9:41

Nanuma, Nanuma

Lotu ni Siganisucu ni Mataveiliutaki Taumada ni 2023

Tracy Y. Browning

iKarua ni Daunivakasala ena Mataveiliutaki Raraba ni Lalai

Sigatabu, 3 ni Tiseba, 2023

Ena vanua au tiko kina, ena itekitekivu ni vula o Noveba, e vaka mera sa dau vakavakarau mera moce na veika bula wavoliti au. Na vakasolokakana ni draunikau, era dau sua ka sere vei au ena vula i tubutubu kei na vula i katakata, era sa lulutu ka tatavasavasa ni‘u butuki ira e yavaqu. Era sa vagagalu na manumanu vuka era dau lagasere ena dua na gauna, ka vaka me ra seavu yani na iboi kamica ni veisenikau. Na veika bula wavoliti au era dau vakatakila tu na bula sa vaka me ra vakasuka yani me dua na gauna, kei na vakanomodi kei na vanua lala era sa biu tu mai—ni sa vakarau mai cava na yabaki ka ni bera ni‘u guilecava me‘u marau tikoga—sa yaco mai na iloloma ni Siganisucu.

Mai na noqu tikina ena nona vuravura levu na Kalou, au nanuma. Au nanuma meu raici ira na veivunikau era drokadroka tu ga, era seraka mai na kedrai iboi totoka, ka kamikamica. Au nanuma meu vaqarai ira na senikau kei na beri era damudamu kata se ra vulavula matua sara ka vakarogoca na veisere ni siganisucu era curuma na yalo kei na itikotiko kei na veivanua ni sokalou, ka kacivaka i vuravura “me da marau,” niu vaqara na vei ivakatakarakara ni Siganisucu me sere vata kei au ko “lomalagi kei vuravura” ka sureti au meu nanuma.

E dua na ka veivakurabuitaki ni gauna oqo sa ikoya ni vaka ni vuravura taucoko va Karisito, kei na vuqa e taudaku ni noda iyalayala, era vakayagataka na gauna oqo ena inaki me ra vakaraica ka vakasinaita na nodra bula ena ivakatakarakara ni ivakananumi ni Siganisucu.

Na Siganisucu sa ikoya na ikawakawa eda lakova me muataki keda yani kina yabaki vou. Ena gauna eda takoso yani kina, eda sa sureti me da vakasamataka na cakacaka mana ni mai sucu ena ituvaki vakaloloma ena koro i Tevita “na Kalou tawamudu, na Turaga, ko Koya ka bulia na i yalayala kei vuravura,”¹ “sa viviraki vua na isulu ni gone, a sa davo ena nodra tikina na manumanu.”² Nida tekivutaka na noda ilakolako ni veisiko ni Siganisucu, eda na rawa beka ni raici keda vaka tagane kei na yalewa vuku ni gauna oqo, ka da vakaraica tiko beka na veikalokalo e dela ni veivunikau drokadroka kei na rarama ka wavoliti keda tu “ka reki vakalevu sara”³ ena vei ivakatakilakila sa tu e matada me dusimaka na noda ilakolako vei Jisu Karisito, vei Koya na “rarama kei vuravura.”⁴ Nida boica e dua na iboi ni isaluwaki caka vakamatau ena draki oqo, e rairai vakananumi keda tiko me da kauta mai vata kei keda na iloloma me da mai solia vua na “Luve ni Kalou bula”⁵—sega ni “koula, na drega me vakamai, kei na mura”⁶ ia e dua na sokalou ni solibula ena “yalo raramusumusu ka bibivoro.”⁷ Vei keda era dau lomani ira ka karoni ira na gonelalai, e rairai eda sa vakataki ira na ivakatawa ni gauna oqo era “vakatawai ira na [noda] qele ni sipi,”⁸ vakarogoci ira na agilosi dauveiqaravi e vuravura era talai mai vua na Kalou ena veisureti me da “kakua ni rere” baleta ni ra kauta tiko mai na veidusimaki ki na vanua e rawa ni kunei kina na noda iVakabula.⁹ Eda se nanuma tiko beka meda vakasolokakanataka “na itukutuku vinaka ni marau levu” kina daligadra na noda gone me ivakadinadina? Baleta, ena gauna era na raica kina me vaka na gone yalo qoroqoro na roka ni Siganisucu damudamu kei na drokadroka, koula kei na vulavula , era na nanuma na veisorovaki savasava ka taucoko ni nodra Dauniveivueti, o Jisu Karisito, ka vakarautaka tu vei ira na isolisoli ni veivakabulai kei na bula vou ka tawamudu.

