Mennin Letok ko Edik Ad Kili
2021 Nokon in Kūrijm̧ōj eo an Būreejtōnji eo Kein Kajuon
Jabōt, Tijem̧ba 05, 2021
Kadkad In
Ke iaar dik, men eo em̧m̧an tata ilo kūrijm̧ōj kar an Bubu im Jim̧m̧a Lundgren jān jait eo an jinō kar lotok kōm. Kajjojo iiō rekajoor ettōr aitok ilo juon wa m̧or n̄an lotok kōm. Kōm lukkuun iakwe er, im ekar em̧m̧an ippam iiōk in paankeek in Sweden eo an bubu—sour cream me ekar bōktok ippān tok jān juon farm ilo jikin eo ilo town eo an. Ekar jutak ilo jito̧o̧b eo ium̧win awa ko, kōmat pāānkeek m̧ae kōm kar lukkuun mat jon̄an jeban kar m̧ōn̄ā ļo̧k wōt. Kiiō ruo bar epepen in ajri rekar rūttoļo̧k ilo aer kar m̧ōn̄ā pāānkeek in Sweden in. Im aolep iien jej kōmat n̄an er, jej keememej Bubu Lundgren im menin letok eo an kōn iakwe.
Jet iaan menin letok ko rem̧m̧an tata rej menin letok ko kōn iien im taļōn ko ad. Ij tōmak kain menin letok kein rej menin letok ko rekwojarjar.
Menin Letok ko
Ej juon jijen in aō kōtmene menin letok ko rekāāl. Ak joteenin, jen bōjrak jidik im kejōkļo̧kjeņ kōn menin letok ko me ewōr ippāmi kadede em̧ōj liwaj—im wōn ro em̧ōj leļo̧k aer im etke.
Anij ekar letok menin letok ko n̄an kōj kajjojo. Kwomaron̄ jab en̄jake an bwijin am̧ menin letok, ak ewōr am̧ menin letok ilo jetōb jān Anij bwe kwon maron̄ kōjeraam̧m̧an ro jet im epaakeļo̧k E.1
Ta menin letok ko Anij ekar lewaj n̄an eok?
Ilo m̧ool, ijjanin kar kile ippa make ke n̄a juon armej eo me elōn̄ menin letok ko ippān. Ejjab n̄a juon rial, rituuj, ak riikkure, ak rijin̄n̄a, ak mōkade math, ak … ak … ak … n̄a ij … juon armej me ebwe jon̄an eo ippān.
Ilo jet iien ikar kejōkļo̧kjeņ kōn menin letok ko reļļap an ro jet im en̄jake an dik ak ejjeļo̧k aō menin letok. Ak ij ekkatak wāween an jej tokjen im eļap an kakkure bōklōkōt ko ad n̄e jej keidi kōj n̄an ro jet. Eļapļo̧k an aorōk, em̧ōj aō loe bwe kajoor eo ekwojarjar kōn “Mennin Letok ko [an Anij me] edik ad kili” im lan̄lōn̄ ilo men kein āinwōt kein kam̧ool kōn iakwe im lōke eo An.
Elder Marvin J. Ashton ekar katakin bwe menin letok ko an Anij ilo jetōb ekoba ro me “edik aer kili,” ekoba “menin letok eo n̄an kajjitōk; menin letok eo n̄an ron̄jake; menin letok eo n̄an keron̄jake im kōjerbal juon ainikien elur im edik; menin letok eo n̄an maron̄ kōmjaļaaļ; menin letok eo n̄an kōjekdo̧o̧n akwāāl; menin letok eo n̄an errā; … menin letok eo n̄an kappukot men ko rejim̧we; menin letok eo n̄an jab ekajet; menin letok eo n̄an reilo̧k n̄an Anij n̄an bōk tōl; menin letok eo n̄an erom̧ juon rikaļoor; menin letok eo n̄an kea kōn ro jet; menin letok eo n̄an maron̄ kejōkļo̧kjeņ; menin letok eo n̄an jar.”2
Laajrak in ejipan̄ ke kwe n̄an loe menin letok ko ilo juon meram ekāāl? Ejipan̄ eō.
