iTukutuku Vinaka Mo Dou Reki Vakalevu Kina
Lotu ni Siganisucu ni Mataveiliutaki Taumada ni 2022
Sigatabu, 4 ni Tiseba, 2022
Me nomuni na Marau ni Siganisucu! Na vakavinavinaka vei ira kece era sa kauta mai ena nodra itukutuku kei na sereivakatagi “nai tukutuku vinaka mo dou reki vakalevu kina” ena draki ni Siganisucu oqo.
E vica vata na drau na milioni na tamata era marautaka na sucu i Jisu Karisito ena draki ni Siganisucu oqo. Na tamata taucoko e dodonu me cakava vakakina. Na Nona bula e a cecere duadua ka na sega tale ni dua ena uasivita.
I.
Ia ena vakanananu mada ga vakatamata, na bula vakayago i Jisu Karisito e sa vakayaco-ka vakalevu sara ki na vuravura oqo kei na kena itukutuku ni veigauna mai na nona bula e dua tale. O Koya e sa dau nodrai ulutaga bibi na parofita kei na dauniserekali me vica vata na udolu na yabaki. Na cakacaka ni liga kei na sereivakatagi ni wase i ra ni noda vuravura e sa dau vakanamata ki na kena marautaki na sucu kei na bula kei na ilesilesi i Jisu Karisito. O ira na vuku kei na daunicioloji era vakayagataka nodra bula ena vulici ni Nona ivakavuvuli. Na veivakavuvuli oqori sa vakauqeti ira e vuqa na isoqosoqo ni veivukei, mera vakaraitaka na loloma savasava i Karisito.
E sega tale ni dua e levu cake na ivakananumi e caka me baleta na Nona Bula kei na ivakavuvuli me vakataki Jisu Karisito. Oqo era oka kina na veivalenilotu lelevu ka ra robota tu na veivanua e Iurope kei na vanua vaka-Amerika, ka vuqa vei ira e a taura e vica vata na drau na yabaki na kedra tara. Wale tikoga oqo, Na Lotu i Jisu Karisito ni Yalododonu Edaidai, sa mai vakatabuya oti e 171 na valetabu ka ra cakacaka tiko kei na 129 era vakavoutaki tiko, tara vou, navuci tiko, se qai kacivaki toka ga mai vei Peresitedi Russell M. Nelson ena Koniferedi Raraba ni Okotova sa oti. Na veivale ni Turaga oqo era tiko ena veivanua lelevu kei na 74 na veimatanitu e vuravura. E kea keimani sa solia na neimami bula me keimani muri Jisu Karisito.
E milioni era sa solia oti nodra bula–ka, bibi cake, e milioni era sa vakaivakarautaka na nodra bula–me vaka na bula ni Turaga na Kalou kei Isireli, o Jiova, o Jisu Karisito, na noda iVakabula. E cavuta kina vakaoqo ka sega ni kinoca o Peresitedi Gordon B.Hinckley, “Na Nona ivakaraitaki tawavakatauvatani rawa [e a] kaukauwa levu duadua me caka kina na veika vinaka kei na veisaututaki e vuravura.”1
II.
Eda rawa ni raica edua na inaki bibi kei na ivakatakarakara ena kena kacivaki vakalou na sucu ni Luvena Duabau ga na Kalou. Eda vulica mai na itukutuku ni Veiyalayalati Vou ni kena kacivaki na sucu nei Karisito ena tokalau ni i wase ni noda vuravura a yaco ki na tolu na iwase ni tamata duidui, ka duidui talega na nodra itovo. O ira na ciqoma nai tukutuku mai lomalagi ni sucu era a tamata yalomalumalumu, era savasava, ka vuku sara.
