32:50

A sa kaya vei ira ko Jisu: Koi Au na Madrai ni Bula

Elder Gerrit W. Gong

Ena Mataveiliutaki ni Vitusagavulu

Dua na Yakavi Vata kei Elder Gerrit W. Gong

Vosa vei ira na Qasenivuli Vakalotu ena VVL •17 ni Feperueri, 2017 • Valecavu e Salt Lake

Kemuni na taciqu kei na ganequ, sa dua na madigi vakasakiti na soqoni ena yakavi oqo. Vinaka vakalevu vei kemuni na lewe vuqa ena nomuni itukutuku ni loloma kei na veivakauqeti. Ena yakavi oqo, ni da veivosakitaki Karisito, eda reki ena vukui Karisito, ¹ vuli me baleti Karisito, sa noqu masu ni da na toro voleka yani Vua.

Kemuni na lewe ni vuvale kei na wati keimami, sa dua na ka lagilagi na tiko kei kemuni. Au sa na vakatauvatani kemuni na wati keimami ena isaluwaki ni kakana. Oi kemuni na wati keimami sa isaluwaki ni neimami bula. Ni yadra mai vakamataka, dau moce bera, ka bulataka tu na vakabauta ena veikalawa. Vinaka vakalevu na veika kece o cakava tiko kei na nomu ituvaki.

Na ilesilesi meu vakaitavi ena Dua na Yakavi vata kei na iVakatutu Raraba e lako mai ena dua na ivola e saini taka mai o Peresitedi Thomas S. Monson, Peresitedi Henry B. Eyring, kei Peresitedi Dieter F. Uchtdorf. Au vakila na nodratou loloma na noda Mataveiliutaki Taumada, vei kemuni yadua ena nodratou kerea na Turaga me vakalougatataka ka vakauqeta na noda sasaga ena yakavi oqo.

Niu a qai ciqoma taumada na ilesilesi oqo, au a sureti rau o Elder Kim B. Clark kei Brother Chad Webb me vakavulici au baleti iko oi kemuni, na qasenivuli ni semineri kei na inisitute, daukaulotu, kei na tamata cakacaka ena VVL e vuravura raraba.

Au vulica ni 45,731 na qasenivuli kacivi ni semineri kei na inisitute kei na daukaulotu e veivakavulici tiko ena 133 na matanitu: e 34,527 vei kemuni e veiqaravi e taudaku kei Amerika; 11,204 vei kemuni e veiqaravi e Amerika. Ni kumunivata kece, o ni solia tiko e 20,208,605 na auwa ena veiqaravi vakosipeli ena vei yabaki. Vinaka vakalevu.

Au vulica ni 2,878 na noda tamata cakacaka ena Semineri kei na Inisitute ni Lotu era veiqaravi ena 129 na matanitu: 1,849 vei kemuni e Amerika ka 1,029 ena taudaku kei Amerika. Ni veiqaravi ena yalodina mai na veimatanitu mai Alabania ki Zamibia—kei Botswana, Bulgaria, Hungary, Lithuania kei Mozambique, e so vei ira na wili talega e loma. Vinaka vakalevu!

Eso vei kemuni sa veiqaravi tu mai ena vica vata na yabaki. Me ivakaraitaki, o Sister Enid May, mai British Columbia, e a qai vagalalataki wale toka ga oqo ni mai cava e 35 na yabaki ni veivakavulici ena semineri. E a vakavulica o Sister May e 9 vei iratou na 10 na luvena, 2 na makubuna, kei na nona bisopi ena gauna oqo. E a daumasulaka tu ga o Sister May me na dau cici rawa tiko nona motoka ena vei yabaki ni tekivu na vuli. Ena iotioti ni siga e a vakavulica kina na semineri o Sister May, ni vakasukasuka tiko na nona motoka e a qai mai mate tu yani vakadua na idini ni nona motoka.

Eso tale vei kemuni o ni sa qai tekivu veivakavulici. Me ivakaraitaki, o Sister Jang Dongran mai Korea kei Sister Johanna Mercader ena Dominican Republic, erau sa tekivu veivakavulici ena yabaki oqo ni rau se qai lewe ni Lotu ena loma ni ono ga na macawa.

E a tekivu veivakavulici ena semineri o Sister Margaret Masai mai Kenya ni oti ga e vica na macawa nona mai lewena na Lotu. E tukuna o Sister Masai ena yalomalumu ni o ira na nona gonevuli, e vuqa era sucu ena Lotu, e ra sa vakavulici koya ka vukea na kena tauyavutaki e dua na yavu vakakosipeli ka sa vakalougatataki koya ena 17 na yabaki e vakavulica tiko kina na semineri.

