Kraist Ekar Ļotak n̄an Lo̧mo̧o̧r
2023 Nokon in Kūrijm̧ōj eo an Būreejtōnji eo Kein Kajuon
Jabōt, Tijem̧ba 3, 2023
Em̧m̧an ippa Kūrijm̧ōj! Bwebwenato eo ilo jeje ko rekwojarjar, al ko, im en̄jake in jipan̄ jej loe an kobrak laļ in ilo iien in ekwojarjar.
Ilo iiō ko, kōra eo ippa im n̄a ekar pād ilo elōn̄ laļ ko ilo iien Kūrijm̧ōj. Kōmro kar iakwe jekjek in an Kūrijm̧ōj kōm̧m̧an ilo elōn̄ m̧anit ko im jekjek ko reoktak jān doon. Ļōmņak kōn en̄jake kein ejipan̄ eō kile bwe Kūrijm̧ōj ej n̄an aolep armej. Ej n̄an ajri ro, ro jineer im jemeer, būbū im jim̧m̧a ro, ro nej jined im jemed, im ro rilikid. Ej n̄an armej ro im mour ko aer rem̧m̧an im n̄an ro rej mour kōn nan̄inmej, jeram̧ōl, im ko rapan̄. Ej n̄an ro kamijak ko an tariņae ejelōt er im n̄an ro rej mour ilo ainem̧m̧an, jekjek ko rejeram̧m̧an. Ej n̄an ro rej kajjeon̄ ļoor Rilo̧mo̧o̧r, n̄an ro em̧ōj aer kar ron̄ et eo Etan, im em̧ool n̄an ro rekar kaarmejete. Ej bar n̄ān ro rekar mour mo̧kta jān An kar ļotak. Kūrijm̧ōj ej n̄an aolep!
Kūrijm̧ōj ej n̄an aolep armej kōnke Anij ear jilkintok Nejin n̄an aoleped im n̄an kajjojo iaad.1 “Bwe n̄an kōj juon nin̄nin̄ eļotak.”2
Kōnke Rilo̧mo̧o̧r ekar ļotak, mour juon mour ewānōk, pinmuur kōn kōj, im kar jerkakpeje, kajjojo iaad jej bōk menin letok eo eļap an jerkakpeje jān mej. Ejjeļo̧k juon jetōb ekar mour ioon laļ in ejjab bōnbōn ilo menin letok in ekabwilōn̄lōn̄. N̄an kakkobaba kōn menin letok in “mej ear jab loi, im lo̧jiln̄in ear jab ron̄jake. … men ko jabdewōt Anij e ar kōppojak n̄an ro rej yokwe E.”3
Jekdo̧o̧n n̄āāt eo ak jekjek ko, ļotak eo an Rilo̧mo̧o̧r ekar baj wōt juon un n̄an m̧ōņōņō. E ekar itok n̄an leļo̧k n̄an kajjojo iaan ajri ro nejin Jemedwōj Ilan̄ “aenōm̧m̧an in laļ in, im mour indeeo ilo mour eo ej itok.”4
Jān iien eo an Adam im Iv, armej ro rem̧m̧an rekar erreim̧aanļo̧k n̄an ļotak eo an juon Rilo̧mo̧o̧r, eo enaaj kar itok n̄an laļ n̄an kōm̧m̧an bwe en dedeļo̧k karōk eo an Jemān n̄an ajri ro Nejin.5 Aiseia im Nipai rekar kanaan kōn ļotak eo An ilo jekjek in mijen eo An .6 Ļotak eo An ejjab maron̄ jenolo̧k jaņ unin An kar itok n̄an laļ in.
Ļomņak kōn Anna im Simeon, ro rekar loe nin̄nin̄ Jisōs im kile bwe nin̄nin̄ in ekar “juon meram in laļ”7 aolepen laļ im kōjatdikdik eo n̄an lo̧mo̧o̧r.8 Jej kiiō unin an kar enjel ro ba ennaan in “ ij bōkwōj ñan koṃ naan ko reṃṃan, naan in lañlōñ eḷap, im enaaj ñan armej otemjeḷọk.”9 Jej m̧ōņōņō n̄e aolep nin̄n̄in rej ļotak, ak ļotak in im nin̄n̄in in rekar oktak.
