Espirituhanon nga Pagkaluwas
Ang Gahom ni Jesukristo ug sa Lunsay nga Doktrina uban ni Elder Neil L. Andersen
Dominggo, Hunyo 11, 2023
Pangbukas nga Mensahe
Mga kaigsoonan, maayong gabii. Ngadto sa atong mga magtutudlo sa relihiyon nga nagpundol sa tibuok kalibotan, tugoti ko nga unang mopahayag sa akong kinasingkasing nga pagpasalamat kon giunsa ninyo pagtudlo ug pagpangalagad sa atong mga estudyante. Sa tinuoray lang, anaa kaninyo ang mismong kaugmaon sa Simbahan diha sa inyong mga klase. Sa akong pagbiyahe ngadto sa mga seminary, institute, ug unibersidad nga mga klase sa tibuok kalibotan, ako nadasig sa paagi nga kamo nag-atiman sa mga estudyante ug sa paagi nga kamo nagtabang kanila sa pagsentro sa ilang mga kinabuhi kang Jesukristo. Sa dihang unang gitawag ni Maria Magdalena ang nabanhaw nga Manluluwas, ang titulo nga iyang gipili mao ang “Raboni.”1 Ang teksto mipahayag niini og usab isip “Magtutudlo.” Pagkahalangdon nga calling nga atong gisawhan isip mga magtutudlo, sa paggiya sa atong mga estudyante ngadto sa Bantogan nga Magtutudlo, gani si Jesukristo.
Human sa akong pasiuna nga pakigpulong, makadawat kita og tambag gikan sa usa ka Apostol ni Ginoong Jesukristo kon unsaon sa pagtudlo sa kamatuoran diha sa usa ka kahimtang nga nagkapuno sa kalibog ug pagpanglimbong. Ako dunay bag-ohay lang nga kasinatian nga nakapalambo sa akong kaugalingon nga pagsabot niini nga hagit. Na-assign ko uban ni Presidente Henry B. Eyring sa BYU–Hawaii, diin ang usa ka estudyante naghisgot sa pamahayag ni Presidente Nelson: “Sa umaabot nga mga adlaw, dili na posible ang espirituhanong pagsugakod kon wala ang giya, direksyon, [makahupay, ug kanunay] nga impluwensya sa Espiritu Santo.”2 Ang estudyante nangutana kabahin sa mga epekto o mga sangpotanan niini alang sa mga young adult. Gipasabot dayon nako kon sa unsang paagi ang Espiritu motabang kanila sa paghimo og mga desisyon—importante nga mga pagpili sa kinabuhi mahitungod kon unsa ang tun-an, kinsa ang ika-date ug minyoan, ug asa mopuyo ug motrabaho.
Apan si Presidente Eyring misunod sa pagtubag pinaagi sa pagpahayag og usab sa usa ka importante nga kinahanglanon diha sa pamahayag ni Presidente Nelson diin iyang gihulagway kon unsaon nga “espirituhanong [maka]sugakod.” Iyang gipasabot nga ang espirituhanong pagsugakod nga atong gikinahanglanan molabaw pa gayod sa yano nga mga pagpili sa kinabuhi nga akong gipaila. Iyang gipasabot kon sa unsang paagi ang atong kabatan-onan ug mga young adult magpuyo sa usa ka panahon diin ang kamatuoran maayo kaayong pagkatago sa kaaway nga kon wala ang Espiritu Santo, mahimong imposible—gani magkalisod—ang pag-ila sa kalainan tali sa maayo ug daotan, tali sa kamatuoran ug sa sayop. Ang espirituhanong pagsugakod dayon nahimong kabahin sa pag-ila sa kamatuoran.
Karong gabii, nanghinaot ko nga atong pamalandongan kon unsaon sa pagtudlo sa atong mga estudyante sa pag-ila sa kamatuoran. Nanghinaot usab ako nga atong ikonsiderar ang atong papel sa pagtudlo sa kamatuoran uban ang katin-aw ug kayano. Mahinamon ko samtang kita magkat-on gikan ni Elder Andersen, ug ako mosaksi kaninyo nga kon atong isentro ang atong pagtudlo kang Jesukristo ug motutok sa lunsay nga doktrina, kita magmugna og usa ka sundanan alang sa atong mga estudyante sa pagkakita ug pag-ila sa kamatuoran—dili lang sa atong mga klase apan sa tibuok nilang mga kinabuhi. Ako nagsulti niini sa ngalan ni Jesukristo, amen.
Pagpaila kang Elder Neil L. Andersen
Akong kahigayonan karon ang pagpaila ni Elder Neil L. Andersen. Adunay daghan kaayo nga akong ikapakigbahin mahitungod ni Elder Andersen—sa iyang nindot kaayo nga kaminyoon ug sa iyang talagsaong pamilya; sa iyang mga kalamposan sa edukasayon ug sa patigayon; sa iyang serbisyo sa Simbahan, lakip sa tawag isip mga lider sa misyon ngadto sa France Bordeaux Mission. Si Elder Andersen makasulti og French, apan siya makasulti usab og Portuguese ug Spanish. Alang sa pipila kanato karong gabhiona, maayo gani, makasulti usab siya og Iningles. Nakapuyo siya sa tibuok kalibotan ug nahibalo sa Simbahan bisan asa man kamo nagtudlo ug nagbayaw sa atong mga estudyante.
Apan kon maghunahuna ko ni Elder Andersen, adunay duha ka kinaiya nga nanghinaot kong inyong mahinumdoman samtang maminaw kamo kaniya karong gabhiona. Una, si Elder Andersen nagtan-aw, nagsunod, ug nagpanalipod sa propeta sa Dios. Akong naobserbahan kini kon sa unsang paagi human sa kinatibuk-ang komperensiya, si Elder Andersen magprinta ug magtuon sa mga pulong sa propeta ug dayon himoon kining kabahin sa iyang kaugalingon nga pagtudlo. Personal nakong nasaksihan si Elder Andersen nga mipadako sa mga pagtulon-an ni Presidente Nelson bahin sa pagkahimong usa ka tigpasiugda og kalinaw; pagkahimong matarong, mainampingong pagkaginikanan; ug pagtukod sa atong mga pundasyon diha ni Jesukristo. Ikaduha, si Elder Andersen mismo usa ka espesyal nga saksi ni Jesukristo. Gidala niya uban kaniya kini nga tawag isip usa ka sagrado nga tinugyanan. Diha sa usa ka buluhaton uban ni Elder ug Sister Andersen ngadto sa Air Force Academy sa Colorado sobra sa usa ka tuig ang milabay, nakakita ko niya nga nagtudlo ug nagpamatuod ni Jesukristo ngadto sa batan-on nga mga kadete kinsa miabot aron maminaw niya nga mamulong. Samtang giobserbahan nako siya niadtong gabhiona, mibati ko og dili matukib nga impresyon ug kompirmasyon nga ako anaa diha sa presensiya sa usa ka espesyal nga saksi ni Jesukristo.
Nanghinaot ko nga inyong makita ang oportunidad nato karon nga maminaw gikan sa usa ka Apostol sa Ginoo kinsa nagsunod sa propeta ug nagsaksi sa Manluluwas, si Jesukristo. Elder Andersen, mahinamon kami sa imong panudlo.