O veivakavulici ena veituvaki ni draki, ena veituvaki duidui eso, vei ira na gonevuli mai na veituvaki ni bula duidui, ena kalasi lelevu kei na ka lalai.

O Brother Benjamin Hadfield e veivakavulici e North Pole, Alaska. O Sister Lorena Tossen e veivakavulici e Ushuaia, voleka ena Antarctica e na vanua e tiko kina na South Pole.

Ena vei Vukelulu ena Inisitute e Salt Lake University, o Brother Jared Halverson e vakavulica e rauta ni 400 na gonevuli. Au a tarogi Brother Halverson e dau cakava vakacava. E kaya o koya, “Au vakavulica na ilawalawa ia au dau tuberi ira yadudua ena vosa.”

E Poladi, o Sister Dagmara Martyniuk, e dua na itabagone qasecake, e dau yadra vakamatakalailai me laki cakacaka ena vale ni madrai, ka qai dau suka bera tu baleta ni waraka me vakavulica na inisitute.

Na kalasi ni semineri nei Sister Myra Flores Aquilar e Honduras, e tekivu ena 5 na matakalailai. Kei na kalasi ni inisitute nei Brother Reuben Adrover e San Juan, Argentina, e tekivu ena 10 ena bogi.

O vakavulica ka vakayacora tiko ena kalasi ni lalai kei na vuli torocake e Mexico, Kiribati, Viti, Toga, kei Samoa.

Baleti iko, era sa wilika tiko vakalevu cake na itabagone kei na itabagone qasecake na ivolanikalou kei na nodra vosa na parofita bula.

Baleti iko, e sa levu cake na itabagone era sa vulica tiko me ra rawata na kila vakayalo ka ra sauma tiko ga na nodra vakatataro mai na nodra kila vakavinaka na ivunau.

Baleti iko, na lewe ni vuli vakai Vatuivakadei ena koronivuli ni Lotu raraba kei na inisitute e sa kauta tiko mai vakavoleka na gonevuli vei Jisu Karisito, na Vatuivakadei Cecere duadua.

Tokaruataki tale, keitou vakavinavinakataki kemuni kei na vakarau ni nomuni veiqaravi. Na vanua cava ga o tiko kina kei na ituvaki cava ga, vinaka vakalevu na nomuni soqoni vata mai na yakavi oqo ena yalo kei na vakasama e tadola—ke mani dua, rua se levu sara ena Yacana.²

Dua na gauna, ni oti mai e dua na ilesilesi balavu, ni keitou a mai ro tiko ena rara ni waqavuka e Salt Lake, ena yalo e nanamaki, e kaya o Peresitedi Boyd K. Packer “Gerrit, o Donna, na watiqu, e sa vakabutara tiko oqo na madrai ena ovani. Na madrai ena buta katakata sara tu ga niu yaco yani i vale.”

E rawa beka ni o vakasamataka se nanuma na madrai kana vinaka? E rawa beka ni o boica— sa qai buta saraga ka katakata tu? E rawa beka ni o tovolea—e kamica beka vakalailai, se via tuituiwina?

Na madrai e kakana kilai raraba. Na tamata kece ga ena ituvaki se yabaki ni bula cava ga e sa kania oti na madrai. E dina sara, e noda ilawalawa e vuravura raraba, na keda madrai e duidui tu na kena levu, kena ibulibuli, kena levu, kei na yaya e vakayagataki kina, ka rawa ni duidui tale ga na yaca.

Baleta beka ni tamata kece ga e veivanua e kila ka vakararavi ena madrai, e a cauraka kina na noda iVakabula: “Koi au na madrai ni bula.”³

Ena vuravura oqo, ena wa votovotoa kei na soni, eda kania na madrai mai na buno ni yadreda, me vakai Atama kei Ivi. Na galala ni digidigi e yaco mai e digidigi dina. Na tubu vakayalo e yaco mai ena veivakatovolei dina. Ia na noda iVakabula e sega ni vakalaivi keda me da raica tiko ga na kau kei na vatu, na malumalumu kei na vakadrukai ni vuravura. E vakalougatataki keda na noda iVakabula ena mana kei na madrai, Na Nona iyalayala vakasakaramede meda rawata na bula, nuinui, reki, ka rawata vakalevu sara. ⁴

E a cauraka na noda Turaga:

“Koi Au na Turaga, au sa tevuka yani na lomalagi, ka bulia na vuravura, ena cakacaka ni ligaqu; kei na veika kecega sa tu kina e noqu.

