Ang Gahom ni Jesukristo ug sa Lunsay nga Doktrina
Ang Gahom ni Jesukristo ug sa Lunsay nga Doktrina uban ni Elder Neil L. Andersen
Dominggo, Hunyo 11, 2023
Elder Neil L. Andersen: Salamat, Elder Gilbert. Salamat, Brother Webb. Duha nako ka higala ug kauban sa trabaho. Gimahal kaayo nako sila.
Dili ba nindot kaayo ang choir? Ug ligdong kaayo! Maayo kaayo mo. Salamat kaayo!
Naghunahuna ko nianang mga pulong sa pagkanta ninyo sa ikatulong bersikulo: “Ang Dios Kahayag; Siya ang kalig-on. Sa gahom niya ko madaogon.”1 Unta, kon ato kanang mapabati sa kahiladman niadtong atong gitudloan, kana mismo makaluwas sa usa ka tawo gikan sa pilegro.
Nindot kaayo dinhi sa Tabernakulo, dili ba? Dili naman ta kanunay makaanhi dinhi. Ang uban ninyo wala pa gayod makaanhi sukad, bata pa kaayo mo. Ang uban kanato adunay handomanan niining maanindot nga karaang Tabernakulo. Pila man kaninyo ang adunay maayong handomanan sa pag-anhi dinhi kaniadto? (Ipataas ang mga kamot.)
Traynta ka tuig na ang milabay, si Elder Christofferson ug ako gipatawag sa sama niini nga komperensiya dinhi. Naglingkod mi, nakahinumdom ko, dihang dapita sa wala pa mobalhin sa pula nga mga lingkoranan. Ang usa sa Apostoles, si Elder Marvin Ashton, nasakit niana nga komperensiya, ug mao nga si Elder Christofferson ug ako mihatag sa among mapaubsanon nga pagpamatuod. Wala kami igong panahon sa pagpangandam.
Aduna koy laing handomanan nga gusto nakong ipakigbahin kaninyo.
Wala na ako makapamulong sulod sa Tabenakulo sukad niadtong pagpamatuod pagka 1933. Mianhi mi sa kataposang komperensiya nga ipahigayon dinhi sa Tabernakulo; Oktubre kadto sa 1999.
Adunay hitabo nga medyo nakapakurat nako. Biyernes kadto sa buntag sa wala pa ang komperensiya—alas 7:30 sa buntag. Didto ko sa akong opisina sa dihang mibagting ang telepono. Ang tingog sa pikas linya miingon, “Brother Andersen, si Presidente Hinkley ni.” General Authority ko, apan talagsa ra kaayo ko makahimamat ni Presidente Hinckley. Ang una niyang gisulti nako—sa tinuod—mao ang, “Unsa ka kamaayong mohalili?” Wa ko kahibalo unsaon pagtubag, basta mitingog ko. Mipadayon siya: “Nasakit si Elder Robert Hales. Operahan siya inigka Lunes ug dili siya makapamulong ugma sa buntag. Ug ganahan mi nga ikaw ang mopuli sa iyang dapit sa pagpamulong sa Sabado sa buntag. OK? Ba-bye!” Ug naglisod ko niadtong mga orasa. Kadto ra ang akong kasinatian sa paghatag og sinugo nga pakigpulong sa kinatibuk-ang komperensiya dinhi sa Tabernakulo.
Kon igo pa unta ang atong panahon, makapaminaw ta sa tanan ninyong mga kasinatian.
