Sa Kalougata Ko ira sa Dau Tataro
Lotu ni Siganisucu ni Mataveiliutaki Taumada ni 2021
Sigatabu, ika 5 ni Tiseba, 2021
Vakadua tale, na noda Mataveiliutaki Taumada lomani e ratou sureti keda me da lakovata mai ka mai tekivutaka na noda marautaka na Siganisucu. Ni duidui na noda itovo kei na ivalavala ena veimatanitu, eda marau ka kalougata ni da duavata—ka duabau ena noda sokalou vua na noda iVakabula o Jisu Karisito ka marautaka na Nona mai sucu rauta na rua na udolu na yabaki sa oti.
E dua na ivalavala tudei ena vuvale na Basset, ka vakakina e vuqa vei kemuni, sa ikoya na kena matanataki na italanoa ni siganisucu. Vei keitou, na wiliki ni itukutuku nei Aisea, Luke, Maciu, Nifai, kei Momani, ka salavata kei na serenilotu ni Siganisucu ka vakabulabulataki ena dua na vakatasuasua me baleti Meri, Josefa, kei na gonelailai o Jisu, e veivakauqeti ka vakayalo—ia e sega ni dau vakakina e vei gauna.
Me ivakaraitaki, ena dua na yakavi ni Siganisucu, o ira na qele ni sipi gonelalai era a yaco me ra dua na matasere ni lalai era tabalaka tiko na tagi. Na tagi ena domolevu oqo e dewa vei ira na ivakatawa kei na agilosi ka bau yaco sara vua na gonelailai vakaikoya ka viviraki tu ena i sulu ni gone. Ena yabaki ka tarava, asega na neitou qele ni sipi. E sega ni dua e via taura na itutu ni sipi ni rivarivabitaki ni, ena rawa ni yaco, o ira na sipi era a vakavuna na tagi veivakarerei ka veivakaleqai. Ena dua tale na yabaki, na nodra ititoko na ivakatawa a yaco me iseleiwau waqa, ka ena duatale na yabaki a sega ni dua e a gadreva me Tamata Vuku se me agilosi, ia era a vinakata me ra dara na isulu ni dainaso se dolofini mai na soqo ni Halowini. Ia, de dua beka na gauna guilecavi dredre duadua sai koya na gauna e vuki mai kina na gone sucu vou mai na nona idavodavo cere kei na ivakatakarakara ni vale ni manumanu sega ni tudei tu, ka lutu mai, me qai tobo ga ni sa voleka ni tau e ra. Au a rikava yani ka toboka na gone, e dina ga ni bale talega vei au na veika yaco oya.
Bogi Buto? Moce vakacegu? Na neitou italanoa ni siganisucu e rawa ni yacana vinaka cake beka me “Veilecayaki ena Valenimanumanu.” Au rawa ni tusanaka ni gauna e dau roro mai kina na Siganisucu, au dau vakasamataka vakavuqa se e dodonu beka me keitou saga me keitou vakarautaka e dua na ivalavala ni Siganisucu ka na sureta mai vakaidina na sautu?
Sautu—na ituvaki kamikamica ka nuitaki eda gadreva taucoko, sega walega ena Siganisucu ia ena veigauna kece. Ia, ena vuravura taucoko nikua, na sautu e sa vaka me sa dredre tikoga mai na kena kunei. Ni vulici tiko na Vunau kei na Veiyalayalati ena yabaki oqo, au a vakananumi ena dua na ivakatakila ka vakamacalataka na noda siga:
“Ia ena siga ko ya … ena yavavala ko vuravura taucoko ka ra kani yatedra na tamata ena rere.”1
Ena ituvaki ni tiko yavavala ni vuravura nikua, e vei e rawa ni kunei kina na sautu levu ka gadreva tu ko vuravura taucoko?
E vakatavulica o Peresitedi Russell M. Nelson:
“Na kosipeli i Jisu Karisito sa ikoya dina na ka e gadrevi ena vuravura oqo ni veilecayaki, veileti, kei na oca.
