Kadkad In

Bok in Mormon ej juon bok in jeje ko rekwōjarjar āinļo̧k wōt Baibōļ eo. Ej juon ļo̧o̧k in m̧akūtkūt ko an Anij ippān armej ro etto ilo kar aelōn̄ in Amedka kaņ im ewōr ie tarlep in gospel eo ejjeļo̧k jem̧ļo̧kin.

Bok in eaar jeje in elōn̄ rikanaan ro etto kōn jitōbōn kanaan im revelesōn. Naan ko aer, kar jeje ioon pileij gold ko, kar kōnono kaki im kōkadudu jān juon rikanaan-rijeje bwebwenato etan Mormon. Ļo̧o̧k in ej letok juon bwebwenato in ruo jukjuk im pād. Juon eaar itok jān Jerusalem ilo 600 M.K. im tokālik eaar ajej ilo ruo laļ ko, kar jeļā kake er riNipai im riLeman ro. Eo juon eaar itok elōn̄ ļo̧k iiō im̧aanļo̧k ke Irooj ar kapok kajin ko ilo Im̧ōn Bar eo ilo Bebel. Jar in jej jeļā kake rej riJered ro. Ālikin elōn̄ to̧ujin iiō ko, aolep kar jako ijello̧kun wōt riLeman ro, im rej jet iaan ro jim̧m̧aan riIndian ro ilo Amedka.

Men eo eļaptata kar je ilo Bok in Mormon ej kōn ministry eo an Irooj Jisōs Kraist make ilubwiljin riNipai ro ālikin wōt An kar jerkakpeje. Ej jake m̧aantak pedped in katak ko ilo gospel eo, ļamļame tok karōk im lo̧mo̧o̧r eo, im jiron̄ armej ta rej aikuj kōm̧m̧ane n̄an bōk aenōm̧m̧an ilo mour in im mour indeeo ilo mour eo ej itok.

Ālikin an Mormon kar kadedeļo̧k jeje ko an, eaar leļo̧k bok in n̄an ļeo nejin Moronai, eo eaar kobaiktok jān an naan im kar ņooje pileij ko ilo juon Bat etan Kumora. Ilo Jeptōm̧ba 21, 1823, ejja Moronai in wōt, kiiō juon eo ar wōj, em̧ōj an jerkakpeje, eaar waļo̧kļo̧k n̄an Rikanaan Josep Smith im katakin e kōn ļo̧o̧k in etto in im karōk eo n̄an ukōte n̄an kajin In̄lij.

Ilo karōk ededeļo̧k pileij kein kar liļo̧k n̄an Josep Smith, eo eaar ukōti kōn mennin leļo̧k im kajoor an Anij. Ļo̧o̧k in kiiō ej jeje ilo elōn̄ kajin ko āinwōt juon kam̧ool ekāāl im kobaiktok ke Jisōs Kraist ej eo Nejin Anij eo emour im bwe jabdewōt eo enaaj itok n̄an E im pokake kien ko im naan in kain̄i ko an gospel eo An maron̄ lo̧mo̧o̧ren e.

Kōn ļo̧o̧k in Rikanaan Josep Smith eaar ba: “Iaar jiron̄ em̧m̧aan ro jeiū im jatū rej tōl tōmak in bwe Bok in Mormon eaar bok eo ejim̧we tata jān bok otemjej ioon laļ, im bwe ej dekā in jabōn em̧ n̄an tōmak in ad, im juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet.”

Kobaļo̧k ippān Josep Smith, Irooj eaar kōm̧m̧an bwe bar jon̄ouljuon armej ren loi pileij gold ko n̄an er make im bwe ren jet rikam̧ool ro bwe Bok in Mormon em̧ool im letok in lan̄. Naan in kam̧ool ko aer rej koba ijin āinwōt “Naan in Kam̧ool eo an Rikam̧ool ro Jilu” im “Naan in Kam̧ool eo an Rikam̧ool ro Ruwalitōk.”

Jej karuwaineneik aolep armej ilo jabdewōt jikin n̄an kōnono ilo Bok in Mormon, n̄an koļmānļo̧kijeņ ilo burueer kōn ennaan ko ie, innām kajjitōk ippān Anij, Jemād Indeeo, ilo etan Kraist eļan̄n̄e bok in em̧ool. Ro rej ļoor iaļ in im kajjitōk ilo tōmak renaaj bōk juon naan in kam̧ool bwe bok in em̧ool im ej letok in lan̄ jān kajoor in Jetōb Kwōjarjar. (Lale Moronai 10:3–5.)

Ro rej bōk kam̧ool in jān lan̄ jān Jetōb Kwōjarjar renaaj barāinwōt jeļā ejja jān kajoor in wōt bwe Jisōs Kraist ej Rilo̧mo̧o̧r an laļ in, bwe Josep Smith ej rikkwaļo̧k revelesōn im rikanaan ilo raan kein āliktata, im bwe Kabun̄ eo an Jisōs Kraist im Armej ro Rekwōjarjar ilo Raan ko Āliktata ej aelōn̄ eo an Irooj bar kajutake ioon laļ, m̧aanjāppopo n̄an Itok eo Kein Karuo an Messaia eo.