Kenadau Vakaivunau kei na Vuli Titobu
Dua na Yakavi Vata kei Elder Gerrit W. Gong
Vosa vei ira na Qasenivuli Vakalotu ena VVL • 17 ni Feperueri , 2017 • Valecavu e Salt Lake
Kemuni na taciqu kei na ganequ lomani, au marautaka na gauna vinaka oqo meu mai maliwai kemuni kina ena yakavi nikua. Niu bera ni vakaveikilaitaki Elder Gong, au gadreva meu wasea mada e dua na vakasama au nuitaka ni na vukei kemuni kei ira na nomuni gonevuli.
Meu vakaraitaka taumada niu lomani kemuni kau vakavinavinakataka na veika ko ni sa cakava tiko. Ko ni sa cakava tiko e dua na cakacaka cecere ena matanitu ni Kalou vakakina ki na nodra bula na nomuni gonevuli. Au lomani kemuni, kau sa masuta me nomuni kei na nomuni matavuvale na veivakalougatataki totoka duadua ni Turaga.
Au gadreva meu vosa mada ena bogi nikua baleta na Kenadau Vakaivunau. Na ka au na tukuna ena vakatabakidua tiko kivei kemuni ko ni vakavulica tiko na semineri, ia sa baleti keda taucoko sara vakaidina.
Na Kenadau Vakaivunau e dua na parokaramu ni semineri ka tolu na kena inaki: imatai, me vukei ira na noda gonevuli me ra vulica na sala me ra rawata kina na kila-ka vakayalo; ikarua, me vukei ira na gonevuli me ra kila ka kila vinaka na ivunau ni iVakabula—sa kena ibalebale o ya me ra kila na vunau dina ena nodra vakasama ka ciqoma na vunau dina e yalodra, ka da vinakata me sa titobu sara e yalodra; ka kena ikatolu, me vukei ira na gonevuli me ra vulica na sala me ra taurivaka na vunau ena nodra bula, o ya me ra bulataka sara ga ka vakayagataka me isaunitaro era na rawa ni taroga na nodra itokani se vakavulica se vukei ira na tamata me ra kila na dina.
A vakatakilaitaki na Kenadau Vakaivunau e vuravura raraba ena vula itubutubu sa oti. Au gadreva mo ni kila ka vakila e yalomuni ni yaco mai oqo ena ivakatakila ni Turaga; oqo e dua na caka mana. Au sa dau vakananuma vakawasoma na sala a yaco mai kina, na gauna a yaco mai kina, kei na vuna a yaco mai kina. Au sa mai raica oqo na Kenadau Vakaivunau ena kena vakarabailevutaki ena veika ni vuli ena Lotu kei na cakacaka cecere ni Turaga ena vuravura.
Au vakadinata ni Kenadau Vakaivunau ena vukei ira na noda gonevuli mera tubu ena kila-ka ka kila vinaka na vunau ka vukei ira mera vulica na sala mera vakayagataka kina na kila kei na kila vinaka o ya ki na nodra bula. Ia e levu cake tale na ka e cakava. E vakavulica talega vei ira na noda gonevuli na sala ni Turaga mera vulica vakatitobu na mataqali kila-ka cava ga kei na gauna cava ga ni nodra bula.
Ena titobu na vuli ena gauna e vakalevutaka kina na noda kaukauwa meda cakava e tolu na ka: (1) meda kila ka kila vinaka; (2) me mana na noda cakacaka ka dodonu; kei na (3) ka meda na vakataka vakalevu cake na Tamada Vakalomalagi kei na Luvena, o Jisu Karisito.1
Mena vakayacori ga na vuli vakatitobu ena sala ni Turaga, ena kaukauwa ni Yalo Tabu vata kei na vuli ka veivakavulici vakaikeda vagumatua e veigauna, ena veitokani ni loloma soliwale i Jisu Karisito. Oqo e ka dina ki na mataqali kila-ka cava ga kei na gauna cava ga ni bula oqo.
Oqo sara ga na ka eda vakavulici ira kina na noda gonevuli ena Kenadau Vakaivunau (kau nuitaka, ena veika kecega eda vakavulica). O koya gona, sa mai yaco kina na Kenadau Vakaivunau, me sala veivakarautaki, ni vuli titobu, ena bula taucoko.
Au vinakata meu tinia na noqu vosa ena rua na veisureti. Na imatai kivei kemuni o ni vakavulica tiko na semineri. Kemuni na taciqu kei na ganequ lomani e vuravura raraba, au nuitaka ni o vukei ira na nomuni gonevuli mera raica ni ko ni sa vakavulici ira tiko ena ivakarau mera vuli kina ena sala ni Turaga. Vakavulici ira ni sa gadrevi mera vulica vakatitobu na kila-ka vakayalo vakayago ena nodra bula taucoko. Vukei ira mera raica ni taurivola mai na semineri e sega ni kena icavacava. Eda gadreva mera taurivola mai na inisitute, ka da vinakata mera tosoya yani nodra vuli ni oti na vuli torocake. O ni sa vukei ira tiko mera cakava na ka e rua o ya ka mera vakadavora e dua na yavu ni vuli e titobu, ni bula taucoko ena nomuni vakavulici ira ena ivakarau mera vuli ena sala ni Turaga.
Na ikarua ni noqu veisureti o ya kivei kemuni o ni vakavulica tiko na inisitute. Kemuni na taciqu kei na ganequ lomani, yalovinaka ni vukei ira na nomuni gonevuli mera vuli ena sala ni Turaga. Yalovinaka vukei ira mera raica na yaga kei na kaukauwa ki na nodra bula ni ra taurivola mai na inisitute. Na taurivola mai na inisitute ena vaqaqacotaka nodra kila-ka vakosipeli kei na nodra yalodina vua na Turaga, ka vukei ira me ra kilai Jisu Karisito ka lomana.
Au kila kevaka mo ni cakava na veisureti oqo, ena vakalougatataki kemuni kei na nomuni gonevuli na Turaga na iVakabula. Au vakadinadinataka ni bula tiko na Tamada Vakalomalagi ka sa lomani keda. Sa noda iVakabula ka Dauveivueti na Luvena, o Jisu Karisito. Au kila ni bula tiko o Koya. Au kila ena Vukuna vakakina mai Vua, eda na rawa taucoko ni vuli vakatitobu ena noda bula taucoko, ni sai Koya ga na Sala, na Dina, kei na Vu-ni-Bula. Ena yaca tabu i Jisu Karisito, emeni.
© 2017 mai na Intellectual Reserve, Inc. Dodonu kece e taqomaki. Vakadonui me Vakavalagi: 12/16. Vakadonui me Vakadewa: 12/16. iVakadewa ni “Doctrinal Mastery and Deep Learning.” Fijian. PD60003279 858