អំណោយទានចំនួនបួនដែលព្រះយេស៊ូវគ្រីស្ទប្រទានដល់បងប្អូន
បងប្អូនប្រុសស្រីជាទីស្រឡាញ់ នេះគឺជារដូវកាលមួយដ៏សំខាន់ខ្លាំងណាស់ ! យើងចូលចិត្តច្រៀងបទ« ចូរមកពួកអ្នកស្មោះត្រង់ » ១ ហើយមានចិត្តរីករាយដើម្បីសរសើរតម្កើងទ្រង់ ៖ ព្រះយេស៊ូវគ្រីស្ទ—ជាព្រះឱរសដ៏អស្ចារ្យនៃភូមិបេថ្លេហិម—« ព្រះយេហូវ៉ានៅក្នុងព្រះគម្ពីរសញ្ញាចាស់ [ និង ] ជាព្រះមែស៊ីនៅក្នុងព្រះគម្ពីរសញ្ញាថ្មី » ។២
រាត្រីនេះចូរយើងពិចារណាជាមួយគ្នាអំពីពរជ័យដែលកើតមានចំពោះយើង ពេលយើងផ្តោតចិត្តទៅលើព្រះជន្ម បេសកកម្ម គោលលទ្ធិ និងដង្វាយធួនរបស់ព្រះអម្ចាស់យេស៊ូវគ្រីស្ទ ។ ដូចជាស្តេចបេនយ៉ាមីនបានធ្វើចំពោះពួកបរិសុទ្ធនៅជំនាន់ទ្រង់ដែរ នោះខ្ញុំអញ្ជើញបងប្អូនឲ្យ « គិតពិចារណាអំពីស្ថានភាពដ៏មានពរ និងរីករាយនៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ » ។ ពរជ័យនោះគឺមានសម្រាប់យើងនៅលើផែនដីនេះក្នុងពេលនេះ ប៉ុន្តែបន្ថែមទៅលើពរជ័យនោះគឺការសន្យាបន្តទៀតនៃ « សុភមង្គលដ៏មិនចេះចប់មិនចេះហើយ » ។៣ ដោយបានថ្លែងយ៉ាងសាមញ្ញ នោះអ្នកដើរតាមដ៏ពិតរបស់ព្រះយេស៊ូវគ្រីស្ទមានឯកសិទ្ធិនៃបទពិសោធន៍អំណរជារៀងរហូតដែលពុំអាចថ្លែងបាន ។
ខ្ញុំបាននឹកចាំពីរឿងនេះកាលពីប៉ុន្មានថ្ងៃមុន កាលខ្ញុំបានជួបនឹងទេវតាមួយរូបឈ្មោះលីឌៀ ។ ទេវតារូបនេះពុំពាក់រូប-សទេ ហើយនាងងាយឲ្យយើងបានជួប ដោយនាងការមកកាន់ការិយាល័យរបស់ខ្ញុំ ។ លីឌៀមានអាយុ ១២ ឆ្នាំ ។ មានគេប្រាប់ខ្ញុំថា នាងមានជំងឺមហារីកខួរក្បាលដ៏កម្រមួយយ៉ាងធ្ងន់ធ្ងរ ។៤ នាងមានទឹកមុខដូចជាទេវតា ហើយមានភាពចាស់ទុំលើសពីអាយុនាងទៅទៀត ។ នៅពេលយើងបាននិយាយអំពីជីវិត និងអនាគតរបស់នាង នាងបានស្ងប់ចិត្ត និងភាពសុខសាន្ត ។ នៅពេលខ្ញុំសួរថា តើនាងមានសំណួរអ្វីទេ នាងបានតបយ៉ាងលឿនថា « តើស្ថានសួគ៌មានទិដ្ឋភាពបែបណា ? » ការណ៍នេះបានដឹកនាំទៅរកការពិភាក្សាចេញពីចិត្តមួយអំពីគោលបំណងនៃជីវិតនេះ និងពរជ័យដែលព្រះវរបិតាសួគ៌នៃយើង និងព្រះរាជបុត្រាស្ងួនភ្ញារបស់ទ្រង់បានប្រទានដល់អស់អ្នកដែលគោរព ហើយធ្វើតាមពួកទ្រង់ ។