Sugdan nako pinaagi sa pagpadayag sa akong gugma ug sa gugma sa Unang Kapangulohan ug sa Korum sa Napulog Duha alang sa matag usa kaninyo. Among gitahod ug gidayeg pag-ayo ang inyong pagtuo ug debosyon sa atong Manluluwas nga si Jesukristo ug sa Iyang balaan nga buhat. Mahinungdanon kaayo kini nga mga adlaw sa kasaysayan. Ang mga kinabuhi sa gatosan sa kaliboan sa atong batan-ong mga Santos sa Ulahing mga Adlaw nag-agad sa inyong impluwensiya. Gitawag man kamo isip magtutudlo sa seminary o institute sa inyong ward o stake o gipili nga magtutudlo sa usa sa atong 638 nga mga institute latas sa kalibotan o sa atong mga seminary nga atol sa normal nga oras ting-eskwela [released-time seminaries]—nangutana ko ni Brother Webb kon pila ka klase ang duna kita, ug miingon siya nga mga 80,000 ka mga klase sa seminary. Ang mga seminary nga atol sa normal nga oras ting-eskwela, bitaw, anaa sa kasadpang Estados Unidos, Canada, ug sa mga eskwelahan sa Simbahan. O kon nagserbisyo kamo sa bisan unsang kapasidad diha sa Seminaries ug Institutes, sinsero akong nagpasalamat sa ngalan sa Unang Kapangulohan ug sa Korum Napulog Duha. Nahigugma kami kaninyo ug nag-ampo alang kaninyo. Gikonsiderar namo kamo isip among isigkadisipulo ni Jesukristo samtang nag-andam kita og matarong nga katawhan latas sa kanasoran, mga kultura, ug mga pinulongan sa kalibotan, agig pagpangandam sa mahimayaong pagbalik sa Manluluwas sa yuta.
Sa pagtahod kaninyo ug sa halangdong mga magtutudlo nga nag-una kaninyo niining dakong buhat, bag-ohay lang kong nakig-hinabi ni Presidente Andy Diaz, usa ka presidente sa stake sa Siyudad sa Salt Lake. Naghisgot mi bahin sa sayo sa buntag nga magtutudlo sa seminary dihang batan-on pa siya. Ug mao kini ang makapainteresado nga koneksiyon. Human mipasakop sa Simbahan sa edad nga 13 didto a siyudad sa Tampa, Florida, si Presidente Diaz misugod sa pagtambong sa seminary paglabay sa usa ka tuig sa samang sayo sa buntag nga kase sa seminary uban sa akong talagsaong asawa, si Kathy. Karon, mabantayan ninyo nga mas tigulang siyang tan-awon kay ni Kathy. Ang kinabuhi lahi-lahi og dinad-an kanato. Ang magtutudlo mao ang mama ni Kathy, ang akong umaabot nga ugangan, si Sister Martha Williams. Paminaw niining mubo nga pakigsultihanay namo ni Presidente Diaz.
[video magsugod]
Elder Andersen: Kauban nako karon si Presidente Andy Diaz, presidente sa Salt Lake Riverside Stake. Si Presidente Diaz ug ako adunay komon nga butang, ug mao kana nga ang akong asawa, si Kathy, kauban niya sa klase sa seminary sobra sa 50 ka tuig kaniadto, ug labaw pa niana, ang ilang magtutudlo mao ang inahan ni Kathy, si Sister Martha Williams. Talagasaon siya nga babaye. Ako, dayag lang, nakaila kaayo niya. Namatay na siya. Apan gusto kong makadungog og mga pagbati dinhi, sobra sa 50 ka tuig ang milabay, gikan sa tawo nga karon usa na ka presidente sa stake, kinsa mipasakop sa Simbahan sa dihang siya 13 anyos ug dayon miapil sa seminary pagkahuman sa usa ka tuig, mahitungod ni Sister Martha Williams. Sultihi lang mi sa imong gibati, Presidente Diaz, bahin niining babaye nga imong magtutudlo sa seminary.
Presidente Andy Diaz: Tingali usa siya sa tulo ka babaye nga dakog impluwensiya sa akong kinabuhi—akong inahan, akong asawa, ug si Sister Williams.
Elder Andersen: Wala ba nimo na pasobrahe?
President Diaz: Wala nako na pasobrahe.
Elder Andersen: Sa unsang paagi siya importante man kaayo kanimo?
President Diaz: Mitabang siya nako nga molambo ug makakat-on sa ebanghelyo, kay bag-o kong miyembro sa Simbahan pagka-13, ug dayon pagka-14 nagsugod ko og seminary. Ug siya ang labing nakatabang nako sa pagkat-on sa ebanghelyo. Abi ninyo dihang nag-junior ko sa high school, nagtrabaho ko sa alas dos sa buntag, ug moderetso ko gikan sa akong trabaho ngadto sa sayo sa buntag nga seminary inig ka alas sais kay dili ko gustong mopalta; ingon ana kadto ka importante para nako. Ug iya nang giandam daan, kahibalo namo, ang kahimtang aron “Magsinati ta og espirituhanong kasinatian,” ug ganahan ko niadtong espirituhanon nga mga kasinatian.
