Na iLoloma Levu Duadua ni Siganisucu
Lotu ni Siganisucu ni Mataveiliutaki Taumada ni 2022
Sigatabu, 4 ni Tiseba, 2022
“Ia ni ra sa lako tani mai vei ira ko ira na agilosi ki lomalagi, era sa kaya vakai ira na ivakatawa ni sipi, .Me datou mai lako ki Peceliema, me raica na ka oqo sa qai yaco, o koya sa vakatakila mai vei kedatou na Turaga.
“A ra sa lako vakatotolo yani, a ra sa kunei Meri kei Josefa kei na gone sa davo ena nodra tikina na manumanu.”1
O ira na tikina rawarawa ni volanikalou ena Veiyalayalati Vou koya vola o Luke e vakavurea ena noda vakasama na iyaloyalo ni veika vakalou a yaco me baleta na nona sucu o Jisu Karisito koya eda marautaka nikua ka marautaki e veiyasai vuravura.
Ena noqu vanua vakaitikotiko e Potukali, na ivakarau ni kena vakaraitaki na veika a yaco ena ivolanikalou edau vakayacori ena kena tuvai na ivakatakarakara ni Sucu o Jisu me dua na ivakarau taleitaka sara. O na kunea na ivakatakarakara e veivanua ena gauna ni siga ni sucu—e dua na ivakarau e vakaraitaki talega ena vuqa na veivale. Na kena taraicake na ivakatakarakara ni Nona Sucu o Jisu e vakayagataka vakalevu na igu ni kena kumuni na moss, na co mamaca, na vatu, kei na so tale na veikabula me tarai kina e dua na irairai ni iVakatakarakara mai na gauna oya.
Na ivakarau ni kena taraicake na ivakatakarakara ni Siganisucu sa dua na itaviqaravi taleitaki ni noqu se lailai ki na tabagone kei rau noqu itubutubu ka qai e muri kei ira na luvequ. Na taraicake ni Vakatakarakara ni Siganisucu e dua na noqu itaviqaravi taleitaki duadua ena loma ni tiki ni yabaki oqo.
Keitou dau maroroya ena loma ni dua na kisi kau o ira kece na ivakatakarakara lalai koya vakayagataki me tara kina na irairai oqo kei o koya na veivanua wavolita. Eso na gauna, e dau vakaraitaki talega e dua na ivakatakarakara lailai ni neimami koro. Ena veiyabaki, na vei Siganisucu, e dau vakuri e vica na ivakatakarakara ena veika e vakasokomuni. O ya o ira na ivakatakarakara ni lewe ni koro, na vale, o ira na dau teitei kei na manumanu, na iqaqi ni cagi kei na wai, kei na so tale na veikabula me ivakatakarakara ni veidelana, qakilo, vunikau kei na lomanibai. Era vakayagataki na tiki ni iloilo me ivakatakarakara ni uciwai. Ena so na gauna, e vakayagataki talega na kawakawa. Ka, ena kena lomadonu o ira na ivakatakarakara bibi duadua, o ira koya e vakamacalataki ena ivolanikalou: a dua na ilawalawa ni sipi kei na “ivakatawa ena lomanibai, vakatawani ira tiko na sipi”2 ka vosa na agilosi vua na ivakatawa me kakua ni rere ka qai kacivaka na nona sucu na iVakabula, kauta vata mai na itukutuku vinaka ka marautaki … vei ira na tamata”3 na kedrau ivakatakarakara o Mary kei Josefa e vakotori ena dua na vanua bibi ena loma ni vale ni manumanu. 4 Sa qai tiko na kalokalo, koya e vakatoka na ivolanikalou ni kauta mai e dua na marau levu vei ratou na tamata vuku ka dusi ira ena igolegole ki vei Jisu.5
E vakatau vei ira na lewe ni vuvale me ra vakaduria na nodra iVakatakarakara ni Sucu o Jisu. Ena loma ni vica na siga se macawa, ena tara tiko vakalalai na ivakaraitaki oqo ka soqoni vata kece na veitikina ena kedra ituvaki donu.
Ena vula ni siganisucu, keimami dau qoroya na irairai ni Vakatakarakara ka vakananuma na veika a yaco mai na nodra volavola o Maciu kei Luke koya vakaibalebale kina na kena marautaki. Na italanoa me baleta na nona vakabauta o Meri; na nodrau ilakolako cake o Josefa kei Meri “ e Kalili, mai na koro ko Nasareci, ki Jutia, ki na koro i Tevita, na yacana ko Peceliema ”6; kei na ibolebole rau sota kaya me kunei e dua na vanua e kea.
Tinitini, me tadu mai na Siganisucu, ka sa biu sara na ivakatakaraka i Jisu ena loma ni vale ni manumanu, kei na veitalanoa e vuki ena Nona bibi o Jisu Karisito ena noda bula kei na veika e vakayacora vei keda.7 ka sa iKoya na iloloma cecere mai vei ira kece na loloma.
