Na iSolisoli Sega ni Laurai Levu
Lotu ni Siganisucu ni Mataveiliutaki Taumada ni 2021
Sigatabu, 5 ni Tiseba, 2021
Ai Vakamacala Taumada
Ena noqu a se gone lailai, au dau vakanamata vakalevu ena nodrau dau yaco mai o Bu kei Tutu Lundgren. E rau dau draiva mai vakabalavu ena vei yabaki ena dua na motoka makawa me rau mai veisiko. Keitou lomani rau vakalevu, ka keitou dau taleitaka talega na panikeke vaka Switeni e dau caka na Buqu—ka caka mai ena sucu kirimu caka vou e dau kauta mai vua na dau susu bulumakau mai na nona itikotiko. E dau duri balavu vaka aua ena yasa ni sitovu, me buli panikeke tu me yacova ni keitou sa sinai vutuvutu ena kana panikeke. Me yacova mai oqo esa rua tale mai na itabatamata ni gone era sa basa mai na kana panikeke vakaiyanaqa oqo ni Switeni. Ena veigauna kece me keitou bulia kina, keitou dau vakananumi Buqu Lundgren kei na nona isolisoli ni loloma.
Na isolisoli vakasakiti duadua sa ikoya na isolisoli ni gauna kei na taledi. Au vakabauta ni isolisoli vakaoqo e isolisoli tabu.
iSolisoli
Oqo na gauna ni nanamaki ni isolisoli vou. Io ena bogi nikua, me da tu mada vaka dua ka vakasamataka na isolisoli e sa soli oti vei keda—o cei e solia kei na vuna e a soli kina.
E sa solia tu vakayadua vei keda na Kalou na isolisoli. O na sega beka ni vakila ni o sa vaka isolisoli taki, ia e tiko vei iko na isolisoli vakayalo mai vua na Kalou me rawa kina ni ko vakalougatataki ira na tani ka toro voleka ki Vua. 1
Na isolisoli cava so esa solia vei iko na Kalou?
Me‘u tukuna na ka dina, au a sega ni bau raici au tu me‘u dua na tamata vaka isolisoli. E sega sara ni‘u dau lagasere, se daudanisi, se dauqito, se daunifika, se … se… se… Au tamata ga … me vaka na kena ivakarau.
Ena so na gauna au dau raica na nodra isolisoli cecere eso tale ka qai dau vakavuna me‘u yalo lailai. Ia au sa vulica tiko na kena sega na betena kei na kena rawa ni veivakarusai na noda dau veidutaitaki vaka oqo. E bibi duadua ga, ni‘u sa mai raica na kaukauwa tabu ni nona “isolisoli sega ni laurai levu” na Kalou ka me da marautaka na ivakadinadina ni Nona loloma kei na yalo dei.
A wasea kina o Elder Marvin J. Ashton ni isolisoli vakayalo ni Kalou e oka kina o ira “era sega ni laurai levu” ka wili talega kina na “isolisoli ni kerekere; na isolisoli ni vakarorogo; na isolisoli ni rogoci rawa kei na vakayagataki ni domo lailai; na isolisoli ni rawa ni tagi; na isolisoli ni vakayawai iko mai na veileti; na isolisoli ni lomavata; na isolisoli ni vakasaqara na ka savasava; na isolisoli ni sega ni vakalelewa; na isolisoli ni rai ki vua na Kalou me veidusimaki; na isolisoli bula vaka tisaepeli; na isolisoli ni loloma vei ira na tani; na isolisoli ni vakasama vakatitobu; na isolisoli ni cabo masu.”2
E veivuke beka na lisi oqo ena nomu raica na nomu isolisoli ena dua na rai vou? E vukei au.
O ira na isolisoli vakanomodi oqo era vakayaco ka me ra vueti cake kina o ira na luve ni Kalou mai vei ira eda dau kila tu ka marautaka sara vakalevu 3— na isolisoli ka ra vukei keda me da rawata vinaka kina na noda inakinaki bibi ni bula. Ia, e ka ni rarawa, ni so na gauna eda dau dreti keda tale ki muri ka da sega ni vakavinavinakataka se wasea na isolisoli, ka da nuiqawaqawataka ni ra sega sara tu ni ituvaki vinaka, sega ni taucoko, se sega ni rairaivinaka me vaka eda vinakata kaya.
Ni da sega ni vakavinavinakataka na vei isolisoli sega ni laurai levu oqo, eda calata na madigi me da vueti ira cake kina na luvena—ka da calata talega kina na madigi me da vakila na loloma ni Kalou.4
Qiria na iVakatagi ni Nomu iSolisoli
Me‘u vakaraitaka tale e dua na isolisoli—na isolisoli mai vei noqu Tutu Lundgren. E dau vinakata tu ga o Tutu me dau vakatagitaka na vaiolini. Ia, na violini oqo e a dabe voliga ka kumuni kuvu toka ena nona vata, ka gole mai ki na noqu, ka sega ni vakatagitaki, ena vuqa na yabaki—era vakadirorogo na ivakatagi ena wa oqo.
Veidutaitaka oqo ki na nona violini na makubuqu yalewa yabaki ono, o Scarlett. E dua tiko na nona isolisoli ka na wasea vei keda ena bogi nikua.