ខ្ញុំរំជួលចិត្តយ៉ាងខ្លាំងដោយសារសេចក្ដីជំនឿរបស់លីឌៀ និងគ្រួសាររបស់នាង ! ទោះជាកំពុងប្រឈមនឹងឧបសគ្គដ៏លំបាកបំផុតមួយនៅក្នុងជីវិតនេះក្ដី ក៏លីឌៀនៅតែពោរពេញដោយសេចក្ដីជំនឿដែរ ។ នាងមានទស្សនវិស័យដ៏នៅអស់កល្បជានិច្ចមួយ ។ នាងដឹងថា ព្រះអម្ចាស់ស្រឡាញ់នាង ហើយនឹងមើលថែនាង ។ គ្រួសារដ៏ស្មោះត្រង់របស់នាងក៏ពោរពេញដោយភាពសុខសាន្ត និងស្ងប់ចិត្តដូចគ្នាតាមរយៈសេចក្ដីជំនឿលើព្រះអម្ចាស់ ។
ក្ដីប្រាថ្នារបស់លីឌៀគឺចង់ជួបនឹងប្រធាននៃសាសនាចក្ររបស់ព្រះអម្ចាស់ ប៉ុន្តែ បំណងប្រាថ្នា របស់នាងគឺលើសពីបទពិសោធន៍មួយគ្រានៅក្នុងជីវិតរមែងស្លាប់នេះទៅទៀត ។ បំណងប្រាថ្នាធំបំផុតរបស់នាងគឺចង់រស់នៅជាមួយនឹងគ្រួសាររបស់នាងជារៀងរហូតនៅក្នុងនគរសេឡេស្ទាល ។ នាងក៏មានបំណងប្រាថ្នាដើម្បីបាននៅជាមួយនឹងព្រះវរបិតាសួគ៌ និងព្រះយេស៊ូវជានិច្ចផងដែរ ។
ពិតណាស់ បំណងប្រាថ្នារបស់យើងជះឥទ្ធិពលដល់យើងម្នាក់ៗតាមរបៀបដ៏អស្ចារ្យ ពុំគ្រាន់តែនៅក្នុងជីវិតនេះ និងនៅពេលនេះប៉ុណ្ណោះទេ ប៉ុន្តែលើសពីនេះទៅទៀត ។ សូមពិចារណាពីសារៈសំខាន់នៃសេចក្ដីថ្លែងការណ៍នេះមកពីអាលម៉ាថា « [ ព្រះអម្ចាស់ ] ប្រទានឲ្យមនុស្ស តាមបំណងរបស់គេ » ។៥
បំណងប្រាថ្នាមានសារៈសំខាន់នៅក្នុងរដូវកាលនៃការផ្ដល់អំណោយនេះ នៅពេលយើងគិតយ៉ាងច្បាស់ពីបំណងប្រាថ្នារបស់មនុស្សដែលយើងស្រឡាញ់ ។ នៅក្នុងរដូវកាលនេះ ខ្ញុំសូមអញ្ជើញបងប្អូនឲ្យពិចារណាពីបំណងប្រាថ្នារបស់បងប្អូនផ្ទាល់ ។ តើបំណងប្រាថ្នាដ៏ធំបំផុតរបស់បងប្អូនគឺជាអ្វី ? តើបងប្អូនពិតជាចង់ដកពិសោធន៍ ហើយសម្រេចបានអ្វីខ្លះនៅក្នុងជីវិតនេះ ? តើបងប្អូនពិតជាចង់ក្លាយកាន់តែដូចជាព្រះយេស៊ូវគ្រីស្ទមែនទេ ? តើបងប្អូនពិតជាចង់រស់នៅជាមួយនឹងព្រះវរបិតាសួគ៌ និងគ្រួសាររបស់បងប្អូនជារៀងរហូត ហើយរស់នៅដូចជាទ្រង់ឬទេ ?