Na imatai ni kacikacivaki a yaco vei ira na ivakatawa ni sipi ena veiulunivanua e Peciliema. E dua na agilosi kei na dua na matasere vakalomalagi era a kacivaka “e dua na itukutuku vinaka mo dou reki vakalevu kina, kei ira kecega na tamata … Na iVakabula, ko koya na Karisito na Turaga.”2 Era a digitaki beka na ivakatawa mera ciqoma na itukutu marautaki oqo baleta nira a yalomalua ka yalomalumalumu. O koya gona, a rawa kina vei iratou me ratou rogoca rawa na itukutuku mai lomalagi, ka ratou vakadeitaka ena nodratou laki sikova na gone sa qai sucu. Sa qai tukuna vakaoqo na ivolanikalou era “sa tukuna yani na vosa sa tukuni vei ira ena vuku ni gone oqo.”3 Na nodra cakacaka vakaivakatawa kei ira na lami era vakatawa era ivakaraitaki ni veika ena vakayagataka na iVakabula ena Nona veivakatavulici. A vaka talega kina, ni lako ko Jisu vei Joni na Dauveipapitaisotaki ena itekivu ni Nona ilesilesi, a kaya vakaoqo na parofita oya, “Raica na Lami ni Kalou, ko koya sa kauta tani na nodra ivalavala ca na kai vuravura.”4
Na ikarua ni kena kacivaki na sucu ni Mesaia a yaco ena valetabu e Jerusalemi vei rau e rua na liganicakacaka savasava ka rawa kina merau ciqoma na ivakadinadina ni Yalo Tabu ena vuku ni nodrau bula savasava. Ena gauna erau a kauta mai kina na gone o Jisu ki valetabu o Meri kei Josefa me baleta na isoro me cabori baleti ira na ulumatua, erau a vakadinadinataka ruarua o Simione kei Ana ni o Koya na Mesaia dina. E tukuna na ivolanikalou ni a keveta na gone o Simione ka vosavinakataka na Kalou ni vakatarai vua me raica “na vu ni bula,” na “rarama me vakararamataki ira na veimatanitu tani, me nodra iukuuku talega na nomuni tamata na Isireli.” Kei Ana, “edua talega na parofita yalewa,” “sa lako mai koya ena tikiniga ko ya sa vakavinavinakataka talega na Turaga, a sa vosataki koya vei ira kecega era tiko mai Jerusalemi era waraka na iVakabula.”5
Na ikatolu ni ilawalawa era a kila talega na sucu veivakurabuitaki oqo. Na iVola Tabu, ni mai vakamatatataka o Josefa Simici e tukuna vakaoqo “eso na tamata vuku mai na tui cake era sa lako mai ki Jerusalemi, ka kaya, Evei ko koya sa sucu me nodra Mesaia na kai Jutia? Ni keitou a raica na nona kalokalo mai na tui cake, ka keitou sa lako mai me cuva vua.”6
Mai na nodratou vakatataro eda sega ni vakatitiqataka niratou a liutaki mai vua na Turaga me baleta na Nona vei inaki tabu eso. E vakavulica na iVola Tabu “ni veika ni Kalou sa sega tale e dua sa kila, vakavo ga ke tiko vua na Yalo ni Kalou.”7 O iratou na tamata vuku oqo eratou a lako mai na dua na vanuatani ka duidui na kena itovo, ka ivakadinadina vei iratou ni Mesaia a sucu mai me baleta na tamata kecega. Me kena ikuri, e rairai a tiko tale beka edua na inaki. Na sau ni iloloma eratou a solia na tamata vuku e a rawa beka me veivuke vei Meri kei Josefa ena nodratou biubiu vakatotolo ki Ijipita ka tiko kina me taqomaki kina na gone o Karisito ni a sagai me vakamatei ena lewa maivua na Tui ca o Eroti.8
E sega beka ni matalia ni sucu veivakurabuitaki ni Karisito kei na bibi ni veika a yaco o ya a vakatakilai ga vei ira na yalomalumalumu, na savasava, kei na vuku sara? Me vaka e vakavulica o James E Talmage ena Jesus the ChristSa dina sara ni Kalou a vakaturi ira cake eso mera Nona ivakadinadina me sotava na veiwasewase kei na ituvaki taucoko ni tamata–na nodra ivakadinadina na agilosi sa baleti ira na dravudravua kei na lolovira, na nodratou na tamata vuku me baleta na tui qaciqacia kei ira na bete dokadoka e Jiutia.”9
Ni da nanumi Simione kei Ana, e rawa ni vakauqeti keda meda vakataki rau, ka vakuria na noda ivakadinadina ena sucu tabu kei na kena inaki ena draki ni Siganisucu oqo.
III.
Kivei keda, e sega ni dua na ka e vou ena marautaki ni sucu i Karisito. Na itukutuku ena sega ni madra rawa ka macala vinaka. E a vakavulici vei Atama. E a vunautaki vei ira na luvei Isireli. E a vakatakilai vei ira na kawa i Liai na Tamadra. Ena veigauna kece, o ira na profita era sa dau tukuna tu na uto ni dina ni ivakavuvuli kei na Veisorovaki i Jisu Krisito. Ena veigauna kece, era sa dau tukuna na Nona ilesilesi ka vakavulica na Nona ivakaro mera lomana na Kalou o ira na luvena ka veiqaravi vakai ira. E talevi lesu ena veitabayabaki, na vei itukutuku oqo baleta ni ra sa bibi sara ena veigauna tawamudu. Kivei ira era muri Karisito, na veitukutuku oqo mera na kakua ni veisautaki. Mera na vakavoui ena noda bula vakayadudua.
