ការរស់រានមានជីវិតខាងវិញ្ញាណ

ព្រះចេស្តានៃព្រះយេស៊ូវគ្រីស្ទ និងគោលលទ្ធិដ៏បរិសុទ្ធជាមួយ អែលឌើរ នែល អិល អាន់ឌើរសិន

អែលឌើរ ក្លាក ជី ហ្គីលប៊ឺត

គណៈអភិបាលនៃប្រព័ន្ធអប់រំរបស់សាសនាចក្រ

ថ្ងៃ អាទិត្យទី ១១ ខែ មិថុនា ឆ្នាំ ២០២៣

សារលិខិតបើក

សាយណ្ហសួស្តី បងប្អូនប្រុសស្រីជាទីស្រឡាញ់ ។ ជូនចំពោះអ្នកអប់រំខាងសាសនារបស់យើងដែលបានប្រមូលផ្តុំគ្នានៅជុំវិញពិភពលោក ជាបឋមខ្ញុំសូមសម្តែងការដឹងគុណយ៉ាងស្មោះអស់ពីចិត្តចំពោះរបៀបដែលបងប្អូនបង្រៀន និងផ្ដល់ការងារបម្រើដល់សិស្សរបស់យើង ។ ជាក់ស្តែង អ្នកកំពុងបង្ហាត់បង្ហាញដល់ ទំពាំងស្នងឫស្សី របស់សាសនាចក្រនៅក្នុងថ្នាក់ទាំងឡាយរបស់បងប្អូន ។ នៅពេលខ្ញុំធ្វើដំណើរទៅថ្នាក់សិក្ខាសាលា ថ្នាក់វិទ្យាស្ថាន និងសាកលវិទ្យាល័យនៅជុំវិញពិភពលោក ខ្ញុំត្រូវបានបំផុសគំនិតដោយរបៀបដែលអ្នកមើលថែដល់សិស្សនៅក្នុងរបៀបដើម្បីជួយពួកគេឲ្យស្ថាបនាជីវិតរបស់ពួកគេនៅក្នុងព្រះយេស៊ូវគ្រីស្ទ ។ នៅពេល ម៉ារា ជាអ្នកស្រុកម៉ាក់ដាឡា បានទូលជាលើកដំបូងអំពីព្រះអង្គសង្គ្រោះដែលបានមានព្រះជន្មរស់ឡើងវិញ នោះព្រះបរមងារដែលនាងបានជ្រើសរើសគឺ « រ៉ាបូនី » ។^១ អត្ថបទនេះបញ្ជាក់ពាក្យនេះឡើងវិញថាជា « លោកចៅហ្វាយ » ប៉ុន្តែការបកប្រែជាភាសាក្រិកគឺ « លោកគ្រូ » ។ ឱ នេះជាការហៅដ៏ថ្លៃថ្នូរដែលយើងមានរួមគ្នាក្នុងនាមជាអ្នកអប់រំ ដើម្បីចង្អុលបង្ហាញសិស្សរបស់យើងទៅកាន់លោកចៅច្វាយ ដែលជាព្រះយេស៊ូវគ្រីស្ទ ។

បន្ទាប់ពីសុន្ទរកថាណែនាំរបស់ខ្ញុំ យើងនឹងទទួលបានការប្រឹក្សាពីសាវកនៃព្រះអម្ចាស់ព្រះយេស៊ូវគ្រីស្ទអំពីរបៀបបង្រៀនសេចក្ដីពិតក្នុងបរិយាកាសមួយដែលការយល់ច្រឡំ និងការបោកបញ្ឆោតកំពុងកើនឡើង ។ ខ្ញុំមានបទពិសោធន៍ថ្មីៗមួយដែលបង្កើនការយល់ដឹងរបស់ខ្ញុំផ្ទាល់អំពីបញ្ហាប្រឈមនេះ ។ ខ្ញុំបានទទួលការចាត់តាំងជាមួយប្រធាន អាវរិង ទៅសាកលវិទ្យាល័យ ប៊ី.វ៉ាយ.យូ.–ហាវៃ ដែលមាននិស្សិតម្នាក់បានលើកពីសេចក្តីថ្លែងការណ៍របស់ប្រធាន ណិលសុន ថា « នៅពេលខាងមុខ យើងនឹងមិនអាចរស់រានខាងវិញ្ញាណបានឡើយ បើគ្មានព្រះចេសា្ត ណែនាំ ដឹកនាំ និងលួងលោមចិត្តជាប់ជានិច្ចមកពីព្រះវិញ្ញាណបរិសុទ្ធនោះ » ។ ^២ និស្សិតរូបនោះបានសួរអំពីផលប៉ះពាល់ដល់យុវមជ្ឈិមវ័យ ។ ខ្ញុំបានបន្តពន្យល់ពីរបៀបដែលព្រះវិញ្ញាណនឹងជួយពួកគេធ្វើការសម្រេចចិត្ត—ជម្រើសជីវិតដ៏សំខាន់អំពីអ្វីដែលត្រូវសិក្សា នរណាត្រូវណាត់ជួប និងរៀបការ កន្លែងធ្វើការ និងទីកន្លែងរស់នៅ ។