Elder Andersen: Nagsubay ba siya nianang kalunsay sa ebanghelyo ug kayano sa ebanghelyo, o siya ba—nakahinumdom ko 50 ka tuig na ang milabay nga sa uban nakong mga klase, maghisgot mi sa mga butang nga wala mi nahibaloan.
Presidente Diaz: Segurado gayod nga nagtudlo siya nako sa lunsay nga mga doktrina ni Kristo. Naghisgot siya mahitungod sa hugot nga pagtuo ug paghinulsol ug mga butang nga kinahanglan natong buhaton aron makabalik sa atong Amahan sa Langit, paglahutay hangtod sa kataposan.
Elder Andersen: Mitabang ba siya nimo sa imong personal nga pagpakigsulti sa Manluluwas nga si Jesukristo, nga nagpadayon sa tibuok nimong kinabuhi?
Presidente Diaz: Oo, gibuhat niya. Tungod kay gitabangan ko niya nga makabaton og relasyon sa atong Amahan sa Langit ug sa Manluluwas. Nakat-on ko mahitungod sa ebanghelyo gikan kaniya. Ug sa tanang butang diha sa kasulatan nga iyang nahisgotan, alang sa dugang nga pagsabot ug kadtong mga doktrina nga gitudlo sa Manluluwas. Siya adunay pagpamatuod, ug siya—wala gayod ko makahinumdom nga iyang taposon ang klase nga dili mopamatuod sa ebanghelyo sa Manluluwas ug sa mga butang nga iyang gitudlo nianang adlawa; importante kaayo kana. Ug madasigon kaayo siya, iya kang hangopon sa iyang gugma sa ebanghelyo. Ug samtang magtan-aw ko niya, ganahan dayon kong sundon ang iyang gihimo.
Elder Andersen: Nan, kon imong hinumdoman, kon duna kay isulti ngadto sa mga magtutudlo sa seminary ug institute—ngadto sa tawo nga pareha nimo, bag-o sa Simbahan, bag-o lang namiyembro—unsay imong iawhag nila nga buhaton, Presidente Diaz?
Presidente Diaz: Higugmaa ang inyong mga estudyante. Pahibaloa sila nga gihigugma ninyo ang Langitnong Amahan ug nga ang Langitnong Amahan nahigugma nila. Ang Manluluwas nahigugma nila. Ug kon mosunod mo sa Dios ug sa Iyang mga propeta, makabalik mo ug makapuyo uban sa atong Langitnong Amahan pag-usab.
Elder Andersen: Aw, segurado ko nga ang imong ginikanan mapasigarbohon kanimo. Ug nasayod ko nga si Sister Williams, kinsa karon migradwar na sa kalibotan 25 ka tuig na ang milabay, nga siya mapasigarbohon usab kaayo kanimo.
Presidente Diaz: Nan, nagpanindot kana sa akong adlaw.
Elder Andersen: Buyno, salamat kaayo. Ug salamat sa pagpakigbahin niining mga butanga kanamo.
Presidente Diaz: Walay sapayan.
[natapos ang bidyo]
Elder Andersen: Si Brother ug Sister Diaz ania uban kanato karong gabii. Gusto ba kamong mobarog, Brother us Sister Diaz, aron makita namo ang inyong presensiya? Salamat kaayo.
Si Presidente Diaz maoy representante sa impluwensiya nga anaa kaninyo ug padayon nga aduna niini alang sa nagtubo nga henerasyon tungod sa inyong hugot nga pagtuo sa Manunubos ug kon giunsa ninyo Siya pagpasidungog isip ang kahayag sa tanan ninyong isulti ug buhaton.
Uban sa inyong serbisyo nga sulondon kaayo, ang akong pag-ampo karon mao nga makapakigbahin ko og usa o duha ka panglantaw nga espirituhanong makabayaw ninyo ug, sa labing gamay nga paagi, makatabang ninyo sa paglig-on sa matarong nga serbisyo nga inyong gihatag.
Ania ang unang konsiderasyon alang kaninyo: Magtudlo kita ug magpamatuod sa mas makadaghan ug mas gamhanang paagi mahitungod ni Jesukristo.