ប្រសិនបើដូច្នោះមែន បងប្អូននឹងចង់ទទួលយកអំណោយជាច្រើនដែលព្រះអម្ចាស់បានប្រទានឲ្យ ដើម្បីជួយបងប្អូន និងខ្ញុំនៅក្នុងគ្រាសាកល្បងរបស់យើងនេះ ។ ចូរយើងផ្ដោតលើអំណោយចំនួន បួន ដែលព្រះយេស៊ូវគ្រីស្ទបានប្រទានដល់អស់អ្នកដែលនឹងយល់ព្រមទទួល វា ។៦
ទីមួយ ទ្រង់បានប្រទានដល់បងប្អូន និងខ្ញុំនូវសមត្ថភាពគ្មានកំណត់ ដើម្បីស្រឡាញ់ ។ វារួមបញ្ចូលទាំងសមត្ថភាពដើម្បីស្រឡាញ់មនុស្សដែលមិនគួរឲ្យស្រឡាញ់ និងអស់អ្នកដែល ពុំ ស្រឡាញ់បងប្អូនព្រមទាំងបានបៀតបៀន ហើយចងគំនុំចំពោះបងប្អូននាពេលបច្ចុប្បន្នផងដែរ ។៧
ដោយមានជំនួយរបស់ព្រះអង្គសង្គ្រោះ យើងអាចរៀនស្រឡាញ់ដូចជាទ្រង់ ។ វាប្រហែលជាតម្រូវឲ្យមានការផ្លាស់ប្ដូរដួងចិត្តមួយ—ពិតណាស់ជាការបន្ទន់ចិត្តរបស់យើង—ដូចជាព្រះអង្គសង្គ្រោះបានបង្រៀនពីរបៀបមើលថែគ្នា ដ៏ពិតប្រាកដ ។ បងប្អូនប្រុសស្រីជាទីស្រឡាញ់ យើងអាចផ្ដល់ការងារបម្រើយ៉ាងពិតប្រាកដតាមរបៀបព្រះអម្ចាស់ នៅពេលយើងទទួលយកអំណោយនៃសេចក្ដីស្រឡាញ់របស់ទ្រង់ ។
ចូរទូលសូមជំនួយរបស់ព្រះអម្ចាស់ដើម្បីស្រឡាញ់មនុស្សដែលទ្រង់ត្រូវការឲ្យបងប្អូនស្រឡាញ់ រួមទាំងមនុស្សដែលពុំងាយទទួលយកសេចក្ដីស្រឡាញ់ក្ដី ។ បងប្អូនប្រហែលជាត្រូវទូលសូមព្រះឲ្យប្រទានពួកទេវតារបស់ទ្រង់ដើម្បីដើរជាមួយនឹងបងប្អូនទៅកន្លែងដែលបងប្អូនពុំចង់ទៅ ។៨
អំណោយទីពីរដែលព្រះអង្គសង្គ្រោះប្រទានដល់បងប្អូនគឺលទ្ធភាព ដើម្បីអភ័យទោស ។ តាមរយៈដង្វាយធួនដ៏និរន្តររបស់ទ្រង់ បងប្អូនអាចអភ័យទោសដល់មនុស្សដែលធ្វើឲ្យបានបងប្អូនឈឺចាប់ និងមនុស្សដែលប្រហែលជានឹងពុំព្រមទទួលយកការទទួលខុសត្រូវចំពោះភាពឃោរឃៅដែលគេធ្វើមកលើបងប្អូន ។
ជាធម្មតា វាងាយស្រួលដើម្បីអភ័យទោសដល់មនុស្សដែលស្វែងរកការអភ័យទោសពីបងប្អូនដោយស្មោះ និងដោយរាបសា ។ ប៉ុន្តែព្រះអង្គសង្គ្រោះនឹងប្រទានដល់បងប្អូននូវលទ្ធភាពដើម្បីអភ័យទោសដល់មនុស្សគ្រប់គ្នាដែលធ្វើខុសចំពោះបងប្អូនតាមគ្រប់រូបភាព ។ បន្ទាប់មក ទង្វើដ៏ឈឺចាប់របស់ពួកគេពុំអាចបំផ្លាញព្រលឹងរបស់បងប្អូនបានទៀតឡើយ ។