“Ka sa noqu inaki meu vakarautaka me yaga vei ira na noqu yalododonu. …

“Ni sa sinai tu ko vuravura, ka sa veirauti na veika e tu ka na vo tale.”⁵

Dua tale na kenai tukutukuni, Nona vuravura e sega ni vuravura ni kau kei na vatu. Nona vuravura e vuravura ni madrai kei na ika.

O nanuma tiko na nona a vakania na lewe vuqa o Jisu ena vica ga na ibuli madrai kei na ika? Daru vakananuma mada me vaka ga daru a tu e kea.

VIDIO

Jisu: “Raici ira na lewe vuqa.”

Tisaipeli 1: “Oqo na vanua lala, a sa kala na siga; mo vakatalai ira yani na le vuqa, me ra lako kina vei koro lalai, me ra volia kina na kedra.”

Jisu: “Mo dou solia mada e dua na kedra.”

Tisaipeli 2: “Me keitou laki volia beka na madrai, e na pene e rua na drau, ka solia vei ira me ra kania?”

Jisu: “E vica na i buli madrai sa tu vei kemudou?”

Tisaipeli 1: “E lima, ka rua na ika.”

Jisu: “Kauti ira mai. Me ra tiko sobu me vakayalimasagavulu, me ra vakani. … iTamaqu, Kalou ni lomalagi kei vuravura, vinaka vakalevu na nomuni sautu. Emeni.” ⁶

[OTI NA VIDIO]

E va na itukutuku ena Veiyalayalati Vou⁷ e vakamacalataka na nona vakani ira na le vuqa e 5,000 na tamata na noda iVakabula. E rua tale na itukutuku ena Veiyalayalati Vou e vakamacalataka, ⁸ ena dua tale na gauna, na nona vakania na le vuqa e 4,000 na tamata. O ira na lewe vuqa era wili kina na tagane, yalewa kei na gone. ⁹

E so na gauna eda nanuma na Kalou e sa rui kawaitaka vakalevu na vakamatailalaitaki ni ka. Dua na gauna lekaleka sa oti au a cokotavata na vakamatailalai ni ivolanikalou ena nona vakani ira na le 5,000 na Kalou mai na kosipeli i Maciu, Marika, Luke kei Joni ka wili tale ga kina na idusidusi vakai Volatabu, ena dua ga na italanoa matata vakaivolanikalou.

Yalovinaka sureta na Yalo Tabu me dolava na nomu kila deivaki ena noda vulica na itukutuku vakaivolanikalou kei na ivakavuvuli e kune ena nona ivakaraitaki na noda iVakabula?

Sa noda masu ni na vakavinavinakataki vakalevucake na nona ivakavuvuli na iVakabula ka na toroi keda, noda vuvale, kei ira na noda gonevuli vakavoleka Vua.

Oqo na tikini volanikalou cokotivata:

“A ra sa soqoni vata vei Jisu ko ira nai apositolo, ka tukuna vua na ka kecega, a ka era sa cakava, kei na ka talega era sa vakavuvulitaka.

“A sa kaya vei ira ko koya, Dou lako mai ka vakatikitiki kina dua na vanua lala,[e tu tani mai, ka vagagalu], ka mo dou vakacegu mada vakalailai: ni ra sa lewe vuqa era lako mai ka lako yani, a ra sa sega kina ni lalaga me ra kana. …

“Ia ko ira na lewe vuqa era sa raica ni ra sa lako yani, a ra sa lewe vuqa sa kilai ira, a ra sa cici e vanua mai na veikoro kece, ka siviti ira.

“A sa lako mai ko Jisu, ka raici ira era sa lewe vuqa sara, a sa lomani ira, ni ra sa vaka na sipi sa sega na nodrai vakatawa.”¹⁰

“A sa vakacegui ira ko koya, a sa vosataka vei ira na ka ni matanitu ni Kalou, a sa vakabulai ira era sa sega ni bula vinaka.”¹¹

“Ia ni sa yakavi mai, sa lako mai vei koya ko ira na nona tisaipeli, ka kaya, Oqo na vanua lala, a sa kala na siga; mo vakatalai ira yani na le vuqa,”¹² “me ra lako ki na veiyasana kei na veikoro lalai, sa vakavolivoliti keda, me ra volia na kedra madrai: ni sa sega na ka vei ira me ra kania.”¹³

“A sa kaya vei ira ko Jisu, E sega ni yaga me ra lako; mo dou solia mada e dua na kedra.” ¹⁴

“A sa vosa ko koya, ka kaya vei ira, Dou solia vei ira me ra kana. Era sa qai kaya vua, Me keitou laki volia beka na madrai, e na pene e rua na drau, ka solia vei ira me ra kania?” ¹⁵

“E dua vei ira na nona tisaipeli, ko Adriu, a taci Saimoni Pita, sa kaya vei koya,