Hunahunaa kon sa unsang paagi kini nga mga pulong gikan ni Presidente Russell M. Nelson sa miaging Abril nga kinatibuk-ang komperensiya tukma kaayo sa panahon sa mga estudyante nga inyong gitudloan: “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo. Pagkat-on pa og dugang bahin sa Iyang Pag-ula, sa Iyang gugma, sa Iyang kalooy, sa Iyang doktrina, ug sa Iyang gipahiuli nga ebanghelyo bahin sa pagkaayo ug paglambo. Dangop ngadto Kaniya! Sunod Kaniya!2
Sa dihang gitawag ko isip usa ka General Authority 30 ka tuig na kaniadto sa sayo nga bahin sa mga 1990, siyam sa napulo ka Amerikano nga mga hamtong miila nga mga Kristiyano. Sumala sa Pew Research Center, ang mga Kristiyano karon anaa sa 64 porsiyento sa populasyon ug lagmit moubos pa sa 50 porsiyento sulod sa pipila ka dekada. Ang ubang mga nasod miatubang o nag-atubang og susama nga mga hagit sa pagtuo.
Dayag lang, dili tanan ninyo nga nangapil karon nagagikan sa mga nasod diin ang Kristiyanismo mao ang dominante nga relihiyon, ug daghan kaninyo nagagikan sa mga dapit diin ang hugot nga pagtuo kang Jesukristo nagpabiling lig-on. Apan bisan asa kita nagpuyo, nakaamgo kita nga ang dalan ngadto sa kinabuhing dayon nagsugod sa lawom ug napahiluna nga pagkakabig ngadto sa atong Manluluwas, uban sa pagtahod sa Iyang balaan nga kinabuhi ug misyon.
“Si Tomas miingon kaniya, Ginoo, … unsaon man namo sa pagkahibalo sa dalan? Si Jesus mitubag, Ako ang dalan, ang kamatuoran ug ang kinabuhi. Walay makaadto sa Amahan kon dili moagi kanako.”3
Sa pambukas nga mensahe diha sa Alang sa Kalig-on sa mga Kabatan-onan, ang Unang Kapangulohan nagsulat: “Kamo sa tinuod naapil sa pinili nga mga espiritu sa Langitnong Amahan, gipadala sa kalibotan niining panahona aron sa pagbuhat og importanteng mga butang. … Dangop ngadto sa Manluluwas. Siya mao ang ‘kalig-on sa kabatan-onan.’”4
Bag-ohay lang didto ko sa seminary nga bilding sa akong mga apo. Nakadayeg ko nga sa mga bongbong adunay daghang mga hulagway sa Manluluwas ug sa Iyang kaugalingong mga pulong ug ubang mga kasulatan nga nagpamatuod Kaniya.
Si Brother Chad Webb nagtudlo niini nga baroganan: “Ang labing importanteng paagi nga makatabang kita sa pagpalambo sa pagtuo sa nagtubo nga henerasyon mao ang hingpit nga pagbutang ni Jesukristo diha sa sentro sa atong pagtudlo ug pagkat-on,”5
Dili ba dako og epekto kanato niadtong Abril nga kinatibuk-ang komperensiya dihang si Presidente Dallin H. Oaks mikutlo sa mga pulong ni Nephi, “[M]agbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton,”6 ug dayon mikuha sa nahibilin sa iyang kusganong mensahe aron sa pagpakigbahin “sa pinili nga mga pulong sa atong Manluluwas—kon unsay Iyang gisulti” diha sa Bag-ong Tugon ug sa Basahon ni Mormon. Si Presidente Oaks mitapos pinaagi niining yanong pagkasulti, nga propetikanhong pamahayag: “Ako mopamatuod sa kamatuoran niini nga mga pagtulon-an sa ngalan ni Jesukristo, amen.”7
Adunay dili hitopngang gahom diha sa mga pulong ni Jesukristo:
“Pangayo, ug kamo pagahatagan; pangita, ug kamo makakaplag.”8
“Ako mao ang pagkabanhaw, ug ang kinabuhi; ang mosalig kanako, bisan siya mamatay, mabuhi siya.”9
Tan-awa, Ako si Jesukristo, ang Anak sa Dios. … Ako ang kahayag ug ang kinabuhi sa kalibotan.”10
Kon maglibog mo unsay isulti, isulti ang mga pulong sa Manluluwas. Isulti ang Iyang mga kasinatian; isulti ang Iyang mga sambingay; isulti ang mga pulong sa kasulatan ug sa mga propeta nga nagpamatuod Kaniya.
