“Mai Vakarokoroko Vua”

Lotu ni Siganisucu ni Mataveiliutaki Taumada ni 2023

Russell M. Nelson

Peresitedi ni Lotu i Jisu Karisito ni Yalododonu Edaidai

Siga Tabu, 3 ni Tiseba, 2023

Taciqu kei na ganequ lomani, e ka rekitaki ni mai tekivutaki tale e dua na gauna talei ni Siganisucu meda vakananuma kina na sucu ni noda iVakabula ka Dauveivueti, na Turaga o Jisu Karisito.

E dua na gauna tabu ni veigauna me sucu e dua na gone. Raica oqo na imoimoi ni dua na makubuqu vakarua ni taura tiko na tacina gone ena imatai ni gauna.

[vidio]

E ka ni veivakurabuitaki ena bogi tabu duadua ena 2,000 na yabaki vakacaca sa oti volekata na koro lailai o Peceliema, era sere reki na kai lomalagi! A vakavulica na agilosi vei ira na vakatawa na dina cecere oqo.

“Raica, au sa kauta mai vei kemudou e dua na itukutuku vinaka mo dou reki vakalevu kina, kei ira kecega na tamata.

“Ni sa sucu vei kemudou ena siga oqo, ena koro i Tevita, na iVakabula, ko Koya na Karisito na Turaga.”¹

Ia oqo, taciqu kei na ganequ lomani, “ Meda mai vakarokoroko Vua.”²

Me vaka e vuqa vei kemuni, na Siganisucu e veisau vei au ena veiyabaki. Noqu gauna ni gone a tekivu ena revurevu ni Dravudravua Levu ni 1930. E sega na ilavo. Na soli loloma sa ka talei sara.

E cakava na noqu itubutubu me ka talei na Siganisucu vei keitou vakaveitacini. Ena veiyabaki keitou dau vuvale “matataki Santa” kina dua tale na vuvale. Keitou vakarautaka na iloloma totoka ka kauta vei ira ena Yakavi ni bera ni Kirisimasi. Ni keitou draiva lesu tiko mai nodra vale, ka ra yaloyalo tiko mai ena mata luluvu e kauta mai na reki dina ni loloma.

Au taleitaka na sere ni Siganisucu ni gauna o ya—kau se taleitaka tikoga. Ena veiyabaki, keirau taleitaka kei Sister Nelson na rogoca ka lagata vata kei Handel’s na Mesaia Au taleitaka na ibalebale vaka Iperiu ni vosa alleluia. E kena ibalebale dina “me vakacaucautaki na Turaga na Kalou o Jiova.”³ Na vosa e lagati na matasere oqo e sega walega ni baleta na sucu ni Turaga ia na Nona veiliutaki ni mileniumi.

Sa sucu vei keda e dua na gonetagane
Sa soli vei keda e dua na gonetagane:
ena tiko e tabana na matanitu;
Ena vakatokai na yacana ko Veivakurabuitaki, nai Vakavuvuli,
Na Kalou kaukauwa
NA TAMA NI GAUNA TAWAMUDU
Na Tui ni Sautu.4

Ena gauna ni noqu itabagone qase au a tekivu rawata kina e dua na ivakadinadina titobu ni Kalou na Tamada kei na Luvena Lomani, o Jisu Karisito. Au a kila ga vakai au nio Jisu Karisito a sucu maivei Meri na goneyalewa, ka sa “ka talei ka digitaki.”⁵ Au a kila nio Koya dina na Luve ni Kalou⁶ ka sa tamata digitaki ena kedra itukutuku kece na tamata.

Vakasamataka mada na cecere tawa vakamacalataki rawa ni veika a rawata o Jisu Karisito—me vaka na veika kece sa lewa na Tamana! A Kalou taumada tiko o Jisu ena gauna a vakalailaitaki sobu me lako mai i vuravura me vakacavara na cakacaka cecere duadua vei keda yadua. Na cakacaka cecere a veivakabulai dina ka veisautaka na bula. Na cakacaka cecere e sega e dua vei keda me cakava rawa vakai koya.

Na iVakabula a “vakila na mosi kei na veivakararawataki kei na veivakatovolei kecega”⁷ me na kila kina o Koya “me vaka na veika vakayago na sala [meda] vukei kina me vaka na [noda] veimalumalumu.”⁸

Ena vica na vula sa oti, au vulica kina vakalevu na mosi kei na veivakauqeti savasava. Na yaloqu sa gole ga vua na noda iVakabula niu saga meu raitayaloyalotaka na levu ni Nona vakararawataki. Na noqu vakasama vakayago e sega ni kila rawa na sala a taura kina Vua na mosi taucoko, na ivalavala ca kece, na yaluma kecega, kei na rarawa kecega ni tamata yadua a mai bula voli!