“O ira na luve ni Kalou yadua sa nodra na madigi me ra rogoca ka ciqoma na itukutuku veivakabulai, ka veivueti i Jisu Karisito. E sega tale ni dua na itukutuku e bibi cake ki na noda bula marau—nikua ka tawamudu.”2
Na itukutuku ni Veivakalesui Mai e itukutuku ni Siganisucu. Na rarama ni kalokalo ka dusimaki iratou na i vakatawa vua na gone e vale ni manumanu e tautauvata kei na duru bukawaqa ka siro vakamalua mai ka cegu vei Josefa—ka rau liu mai ni bera na itukutuku ni marau kei na reki levu ka kacivaki Karisito ki vuravura.
Na itukutuku i Aisea kina noda vuravura vakaleqai e tomani tiko ka vaka, “Ni sa sucu mai e dua na gone me noda, sa soli mai vei keda e dua na gone tagane; ena vakatau vei koya na lewa; ena vakatokai na yacana ko Veivakurabuitaki, Na iVakavuvuli, Na Kalou kaukauwa, Na Tama ni gauna tawamudu, Na Tui ni Sautu.”3
O Elder Quentin L.Cook e vakavulica, “E dua na icavuti lomani ni noda Turaga ka iVakabula, ko Jisu Karisito, sa ikoya na ‘Tui ni Sautu’ [Aisea 9:6]. … Ena tauyavutaki na Nona matanitu ka oka kina na sautu kei na loloma.”4
Ni da wilika na vosa ka volai ena Luke ena yabaki oqo, au nuitaka ni o na vakasamataka na nodra vosa na “lewe vuqa na kai lomalagi a ra sa vakavinavinaka vua na Kalou,” ka kaya, “Sa nona na Kalou na vakarokoroko ena veiyasana e cake sara, a sa veivinakati rawa ko ira e vuravura, sa lomani ko ira na tamata.”5 Au vakasamataka vakatitobu na veivosa oqo ka nanuma ni rairai ganita beka vei keda me da okata oqo me dua nai tukutuku “ni sa tiko e vuravura nikua na Sautu.” “Sa yaco mai na Sautu!” e rawa ni ra a kacivaka. Ni a, yaco dina, ni a tadu dina mai ki vuravura ena valenimanumanu lolovira ena yakavi oya, na “Tui ni Sautu.”
Ena i matai ni Siganisucu oya sai ira na agilosi dautukutuku era a kacivaka na yaco mai ni sautu. Ni bera oya a sa tukuna mai o Jekope, “Ni keimami a kila na veika baleti Karisito, ka a tu vei keimami na inuinui ni nona lagilagi ena vica na drau na yabaki ni se bera na nona lako mai; ka sega walega ni tu vei keimami na inuinui ni nona lagilagi, ia ko ira kece talega na parofita tabu ka ra a bula e liu vei keimami.”6
A parofisaitaka talega o Aisea, me baleta na noda siga e daidai, me vaka e a vola, “Na kena lagilagi ena ulunivanua na yava i koya [se o ira] sa kauta mai na irogorogo vinaka, sa vakarogoya mai na sautu.”7
Ia, o cei sara mada o ira na tamata lagilagi oqo ka ra vakarogoya mai na sautu? Na iVakabula a tukuna vei iratou na Nona tisaepeli mai Kaleli kei na Vanuasautu ni, “Sa kalougata ko ira kece sa dautataro: ni ra na vakatokai me luve ni Kalou.”8
Me kena ikuri, na Tui o Penijamini e a vakavulica, “Ia oqo, ena vuku ni veiyalayalati ko ni sa vakayacora ko ni sa vakatokai kina mo ni luve i Karisito, na luvena tagane kei na luvena yalewa; ni raica, ni sa vakasucumi kemuni vakayalo ko koya ena siga oqo; ni ko ni sa kaya sa veisau na yalomuni ni ko ni sa vakabauta na yacana; o koya, sa vakasucumi kemuni kina mo ni luvena tagane ka luvena yalewa.”9
O iko kei au e daru luvei Jisu Karisito ni veiyalayalati, o keda yadua eda luvena. Nanuma tiko, e tukuna o Koya ni o ira na dautataro era na vakatokai me ra luve ni Kalou. O koya gona ya, o keda—na luve ni Kalou—me da na dautataro. Sa ikoya oqo na noda itavi ni veiyalayalati. O iko kei au e daru vakaitavi ena vakayaco veisau ena vuravura leqa nikua ni da sasaga me da dautataro—ena noda itikotiko, vei ira na noda i vavakoso, itikotiko raraba, ka vakakina ki vuravura, ena noda yalololoma, ena noda cakacaka vinaka, kei na noda ivosavosa—e matanavotu se ena initaneti. Me da “vakarogoya yani na sautu” ena yalodina ni da vakadinadinataki Koya, ena vosa kei na ivalavala.
