai mera lagasere ka kila vinaka na kosipeli. Na cava beka me na vakariseyate ena veika oqori? Ia e sega ni vakakina. Kevaka o tarogi au na cava na irairai ni tamata e tu e “nai serau ni Kalou,” e vakataki Beverly Whitley. E vakataki Alma Heaton. Erau vakila “nai serau ni Kalou” ni dua na gone lailai e sasaga tiko ena nona igu ka lomani koya me vakakina, kevaka sara madaga e sega ni yaco sara vakavinaka.
E vakatalega oqori na Tamada Vakalomalagi. E raica keda tiko, o Koya ni da sasaga tiko. E sega ni dau rawati tu ga na noda sasaga, ia, e kila o Koya na kaukauwa ni noda saga ka cakacakataka tiko—ni da vakasequru bati tu kei na toso dredre—ka lomani keda dina o Koya. Ena noda karakaravisa, kei na domo vela, ka sega ni kilai tu na kabakaba ni sere eda vakamuria, e tala mai o Koya na Luvena Duabau ga, sai koya nai serau ni Kalou. Ena vakavinakataka o Jisu Karisito na kabakabaka ni sere kece e cala ka vakabula na karakaravisa kevaka eda na lako yani Vua ka kerea Nona veivuke. Baleta na nona sucu, Veisorovaki, kei na mate i Jisu Karisito eda rawa ni moce vakacegu.”1
Sa kani marau vei au meu lagata na sere ena gauna ni Siganisucu oqo ka tiko kina na itukutuku talei ni Vakabula kei vuravura me baleti ira e mosi tu na yalodra. Au yalataka vei kemuni na ka vata ga e yalataka o Sister Whitley vei ira na Lalai. Kevaka o vakasamataka na qaqa ni sere o lagata ena gauna oqo, o na kunea na itukutuku vakalou e caka me baleti iko ka na laveti iko cake ka vakacegui iko. Oqo e dua au kunea ena gauna ni Siganisucu oqo. Au dau leqataka tu ga na levu ni tamata e sega ni dau yacovi ira rawa na veivuke raraba ni lotu kei na nodra dau vakadredretaka eso na matanitu me keitou yacovi ira yani na tacida kei na ganeda era vakaleqai tu. Ena mataka nikua ena iSoqosoqo ni Veivukei, au vakarogoca vakamalua na na sere keitou lagata:
Vakalougatataki ira na gone era lomani ena nomu veimaroroi talei,
Kila ni ganiti keda ki lomalagi ka tiko vata kei iko kina.2
Au vakadinadinataka ni serau ni Kalou na Luve ni Kalou; Sai Koya nai serau ni Kalou. Ena yaca i Jisu Karisito, emeni.