Samtang magtudlo kita ug mopamatuod ni Jesukristo, ang Espiritu Santo mokompirma sa mga kasingkasing sa atong batan-ong mga disipulo sa kamatuoran sa Iyang kinabuhi ug mga pagtulon-an pinaagi sa gahom nga mas molungtad kay sa gahom sa atong kaugalingong pagtudlo.
Mapaubsanon natong ikonsiderar kon ato bang gibuhat kutob sa atong mahimo sa pagtudlo ug pagpamatuod, sama sa gihangyo ni Presidente Nelson, sa Iyang Pag-ula, Iyang gugma, Iyang kalooy, Iyang doktrina, Iyang gipahiuli nga ebanghelyo sa pagkaayo ug pag-uswag.
Tungod kay ang sundanan sa atong pagtudlo sa una dili igo alang sa karon ug sa unsay mahitabo sa umaabot, palapdan nato ang atong panabot ug, sama sa gitambag ni Presidente Nelson, “magkat-on pa og dugang” sa atong kaugalingon ug awhagon ang kabatan-onan ug mga young adult sa Simbahan nga “magkat-on pa og dugang” mahitungod “sa kinabuhi ug mga pagtulon-an ni Jesukristo.”11
Karon ang akong ikaduha nga konsiderasyon: Ipabilin nato nga lunsay ug yano ang doktrina.
Kon unsa gayod ang atong nahibaloan bahin sa atong Langitnong Amahan; sa atong Manluluwas nga si Jesukristo; sa atong kinabuhi sa wala pa sa yuta; sa plano sa atong Amahan sa kalipay alang kanato, atong mga prebilihiyo sa pagtuo, paghinulsol, ug mga ordinansa—nasayod kita niining tanan—sa atong panginahanglan sa mga sugo, mga pakigsaad, pagkamasulondon ug paglahutay; ug ang atong gisaad nga mga panalangin lapas niining mortal nga kalibotan—kining tanan maanindot kaayong pagkaklaro, dili gayod kita mobati nga kinahanglang “[mo]lapas sa tumong”12 sama sa gitudlo sa kasulatan.
Isentro nato ang atong pagtudlo sa atong Langitnong Amahan, ni Jesukristo, ug sa ilang gipadayag nga doktrina aron sa pagtabang sa atong kabatan-onan nga molambo ang ilang pagtuo diha Kanila, makabig ngadto Kanila, ug makadawat sa Ilang gisaad nga mga panalangin.
Ang doktrina ni Kristo makita diha sa mga kasulatan ug sa mga pagtulon-an sa mga propeta, kansang responsibilidad mao ang pagsulti sa kabubut-on sa Ginoo.
Ang doktrina diha sa mga kasulatan ug gitudlo sa mga propeta naglakip sa mga baroganan sa daghang mga saksi, usa ka baroganan nga inyong nadungog kanunay sa kinatibuk-ang komperensiya ug usa nga akong gipakigbahin labaw sa 10 ka tuig kaniadto: “Pipila ang magduhaduha sa ilang pagtuo kon makakaplag sila og pamahayag sa usa ka lider sa Simbahan mga dekadang milabay nga daw sukwahi sa atong doktrina. Adunay importanteng baroganan nga nagdumala sa doktrina sa Simbahan. Ang doktrina gitudlo sa tanang 15 ka mga sakop sa Unang Kapangulohan ug Korum sa Napulog Duha. Wala kini gitago sa usa ka walay klaro nga parapo sa usa ka pakigpulong. Ang tinuod nga mga baroganan kanunay nga gitudlo ug sa kadaghanan. Ang atong doktrina dili lisod pangitaon.”13
Makita ba ninyo ang importansiya sa kanunayng pagdala sa mga pagtulon-an sa mga propeta ug mga apostol ngadto sa inyong mga diskusyon sa klasehanan? Ang direksiyon sa Ginoo alang sa mga pangutana ug mga problema sa atong modernong kalibotan nagagikan niadtong giordenahan sa apostolikanhong katungod. Kon ang pagsalig ngadto sa mga propeta ug apostoles nagkunhod, ang mga paglingla, ang sayop nga mga direksiyon, ug ang mga sayop nga pangatarongan sa kalibotan makapalayo sa tawo gikan sa iyang espirituwal nga mga pundasyon. Pagmadasigong magpaabot sa kinatibuk-ang komperensiya ug hisgoti ang importanteng mga pagtulon-an nga mosunod. Ilha og klaro ang sagrado nga tahas sa dinihogan sa Ginoo. Samtang ang kalibotan nagkalayo sa mga sugo sa Dios, ang tahas sa Apostoles magkadugang sa kaimportante.