អំណោយទីបីមកពីព្រះអង្គសង្គ្រោះគឺ ការប្រែចិត្ត ។ អំណោយនេះពុំត្រូវបានយល់ច្បាស់លាស់ជានិច្ចនោះទេ ។ ដូចបងប្អូនដឹងហើយ ព្រះគម្ពីរសញ្ញាថ្មីដើមឡើយត្រូវបានសរសេរជាភាសាក្រិក ។ នៅវគ្គមួយត្រង់កន្លែងដែលព្រះអង្គសង្គ្រោះអំពាវនាវឲ្យមនុស្សប្រែចិត្ត ពាក្យដែលបានបកប្រែថា « ប្រែចិត្តជាភាសាក្រិកគឺពាក្យថា metanoeo ។៩ នេះគឺជាពាក្យករិយាសព្ទជាភាសាក្រិកដ៏មានអនុភាពមួយ ។ បុព្វបទនៃពាក្យថា meta មានន័យថា « ផ្លាស់ប្ដូរ » ។ យើងក៏ប្រើបុព្វបទនោះក្នុងភាសាអង់គ្លេសដែរ ។ ឧទាហរណ៍ ពាក្យ metamorphosis មានន័យថា « ផ្លាស់ប្ដូរទ្រង់ទ្រាយ ឬទម្រង់ » ។ ពាក្យ noeo ដែលនៅខាងចុងទាក់ទងនឹងពាក្យក្រិកមួយដែលមានន័យថា« គំនិត » ។១០ វាក៏ទាក់ទងផងដែរនឹងពាក្យក្រិកផ្សេងទៀតដែលមានន័យថា « ចំណេះដឹង »១១ « ស្មារតី »១២ និង « ដង្ហើម » ។១៣
តើយើងអាចចាប់ផ្ដើមមើលឃើញទំហំ និងជម្រៅនៃអ្វីដែលព្រះអម្ចាស់កំពុងប្រទានឲ្យយើង នៅពេលទ្រង់ប្រទានដល់យើងនូវអំណោយដើម្បីប្រែចិត្ត ដែរឬទេ ? ទ្រង់អញ្ជើញយើងឲ្យផ្លាស់ប្ដូរគំនិត ចំណេះដឹង វិញ្ញាណ សូម្បីតែដង្ហើមរបស់យើង ។ ឧទាហរណ៍ នៅពេលយើងប្រែចិត្ត យើងដកដង្ហើមជាមួយនឹងអំណរគុណចំពោះព្រះ ជាអង្គដែលផ្ដល់ដង្ហើមឲ្យយើងជារៀងរាល់ថ្ងៃ ។១៤ ហើយយើងប្រាថ្នាចង់ប្រើដង្ហើមនោះដើម្បីបម្រើទ្រង់ និងបុត្រាបុត្រីរបស់ទ្រង់ ។ ការប្រែចិត្តគឺជាអំណោយមួយដ៏ត្រចះត្រចង់ ។ វាគឺជាដំណើរការមួយដែលពុំគួរមានការភ័យខ្លាចឡើយ ។ វាគឺជាអំណោយមួយសម្រាប់យើង ដើម្បីទទួលដោយអំណរ ហើយប្រើ—ថែមទាំងឱបក្រសោបយក—ជារៀងរាល់ថ្ងៃ នៅពេលយើងខិតខំដើម្បីប្រែក្លាយកាន់តែដូចជាព្រះអង្គសង្គ្រោះនៃយើង ។
បិតារបស់ស្ដេចឡាម៉ូណៃបានយល់ដឹងពីអនាគតនៃអស់អ្នកដែលបានជឿលើព្រះគ្រីស្ទ ហើយបានធ្វើតាមទ្រង់ ។ ទ្រង់បានប្រកាសថា ទ្រង់នឹងលះបង់អំពើបាប ទាំងអស់ របស់ទ្រង់ដើម្បីទទួលបានឯកសិទ្ធិនៃការស្គាល់ព្រះអម្ចាស់ ។១៥ ការប្រែចិត្តពិតពុំមែនជារឿងដែលកើតឡើងតែម្ដងនោះទេ ។ វាគឺជាឯកសិទ្ធិមួយដែលគ្មានទីបញ្ចប់ ។ វាមាន សារៈសំខាន់ ចំពោះការរីកចម្រើន និងមានភាពសុខសាន្តនៅក្នុងចិត្ត ការលួងលោម និងអំណរ ។