Na Siganisucu e vakatara me da lakova e dua na ilakolako vakayalo ki Peceliema me da rawata e dua na ivakadinadina me baleta na noda iVakabula, o Jisu Karisito, ka qai kauta yani na ivakadinadina oya ena yame sa sereki kei na yava kei na liga sa tu vakarau tu me “vakatakila yani”¹⁰ ka tusanaka ki na tamata kecega na veika eda sa mai kila me baleti Koya. Eda rawa ni lakova na ilakolako oya ki vua na iVakabula ena noda vakananuma.

Na Kalou e solia vei keda na isolisoli ni daunanuma na ka, me da kua ni guilecava kina na Daunisolisoli, me da vakila kina na Nona loloma tawayalani vei keda ka vulica me da lomani Koya me kena idole. Na parofita ni gauna makawa o Moronai e vakauqeti keda me da nanuma “ni ka kecega sa vinaka sa mai vei Karisito.”¹¹ Na noda iVakabula e solia na isolisoli ka duatani mai na kena ka solia ko vuravura—ni veika vakavuravura e vakaiyalayala, vakatikina, ka rawa ni seavu yani ni toso tiko na gauna. O Jisu Karisito e solia tu na isolisoli e tudei, ka yaga vakaidina, me vaka na:

iSolisoli ni Yalo, me vaka na kila-ka, yalomatua, ivakadinadina, kei na vakabauta.¹²
Na isolisoli ni Yalo Tabu.
Na iloloma ni bula tawamudu.

Nida vakasamataka vakatitobu na vei “isolisoli vinaka” ena gauna ni noda bula, na kena e lelevu kei na kena e lalai, e rawa beka ni da raica na liga ni Turaga ni vueti keda, vaqaqacotaki keda, ka vakacegui keda?

Ni dau gole tani se ciri yawa na noda vakanananu kei na yaloda mai Vua, na Nona yalodina e vakadeitaka vei keda ni Turaga e sega ni guilecavi keda—ena Siganisucu se ena dua tale na gauna. Na Turaga sa tukuna oti nida ceuti tu ena qeteqete ni Ligana.¹³ Ena dau maroroya tu ga o Koya na Nona yalayala. E nanuma tu ga o Koya na veiyalayalati a vakayacora kei keda ka vakakina kei ira na noda qase. E rogoca ka nanuma o Koya na noda masu vua na Tamada Vakalomalagi se da tekiduru se vakamamasu mai na noda loqi se da vakatakekere mai lomada. Me vaka a vakavulica o Peresitedi Russell M. Nelson, e dau nanuma o Koya me “takoso ena nodra bula o ira era vakabauti Koya.”¹⁴ Sa yalataka tu o Koya ni na vosoti keda ena veigauna kecega eda veivutuni kina. E nanuma o Koya me vosa vei keda mai na ivolanikalou kei ira na parofita me ra vukei keda me da dau kunea na noda sala lesu i vale—se mani vakayacava na yawa kei na balavu ni gauna eda lako sese kina. Ka nanuma o Koya me tala mai na Yalona me vukei keda ni da saga me da maroroya na noda yalayala tabu “me da dau nanumi Koya “¹⁵

O Peresitedi Spencer W. Kimball a vakavulica: “Ni o vaqara ena ivolavosa se cava na vosa bibi taudua, … ena rawa ni nanuma. Baleta nio kemuni kece oni sa caka veiyalayalati oti … na noda gagadre levu duadua o ya me da nanuma. Oya na vuna eda gole kece kina ena vei Siga ni Vakacecegu ki na soqoni ni sakaramede—me da vakayagataka na sakaramede ka rogoca na nodra masu na bete ni ra kaya “ka dau daunanumi Koya tiko ga ka muria na Nona i vakaro sa solia vei ira.’ … Nanuma sa ikoya na vosa. Nanuma e ituvatuva.”¹⁶