Jisōs Kraist, lukkuun meram eo im mour eo an laļ, kar ļotak nin̄nin̄ edik ilo jikin m̧ōn̄ā an menin mour, men̄e menin juon iju ekāāl ekar kōkaļļāik ļotak eo An. Bok in Mormon ej kwaļok juon iien eļap—juon raan, juon bon̄, im juon raan ejjeļo̧k marok—eo ekar kōkaļļāik itok eo An. Kōkaļļe kein rekabwilōn̄lōn̄ kar letok n̄an kalikkar itok eo an Meram eo an Laļ,10 eo enaaj kar kōtļo̧k kōj jān marok in jerawiwi im mej. Jemaron̄ jipan̄ kajeeded meram eo An ilo laļ in.
Ilo iien Kūrijm̧ōj, em̧ool bar ajri jiddik ro remaron̄ bar en̄jake im̧we im kajoor in iakwe eo an ad Rilo̧mo̧o̧r. Jet iiō ko remootļo̧k, juon iaan leddik ro nejimim, Sonja, ekar jeje kōn juon iien ekar bwebwenato ippān ļaddik eo nejin ļalem an iiō.
Ekar je, “Andrew ekar ba n̄an n̄a bon̄in ke ikar kakikiki, ‘Iiō in laļ, ijjab tōn ļōmņak eļap kōn menin letok ko, ak ij tōn ļōmņak eļap kōn ta eo ij leļo̧k n̄an Jisōs.’ Ikar kajjitōk ippān ia eo ekar bōk ļōmņak in, im ekar ba n̄an eō jān rikaki in Būraimere eo an. Hooray n̄an Būraimere!”11
Aaet. Hooray n̄an Būraimere. Kiiō, 14 iiō tokālik, Andrew ej jerbale juon mijen im joļo̧k iien ilo Kūrijm̧ōj n̄an kwaļo̧k naan eo kōn Jisōs Kraist n̄an ro jet. Ekar je, “Jisōs ekar letok n̄an kōj aolep kain … [im] enaaj bōke aolep jerawiwi ko ad. En̄in ej unin ao pād ijin ilo mijen eo aō.”12
Kūrijm̧ōj jijen in ej juon iien eaorōk n̄an ļōmņak kōn ta eo eaorōktata n̄an leļo̧k. Jemaron̄ jipan̄ ro jet en̄jake “lan̄lōn̄ kōn kōjatdikdik”13 eo ej itok n̄an jeļā Rilo̧mo̧o̧r im leļo̧k būruwōd n̄an E.
Leddik eo nejimim Alisa ekar jako jān nan̄inmej in kāānjer elōn̄ iiō ko remootļo̧k, im ij iakwe wāween an kalimjek Kūrijm̧ōj, men̄e ilo an jelm̧ae nan̄inmej eļap. Juon iiō ekar je:
“Ikar bōk juon menin kabwilōn̄ n̄an Kūrijm̧ōj. Juon eo eļap. … Ikar bōk juon email m̧okta jān Kūrijm̧ōj jān nurse eo ilo opij eo an oncologist eo aō. Ekar ba, ‘Merri Kūrijm̧ōj—tum̧ōr eo am̧ kar etale im kar kalikkar [bōdan̄ ilo] bōtōktōk.’ … Ta meļeļein n̄an eō? Rekar kōmālim … juon uno …eo me ej jerbal ippān iaļaņ kāānjōr cell eo [n̄an ro ewōr ippāer mutation eo]. Ejjab juon uno in kemour, ak ej juon uno ekabwilōn̄lōn̄ me emaron̄ … m̧ōkaj an kadikļo̧k tum̧ōr eo. … Būrom̧ōj , ānbwin eo ej eļļā jene , im kāānjōr eo eaar bar ro̧o̧ltok. … Bōtaab ikar en̄jake āinwōt n̄e juon ekar bar letok elōn̄ļo̧k allōn̄ ko n̄an mour. Im ta meļeļe in men jab in?… Juon bar summer? Bar juon holiday season ippān nin̄nin̄ ro nejū? Ikar jan̄ ke ikar kōpeļļo̧k email eo im kam̧m̧oolol Anij kōn menin kabwilōn̄lōn̄ in em̧m̧antata ikar bōke.”14
Alisa ekar bōk eļapļo̧k iien eaorōk ippān baam̧le e an. Ekar kwaļok juon an en̄jake baamle eo an rekar ioone ke rekar bokļo̧k juon menin leļok ilo ittiņo n̄an juon ritūrier. Ej kalikkar bwe aolepen jekjek in menin leļo̧k eo ad emaron̄ jab aolep iien jejjōt. Ekar je:
“Kōm ekar bokļo̧k juon menin leļo̧k eo … ilo ittiņo bon̄ōn eo ļo̧k. Ļaddik ro rekar karōke m̧akūtkūt ko amim rettiņo im jikin kitileekek ko.