“Sa tiko eke e dua na gonetagane sa tu vua e lima nai buli madrai parile, ka rua na ika: ia ka yaga vakacava oqo vei ira na lewe vuqa vakaoqo?”¹⁶

“A sa kaya ko koya, Dou kauta mai vei au.” ¹⁷

“A sa kaya ko koya me ra tiko sobu kecega vakaivavakoso, e na co drokadroka.”¹⁸“Ia sa levu na co ena yasana koya.”¹⁹“A ra sa tiko sobu, era sa yatuni, sa yayadrau se yayalimasagavulu.”²⁰

“A qai taura ko koya na buli madrai e lima kei na ika e rua, a sa ta cake ki lomalagi, ka lotutaka, ka dovia,”²¹ “ka vakavinavinakataka,”²² “a sa solia vei ira na tisaipeli, ia ko ira na tisaipeli era sa solia vei ira na lewe vuqa.”²³ “A sa vota ko koya na ika e rua vei ira kece”²⁴ “me rauti ira kece.”²⁵

“A ra sa kana kece ga,”²⁶ “ka sa mamau kece ga.” ²⁷

“Ia ni ra sa mamau, sa kaya ko koya vei ira na nona tisaipeli, Kumuna vata na tikina lalai sa vo, me kakua ni dua na ka e yali.” ²⁸

“A ra sa tomika vata na vo ni ka sa dovi” ²⁹ “ka vakasinaita na su e tinikarua ena tikina lalai ni buli madrai parile e lima”³⁰ “kei na ika tale ga” ³¹ “sa vo vei ira sa kana.”³²

“Ia ko ira sa kana era sa lewe lima beka na udolu na tagane, ia ko ira na yalewa kei na gone era sa sega ni wili.”³³

“Ia ni sa [vakatalai ira oti], sa lako ko koya kina ulunivanua me masu.”³⁴

“Ia ko ira na tamata, ni ra sa raica na cakacaka-mana sa kitaka ko Jisu, era sa kaya, Sai koya dina oqo na parofita ko ya e dodonu me lako mai ki vuravura.” ³⁵

Na cava o raica, vakila, ka vulica ena nona vakani keda yadua o Jisu Karisito, kei keda kece, ena lima na ibuli kei na rua na ika? E a vakabeka na mana na madrai, kamica vaka na korieda kei na hani?³⁶ E a vakani keda beka vakacava na rua na ika lalai—vakamamautaki keda—kece?

Oqo e ciwa na ka au raica ka vakila. Ena rawa beka ni vukei keda me da kila vinaka cake na noda iVakabula, toro voleka Vua, ka sureti keda me da vakataki Koya vakalevu cake.

Ulutaga 1: E dau cakacaka ena yalololoma na noda iVakabula.

E levu na nona cakamana na noda iVakabula e tekivu mai na noda kilai Koya vakavinaka kei na yalololoma. E kila vinaka o Koya na lomada kei na noda ituvaki. E vakasinaiti tu o Koya ena loloma kei na nuinui kei na noda mavoa, kei na noda gagadre.

E sa bau dua na gauna mosimosi. E sa mai vakamatei o Joni na Dauveipapitaisotaki, ka kau mai na uluna ena dua na peleti siliva, na iyalayala ni veivosoti ni tui vua na yalewa kei tinana e vakacudrui tu. Eratou sa gole na tisaipeli kei noda iVakabula vakatikitiki me ratou lai vakacegu. Ia na cava e a qai cakava na noda iVakabula ni sa raici ira na tamata ni ra levu yani? “a sa lomani ira,” ko Koya³⁷ E ciqomi ira. E vakavulici ira. E vakabulai ira. Ia, ena sala e cakacakataki rawa, e kila o Koya “ni sa sega na ka vei ira me ra kania.” ³⁸

Ena Nona cakacaka vakalotu na iVakabula ena yalololoma—yalololoma vua na vukavuka, ³⁹ yalololoma vua na turaga sa curumi yalovelavela na luvena, ⁴⁰ yalololoma vua na yada sa mate na luvena e dua ga. ⁴¹ E vakatavulici keda na noda iVakabula meda vakataka na kai Samaria dau yalololoma vua na turaga sa mavoa tu ka biu me sa mate. ⁴²

E vakakina, na tama ni gone cidroi ena yalololoma e a cici yani vei luvena “ni se yawa sara.” ⁴³Vaka vakasama, ni sa vakilai yalona mai na gone cidroi, ni tukuni tiko na madrai, sa qai kilai yalona ka “Sa le vuqa na tamata nei tamaqu…sa mamau ena madrai ka vo tu yani.” ⁴⁴

E tekivu na noda iVakabula ena yalololoma; ka vakacavara o Koya ena loloma matau.