Na Siganisucu e vakayadrata vei keda e dua na gagadre meda dolavi keda yani me sivia na iyalayala ni loloma kei na veitokani ka sa dau matau tu. Na itukutuku mai Lomalagi “sa veivinakati rawa ko ira e vuravura, sa lomani ko ira na tamata”10 a sega ni yalani ga vei ira ka da sa lomani ira ka taleitaki ira rawa tu. E vagolea yani na cakavinaka vei ira noda itokani vagauna, ira na vulagi, ka vakakina o ira noda meca. Na Siganisucu e gauna talega ni veivosovosoti, na gauna me vakamavotaki kina na veimavoa makawa ka vakabulabulataki na veimaliwai ka sa mai luluqa.
Na Siganisucu e gauna me biu tani kina na qaciqacia kei na veivakacudrui, me tabonaki sobu na veidusi, me vakatovotovotaki na vosota, ka kautani na duidui ena keda maliwa. E dodonu meda vakatetea yani na veikauwaitaki dina vei ira na tamata kece, vei ira eda vakabauta vata se sega, me muri kina na ivakaro ka solia na Kalou vei Mosese me solia vei ira na Isireli:
“Ia kevaka sa tiko vulagi kei iko ena nomudou vanua edua na kaitani, mo dou kakua ni vakararawataki koya.
Na kai tani sa tiko vulagi kei kemudou ena tautauvata vei kemudou kei na dua na kai nomudou, ia mo lomani koya me vaka ko sa lomani iko.”11
Na Siganisucu e dua na gauna meda vakananuma kina nida luvena kece e dua na Tamada mai Lomalagi ka solia na Luvena E Duabau Ga meda vakabulai kece mai na mate ka sa vakarautaka tu na veivakalougataki ni veivakabulai kei na veivakacerecerei ki na kawatamata ena ituvaki e tautauvata.
Me vaka nida muri Karisito, e dodonu meda tamata mamarau ka dau veikauwaitaki mai vei ira na tamata kecega ena vanua cava ga. E dodonu meda vakavulici ira na luveda mera dau yalololoma ka veikauwaitaki vei ira na tamata kecega. Sa dodonu vakatalega kina, meda levea na veimataqali ilawalawa kei na itaviqaravi ka dau vakaleqai kina noda ivakarau se vakamamadataka na noda vakabauta kei na sokalou. Ia, e sega ni dodonu me tarova na noda sasagataka vagumatua ena sala kece sara ni vakamamasu vei ira na tamata—vakabauta kei na tawavakabauta.
Ena tini vakacaca na yabaki sa oti, e a tukuna kina o Peresitedi Monson na veivosa oqo:
“Era a vakasaqara na ivakatawa ni gauna makawa na gone o Jisu. Ia eda sa vakasaqarai Jisu na Karisito, na Tuakada, na noda Dautataro vua na Tamada, na iVurevure ni noda vakabulai; a tiko e liu kei na Tamana mai na ivakatekivu; o Koya sa taura vua na ivalavala ca ni kai vuravura ka lomana ga me mate meda na bula tawamudu koi keda. Oqo na Jisu eda vakasaqara tiko.”12
O ira na Yalododonu Edaidai era duatani duadua ena nodra marautaka na itukutuku ni veivakabulai i Jisu Karisito e loma ni yabaki taucoko. E tiko vei keda na isolisoli ni Yalo Tabu, ka nona ilesilesi me vakadinadinataka na Tamana kei na Luvena.13 Eda sa luvena edua na Tama mai Lomalagi ka tukuna vakaoqo, “Oqo na noqu cakacaka kei na noqu lagilagi—meu vakavuna na tawamate rawa kei na bula tawamudu ni tamata.”14 Me vaka ni ra parofita ni noda iVakabula, o Jisu Karisito, na Turaga na Kalou ni Isireli, era sa tukuna na Nona kosipeli:
Ni a lako mai ki vuravura ko koya, io ko Jisu, me mai vakamatei ena kauveilatai ena vukui vuravura, ka me colata na ivalavala ca ni vuravura, ka me vakatabuya na vuravura, ka vakasavasavataka mai na veika tawadodonu kecega;
“Raica era na vakabulai ena vukuna ko ira kecega, me vaka na kaukauwa kei na lewa sa solia vua ko Tamana;
“A sa vakalagilagia na Tamana, ka vakabulai ira kece na ibulibuli ni ligana.”15
O koya gona, ena Nona Lotu sa vakalesui mai eda vakaraitaka kina “Keimami vakabauta ni na vakabulai na tamata kecega ena Veisorovaki nei Karisito, kevaka eda sa talairawarawa ki na lawa kei na cakacaka vakalotu ni Kosipeli.”16 Au sa vakadinadinataka ena yaca tabu i Jisu Karisito, emeni.