“‘Ak baj wōt n̄e renaaj lo kōm …,’ Sam ekar ba ilo ejjeļo̧k kōjak, im ro ruo rekar ikūm̧kūm̧ im jilloktok. ‘Ej aikuj wōr snowball ilo peid.’
“James ekar meļeļe. ‘Ekwe em̧m̧an. N̄an kade kōjem eo bwe en bar kilōk?’
“‘Ejjab,’ [Sam ekar uwaak], ‘jen kad mejāer.’”15
Alisa ekar aorōk kōm̧m̧ao eo an ippān ļaddik eo nejin ediktata, Luke, eo ekar jiljino an iiō iien eo. Eaar je:
“Kiiō bon̄in ilo am̧ro babu ilo jikin babu e an meram kōn meram in to ko rekōļar itulōn̄ in wūntō eo an, ikar kajjitōk ippān … , ‘Ekwe, ta eo kwoj kōņaan … kajjitōk?’
“‘Ekwe, imaron̄ ļōmņak kōn juon men.’
“‘O?’
“‘Emaron̄ jerbal ilo aolep jijen ko.’
“‘O?’
“Mōkaj in ba. ‘Juon atabakwoj im juon mejen maik jān m̧am̧a.’
“Men eo aikuj 100 kattōn mejen m̧aik im atabakwoj kileplep. ‘Kokjak Luke, kwomaron̄ bōk men eo aolep iien!’
“Ak ke ij diwōjļo̧k ilo kōjem eo būruo ekar būrom̧ōj. Bōlen men eo emaron̄ jab m̧ool. Ij m̧ōņōņō bwe ilo iiō in emaron̄ bōk men eo im menin leļo̧k ko.”16
Ikar ilbōk kōn ļōmņak eo an Alisa kōn kōjatdikdik eo ej jepooļ Kūrijm̧ōj. Eaar je:
“Ekar itok limou kōn kōjatdikdik ilo jijen in. Ilo aō ļōmņak kōn kabwilōn̄lōn̄ in Kraist im menin letok ko rellōn̄ an Anij, ij en̄jake kōjatdikdik kōn aolep men im aolep armej. Ejjab lukkuun kain kōjatdikdik eo in ke aolep men renaaj jejjōt, ak bwe aolep men renaaj em̧m̧an, im āliktata jouj ej anjo̧. Ilo aolepen mour ko ad. Ijjab tōmak ke erūm̧ij n̄an menin kabwilōn̄lōn̄ ko, n̄an oktak, im n̄an aenōm̧m̧an. Ij tōmak bwe tum̧wilal ilowa im aolep jikin. Ij erre bwe epidodo n̄an en̄jake kōjatdikdik in n̄an ro jet, epenļo̧k n̄an letok n̄an eō make. Ak ij ekkatak. ‘Tōmak men ko otemjeļo̧k, kōjatdikdik kōn men ko otemjeļo̧k, kijejeto ilo men ko otemjeļo̧k.’ Pidodo. Aiboojoj.”
Ekōnono kōn ļaddik eo nejin, liin ekar wōnm̧aanļo̧k wōt, “James ilo Bon̄ eo m̧okta Jān Kūrijm̧ōj ej kōjan̄e n̄an eō [juon al in Kūrijm̧ōj im ikar] iakwe naan ko ilo al eo:
Rikūrijin ro Rem̧m̧an, rem̧ōņōņō [Good Christian men, rejoice]
Kōn bōro, aolpen aer, im anikien; [With heart, and soul, and voice];
Kiiō ejjab aikuj mijak mej: [Now ye need not fear the grave]:
Aeņōm̧m̧an! [Peace]! Aeņōm̧m̧an! [Peace]!
Jisōs kar ļotak n̄an Lo̧mo̧o̧r! [Jesus Christ was born to save]!
Kūr juon, im kūr aolep, [Calls you one, and calls you all],
N̄an etaļ n̄an ijo Jikin indeeo: [To gain His everlasting hall]:
Kraist kar ļotak n̄an Lo̧mo̧o̧r! [Christ was born to save]!
Kraist kar ļotak n̄an Lo̧mo̧o̧r! [Christ was born to save]!”17
E ekar ļotak n̄an lo̧mo̧o̧r. N̄an lo̧mo̧o̧ren kwe im n̄a. Ej juon menin letok ban keidi me emaron̄ wōt itok jān E. Jekdo̧o̧n ta jekjek ko ad kiiō, jen jouj im en̄jake menin letok ko An ilo mour ko ad ilo iien Kūrijm̧ōj in.
Ilo etan Jisōs Kraist, amen.