Na sere ni siganisucu oqo e taura vata kece na vakila ni yalo ni siga ni sucu:
“Na Luvena o Meri, qaravi ka talei!
Na Gone lailai savasava ka rarama!
Roqoti ena co mamaca ni nona imocemoce ena vale ni manumanu
Ena imatai ni Siganisucu vakalou!
Na inuinui ni vei tabayabaki kei na vei mataqali tamata
E isutu ena Matamuni vakasakiti!
Na Gone koya vakasinaiti vuravura na nona iserau!
Na Gone lailai sucu ena vanua dravudravua!
Era dusimaki mai na vanua yawa na ivakatawa ni sipi,
Ka tucake ena sokalou e ruku ni kalokalo,
Era tekiduru na tamata vuku
Na vakacaucau e wasei Vua!
Na Gone era lagasere kaya na agilosi!
Na Gone lailai, na Tui!
E ivakadei ni vutugu ni veitamata kece
Ena loma ni matana serau!
Ai loloma bibi soli vei ira na tamata e vuravura
Mo qaqa ena isolisoli vaka Lomalagi!”8
Yalataka na iVakabula na Nona iloloma vei keda: “A veika oqo kau sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa: ia mo dou vakacegu; au sa vakamalumalumutaki vuravura.”9
“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”10
Na loloma vakasakiti; na loloma vakaitamera!
Na gauna ni Siganisucu e dua na gauna meda vakasamataka ka vakaraitaka na vakavinavinaka kei na madigi e tiko vei keda me baleta na Nona sucu, bula, Veisorovaki, kei na Tucake tale ni noda iVakabula, o Jisu Karisito.”11
Au vakananuma ni veivakalougataki ni kune vakacegu kei na inuinui, ena loma ni dredre kei na iboleble;12 na veivakalougatataki ni veidusimaki vakalou ena gauna ni qaqa kei na gauna ni luluqa;13 na veivakalougataki ni rai rabailevu kei na noda inakinaki, ni da kila tu ka vakabauta tiko ni e vuqa tale na veika eda na lako curuma ni oti na ilakolako e vuravura;14 na veivakalougatataki ni noda vakavinavinakataka kevaka madaga e lailai na veika eda gadreva tu; na veivakalougataki ni noda karoni ni da galili;15 kei na veivakalougatataki me da rawa ni solia na ka ni lailai tu na veika eda taukena.
Oqo kei eso tale e vuqa na veivakalougataki e rawa baleti Jisu Karisito! Io, me baleta na gone dramidrami o Jisu, au maqusa sara meu waraka na nona na biu ena vale ni manumanu ena Siganisucu me tiki ni ivakatakarakara ni Nona sucu o Jisu. O Koya na noda loloma levu duadua, e solia na veivakalougatataki baleta na Nona bula, ivakaraitaki, vakavuvuli kei na solibula.
Okoya au taroga kina: E sega li, me isau, na noda vakayagataka me laveta na icolacola ni nodra na tani, vukea ka vakauqeti ira mera sema kei na marautaki ni gauna oqo kei na kena marautaki na itukutuku vinaka vei ira na ivakatawa ni sipi ena imatai ni Siganisucu?
E rawa ni veisautaka o Karisito na noda Siganisucu me uasivita na reveni ni yalovinaka kei na loloma ka ologa na noda marau ena yalololoma, “sa i koya na loloma taucoko i Karisito ka sa ia tiko ga ka sega ni mudu.”16 “Dina ga ni veisau na veika eda vakila, na Nona loloma vei keda ena sega vakadua ni veisau.” Nona loloma ena tomani tikoga ena noda bula taucoko ka vakakina ena veiyabaki.
Ni vakatabakidua na rai vei Karisito ena vula i Siganisucu e rawa me vakarautaka e dua na ivakarau cecere ni Nona loloma ena noda bula kei na kena rawa vakalevu na noda veilomani kei na veiqaravi vei ira eso.
Ni da maroroya na yalo ni Siganisucu, eda maroroya tiko na Yalo nei Karisito. Au niutaka, ena gauna oqo, me da vakanamata vei Jisu Karisito, na Rarama kei Vuravura, ka me da vakaudreva na noda cina ena vula ni Siganisucu ena noda wasea kei ira eso na loloma, veikawaitaki kei na veiqaravi.
Baleta na Nona sucu, e vakaibalebale na noda bula tiko qo. Baleta na Nona sucu, e tiko na inuinui. Sa iKoya na iVakabula kei vuravura, ka loloma bibi duadua, okoya au wasea kina na noqu vakadinadina. Ena yacai Jisu Karisito, emeni.