Na itukutuku ena kosipeli e tukuna ni sa vakani ira oti na le vuqa o Jisu, e sa “vakatalai ira” ko Koya.” Ia, ena ivakamacala ena Marika e vakamatatataki kina. E sega ni “vakatalai ira”, e tukuni ni a “veitalatala kei ira.”⁴⁵ E rawa beka ni o vakasamataki Jisu ni sa veitalatala kei ira na tamata ni ra sa gole yani ena gauna e sa vakani ira oti kina o Koya?

Ulutaga 2: E a tekivu na noda iVakabula ena veika e tiko vei ira.

Ena nona a via vakani ira na lewe vuqa, e a tekivu na noda iVakabula ena nona tarogi ira na Nona tisaipeli na veika e sa tiko rawa. O Koya na Dauveibuli ni vuravura, Turaga ni lomalagi kei vuravura, Ia, e tekivu o Koya ena veika e tiko vei ira, mai na vanua era tiko kina.

“Sa tiko eke e dua na gonetagane sa tu vua e lima nai buli madrai parile, ka rua na ika.” ⁴⁶

E tekivu na noda iVakabula ena veika e sa tiko rawa vei ira: “Dou kauta mai vei au.” ⁴⁷

O dau raici iko beka, kei na veika se o ira mo na vakavulici ira, ka qai vakasamataka ena rawa vakacava me na veirauti na ka e tiko vei iko? De vakai iratou beka na tisaipeli, eda raica na vica wale ga na ibuli madrai kei na ika lalai ka qai kaya, “Ia ka yaga vakacava oqo vei ira na lewe vuqa vakaoqo?” ⁴⁸

Me vaka niu qasenivuli, keitou sureti kemuni yadudua na gonevuli mo ni vakaitavi ena kalasi. E so na gonevuli ena levu cake na ka e solia, eso e lailai sara. Me vaka ni da vuli tiko ka qasenivuli (eda qarava ruarua tiko), eda tekivu ena veika sa tiko vei keda, ena ituvaki eda tiko kina oqo. Ena qai vakalevu taka cake na noda sasaga o Koya. Na ivakavuvuli ni tubu mai na vanua o tiko kina e vakaraitaka e dua na dina ena iVola i Momani ni da vakabulai ena loloma, “ni sa oti sara na veika kece eda rawa ni cakava.” ⁴⁹

E marau o koya ni da kauta mai na veika e tiko vei keda kei na noda ituvaki eda tiko kina ka lako yani Vua.

Ulutaga 3:E cakacaka yani na iVakabula ena sala e tuvai vakamatau.

O sa bau oka tu ena dua na ilala levu ka sasagataka vata tiko e dua na ka? Au sa sotava oti. O ira na tiko iliu era sega ni kawaitaki ira na tiko e muri. Au a leqataka ke dua e a lutu, ke a buturaki saraga.

Ni vakatautauvatataki, na noda iVakabula e “a kaya ko koya me ra tiko sobu kece ga vakaivavakoso.” ⁵⁰ Era tuvai tu vakamatau na ivavakoso oqo “era sa yatuni, yayadrau, ka … limasagavulu.” ⁵¹

Ena lotu eda kila tu na nodra kabani na painia. Eda veitalanoataka na iwasewase vakaoqo ena noda sokalou e valetabu. Vei keda, na vosa oqo na kabani e vakaibalebale kina dua na ilawalawa e wasea vata e dua na inaki cecere.

E dina, ni vakatokai me dua na vanua vakatikitiki, e a sega ni vakaroti ira na Turaga me ra dabe na le vuqa ena qele. E a vakarota o Koya me dabe “ena co drokadroka.” ⁵² E digitaka o koya na vanua “sa levu na co ena vanua ko ya.”⁵³

Ulutaga 4:E vakavinavinaka na noda iVakabula.

E sa taura na ibuli madrai kei na ika, “ka tacake ki lomalagi, ka lotutaka, ka dovia. ⁵⁴

Na Dauniveibuli ni lomalagi kei vuravura, na Tui ni tui vakai Koya e vakavinavinaka ni bera ni veisoliyaka yani na madrai kei na ika ka vakalevutaka vei ira kece, “me rauti ira”.⁵⁵

Ulutaga 5: E vakani ira na tisaipeli na noda iVakabula ka qai tukuna vei ira me vakani ira na lewevuqa.