Menin letok kein rellōn̄ rej kōm̧m̧an eļap n̄an ajri ro nejin Anij āinwōt ro jet me jej kile er im m̧ōņōņō jim̧or ippāer3—menin letok ko rellōn̄ me rej jipan̄ kōj kadedeikļo̧k kōttōpar eo ad eaorōk tata ilo mour in. Ak, būrom̧ōj, jet iien jej dāpij im likjab n̄an kam̧m̧olool ak jeere menin letok ko ad, mijak bwe rejjab lukkuun āinwōt jatōltōl, wānōk, ak aibojooj ilo ad kōtmeni.
N̄e jej likjab n̄an kam̧m̧oolol kōn menin letok ko edik ad kili, jej likjab jān juon bar iien n̄an ļōn̄aj ajri ro Nejin im jej likjab jān juon iien en̄jake iakwe eo an Anij.4
Kajo Al eo kōn Menin Letok ko Am̧
Imaron̄ ke kwaļo̧k n̄an eok bar juon menin letok—juon menin letok jān Bubu Lundgren. Jim̧m̧a, aolep iien ekōņaan bwe en kōjan̄jan̄ violin im viola. Ijoke, violin in ejjeļo̧k ej kōjerbale im ebūn̄aln̄al ioon jeļab eo an, innem bar ioon jeļab eo aō, ium̧win elōn̄ iiō ko—al eo ilo ainikein to kein an violin eo rekar jab jan̄.
Keidi menin n̄an violin eo an leddik eo jibu me jiljino an iiō, Scarlett. Ekar wōr juon an menin letok n̄an kwaļo̧k n̄an kōm joteenin.
[Scarlett ej kōjan̄jan̄ violin]
Kom̧m̧ol, Scarlett. Elukkuun aibojooj. Ij iakwe eok.
Menin letok kein ad jān Jemedwōj Ilan̄ rej n̄an jeeri. Violin eo nejin Scarlett ekar jab ļap wōņeen, im jemaron̄ kile bōd in an kōjan̄jan̄, ak kōnke ekar kōmaat an n̄an e, kar maron̄ leļo̧k n̄an e juon menin letok im ekar bōktok lan̄lōn̄.
Jab kōtļo̧k bwe menin letok ko an Anij n̄an eok, men̄e menin letok ko An me edik ad kili, ren jab pād bajjōk ak jab kam̧m̧oolol kaki. Bōk menin letok ko me Ekar lewaj n̄an eok jān jeļab eo. Eļan̄n̄e kwaar kakkoņi kōn wōt pere, joļo̧k jān bun̄alier im bar kajjieon̄ kōjerbali. Liļo̧ki n̄an Anij im ajri ro Nejin. Menin letok ko jej bōki jān Jemedwōj Ilan̄ rej n̄an kōjerbali im kwaļo̧ki. Aolep menin letok ko jān Anij, mekarta jab wānōk, ej bōktok lan̄lōn̄ im rej, n̄e jej liļo̧k n̄an E, juon al in nōbar.
Bōk menin letok eo n̄an ron̄jake kōn iakwe im loļo̧k juon m̧ōttam̧ eo eajimakeke. Elōn̄ ke am̧ menin letok n̄an kōjekdo̧o̧n akwāāl im errā aolep iien? Menin letok kein rejjan̄in kar ļap aikujier n̄an jon̄an in. Liļo̧k n̄an baam̧le eo am̧, ro m̧ōttam̧, im ro rūtūrūm̧. Ba n̄an eo me ejabwābwe ke kwoj iakwe e, im karuwaineneik e n̄an tebōļ in jikin m̧ōn̄ā eo am̧. Katakin kōn juon katak eim̧we. Je juon no̧o̧t em̧m̧an im jouj. Kōjerbal menin letok ko am̧ n̄an jipan̄ im kalōk Zaion im ļōn̄aj armej ro ipeļaakūm̧. Anij ej aikuj aolep kain armej. Ekar leļo̧k an aolep menin letok n̄an ļōn̄aj ajri ro Nejin. Jab kōtļo̧k bwe al ko ilo kwe ren jab jan̄ ak jo̧, jab m̧akoko in atbokwōj, im jab m̧akoko in jeorļo̧k bōd.
