Te tāmaura’a ha’api’ira’a tumu ’e te ha’api’i-hōhonu-ra’a
Hō’ē ’āru’i ’e Elder Gerrit W. Gong
A’ora’a i te feiā ha’api’i nō te FHE • 17 nō fepuare 2017 • Fare menemene nō Roto Miti
E au mau taea’e, e au mau tuahine, ’oa’oa rahi tō’u i te ti’ara’a i rotopū ia ’outou i teie pō. Hou vau ’a paraparau ai nō Elder Gong, e mau mana’o tā’u i hina’aro e fa’a’ite ia ’outou, ’ia riro te reira i te tauturu ia ’outou ’e tā ’outou mau pīahi.
Nā mua roa, fāri’i mai i te tāpa’o nō te here ’e te māuruuru nō te mea tā ’outou e rave nei. E ’ohipa fa’ahiahia tā ’outou e rave nei i roto i te bāsileia o te Atua ’e i roto i te orara’a o tā ’outou mau pīahi. ’Ua here au ia ’outou ’e tē pure nei au ’ia vai te mau ha’amaita’ira’a ta’a ’ē roa a te Fatu i ni’a ia ’outou ’e tō ’outou ’utuāfare.
E paraparau ri’i au nō te Tāmaura’a ha’api’ira’a tumu. E tano ta’a ’ē te reira ia ’outou e ha’api’i nei i te Séminaire, e mea faufa’a ato’a rā nō tātou pā’āto’a.
Te tāmaura’a ha’api’ira’a tumu, e fa’anahora’a ïa nō te Séminaire ’e e toru fā nō te reira : ’a tahi, tauturu i tā tātou pīahi ’ia ha’api’i nāhea e ’apo mai i te ’ite pae vārua ; te piti, tauturu ia rātou ’ia ’ite i te ha’api’ira’a tumu a te Fa’aora ’e ’ia māramarama i te reira—te aura’a ra, ’ia ’ite rātou i te ha’api’ira’a tumu mau i tō rātou ferurira’a ’e ’ia māramarama ho’i i tō rātou ra ’ā’au, ’ia hōhonu roa ho’i ; ’e te toru, tauturu i te pīahi ’ia ha’api’i i te fa’a’ohipara’a i te ha’api’ira’a tumu i roto i tō rātou orara’a, ’ia ora i te reira ’e ’ia fa’a’ohipa ato’a ho’i nō te pāhono i te mau uira’a a tō rātou mau hoa, ’e nō te ha’api’i ’e nō te tauturu i te tahi mau pu’era’a ’ia ’ite i te parau mau.
’Ua pūharahia te reira i te tau ha’apohera’a rā’au i ma’iri, nā te ao ato’a nei. Tē hina’aro nei au ’ia ’ite ’outou ’e ’ia putapū ho’i tō ’outou ’ā’au i te mea ē, ’ua tae mai te reira nā roto i te heheura’a, nō ’ō mai i te Fatu ; e semeio te reira. ’Ua māna’ona’o pinepine au i te huru te reira i tae mai, te taime ’e te tumu i tae mai ai. ’Ua tae roa iā’u ’ia hi’o i te reira i roto i te fa’anahora’a ha’api’ira’a o te ’Ēkālesia ’e i roto i te ’ohipa rahi a te Fatu i ni’a i te fenua nei.
Tē ti’aturi nei au ē, e tauturu te tāmaura’a ha’api’ira’a tumu i tā tātou pīahi ’ia fa’arahi i tō rātou ’ite ’e tō rātou māramaramara’a i te ha’api’ira’a tumu ’e ’ia ha’api’i e nāhea i te fa’a’ohipa i terā ’ite ’e terā māramarama i roto i tō rātou orara’a. Hau atu rā. E ha’api’i ato’a te reira i tā tātou pīahi i te rāve’a a te Fatu nō te ha’api’i hōhonu i te mau ’ite ato’a ’e i te mau taime ato’a i roto i tō rātou orara’a.
