Ang Hingpit nga Gasa
Usa ka tuig, mga tulo ka adlaw sa wala pa ang Pasko sa mga bata pa, akong bana, nga si Rob, nakadiskubri sa duha niya ka magulang nga babaye nga sekretong miabli sa duha sa ilang mga regalo sa Pasko didto sa ilang kwarto. Dayon, human sila milili sa unsay sulod, ang iyang mga igsoon nga babaye miputos og balik sa ilang mga regalo. Ang mga igsoon nga mga babaye ni Rob misulti niya, “Kon dili ka mosulti ni Mama, among ipakita nimo unsaon sa pagbuhat niini.”
Sa katapusan nagpatintal siya, ilabi na nga adunay sama sa basketball nga gidak-on nga putos ilawom sa Christmas tree nga dunay ngalan niya.
Apan, ang regalo makapatingala kay gaan man dihang sekreto nga gidala niya kini sa iyang kwarto. Mainampingon kini niyang giablihan ug nakita nga walay sulod, gawas sa usa ka mubo nga sulat. Mabasa sa mubo nga sulat, “Nasayud ko unsay imong gibuhat. Ayaw himoang bati imong Pasko. Naghigugma, Mama.” Nakat-on siya sa iyang leksyon, ug mao na kadto ang katapusan sa dakong sayop sa paglili og regalo sa Pasko.
Hunahunaa ang mga panumduman, maanindot nga mga talan-awon, sama sa anghel nga mga tingog, ug dili malimtan nga mga humot nga mahinumduman kon maghunahuna og Pasko. Mas malumo pa nga mga panumduman kadaghanan kanato naghinumdum sukad sa pagkabata sa pagkabalaan sa Pasko—ang pagsaulog sa pagkatawo sa atong Manluluwas. Kadtong mga sagradong pagbati dili gayud mawala kanato.
Bation nato kini matag higayon nga mamalandong kita sa gamay nga pasungan sa Betlehem diin daghang mga propesiya, gatusan ka mga tuig, tanan nagkatigum niadtong mabitoon nga kagabhion—dihang ang atong Manluluwas ug Manunubos nahimugso dinhi sa kalibutan isip Hari sa mga Hari ug Ginoo sa mga Ginoo.
Kanunay natong madungog nga ang Pasko alang sa mga bata, apan dili ba kitang tanan mga bata sa kasingkasing? Usa niana ka adlaw ang usa ka inahan ug iyang nuwebe anyos nga anak nga babaye busy nga namalit para sa Pasko. Gadaling misulod sa dakong tindahan agi sa seksyon sa mga alahas, ang anak nakabantay og dako kaayong karatola nga gibitay ibabaw sa baligyaanan. Sa dagkong pula nga mga letra, makita sa karatola, “Ang Gasa Nga Dili Mohunong sa Paghatag.”
Ang anak mibasa niini, namalandong sa makadiyut, ug mipahiyum. Mapasigarbohon siya nga misulti sa iyang inahan, “Ma, kahibalo nako unsa ang gasa nga dili mohunong sa paghatag.”
“Oh, unsa man?” ang iyang inahan nangutana samtang nagdali sila paglakaw diha sa panon sa mga katawhan.
Ang anak inosente kaayong miingon, “Si Jesus!”
Ang iyang inahan sayop nga mitubag, “Dili, Langga. Kini ang mga diyamante.”
Si Isaias nagpahinumdom kanato, “Ug ang usa ka bata nga gamay maoy magamando kanila.”1
Gamit ang usa ka internet search engine, liboan ka mga butang akong nakita nga gi-advertise uban sa hugpong sa mga pulong “Ang gasa nga dili mohunong sa paghatag.” Apan bisag unsaon, walay materyal nga regalo nga atong mahatag nga molungtad sa kahangturan.
Sa sukwahi, tuguti ako nga ipaambit kaninyo ang usa sa malumo nga mga panumduman sa Pasko sa duha ka tawo kinsa, nagtuo ako, wala mohunong sa paghatag. Sila ang akong mga ginikanan, si Aldo ug Eleanor Harmon.
Nag-snow sa among gamay nga lungsod niana nga tuig, apan wala kana makapugong sa akong papa pagdala sa among pamilya sa pagpangita alang sa perpekto nga Christmas tree. Sa diha nga ang kahoy diha na sa panimalay ug nasiguro na sa baruganan, ang mga suga, anghel nga mga dayan-dayan, ug tinsel mahigugmaon nga gibutang sa mga sanga. Ang among gamay nga panimalay opisyal nga andam na sa pagsugod sa Pasko.
Ang mga catalog sa dulaan miabot sa mail, ug ang akong mga igsoon ug ako dasig nga mipakli sa mga pahina nangandoy alang sa mga bahandi sa Pasko. Ang kahumot sa gingerbread ug fruitcake mipuno sa among panimalay, ug ang Disyembre hinayhinay nga nawala diha sa kalendaryo sa pag-abut ni Kristo. Nagbilin kami og mga sorpresa sa mga pultahan sa mga silingan ug naningkamot sa pagserbisyo sa mga pamilya kinsa nanginahanglan og dyutay nga pagdasig sa Pasko.
Kada gabii, nga naa nako sa higdaanan, ang akong inahan migahin og dakong panahon nga nag-inusara sa iyang kwarto. Ang nadungog ra nako mao lamang ang tingog sa iyang makina nga pangtahi. Daghan kaayo siyang gitahi nga sinina namo wala nako maghunahuna bahin niini.