[Vakatagitaka tiko o Scarlett na vaiolini]
Vinaka vakalevu, Scarlett. Sa totoka dina o ya. Au lomani iko.
Na noda isolisoli mai vua na Tamada Vakalomalagi e nakiti me wasei. E sega ni sau levu na nona vaiolini o Scarlett, na kenadau ena rawa ni toboka kevaka e cala na ivakatagi se imoimoi, ia me vaka ni solia taucoko kina na yalona, e wasea kina o koya na nona isolisoli ka kauta mai na marau.
Kakua ni vakatara na nona isolisoli na Kalou, o koya madaga e sega ni kilai levu, me sega ni vakayagataki se vakavinavinakataki. Taura na isolisoli e sa solia vei iko o Koya mai na vata. Kevaka o sa maroroi ira baleta ni o lomatarotaro, kurea tani na kuvu ka tovolea tale. Wasea vua na Kalou kei ira na Luvena. Na noda isolisoli mai vua na Tamada Vakalomalagi e nakiti me ra vakayagataki ka wasei. Na nomu isolisoli taucoko mai vua na Kalou, se vakacava tu na kena sega ni maucokona, e kauta mai na marau, ni da wasea vei Koya, na sere ni veivakacaucautaki.
Kauta na nomu isolisoli ni vakarorogo ena loloma ka sikova e dua na itokani ka galili voli. E tiko beka vei iko na isolisoli ni levei ni cudru ka vakayaco veivakaduavatataki? Na isolisoli vakaoqo e sa gadrevi sara vakalevu. Wasea vei ira na nomu matavuvale, itokani, kei ira ko ni tiko veitikivi. Tukuna vei dua e veilakoyaki voli ni o lomani koya, ka sureti koya ki na nomu teveli ni kana. Vakavulica e dua na lesoni ni veivakauqeti. Vola e dua na ivola ni veikauwaitaki. Vakayagataka na nomu isolisoli eso mo veitaratara yani ka tarai Saioni cake kei ira na tamata era tiko wavoliti iko. E gadreva na vei mataqali taucoko na Kalou. E sa solia na isolisoli taucoko o Koya me ra vueti cake kina na Luvena. Kakua ni o vakatara me sega ni lagati na nomu ivakatagi, na imoko me sega ni vakayacori, na veivosoti me sega ni soli.
Na Ciqomi ni Nona iSolisoli
Ena gauna ni marau ni Siganisucu ni 1832 era sotava na Yalododonu ena gauna oya na dredre vakapolitiki kei na nodra vakabesebese na lewe ni vanua. Na Parofita o Josefa Simici a se qai parofisaitaka oti ga e dua na ivalu vaka lewenivanua.5 Oqori e sega ni ka me marautaki.
Ia, ena 27 ni Tiseba a ciqoma na ivakatakila o Josefa Simici—dua na “itukutuku ni marau” mai vua na Turaga.6 Ena gauna dredre oqo e a vakananuma na Kalou vei Josefa na isolisoli e a solia vei ira na Yalododonu—ka vakabibi, na isolisoli ni iVakabula o Jisu Karisito kei na inuinui ni bula tawamudu.
Na sala me marautaki kina na Siganisucu oya sa ikoya me da raica ka ciqoma na isolisoli ni Kalou; na imatai ka bibi duadua na nona “isolisoli sega ni tukuni rawa”7 ni dua na iVakabula. Na veika oqo e dina tikoga ena Siganisucu oqo.
Ena ivakatakila e ciqoma o Josefa, e tarogi koya na Turaga na vei taro eso oqo:
“A cava na kena yaga vua na tamata kevaka sa vakarautaki tu na isolisoli me nona, ka qai sega ni taura? Raica, sa sega ni vinakata na isolisoli sa soli vua, io sa sega talega ni vinakati koya sa solia.”8
iTinitini
Au niutaka ni da na rawa ni raicavakayadua ka ciqoma na isolisoli e sa solia na Kalou vei keda—ka bibi duadua na inuinui me da marautaka na Kalou, o Koya e solia na isolisoli taucoko.
Au vakavinavinakataka na isolisoli sega ni tukuni rawa ni Luvena—na Luvena ka a tadu mai ki vuravura vaka gone dramidrami, ologi mai vua na tinana ka vakaimocemoce ena ikanakana ni manumanu. E dua na gone dramidrami ka a vuli laini vaka laini ka tubu ena loloma soliwale me yacova ni sa solia na Nona bula me isoro ni noqu ivalavalaca. Nomu ivalavalaca. Na nodra ivalavalaca taucoko o ira era a bula e liu kei ira era na bula e delai vuravura.
Eda dau lagata na qaqa ni dua na sere taleitaki:
“Me da marau, sa tadu mai na noda Tui dokai!”9
Na isolisoli i Jisu na Karisito e sa soli, ena isau cava! Na taro e tiko, eda na ciqomi Koya li? Eda na vakacurumi Koya mai loma ka vakatarai Koya me qaqa? Me Caka Vakacava?
Au vakadinadinataka ni noda ciqoma na noda Tui kei na Nona isolisoli ena kauta mai na marau dina— na marauki vuravura kei na maraue vuravura.
“Me ia na vakavinavinaka vua na Kalou ena vuku ni Nona isolisoli sa sega ni tukuni rawa”10 ni Luvena Duabau ena yaca tabu i Jisu Karisito, emeni.