Oqori na tuvaki matau, ia e levu cake mai na ituvaki matau. Oqori na nodra vakaukauwataki na ivakatawa ni sipi me rawa ni vakaukauwataki na sipi. Sai koya na nodra vakavulici na qasenivuli me rawa ni vakavulici ira na gonevuli o qasenivuli. E sa dua na ituvatuva vakalou ena iVolatabu, ena Vola i Momani, kei na Nona Lotu vakalesuimai: “a sa solia vei ira na tisaipeli, ko ira na tisaipeli era sa solia vei ira na lewe vuqa.” ⁵⁶

Sai koya na isolisoli levu vakayalo ni solia kei na ciqoma. Ni da vulica ka kila ni da na veivakavulici ena vukei keda. Ena veivakavulici me ra vuli, eda vulica na veivakavulici. Na noda ivakaraitaki ni vakavulica kei na vakatavulica ena vukei ira na noda gonevuli me ra kila na sala me ra kila na vulica kei na veivakatavulici.

Ulutaga 6: E vakania na noda iVakabula na 5,000 kei na dua ena gauna vata ga.

Ena sala e veivakurabuitaki, e a dovi ka vakalevutaki na ibuli madrai kei na ika vua na tamata yadua ena levuqa: “A ra sa kana kece ga,” ⁵⁷ “a ra sa mamau.” ⁵⁸

Oqo e dua na cakamana eda vakasaqara na qasenivuli—me vakavulici ira kece na kalasi kei ira na tamata yadua ena kalasi. Oqo ena vinakati kina me na qaravi na 5,000 kei na dua. Ena sureta tiko na kena raici na leqa kece e tiko kei na gagadre yadudua. Ka, uasivi mai na tautauvata ni ka, e sureta na cakamana vakayalo ka na veirauti ena gauna e tekivutaki kina.

Ulutaga 7: E qarauna na noda iVakabula me kua ni dua na ka e yali.

“Ia ni ra sa mamau, sa kaya ko koya vei ira na nona tisaipeli, Kumuna vata na tikina lalai sa vo, me kakua ni yali e dua na ka.” ⁵⁹

E tiki ni noda tekivu me da vakavinavinakataka na ka e tiko vei keda sa ikoya na noda qarauna me kua ni dua na ka e yali ena gauna eda sa oti kina. Na bula vakaituvatuva e lomalagi e sega ni dau vakasabusabutaki. Na veika kece e kau mai ena ivakatekivu, ena sega ni dua na ka e biu tu me na yali ni sa mai cava.

E wasea o Elder Richard G. Scott na sala eda rawa ni volaitukutukutaka na veika eda vakila ka vulica kevaka e levu tale me na yaco mai. ⁶⁰ Na ituvatuva talevi wasoma oqo ni kerekere, ciqoma, volaitukutukutaki, vakasamataka vakabibi, talairawarawa, ka kerea tale, e vakaraitaka na noda iVakabula “ena soli talega vakalevu vei kemudou.” ⁶¹

E levu tale tiko. Ena nona vakamacalataki Koya ni madrai ni bula, e kaya na noda iVakabula: “Ia sai koya oqo na loma i Koya sa talai au mai, meu kakua ni vakayalia e dua vei ira sa solia mai vei au ko koya.” ⁶² E maroroi ira e sa solia vei Koya o Tamana, me kakua ni dua e yali. Me vaka ni da qasenivuli, daukaulotu, tamata cakacaka, eda na vakayacora na veika kece ena noda vakabauta kei na kaukauwa me da maroroi ira era sa nuitaki tu vei keda me da karoni ira, me kakua ni dua e yali.

Ulutaga 8: Vua na noda iVakabula, ena levu cake na ka eda na rawata mai na veika eda a tekivu vata mai ni sa mai cava.

Ni ra vakavinavinaka tiko ni sega ni dua na ka e yali, e ratou raica tale na tisaipeli e dua na cakamana: “A ra sa tomika vata na vo ni ka sa dovi” ⁶³ “a sa tinikarua nai su sa sinai kina” ⁶⁴ “kei na ika tale ga” ⁶⁵ “sa vo vei ira sa kana.” ⁶⁶

Na cakamana ni vakalevutaki cake na bula vakayalo, vua na noda iVakabula, me levucake ena gauna sa cava kina mai na gauna eda tekivu kina. Me da na cava ena loloma, vuli, veivakauqeti, kei na loma vinaka e levu cake mai na gauna eda tekivu kina. Na veivakavulici e tawani vakayalo ena lesu mai vaka na madrai kei na wai—vaka na ibuli madrai kei na ika, e levucake mai na gauna e da tekivu kina.

Me da vakasokumuna mada na noda veitalanoa me yacova mai oqo:

Na noda iVakabula e kila tu na lomada kei na noda ituvaki. E dau yavalati Koya na loloma me vakalougatataki ka vakasinaiti keda ena veisala kece.