Bōk Menin Letok eo An
Ilo jijen in Kūrijm̧ōj in ilo 1832, Armej ro Rekwojarjar etto rekar jelm̧ae apan̄ kōn an būrabōļ kien im an jab em̧m̧an. Rikanaan Josep Smith ekar kanaan kōn juon tariņae ilo juon laļ.5 Ekar jab juon ennaan eo ekam̧ōņōņō.
Ak ilo Tijem̧ba 27, Josep ekar bōk bar juon revelesōn—juon “ennaan in kaenōm̧m̧an” jān Irooj eo.6 Ilo iien kein reppen, Irooj ekar kakeememej Josep kōn menin letok ko Ekar leļo̧k n̄an Armej ro Rekwojarjar—eļapļo̧k an aorōk, menin letok eo an Rilo̧mo̧o̧r Jisōs Kraist im kōjatdikdik eo kōn mour indeeo.
Wāween eo n̄an lan̄lōn̄ bweseason in Kūrijm̧ōj ej n̄an ad loe im bōk menin letok ko an Anij; m̧oktata im ejjab diktata eo me ej “menin letok eo jab maron̄ keidi”7an juon Rilo̧mo̧o̧r. Ejja menin wōt em̧ool ilo season in Kūrijm̧ōj in.
Ilo revelesōn eo Josep ekar bōke, Irooj ekar kajjitōk ippān kajjitōk kein rej ellaajrak:
“Bwe ta em̧m̧an eo n̄an juon armej eļan̄n̄e mennin leļo̧k eo likūti ioon, im e ejjab bōk mennin leļo̧k eo? Lo, e ej jab m̧ōņōņō ilo men eo kar leļo̧k n̄an e, im jab m̧ōņōņō ilo e eo rileļo̧k eo an mennin leļo̧k eo.”8
Jem̧ļo̧k in
Ij kōjatdikdik bwe kōj kajjojo jej loe im bōk menin letok ko me Anij ekar letok n̄an kōj—ak eļaptata Ij kōjatdikdik bwe kōj kajjojo jemaron̄ lan̄lōn̄ ilo Anij, riletok menin letok kein.
Eļap aō kam̧m̧oolol kōn menin letok eo me jejjab maron̄ keidi an Eo Nejin—Eo Nejin eo ekar itok n̄an laļ in āinwōt juon nin̄nin̄, jiburlep e jān jinen eo ekekemooj im ej babu ilo juon jikin m̧ōn̄ā an kidu. Juon nin̄nin̄ eo enaaj ekkatak ļain ioon ļain im eddōkļo̧k ilo jouj im jouj m̧ae iien Ekar aje mour eo An āinwōt juon katok kōn jerawiwi ko aō. Kōn jerawiwi ko am̧. Kōn jerawiwi ko an aolep ro me ekar mour im ro me renaaj mour ioon laļ in.
Jej al naan ko ilo juon al eo eļap an em̧m̧an ippān aolep:
“Lan̄lōn̄ n̄an laļ, Irooj ej itok; Laļ in en wōnm̧aeik Kiin̄ eo an!”9
Menin letok eo an Jisōs Rikraist eo em̧ōj letok im ejjeļo̧k wōņeen! Kajjitōk eo ej, jenaaj ke wōnm̧aeik E? Jenaaj ke kōtļo̧k An itok im kōtļo̧k bwe En anjo̧? Ewi wāween?
Ij kam̧ool bwe ilo ad wōnm̧aeik Kiin̄ eo ad im menin letok ko An renaaj bōktok lan̄lōn̄ em̧ool—lan̄lōn̄ n̄an laļ im lan̄lōn̄ ilo laļ in.
“Kam̧m̧oolol Anij kōn An men in letok eo eļap jān maron̄ in ba”10 eo an Eo Nejin ilo āt eo ekwojarjar etan Jisōs Kraist, amen.