“Im Kwomaron̄ Jelā Barāinwōt”
Nokon in Jota in Kūrijm̧ōj eo an Būreejtōnji eo Kein Kajuon
Jabōt, Tijem̧ba 05, 2021
Ro jeiū im jatū jitōnbōro, Kūrijm̧ōj ke ij dik ilo m̧weo im̧ō eļap an pedped ioon immenene ko jān ļam̧orāān ko an jinō im jema. Jinō ekar em̧m̧akūttok n̄an Amedka jān Sweden im jema ekar itok jān Finland.1 Ilo m̧aanjabpopo n̄an Kūrijm̧ōj, kōm kar kainōknōk wōjke in Kūrijm̧ōj eo am kōn kein kainōknōk ko kōm̧m̧an in pā, im jinō ekar kōmat im kōmat im bar kōmat. Ilo aolepen aō jeļā, nukin jibuin Sister Graig Lundgren. Kam̧ōņōņō ko am Bon̄ōn eo Im̧aan Kūrijm̧ōj ekar ijjinio kōn juon kein smorgasbord em̧m̧an kōn m̧ōn̄ā ko jinō ekar kōmati—meatballs; rice pudding; im pilawe ko, keek ko im kukiij ko. M̧akūtkūt ko an Bon̄ōn eo Im̧aan Kūrijm̧ōj rej jem̧ļo̧k kōn itok eo an Jultomten—Santa Claus—eo ej boktok aolep menin leļo̧k ko n̄an aolep ajri. Bōtaab m̧okta jān an Jultomten kar itok, jinō aolep iien ej kakōbaik ro jeiū, jatū, im n̄a n̄an ron̄jake ilo an jema riiti bwebwenato in Kūrijm̧ōj eo jān Kallim̧ur Ekāāl.
Jema ekar ejjeļo̧k an naan, juon em̧m̧aan eo jejjo wōt an naan ilo kajin eo an make im Kajin English eo im ekar ekkatak āinwōt juon rūtto. Ekar lukkuun m̧ool im ejjan̄in kar pukōt nōbar. Ejjan̄in kar kwaļo̧k an pepe, im ekar meļak an kōnono. Ilo bon̄ōn eo m̧okta jān Kūrijm̧ōj ekar riit jān Luke 2. Ekar riit kōn an Josep im Meri etal n̄an Bethlehem, waļo̧kļo̧k eo an enjeļ eo n̄an rilale sip ro, ļotak eo an Jisōs, im an Meri kejōkļo̧kjeņ kōn aolep men ko rekar waļo̧k ilo būruōn. Ak jema ekar jab bōjrak ijōn ilo eoon 19; ekar wōnm̧aanļo̧k kōn bwebwenato eo an Meri im Josep boktok ninnin Jisōs n̄an tampeļ eo ilo Jerusalem n̄an kōm̧m̧ane joortak āinwōt kōnono ilo Kien Moses.
Jema ekar riit:
“Im, lo, juon armej ilo Jerusalem, etan Simeon …
“Im Jetōb Kwōjarjar ear kwaḷọk n̄an e, bwe e jāmin lo mej ṃokta jān an lo ri Kraist an Irooj.
“Im ej itok kōn Jetōb ilowaan tempel, im ke [Meri im Josep] rej bōktok nin̄nin Jisōs, …
“Innam jepak [Simeon e] kōn pein, im nōbar Anij, im ba,
“Kiiō, Irooj kwōn kōtḷọk eō ri karijerōṃ ilo aenōṃṃan, āinwōt Aṃ in naan:
“Bwe meja raar lo Aṃ lọmọọr,
“Eo Kwaar kōppojak iṃaan mejān armej otemjej.”2
Ilo ijin, jema ekōn kar aolep iien bōjrak. Innāem ekar kwaļo̧k naan in kam̧ool eo an. Aolep iien ilo ejja jekjek eo ekadu, ekar ba ilo kajin pālle eddo, “Imaron kar jab jepak nin̄nin̄ Jisōs ilo peiū, ak ijeļā, āinwōt an kar Simeon jeļā, bwe nin̄nin̄ eo ekar Nejin Anij, aō Rilo̧mo̧o̧r im Ripinmuur. E ej m̧ool, im E emour.” Āliin kean̄ in ekajoor, ej kalimjōk kajjojo kōm kōn māj būļu ko mejān im ba kōn juon m̧ajidjid, “Im kwomaron̄ barāinwōt jeļā.”
Jema im jinō rekar jeļā wōn nin̄inin̄ eo ilo Bethlehem im ta eo En kar rūttoļo̧k n̄an kadedeļo̧k. Jeļā in ekar ukōt er. Raar ikdeelel ejjab wōt bwe kōm ajri ro kōmij tōmak naan ko aer3 ak bwe kōm naaj kar jeļā kōn kōm make bwe kōm maron̄ oktak barāinwōt. Em̧m̧akūt kōn naan in kam̧ool eo an jinō im jema, ikar etetal ilo ial in bujin eo kōn ikdeelel eo nan “barāinwōt jeļā.”