E tekivu o Koya ena vanua eda tiko kina, kei na ka e tiko vei keda, me vaka ga ni a ciqoma na vica na ibuli kei na ika mai vua e dua na cauravou.

Ka tomana yani ena ituvatuva sa tuvai vakamatau.

E dau vakavinavinaka o Koya. E rai yani o Koya ki lomalagi ni se bera ni masulaka ka dovia.

E wasea iliu kei ira nona tisaipeli, ka kerei ira me ra solia yani vei ira na tamata.

E kila o Koya me karoni ira ka vakatavulici ira na 5,000 vakakina na dua ena gauna vata ga.

E kumuna vata tale e na vakavinavinaka o Koya, me kua ni dua na ka e yali.

E vukei keda o Koya me da kila vinaka ni sa mai levucake na ka ena mai cava kina mai na kena eda tekivu kina.

E levu dina tu. Nodra vakani na lewevuqa e sega ni matai ka sega talega ni otioti ni gauna e vakayagataka kina na iVakabula na madrai kei na ika me vakatavulica se vakadinata na Nona sautu.

Ia na ika ciwa ka iotioti ni ulutaga:

Ulutaga 9: Ena mata sa raica kei na daliga sa rogoca, e vakatavulica ka vakadinata na noda iVakabula na sautu vakasakaramede.

“Ia ko ira na tamata, ni ra sa raica na cakacakamana sa kitaka ko Jisu, era sa kaya, Sai koya dina oqo na parofita ko ya e dodonu me lako mai ki vuravura.” ⁶⁷

E muri, ni a vakaibalebaletaka tiko na madrai kei na ika, e a tarogi iratou nona tisaipeli na iVakabula:

“Dou sa sega beka ni nanuma?

“Niu sa dovia nai buli madrai e lima vei ira na lewe lima na udolu, e vica nai su dou a vakatawana e na kena vo? A ra sa kaya, e tinikarua.

“Ia ni sa vitu vei ira na lewe va na udolu, e vica na sova dou a vakatawa e na kena vo? A ra sa kaya, e vitu.” ⁶⁸

Me tokarua taka tale: Nona vuravura e vuravura ni madrai kei na ika, e vutuniyau kina.

Kivua na marama ena mata ni wai, ni vakaibalebale ena vanua mamaca, e vakaraitaka na noda iVakabula ni sai Koya na wai ni bula. “Ko koya sa gunuva na wai au sa solia vua, ena sega sara ni viagunu ka tawamudu: ia na wai kau na solia vua, ena tu e na lomana me mata ni wai sa tovure kina bula tawamudu.” ⁶⁹

Vei ira era tarogi Jisu, “A noda qase era kania na mana ena veikau, solia vei keimami na madrai mai lomalagi?” ⁷⁰ E sauma o Jisu, “Ko Tamaqu ga sa solia na madrai dina mai lomalagi.” ⁷¹ “Koi au na madrai ni bula.” ⁷² “O koya sa vakabauti au sa rawata na bula tawamudu.” ⁷³

E sega tale ni dua na ka e rawarawa, se bibi, se rabai levu cake mai na madrai kei na wai. Na cava eda ciqoma ni rau lako vata mai na madrai ni bula kei na wai bula? E dina, eda ciqoma na sakaramede.

Ena icavacava ni Nona cakacaka vaka lotu, ena ivakarau eratou sa raica oti na nona tisaipeli, na noda iVakabula “sa taura na madrai, ka vakavinavinakataka, ka dovia, ka solia vei ira, ka kaya … mo dou vakananumi au kina.” ⁷⁴

Ena itekivu ni nona cakacaka vakalotu ena Nona tucake tale, a vakaraitaka tale o koya e dua na ivakarau vata ga oqo, e a vakayacora na sakaramede na noda iVakabula vei ira na Nifai, ira na Nona sipi tale eso:

Ia ni ratou sa kauta mai na tisaipeli na madrai kei na waini.

Sa vakaroti ira na lewevuqa me ra dabe sobu ki na qele.

Sa taura na madrai ko Koya ka dovia ka vakalougatataka.

Ka solia vei iratou na tisaipeli ka vakarota me ratou kania.

Ia ni ratou sa kana oti ka vakamamautaki, sa vakarota me ratou solia tale ga vei ira na lewe vuqa.