Mai na Luke eda wilika:
“Ia ni sa lako tani vei ira ko ira na agilosi ki lomalagi, era sa kaya vakai ira na ivakatawa ni sipi, Me datou mai lako ki Peceliema, me raica na ka oqo sa qai yaco, o koya sa vakatakila mai vei kedatou na Turaga.
“A ra sa lako vakatotolo yani, a ra sa kunei Meri kei Josefa kei na gone sa davo ena nodra tikina na manumanu.
“Ia ni ra sa raica, era sa tukuna yani na vosa sa tukuni vei ira e na vuku ni gone oqo.”10
Me vakakina, “ me da qai lako yani oqo” ka “vakarogoya yani ki vuravura” na i tukutuku ni sautu “me baleta na gone oqo.” Oqo nai tukutuku era vakatavulica na noda daukaulotu vei ira na noda daulomani kei na itokani; oqo na itukutuku bula era wasea na daukaulotu veiqaravi ni ra veiqaravi tiko me vaka na iVakabula. Oqo na itukutuku me da wasea yani ni da loloma, wasea ka sureti ira era wavoliti keda me ra vakaivotavota ena inuinui kei na sautu ka kunei ena itukutuku vinaka kei Jisu Karisito.
Ia me da lesu tale kina vakatasuasua yakusurasura ni siganisucu na matavuvale na Bassett ka keitou dau tovolea ena vei siganisucu—na cava na vuna e keitou dau saga tikoga kina me keitou maroroya tikoga na ivalavala oqo, ka uqeti ira na luvei keimami kei na makubui keimami me ra dramataka vei keitou na bogi totoka oya mai na vei bogi tale eso, ena nodra a tadu mai na agilosi ka kauta vata mai kei ira na itukutuku vinaka ni reki levu?
Na kena isau e rawarawa ka talei: “Ia eda veivosakitaki Karisito, eda reki ena vukui Karisito, eda vunautaki Karisito, eda parofisaitaki Karisito, ka eda sa volavola me vaka na noda parofisai, me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.”11
Io, eda raica ni vuravura taucoko e sa yavavala ka ra kani yatedra na tamata ena rere. O koya gona, se mani vakacava na bolebole, ni da tu saqati, ka ena loma ni yavavala, me da gu tiko ga ena vakarogoya yani na sautu, ena gauna oqo kei na vei gauna kecega, ni da vakarautaki keda kei ira era wavoliti keda ki na lesu tale mai vakairogorogo ni Tui ni Sautu, io na Turaga, ka i Vakabula, ka Dauniveivueti, o Jisu Karisito. Ni tokaruataki na vosa nei Peresitedi Nelson, “Na luve ni Kalou yadua sa nodra na madigi me ra rogoca ka ciqoma na itukutuku ni veivakabulai, veivueti i Jisu Karisito.”
Me da dau vakarogoya yani na sautu ni da marautaka tiko na nona sucu, na nona bula, kei na ilesilesi ni noda iVakabula ena gauna ni Siganisucu oqo ka sa noqu masu tikoga ena veigauna ena yacai Jisu Karisito, emeni.