Ke ekar 11 iiō detta, baam̧le eo am ekar jokwe ilo Göteborg, Sweden. Mijen būreejtōn eo ekar karuwaineneik aolep jodikdik n̄an riiti Bok in Mormon. Ikar jab lukkuun deļo̧n̄ ilo kūr eo, bōtaab ļeo jeiū ekar juon tikōn ilo iien eo, im ekar bōk kajjitōk eo. Ikar aolep iien kōņaan erom āinwōt ļeo jeiū im kōm̧m̧ane ta eo ekar kōm̧m̧ane, kōn menin ikar kobaļo̧k. Jinō im jema rekar letok n̄an ro jeiū im jatū im n̄a jeje ko rekwojarjar am̧ make, im ikar jino riit aolep jota.
Jet allon̄ tok ālik, Būreejtōn Gösta Malm, rikapilōklōk eo ilo mijen būreejtōnji eo,4 ekar rōjan jodikdik ro rekar riiti Bok in Mormon n̄an kajitōk ippen Anij kōn mool eo an. Ikar kāālet bwe inaaj kar kōm̧m̧ane menin. Bon̄ōn jab in ikar kōttar m̧ae iien eo ļeo jeiū ekar kiki ļo̧k. Ikar to jān peet eo, bukwelōlō ioon būļoor eo em̧ōļo, im ikar jino jar. Ejjab to ikar en̄jake āinwōt eļan̄n̄e kar jiron̄ eō, “Iļakkar de jiron̄ eok aolep iien bwe em̧ool.” Im kōn menin, juon aenōm̧m̧an epen kōmeļeļeiki ekar itok iioū. Ikar jeļā kōn n̄a make jān kajoor eo an Jetōb Kwojarjar bwe Bok in Mormon ej m̧ool.5
Ejja wōt kar kallim̧ur kake ilo Kadkad in Bok in Mormonikar barāinwōt “[itok] n̄an jeļā jān [kajoor eo an Jetōb Kwojarjar] bwe Jisōs Kraist ej Rilo̧mo̧o̧r eo an laļ in, bwe Josep Smith ej rikwaļo̧k revelesōn im rikanaan ilo raan kein āliktata, im bwe Kabun̄ eo an Jisōs Kraist im Armej ro Rekwōjarjar ilo Raan Ko Āliktata ej aelōn̄in kiin̄ eo an Irooj bar juon alen kajutake ioon laļ in, kōppopo n̄an Itok eo Kein Karuo an Messaia eo.”6 Jeļā jab in, kar koba ippān rikam̧ool ro ālkin, kar ukōt eō, ejja āinwōt an kar n̄an jinō im jema.
Jeļā in—bwe Jisōs Kraist ej Nejin Anij im bwe ekar mej kōn jerawiwi ko an laļ—ej juon menin letok ilo jetōb.7 Menin letok in ejjab n̄an juon opiij an priesthood emakeļo̧k ak juon em̧m̧aan ak kōrā emakeļo̧k; ijello̧kin, ej pād n̄an aolep ro rej karbōb n̄an e. Rejjab kajjitōk ippād n̄an bōktok n̄an Rilo̧mo̧o̧r eo menin letok ko an kooļ, frankincense, im m̧ōr n̄an karbōb n̄an menin letok ilo jetōb in aiboojoj. Kajjitok ippād n̄an leļo̧k kōj make.8 Rikanaan eo ilo Bok in Mormon Amaleki, ekar akweļap ippān armej ro, ba, “Im kiiō … ikōņaan bwe kom̧in itok n̄an Kraist, eo ej Rikwōjarjar in Israel, im bōk leen lo̧mo̧o̧r eo An, im kajoor in lo̧mo̧o̧r eo An. Aaet, itok n̄an e, im wujlepeļo̧k aolep jetōb ko ami āinwōt juon katok n̄an e … ; im āinwōt Irooj ej mour kom̧ naaj bōk lo̧mo̧o̧r.”9
Ilo aō kar rūttoļo̧k, ikar loe an jinō im jema jerbal n̄an ro jet. Ikar loe aer kōjparok bujen ko rekar kōm̧m̧ani ippān Anij. Ikar loe aer kate er kōm̧m̧ani loļo̧k ko im katakin ilo im̧ōko, kajjieon̄ jerbal in karejar n̄an ro raar jerbal n̄an er. Ikar loe aer bōk koņaer ilo kaini ko an tampeļ im bōk kūr ko an Kabun̄ in. Im kajjojo iiō, ilo Bon̄ōn eo Im̧aan Kūrijm̧ōj, jema ekar kam̧ool ippān Simeon kōn Rilo̧mo̧o̧r eo Jisōs Kraist. Ium̧win iiō ko, jema ekar erļo̧keļo̧k karuwainene eo an n̄an “barāinwōt jeļā” n̄an ro jinen im jemān kōn kien (in laws) im ajri ro jibūn.