Era kana na lewe vuqa ka mamau. ⁷⁵

E muri, e a vakayacora tale na sakaramede na noda Turaga, vei ira na Nifai, ena gauna oqo e vakarautaka na madrai kei na waini ena cakamana:

“E a sega na madrai se waini… ;

“Ia e a solia vakaidina vei ira ko koya na madrai me ra kania kei na waini me ra gunuva.” ⁷⁶

E a yalataka o Koya ni o ira era kania na madrai kei na waini ena vuni yalodra “ena sega ni viakana se viagunu na yalona, ia ena vakasinaiti.” ⁷⁷

Sa dina sara, “ni ra sa kana ka gunu kece na lewevuqa, era sa vakasinaiti ena Yalotabu.” ⁷⁸

Oqo na vakavotukana ni yalayala cecere ni sakaramede vei ira na tagane kei na yalewa ena veiyabaki kece sara, veituvaki, kei keda kece e vakararavi tu na noda bula kina madrai kei na wai “Sa kalougata ko ira kece sa via kania ka via gunuva na ivalavala dodonu, ni ra na vakasinaiti ena Yalo Tabu.” ⁷⁹

Kemuni na taciqu kei na ganequ, vinaka vakalevu ni o qasenivuli ka gonevuli totoka ena vuravura e waloloi tu ka karamaca tu ena veika vakayalo! Vinaka vakalevu na nomuni dau vakayacora tiko na veilesoni, kei na veimaliwai kece kei ira na gonevuli, me vaka e dua na kana magiti ni ibuli madrai kei na ika!

Kemuni na taciqu kei na ganequ, au sa vakila e dua na tovure ni wai ni bula e sa drodro yauyau e lomaqu ka sa vakasinaiti ena noqu lomana na noqu iVakabula.

Ena dua ga na gauna sa oti, ni a donumaki au na madigi meu veiwaseyaka yani na madrai kei na wai, au vakila na loloma levu ni noda iVakabula vei ira era ciqoma tiko na ivakatakarakara tabu. Au vakila talega na vakavinavinaka cecere vua na noda iVakabula ni a vakayacora na cakacaka vakalotu ni sakaramede.

Ena so na gauna, ni vakasamataka (oka tale ga ena Siganivakacecegu), au vakila na veivakadonui nui sa cakava tiko na veika kece au sa rawata ena gauna oqo. Ena levu na gauna, au vakila na inuinui kei na veivakayaloqaqataki nui rawa ni “lako mai vei Karisito, ka mo dou vakataucokotaki vua, ⁸⁰ e dina ga ni tu noqu malumalumu.

Au nuitaka ni o sa na raica ena dua tale na sala vou na madrai kei na ika, na madrai kei na wai. ⁸¹

Au nuitaka ni o kunea na veika e talei, vakavure vakasama, ka veivakauqeti ena kena veicurumaki na itukutuku vakaivolanikalou, ivakavuvuli ni kosipeli, kei na nodra vosa na parofita bula kei na iapositolo ena nomu vakayacora na veika o nuitaki tiko kina ena nodra vukei na gonevuli me ra kila vakavinaka na noda iVakabula, ka lako yani ena vakarokoroko ki Vua.

Au nuitaka ni o na nanuma tiko ni sa “nona vuravura na Turaga kei na veika kece e sa tiko kina.” ⁸² E Nona na vuravura ni ika kei na madrai. E sa Nona iyalayala vakasakaramede ni sa levu tu ka na vo tale.

Au vakadinadinataka na Kalou ena vakavinavinaka, na Tamada Tawamudu; Na Luvena Tabu, noda iVakabula, o Jisu Karisito; kei na Yalo Tabu. Au vakadinadinataka ena vakavinavinaka me baleta na dina vakalesui mai kei na lewa ni matabete e veitaravi sobu mai ka sega ni gutuvi rawa vua na Parofita o Josefa vei Peresitedi Thomas S. Monson sa Peresitedi tu nikua, na ivolanikalou tabu, kei na vakacegu, veidusimaki, kei na reki eda na ciqoma ni tiko kei keda na Nona Yalotabu ni da vakananumi Koya e veigauna kece.

Na vanua cava beka ga o tu kina, ena ituvaki cava ga, na veika o sotava tiko, na nomu reki kei na dredre, au nuitaka ni o sa vakila ena noda yakavi vata oqo na levu ni nona lomani iko na Turaga kei na nona Lotu. E lomani iko o Koya. Au kila ni keimami lomani kemuni. Ena yacana tabu ka rokovi na noda Turaga ka iVakabula o Jisu Karisito, Emeni.

© 2017 mai na Intellectual Reserve, Inc. Dodonu kece e taqomaki. Vakadonui me Vakavalagi: 12/16. Vakadonui me Vakadewataki: 12/16. iVakadewa ni “And Jesus Said unto Them: I Am the Bread of Life.” Fijian. PD60003279 858