Apan sa dihang nagkaduol ang Pasko, si Mama hilabihan nga naluya. Nasakit siya ug naghigda sa adlaw sa wala pa ang Pasko. Dihang gisultihan sa doktor ang akong papa nga siya magpabilin sa higdaanan mga usa ka semana, nabalaka ko—apan nasagmuyo usab. Unsaon sa pagpadayon sa Pasko kon wala si Mama? Unsaon nga mobati nga Pasko? Ug gawas pa, kinsay moluto sa panihapon sa Pasko?
Samtang ang akong amahan mahigugmaon nga nag-atiman sa akong inahan, nakaamgo siya nga ang pagluto sa panihapon sa Pasko maanha kaniya. Nabalaka na usab ko! Bisan og usa ka maalamon ug hanas nga tawo, ang pagluto usa ka butang nga dili siya sinati.
Bisperas sa Pasko miluhod ko nga nag-ampo nga ang akong inahan milagroso nga mamaayo ug ang buntag sa Pasko maingon nga sama sa naandan—among pamilya mag-alirong sa Christmas tree. Ang kahigawad milukop kanamo sa buntag sa Pasko dihang among nakita nga ang among minahal nga inahan anaa sa higdaanan nga masakiton gihapon. Sa pag-abli sa among mga regalo, nasorpresa ko sa pagkakita nga ang akong espesyal nga regalo nagkalain-laing mga sinina sa munyeka nga gitahi sa akong inahan alang kanako niadtong mga lawom sa kagabhion sa Disyembre. Wala ko kapaabut nga modagan ngadto kaniya ug gakson og hugot iyang liog. Unsa kadako ang iyang pagsakripisyo alang kanako.
Ang akong minahal nga Papa naningkamot sa tanang paagi aron ang Adlaw sa Pasko mahimong normal niana nga tuig, ingon ka normal bisan wala si Mama. Ug nagmalampuson siya. Human sa simple nga panihapon, ang akong mapinanggaon nga amahan nakatulog diha sa lingkuran tapad sa fireplace samtang nagdula ko uban sa akong mga igsoon ug sa akong munyeka ug sa iyang bag-ong mga sinina. Ang akong minahal nga inahan naulian human ang eksaktong pahulay, ug maayo na ang tanan. Sa akong kinabuhi, alang nako ang akong mga ginikanan usa ka regalo nga dili mohunong sa paghatag.
Atong hunahunaon kana nga hugpong sa mga pulong sa makadiyut. Dili ba ang usa ka gasa nga dili mohunong sa paghatag makonsiderar nga usa ka hingpit nga gasa? Una, ang usa ka hingpit nga gasa nagpadayag og usa ka butang bahin sa naghatag sa regalo. Ikaduha, kini mopakita og butang bahin sa mga panginahanglan sa tawo nga modawat sa gasa. Ug sa katapusan, ang gasa, kon kini usa ka hingpit nga gasa, maghupot sa iyang bili dili ra sa nagpadayon nga panahon apan sa kahangturan.
Dili ba ang atong minahal nga Manluluwas, bisan ang Manluluwas sa kalibutan, nagtuman niining tulo ka mga gikinahanglan? Dili ba ang gasa sa pagkatawo ni Jesukristo, pagpangalagad, ug pag-ula nagpadayag og butang mahitungod sa Tighatag sa regalo? Siyempre. “Kay gihigugma gayud sa Dios ang kalibutan, nga tungod niana gihatag niya ang iyang bugtong Anak.”2 Ang atong Amahan sa Langit misakripisyo sa Iyang Anak tungod sa gugma nga putli alang kanato, Iyang mga anak.
Gipakita ba nga ang gasa ni Jesukristo hingpit nga nasayud ang atong Langitnon nga Amahan unsay atong gikinahanglan? Sa makausa pa, usa ka hugot nga oo! Napukan kita sa kinaiyahan, ug kita labaw nga nagkinahanglan og usa ka Manluluwas ug Manunubos. Si Nephi mitudlo, si Jesukristo “dili maghimo og bisan unsa gawas kon kini alang sa kaayohan sa kalibutan; kay siya nahigugma sa kalibutan.”3
Ug ang katapusan nga gikinahanglan alang sa hingpit nga gasa? Kinahanglan nga huptan niini ang bili sa kahangturan. Ang Basahon ni Mormon klaro nga nagtudlo kanato nga ang Pag-ula ni Jesukristo walay kinutuban ug mahangturon.4
Nahinumdom mo sa karatola sa departamento sa alahas? Ang batan-ong batang babaye nasayud kon unsa ang tinuod nga gasa. Niining mangitngit nga kalibutan, motan-aw kita lapas pa sa mga alahas ngadto sa Kahayag sa Kalibutan. Ang Manluluwas Mismo mitudlo:
“Busa, ipakita ninyo ang inyong kahayag aron kini moiwag sa kalibutan. Tan-awa Ako mao ang kahayag diin kamo mopakita.”5
“Ako ang kahayag nga nagdan-ag sa kangitngit.”6
Mopamatuod ko nga si Jesukristo mao ang hingpit nga gasa—ang gasa nga dili mohunong sa paghatag. Hinaut nga huptan natong tanan kana nga kamatuoran diha sa atong kasingkasing niini nga Pasko ug hangtud sa kahangturan. Siya buhi. Sa sagradong ngalan ni Jesukristo, amen.