អំណោយទីបួនមកពីព្រះអង្គសង្គ្រោះនៃយើងគឺជាការសន្យាមួយ—ជាការសន្យានៃ ជីវិតជានិរន្ដរ ។ វាពុំមែនមានន័យថា គ្រាន់តែជាការរស់នៅសម្រាប់ពេលដ៏យូរអង្វែងនោះទេ ។ មនុស្សគ្រប់គ្នានឹងរស់នៅជារៀងរហូតបន្ទាប់ពីសេចក្ដីស្លាប់ ទោះជាពួកគេបានទទួលនគរ ឬសិរីល្អណាមួយក្ដី ។ មនុស្សគ្រប់គ្នានឹងបានរស់ឡើងវិញ ហើយដកពិសោធន៍នូវ អមតភាព ។ ប៉ុន្តែជីវិតដ៏នៅអស់កល្បជានិច្ចគឺលើសពីការកំណត់ពេលវេលាមួយទៅទៀត ។ ជីវិតដ៏នៅអស់កល្បជានិច្ចគឺជាជីវិតមួយដែលព្រះវរបិតាសួគ៌ និងបុត្រាស្ងួនភ្ញារបស់ទ្រង់រស់នៅ ។ នៅពេលព្រះវរបិតាប្រទានជីវិតដ៏នៅអស់កល្បជានិច្ចដល់យើង ទ្រង់កំពុងមានបន្ទូលថា « ប្រសិនបើអ្នកជ្រើសធ្វើតាមព្រះរាជបុត្រារបស់យើង—ប្រសិនបើ បំណងប្រាថ្នា របស់អ្នក ពិត ជាដើម្បីក្លាយឲ្យកាន់តែដូចជាទ្រង់មែន—នោះអ្នកត្រូវរស់នៅដូចជាយើង ហើយគ្រប់គ្រងពិភព និងនគរនានាដូចជាយើង » ។
អំណោយដ៏វិសេសវិសាលទាំងបួននេះនឹងនាំយកអំណរដ៏ច្រើនមកឲ្យយើង នៅពេលយើងទទួលយកវា ។ វាអាចកើតឡើងបាន ដោយសារព្រះយេហូវ៉ាបានយាងចុះមកផែនដីក្នុងនាមជាព្រះឱរសយេស៊ូវ ។ ទ្រង់បានប្រសូតមកពីព្រះវរបិតាដែលមានជីវិតអមតៈ និងមាតាដែលមានជីវិតរមែងស្លាប់ ។ ទ្រង់បានប្រសូតនៅភូមិបេថ្លេហិមក្នុងស្ថានភាពដ៏រាបសាបំផុត ។ ការប្រសូតរបស់ទ្រង់គឺជាការប្រសូតដ៏បរិសុទ្ធដែលបានឃើញជាមុនដោយពួកព្យាការីចាប់តាំងពីជំនាន់អ័ដាមមកម្ល៉េះ ។ ព្រះយេស៊ូវគ្រីស្ទគឺជាអំណោយដ៏ធំធេងរបស់ព្រះ—ជាអំណោយពីព្រះវរបិតាទៅកាន់បុត្រាបុត្រីទាំងអស់របស់ទ្រង់ ។១៦ យើងសាទរនឹងការប្រសូតនោះពេញដោយអំណររៀងរាល់រដូវកាលបុណ្យគ្រីស្ទម៉ាស់ ។
ដោយគំនិត និងអារម្មណ៍របស់យើងផ្ដោតយ៉ាងខ្លាំងទៅលើព្រះអង្គសង្គ្រោះនៃពិភពលោក តើ យើង ចាំបាច់ត្រូវធ្វើអ្វីខ្លះដើម្បីទទួលបានអំណោយទាំងនេះដែលព្រះយេស៊ូវគ្រីស្ទបានប្រទានដោយស្មោះដល់យើង ? តើអ្វីទៅគឺជាគន្លឹះដើម្បីស្រឡាញ់ដូចជាទ្រង់ អភ័យទោសដូចជាទ្រង់ ប្រែចិត្តដូចជាទ្រង់ ប្រែក្លាយកាន់តែដូចជាទ្រង់ ហើយនៅទីបំផុតរស់នៅជាមួយនឹងទ្រង់ និងព្រះវរបិតាសួគ៌នៃយើង ?