Ena ilesilesi cecere ni yalololoma e vakadruka na kila vakatamata se ivakamacala, a soli Koya na iVakabula ki na yaluma vakayalo ka vakayago tawa vakatauvatani rawa.

Eda doka na Gonelailai mai Peceliema baleta ni a qai solibula tawamudu e tawa vakamacalataki rawa ena Were o Kecisemani vakakina ena kauveilatai e Kalivari. Na solibula oqo sa vueti keda kina vakayadua ni da digitaka meda veivutuni ka muri Koya. Oti, ena ulu ni Nona ilesilesi e vuravura, a tucake mai na ibulubulu enai katolu ni siga, eda sa rawata yadua kina na kalougata vou ni tucake tale kei na bula ni oti na mate.

Ena gauna oqo, eda dau lagata ena marau se kaya, “Mo kalougata tiko ena Siganisucu.” Taciqu kei na ganequ lomani, na gagadre ni yaloqu vei kemuni yadua nikua e wase vica tiko. Na ka dina, e sega ni noqu gagadre baleti iko, sa noqu masu baleti iko ena gauna tabu oqo ni Siganisucu.

iMatai, sa noqu masu mona vakila na titobu, ni loloma tawamudu ni noda iVakabula kivei iko sara ga. A kilai iko tu mai o Jisu Karisito mai na bula taumada. E kilai iko ka raici iko tiko mai. E raica na nomu reki tiko kei na nomu rarawa. Sa sotavi ira vakayadua.

Sa uasivi na nona yalololoma ni ko sasaga bula ka reki ena veigauna ni ko gu yani ki liu ena savasava, ena gauna vinaka kei na ca.

Sa noqu masu nio na rawata na nomu ivakadinadina nio Jisu Karisito sa Luve ni Kalou, ni sa vakasinaiti ena kaukauwa vakalou ni vuku ni Nona solibula cecere veisorovaki, ena sega ni gadrevi kina mo sotava duadua na iboleboile dredre ni bula oqo. Nio kerekere, vakasaqaqara, ka tukituki ena yalodina,⁹ ena tiko ga kei iko na Nona kaukauwa me vukei iko, vaqaqacotaki iko, ka vakabulai iko.¹⁰

Sa noqu masu nio na taura deivaki na Veisorovaki ni iVakabula ena veivutuni ena veisiga, me savasava cake tikoga na nomu bula, ka vakasaqara na veidusimaki vakalomalagi ena veika kece o cakava. Sa vakakina, sa noqu masu mo na sotava na reki ni vakasama tikoga vakasilesitieli

Sa noqu masu talega mo na vakayagataka na gauna ni vakacagicagi oqo mo tekivuna kina na gauna mo sokalou kina vakalevu cake. Tekivuna vou mo vulica na ivakavuvuli kei na Veisorovaki i Jisu Karisito. Sega ni dua e vuravura oqo e lomani iko me vakataki Koya. Sega ni dua eke e kilai iko vinaka se kila dina na nomu rarawa kei na malumalumu. Sega ni dua e vuravura e tiko nona kaukauwa me vakataki Jisu Karisito. Sega ni dua eke e vinakati iko vakalevu cake mo tamata yaco ena veika kecega. Sega ni dua e vakamamasu vua na Tamana ena vukumu me vakataki Koya.

Na Turaga o Jisu Karisito sa noda iVakabula ka noda Dauveivueti. Sai Koya na Luve ni Kalou, na Yalo Savasava ni Isireli. Sa Koya sa Lumuti.¹¹ Ena veidusimaki nei Tamana, sai Koya na Dauveibuli ni ka kecega sa buli.¹² O Jisu Karisito na Jiova Cecere, na Kalou ni Veiyalayalati Makawa.¹³ Sai Koya na Imanueli sa yalataki tu mai.¹⁴ Sai Koya na noda Daunivakaraitaki cecere¹⁵ ka sa noda Dauveivakameautaki kei na Tamada.¹⁶ Ena vuku ni Nona kosipeli vakalesuimai, na kalougata kece ni Nona matabete sa nodra na tamata kecega ni ra lako Vua ka vakataucokotaki Vua.

Taciqu kei na ganequ, meda sa qai bula ena yalo ni “alleluya” ka vakacerecerea na Turaga na Kalou o Jiova. Ena gauna ni Siganisucu lagilagi oqo, meda mai vakarokoroko Vua, na Karisito na Turaga!

Au kila ni bula tiko na Kalou! Sai Jisu na Karisito! Oqo na Nona Lotu. Sa dusimaka tiko na toso ni Vakalesuimai ni Nona kosipeli. Au sa vakadinadinataka oqo ena yaca tabu i Jisu Karisito, emeni.