Sa pagpabiling lunsay ug masabtan sa doktrina sa Ginoo, pagmatngon nga magpabilin sa sulod sa mga utlanan nga gi-establisar sa Dios, maglikay sa mga sayop nga moabot pinaagi sa pangagpas ug dili subay sa doktrina nga personal nga mga ideya. Ang maong mga ideya mahimong makadani sa uban apan walay gahom sa kamatuoran nga makapalig-on sa pagtuo.
Ganahan ko sa leksiyon nga gitudlo ni Presidente Dallin H. Oaks sa iyang anak nga lalaki sa dihang ang iyang anak nangutana og pangutana nga wala maklaro sa pagpasabot diha sa doktrina ni Kristo. Ang iyang tubag: “Anak, wala ko masayod sa tubag nianang pangutanaha, apan tugoti ko nga motubag sa pangutana nga nahibaloan nako.” Mihatag dayon siya og pagpamatuod bahin ni Propeta Joseph Smith ug sa Unang Panan-awon. Magmahimo kitang andam nga moingon nga, “Wala ko masayod bahin niana, apan mao kini ang akong nahibaloan.”
Ikonsiderar kining mga pangutana ug mga tubag:
“Brother Jones, unsay koneksiyon tali sa Big Bang ug ni Adan ug Eva?” “Wala ko kahibalo sa tubag niana nga pangutana, apan sultihan ta ka kon unsay atong nahibaloan mahitungod ni Adan ug ni Eva.”
“Sister Gonzalez, nganong wala man tay dugang nahibaloan bahin sa atong Langitnong Inahan?” “Wala ko kahibalo sa tubag niana nga pangutana, apan nasayod gayod ako nga ikaw ‘usa ka hinigugmang anak nga babaye sa Langitnong mga Ginikanan, nga adunay diosnong kinaiya ug mahangtorong padulngan.’14”
Hunahunaa kon unsaon ninyo paghimo sa maayong mga pangutana, apan mga pangutana nga makatintal sa paghimo og pangagpas, ngadto sa mga tubag nga makapalig-on sa pagtuo ngadto sa atong Manluluwas nga si Jesukristo. Ug ania ang usa ka hagit alang kaninyo. Tabangi nga masilsil sa inyong mga estudyante ang panabot nga ang tanang pangutana dili parehas. Ang espirituhanong pagsabot ug pagkahamtong makatabang sa paglahi sa importanteng mga pangutana gikan sa makapainteresado nga mga pangutana.
Pinaagi sa pagkatukma, pagkaklaro, ug pagkayano, atong madapit ang makapalig-on nga pagsaksi sa Espiritu Santo. “[Kon] moanhi ang Magtatabang, … ang espiritu nga nagpadayag sa kamatuoran, … [siya] magsaksi mahitungod kanako.”15
Si Brigham Young mihulagway sa mga pagtulon-an ni Joseph Smith niining paagiha, “Siya mikuha sa langit, ingnon ta, ug midala niini dinhi sa yuta; ug iyang gikuha ang yuta, gidala sa itaas, ug giablihan kini, sa kayano ug sa kamapainubsanon, ang mga butang sa Dios.”16
Bantayi nga ang mga asoy ug mga istorya nga inyong nadungog walay mga pakapin. Tinguhaa sa pagsiguro nga ang mga kasulatan o mga pamahayag nga imong gikutlo anaa sa konteksto nga angay niini.
Sayon ra nga madani sa butang nga bag-o o hilabihan nga makaintriga lapas sa kinutoban sa atong panabot. Pagpabilin diha sa sulod sa kahilwasan sa lunsay ug yano nga doktrina.