E mea hōhonu tā tātou ha’api’ira’a ’ia rahi tō tātou pūai nō te rave e toru mea : (1) ’ite ’e māramarama ; (2) ’ohipa tano ’e ma te parau ti’a ; (3) ’e riro rahi atu ā mai tō tātou Metua i te Ao ra ’e tāna Tamaiti ’o Iesu Mesia.1
E mea tītauhia ’ia ravehia te ha’api’ira’a hōhonu nā roto i te rāve’a a te Fatu, nā roto i te Vārua Maita’i ’e nā roto i te tuatāpapara’a itoito ’e te tāmau ’e te ha’api’ira’a te tahi i te tahi, ’āpe’ehia mai e te maita’i rahi o Iesu Mesia. E parau mau te reira noa atu te hutu ’ite ’e noa atu te taime o te orara’a.
’O te reira mau tā tātou e ha’api’i nei i tā tātou pīahi nā roto i te tāmaura’a ha’api’ira’a tumu (’e maita’i ho’i i roto i tā tātou ato’a mau ha’api’ira’a). Nō reira, te tāmaura’a ha’api’ira’a tumu, e ’ūputa ïa nō te ha’api’ira’a hōhonu ē hope noa atu te orara’a.
’Ei ’ōpanira’a i ta’u a’ora’a, e piti anira’a tā’u. ’A tahi, ia ’outou e ha’api’i ra i te Séminaire. Tō’u mau taea’e ’e mau tuahine here nā te ao ato’a nei, maita’i ē tē ’ite ra tā ’outou pīahi ē, tē ha’api’i ra ’outou ia rātou nāhea i te ha’api’i mai te au i te rāve’a a te Fatu. Ha’api’i ia rātou ē, tītauhia ’ia ha’api’i hōhonu rātou i te ’ite pae vārua ’e te ’ite pae tino, i tō rātou orara’a tā’āto’a. Tauturu ia rātou ’ia ’ite ē, e ’ere te ha’afēti’ara’a Séminaire i te hope’a. ’Ua hina’aro tātou ’ia ha’afēti’a ia rātou i te Institut, ’e ’ia tūra’i atu ā rātou i te ha’api’ira’a i muri mai i te ha’api’ira’a tuarua (Lycée). Tō’u mau taea’e ’e mau tuahine here, ’a tauturu i tā ’outou pīahi ’ia ’ite ē, tē ha’api’i ra ’outou ia rātou nāhea i te ha’api’i mai te au i te rāve’a a te Fatu.
Te piti o te anira’a, ia ’outou ïa e ha’api’i ra i te Institut. Tō’u mau taea’e ’e mau tuahine here, ’a tauturu i tā ’outou pīahi ’ia ha’api’i mai te au i te rāve’a a te Fatu. Tauturu na ia rātou ’ia ’ite i te faufa’a ’e te mana e tae mai i roto i tō rātou orara’a nō te ha’afēti’ara’a i te Institut. ’Ua riro te ha’afēti’ara’a Institut ’ei fa’aotira’a nō te hō’ē tuatāpapara’a ’evanelia nahonaho ’e te hōhonu. E riro te ha’afēti’ara’a Institut i te ha’apa’ari i tō rātou māramarama i te ’evanelia, fa’ahōhonu i tō rātou ’itera’a pāpū ’e tā rātou fafaura’a i te Fatu, e tauturu ato’a te reira ia rātou ’ia ’ite ’e ’ia here ia Iesu Mesia.
’Ua ’ite au ē, ’ia ’ohipa ’outou mai te au i teie mau anira’a, e ha’amaita’i mai te Fatu te Fa’aora ia ’outou ’e i tā ’outou mau pīahi. Tē hōro’a atu nei au i tō’u ’itera’a pāpū ē, tē ora nei tō tātou Metua i te Ao ra ’e ’ua here ’oia ia tātou. ’Ua riro tāna Tamaiti, Iesu Mesia, ’ei Fa’aora ’e ’ei Tāra’ehara nō tātou. ’Ua ’ite au ē, tē ora nei ’oia. ’Ua ’ite au ē, i roto iāna ’e nā roto iāna tātou e nehenehe ai e ha’api’i hōhonu i te roara’a o tō tātou orara’a, inaha ’o ’oia te ’ē’a, te parau mau ’e te ora. Nā roto i te i’oa mo’a o Iesu Mesia, ’āmene.
© 2017 na Intellectual Reserve, Inc. Fatura’a paruruhia. Parau fa’ati’a nō te reo peretāne : 12/16. Parau fa’ati’a nō te ’īritira’a : 12/16. ’Īritira’a nō « Doctrinal Mastery and Deep Learning ». Tahitian. PD60003279 895