គន្លឹះនោះគឺជាការចុះ ហើយគោរពសេចក្តីសញ្ញាដ៏ពិសិដ្ឋទាំងឡាយ ។ យើង ជ្រើសរើស រស់នៅតាម និងរកចម្រើននៅលើផ្លូវនៃសេចក្ដីសញ្ញារបស់ព្រះអម្ចាស់ ហើយបន្តនៅលើផ្លូវនោះ ។ វាពុំមែនជាផ្លូវលំបាកទេ ។ វាគឺជា ផ្លូវ ទៅរកអំណរពិតនៅក្នុងជីវិតនេះ និងជីវិតដ៏នៅអស់កល្បជានិច្ចបន្ទាប់ពីជីវិតនេះ ។
បងប្អូនប្រុសស្រីជាទីស្រឡាញ់ បំណងប្រាថ្នាដ៏ធំបំផុតរបស់យើងគឺចង់ឲ្យបុត្រាបុត្រីគ្រប់រូបរបស់ព្រះវរបិតាសួគ៌មានឱកាសស្ដាប់ឮដំណឹងល្អនៃព្រះយេស៊ូវគ្រីស្ទ ហើយស្ដាប់តាមការបង្រៀនរបស់ទ្រង់ ហើយចង់ឲ្យសាសន៍អ៊ីស្រាអែលត្រូវបានប្រមូលផ្ដុំដូចដែលបានសន្យានៅថ្ងៃចុងក្រោយ ។ ហើយខ្ញុំប្រាថ្នាថា យើងនឹងជឿ ហើយទទួលយកសេចក្ដីស្រឡាញ់ដែលព្រះអង្គសង្គ្រោះមានសម្រាប់យើងម្នាក់ៗ ។ សេចក្ដីស្រឡាញ់ដ៏ល្អឥតខ្ចោះ ហើយគ្មានទីបញ្ចប់របស់ទ្រង់បាននាំទ្រង់ឲ្យធ្វើដង្វាយធួនសម្រាប់បងប្អូន និងខ្ញុំ ។ អំណោយនោះ—ដែលជាដង្វាយធួនរបស់ទ្រង់—អនុញ្ញាតឲ្យរាល់អំណោយទានផ្សេងទៀតរបស់ទ្រង់ក្លាយជារបស់ផងយើង ។
នៅថ្ងៃខាងមុខ—ក្នុងសហសវត្សរ៍ដែលយើងកំពុងត្រៀមខ្លួនឥឡូវនេះ—« គ្រប់ជង្គង់នឹងលុតចុះ ហើយគ្រប់អណ្ដាតនឹងទទួលថ្លែង » ១៧ ថា ព្រះយេស៊ូវគឺជាព្រះគ្រីស្ទ ។ ហើយវាពុំគ្រាន់តែក្រុមចម្រៀងរោងឱបោសថដ៏អស្ចារ្យនៅវិសាលដ្ឋានព្រះវិហារបរិសុទ្ធច្រៀងបទ « ហាលេលូយ៉ា » ប៉ុណ្ណោះទេ ។១៨ មនុស្សគ្រប់គ្នាដែលបានជ្រើសធ្វើតាមព្រះយេស៊ូវគ្រីស្ទនឹងច្រៀង ហើយស្រែកថា « ហាលេលូយ៉ា ដ្បិតព្រះអម្ចាស់ដ៏ជាព្រះ ដែលមានព្រះចេស្តាបំផុត ទ្រង់សោយរាជ្យឡើងហើយ » ។១៩ « នគរទាំងប៉ុន្មាននៅលោកីយ៍ បានត្រឡប់ជានគររបស់ព្រះអម្ចាស់នៃយើងរាល់គ្នា និងជារបស់ផងព្រះគ្រីស្ទនៃទ្រង់ហើយ ទ្រង់នឹងសោយរាជ្យនៅអស់កល្បជានិច្ចរៀងរាបតទៅ » ២០ « ស្តេចលើអស់ទាំងស្តេច ជាព្រះអម្ចាស់លើអស់ទាំងព្រះអម្ចាស់ » ។២១
ខ្ញុំសូមថ្លែងទីបន្ទាល់ថា ព្រះមានព្រះជន្មរស់ ! ព្រះយេស៊ូវគឺជាព្រះគ្រីស្ទ—ជាព្រះមែស៊ី ។ នេះគឺជាសាសនាចក្ររបស់ទ្រង់ ដែលទ្រង់ដឹកនាំតាមរយៈពួកព្យាការីរបស់ទ្រង់ ។ យើងសូមបួងសួងដោយរាបសាថា ពរជ័យរបស់ទ្រង់នឹងកើតមានចំពោះបងប្អូនម្នាក់ៗ រួមទាំងបំណងប្រាថ្នា និងលទ្ធភាពដើម្បីទទួលយករាល់អំណោយទានដែលព្រះអង្គសង្គ្រោះប្រទានដល់បងប្អូន នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។