Pagmatngon sa inyong pilion nga medya, personal nga istorya, ug mga leksiyon nga maggamit og butang. Kon gamiton sa epektibong paagi, makadugang kini sa interes ug giladmon. Kon masobrahan sa pagpasabot, mahimong makabalda sa imong pagtudlo. Ang pamaagi mahimong molabaw sa mensahe.
Si propeta Alma mipamatuod nga ang maayong balita sa ebanghelyo “gipahibalo ngari kanato sa yano nga mga paagi, aron kita mahimo nga makasabot, nga kita dili masayop.”17
“Ug kon ang pagpatingog sa trumpeta dili klaro, kinsa may mangandam alang sa gubat?”18
Hunahunaa kon unsa katahom ang pagka-klaro niini nga mga kasulatan:
“Duol kamo kanako.”19
“Kon ang usa ka tawo buot mahimong akong tinun-an kinahanglang dili siya magtuman sa iyang kaugalingon, pas-anon niya ang iyang krus ug mosunod siya kanako.”20
“Kay kon inyong pasayloon ang nakasala kaninyo, pasayloon usab kamo sa inyong Amahan nga atua sa langit.”21
“Kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila.”22
“Kini mao ang akong sugo: paghigugmaay kamo sama nga ako nahigugma kaninyo.”23
Sa iyang gamhanan nga wali “Paminaw Kaniya,” si Presidente Nelson miingon, “[Ang Langitnong Amahan] makigsulti sa yano, sa hilom, ug sa labihan kayano nga kita makasabot gayod Kaniya.”24
Klaro, tukma, yano mao ang balaanong paagi sa pagtudlo.
Pagmaalamon samtang inyong ibalanse ang doktrina nga imong itudlo. Hatagi og igong gibug-aton ang punto sa doktrina nga haom sa konteksto sa ubang may kalabotan nga mga kamatuoran. Hinumdomi ang tambag sa Manluluwas bahin sa pagtudlo sa mga sugo: “Angay unta nga buhaton ninyo kini sa walay pagbiya sa ubang pagtulon-an.”25
Si Elder Neal A. Maxwell mipasabot, “Ang mga baroganan sa ebanghelyo gitahi ngadto sa usa ka panapton nga maampingan kini ug kanunayng mabalanse sa usag-usa.”26
Hunahunaa kini: Ang gugma sa Dios ug ang mga balaod sa Dios, kapasayloan ug paghinulsol, ang unang sugo ug ang ikaduhang sugo, kabubut-on ug pagkamay-tulubagon.
Sama sa gikasulti na sa daghang higayon, pagtudlo dili lang aron masabtan, apan pagtudlo aron dili ka masaypan sa pagsabot.
Sa kataposan, sama sa nahibaloan na kaayo natong tanan, kining mga kamatuoran kinahanglang ipakigbahin diha sa kahimtang nga mohangop ug moagni sa Espiritu. Dili nato mapugos ang Espiritu. Mag-ampo ta ug dapiton nato ang Espiritu, apan dili kita makahimo og artipisyal nga pagsulay sa paghimohimo og espirituwal nga kasinatian.
Sobra sa 30 ka tuig na ang milabay, si Presidente Dallin H. Oaks misulti kanako sa usa ka kasinatian uban sa iyang anak nga babaye nga si Jenny, kinsa tin-edyer pa. Kini ang iyang mga pulong: “Si Jenny mitambong og usa ka klase o kalihokan sa Young Women dihang tin-edyer pa siya. Pag-abot niya sa balay, ang akong asawa ug ako nangutana niya kon kumusta ang panagpundok, sama sa buhaton sa mga ginikanan. Miingon si Jenny, ‘Aw, ang magtutudlo miingon, “Karong gabii makaangkon kita og espirituwal nga kasinatian. Kon ang matag usa maggunitay nga mag-alirong makaangkon kita og espirituwal nga kasinatian.”’”