Na nanuma na Kalou e vakauqeti keda meda vakacaudreva na kaukauwa ni noda igu vakayalo ka sureti keda me da ivalavala vakalou. Vakasamataka mada na vei ivakavuvuli oqo ka sureti keda kina o Peresitedi Nelson me da nanuma:

“Laiva na Kalou me gumatua ena nomu bula” ka “solia vei Koya e dua na iwase veirauti ni nomu gauna.”
“Vaqara ka namaka na cakacaka mana.”
“Muduka na veisaqasaqa ena nomu … bula”¹⁷ ka mo dua na dautataro.¹⁸

Na Siganisucu e rawa ni dua na madigi vinaka me cakacakataki kina na veisureti oqo ena noda vakayagataka na igu ni noda vakasama me da nanumi Jisu Karisito vakalevu cake kina, ka lomasoli me da dau vakasamataka vakatitobu na cakamana ni Nona mai sucu, ka vakila ka bulataka e dua na yalo ni veitokani kei ira na luve ni Kalou e uasivi cake. Na ivakatakilakila ni ivakananumi ka dau kunei ena gauna ni Siganisucu era sa dau kilai vakavuqa ni da:

Nanuma me da dau vakadewataka yani na veikidavaki ni Siganisucu vei ira na itokani, matavuvale, kei ira na vulagi.
Nanuma me da soli iloloma me ivakaraitaki ni loloma.
Nanuma me da lomasoli vei ira era vakaleqai tu ka ciqomi ira era curu mai ki na noda loma ni vale.
Nanuma me da raica matua na bibi ni sota vata kei na ivalavala tudei ni matavuvale ka yaco kina na Siganisucu me duidui ka kilaitani.

Vei ira e vuqa ena gauna vaqo e veiyabaki, na noda taleitaka na vakarautaki ni kakana vata ga, na railesuvi ni italanoa ni matavuvale, kei na ukutaki ni vunikau ni Siganisucu ena iukuuku eda biuta cake e veiyabaki era itavi bibi ka ra maroroya na noda gagadre me da vakananuma na veika sotavi e bibi vei keda. Na veikakana digitaki, eso na italanoa, kei na iukuuku ni gauna ni vakacagicagi era rawa ni ikumuni ni noda ivakananumi. Na noda gagadre kaukauwa me da dausoli-ka vakalevu cake ena gauna vakaoqo e veiyabaki e rawa ni vakabibitaka na noda inakinaki me da nanuma me da dau vakavinavinaka. Na loloma talei ka dau yacovi keda ni yaco mai na Siganisucu e sa dua talega na madigi ka soli vei keda me uto ni noda sasaga kei na noda cakacaka o Jisu Karisito: “Mo drau nanuma, mo drau nanuma mo drau tara na nomudrau yavu ena uluvatu ni noda Dauveivueti, o koya na Karisito na Luve ni Kalou.”¹⁹ Nanuma ni da yacova mai na icavacava ni dua na yabaki ka da takosova na ikawakawa ki na yabaki vou—me vaka na tagane kei na yalewa vuku, me vaka na ivakatawa dau veiwanonovi—ni ena kaukauwa duadua ga ni liga ni Turaga²⁰ eda na rawata kina.

O koya gona ena vanua cava ga o tiko kina e vuravura, nanuma mo vagolea na nomu rai ki na veimataqali ivakatakarakara ka ra sureti iko mo vakasaqarai Karisito. Ena veika kece eda vakabibitaka ena gauna vata oqo e veiyabaki, ena veikidavaki eda vakayacora, vei ira na tamata eda nanumi ira, me da kua ni guilecavi koya na Daunisolisoli dina—ena sega ni guilecavi keda o Koya ka na solia vei keda na kaukauwa me da nanumi Koya ena Yalona, ena gauna ni Siganisucu kei na veigauna kecega. E kauta mai na “marau ki vuravura” o Koya ka sureta na lomada “me sa vakarau”²¹ me ciqoma na noda Tui Sau. E yavudei ni noda ilakolako o Koya. E Rarama kei Vuravura ka Luve ni Kalou bula o Koya. Au sa vakadinadinataka ena Yacana, io o Jisu Karisito, emeni.