N̄oul iiō ko ālkin aō kar en̄jake ke ikar ļaddik wōt kōn Bok in Mormon, kar kūr eō āinwōt juon Ritōl Eutiej Jiljilimjuonn̄oul im kar kappeik eō n̄an kōnono ilo kweilo̧k eo eļap. Leddik ro jeiū im jatū rekar lukkuun bwe ļlōllap eo jema 92-an-iiō en kar maron̄ alooje kweiļo̧k eo eļap—im eļaptata kōnono eo aō. Ālikin kweilo̧k eo eļap ikar etal n̄an m̧weo im̧ōn. Ikar kajjitōk, “Baba, kwaar ke alooje kweilo̧k eo eļap?” Ekar uwaak, “Ja.” Ikar kajjitōk, “Kwaar ke ron̄ aō ekōnono?” Ekar uwaak, “Ja.” Kōn jidik kūtoto, ikar ba ilo jab ļōmņak, “Ekwe, Baba, ta am̧ ļōmņak?” Ekar uwaak, “O, ekar em̧m̧an. Ikar nan̄in wōt jidik utiej būruō.”
Ālkin juon iien aitok ekar ba, “Dale, ewōr juon men ij aikuj jiron̄ eok.” Ikar jino jeļā bwe ilo aō kar kabbok naan in nōbar, jemlea ekar m̧ad kōn juon men aorōkļo̧k jān an letok nōbar n̄an n̄a. Ekar wōnm̧aanļo̧k, “Bon̄ ekar wōr juon aō ettōņak. Ikar ettōņake aō mej, im ikar loe Rilo̧mo̧o̧r eo. E eaar bōk n̄a ilo Pein im kar jiron̄ eō kōn jerawiwi ko aō rekar meļo̧kļo̧ki. Im ekar juon en̄jake ekanooj em̧m̧an.” Bwe ekar men wōt jema ekar kōļap an ba. Bōtaab kōjellin turin mejān ekar kwaļo̧k aorōk eo; ekar jeļā Jisōs Kraist. Ekar jeļā bwe nin̄nin̄ eo ilo Bethlehem, eo ekar “ḷapḷọk ilo mālōtlōt im rūtto, im ilo jouj ippān armej im Anij,”10 ekar lo̧mo̧o̧r eo an, me Nejin Anij ekar eddōkļok im en̄taan kōn jerawiwi ko an. Im jema ekar jeļā kake m̧oktaļo̧k jān ettōņak in. Ettōņak eo ekar juon tūriam̧o kake eļam waan—juon menin letok—jān Jemedwōj Ilan̄ eo ej iakwe n̄an juon ļōļļap, eo ekar mej ruo allōn̄ ko tokālik. Iaan aolep menin letok ko an Kūrijm̧ōj ikar bōk, ij kaorōke eļap tata menin in letok eo an naan in kam̧ool im tōmak kar kwaļo̧k jān jema im jinō.
Kūrijm̧ōj in, kajjitōk ippān Jemāmi Ilan̄ kōn menin letok eo ilo jetōb an jeļā kōn mour eo em̧ool an Rilo̧mo̧o̧r eo an laļ. Iien Kūrijm̧ōj ej iien eo em̧m̧an im aiboojoj n̄an katak kōn m̧our eo An im n̄an kajjieon̄ arin m̧wil im piktok ko An. Ilo am̧ kōm̧m̧ane, kwonaaj jeļā bwe Jisōs ej Kraist eo, Nejin Anij, im bwe Ekar pinmuur kōn jerawiwi ko am̧. Menin letok in em̧m̧anļo̧k im ettoļo̧k an pād jān aolep pākij me Jultomten ekar bōktok n̄an kwe, kōnke emaron̄ ukōt eok. Kwoniej ekkatak bwe Rilo̧mo̧o̧r eo ej iakwe karoole tok men ko kwoj jab bar koroole tok, kōmour kinej ko kwoj jab maron kōmour, bar kōm̧m̧ane men ko emōj an rub, im kāeņōm̧m̧an bōro ko emōj aer itipdikdik.
Ejja āinwōt jema eo ilaļ in, ijeļā bwe ijjamin naaj maron̄ jibwe nin̄nin̄ Jisōs in edik ilo peiū, bōtaab ijeļā, ejja āinwōt kar an Simeon jeļā, bwe nin̄nin̄ eo ekar Nejin Anij, Rilo̧mo̧o̧r eo aō im Rilo̧mo̧o̧r eo am̧, Ripinmuur eo aō im Ripinmuur eo am̧. E ej m̧ool, im E mour. Im Kwomaron̄ Jelā Barāinwōt. Ilo etan Jisōs Kraist, amen.