Padayonon ko sa pagkutlo si Presidente Oaks: “Akong gipangutana si Jenny, ‘Unsay imong gibati?’ Ug miingon siya, ‘lain ang akong gibati!’” (Tingali karon, 30 ka tuig na ang milabay, makaingon ta nga, “Lain akong pamati.” Dili ko sigurado sa sakto nga mga pulong.) Si Presidente Oaks mipadayon, “Miingon ko, ‘nalipay ko kay kon makadungog ko og sama niini, lain pud ang akong bation.’” Dayon si Presidente Oaks miingon, “Gitudloan nako siya nga ang espirituwal nga mga kasinatian dili ma-eskedyul kon kanus-a mahitabo, apan mahitabo kini kon nagtinguha ta sa impluwensiya sa Espirtu sa Ginoo.”
Nahinumdom mo sa gugma nga gibati ni Presidente Diaz gikan sa iyang magtutudlo sa seminary, si Sister Williams? Atong madapit ang Espiritu samtang magtudlo kita pinaagi sa gugma, kalinaw, kaaghop, pagpaubos, ug hugot nga pagtuo.
Nakahibalo kamong tanan niini nga kasulatan: “Siya nga nakadawat sa pulong pinaagi sa Espiritu sa kamatuoran nakadawat niini ingon nga kini gisangyaw pinaagi sa Espiritu sa kamatuoran. … Busa, siya nga nagsangyaw ug siya nga nakadawat, nakasabot sa usag usa, ug ang duha makadawat og kaayohan ug maglipay nga maghiusa.”27
Busa mag-agad kini dili lang kaninyo apan usab niadtong anaa sa inyong klasehanan. Ang atong mga estudyante makakat-on pinaagi lang sa pagkamasulondon ug kanunay nga paghinumdom Kaniya nga padayon silang makabaton sa Iyang Espiritu uban kanila.
Kini ang mga pulong ni Presidente Eyring:
“Ang doktrina makaangkon sa gahom niini sa higayon nga ang Espiritu Santo mopamatuod nga kini tinuod. Atong andamon kadtong atong tudloan, kutob sa atong mahimo, sa pagdawat sa hilom nga mga pag-aghat sa hinay, hinagawhaw nga tingog. Kana nagkinahanglan bisan gamay nga pagtuo kang Jesukristo. Nagkinahanglan kini og gamay nga pagpaubos, pipila ka pagkaandam sa pagtugyan ngadto sa kabubut-on sa Manluluwas alang kanato. “Ang tawo nga imong tabangan tingali adunay gamay niining duha, apan kamo makaawhag aron sila magtinguha nga motuo. Labaw pa niana, kamo makakuha og pagsalig gikan sa lain bahin sa mga gahom sa doktrina. Ang kamatuoran makaandam sa kaugalingong paagi niini. Ang yano nga pagkadungog sa mga pulong sa doktrina makapatanom sa liso sa hugot nga pagtuo diha sa kasingkasing. Ug gani ang gamay nga liso sa hugot nga pagtuo diha kang Jesukristo magdapit sa Espiritu.”28
Matahom nga mga pulong. Buyno, matinahuron kaayo kamo. Salamat kaayo nga inyo kong gitugotan sa paggahin niining panahon uban ninyo. Gihigugma namo kamo, ug nagpasalamat kami kaninyo sa tanan nga inyong gibuhat sa pagpalig-on sa atong kabatan-onan ug mga young single adult ug sa paglig-on sa ilang pagtuo ni Jesukristo.
Isip sulugoon sa Ginoo, ug pinaagi sa akong apostolikanhong katungod, panalanginan ko kamo nga ang inyong mga hunahuna ug mga kasingkasing mapuno sa gugma, kaluoy, mga pagtulon-an, ug lawom nga balaang pagtahod sa dili hitupngan nga maulaong sakripisyo sa atong Ginoong Jesukristo. Panalanginan ko kamo, kon inyo kining tinguha, nga ang inyong abilidad sa pagtudlo sa doktrina ni Kristo uban sa kalunsay ug gahom molambo ug nga kamo makakita ug makabati sa mapamatuoron nga pagsaksi sa Langitnong Amahan ngadto sa inyong maayo nga mga estudyante.
Akong ibilin kaninyo ang akong segurado ug piho nga pagsaksi nga si Jesus mao ang Kristo. Ug mopamatuod ako kaninyo sa Iyang saad dihang miingon Siya, “Ang moila ug moangkon kanako atubangan sa mga tawo, angkonon ko usab atubangan sa akong Amahan didto sa langit.”29 Sa ngalan ni Jesukristo, amen.