ប៉ុន្តែក្រោយមកប្រធាន អាវរិង បានឆ្លើយតបដោយការលើកឡើងនូវវគ្គជម្រុះដ៏សំខាន់មួយនៅក្នុងសេចក្ដីថ្លែងការណ៍របស់ប្រធាន ណិលសុន ដែលលោកបានពិពណ៌នាអំពីភាពសំខាន់នៃ« ការរស់រានខាងវិញ្ញាណ » ។ លោកបានចង្អុលបង្ហាញថា ការរស់រានមានជីវិតខាងវិញ្ញាណ គឺយើងត្រូវការឲ្យហួសពីជម្រើសនៃជីវិតសាមញ្ញដែលខ្ញុំបានណែនាំនោះ ។ លោកបានពន្យល់ពីរបៀបដែលយុវវ័យ និងយុវមជ្ឈិមវ័យរបស់យើងនឹងរស់នៅក្នុងយុគសម័យមួយ ដែលមារសត្រូវនឹងលាក់កំបាំងសេចក្តីពិតយ៉ាងឆ្លាតវៃ ដែលថា បើគ្មានព្រះវិញ្ញាណបរិសុទ្ធទេ នោះវានឹងមិនអាចទៅរួច—នឹងកាន់តែពិបាកបែងចែក—ដើម្បីប្រាប់ពីភាពខុសគ្នារវាងការណ៍ល្អ និងអាក្រក់ រវាងសេចក្តីពិត និងកំហុស ។ បន្ទាប់មក ការរស់រានមានជីវិតខាងវិញ្ញាណបានក្លាយជាបញ្ហានៃការស្គាល់សេចក្តីពិត ។

យប់នេះ ខ្ញុំសង្ឃឹមថា យើងនឹងគិតពិចារណាពីរបៀបបង្រៀនសិស្សរបស់យើងឲ្យស្គាល់សេចក្តីពិត ។ ខ្ញុំក៏សង្ឃឹមថា យើងនឹងពិចារណាពីតួនាទីរបស់យើងក្នុងការបង្រៀនសេចក្តីពិតដោយភាពច្បាស់លាស់ និងចំៗផងដែរ ។ ខ្ញុំទន្ទឹងរង់ចាំពេលដែលយើងរៀនពីអែលឌើរ អាន់ឌើរសិន ហើយខ្ញុំធ្វើជាសាក្សីចំពោះបងប្អូនថា នៅពេលយើងស្ថាបនាការបង្រៀនរបស់យើងនៅលើព្រះយេស៊ូវគ្រីស្ទ និងនៅក្នុងគោលលទ្ធិបរិសុទ្ធ នោះយើងបង្កើតគំរូមួយសម្រាប់សិស្សរបស់យើងដើម្បីមើលឃើញ និងស្គាល់សេចក្តីពិត មិនត្រឹមតែនៅក្នុងថ្នាក់របស់យើងប៉ុណ្ណោះទេ ប៉ុន្តែពេញមួយជីវិតរបស់ពួកគេផងដែរ ។ ខ្ញុំសូមពោលពាក្យទាំងនេះក្នុងព្រះនាមនៃព្រះយេស៊ូវគ្រីស្ទ អាម៉ែន ។

ការណែនាំពីអែលឌើរ នែល អិល អាន់ឌើរសិន

ឥឡូវនេះ ខ្ញុំមានឯកសិទ្ធិដើម្បីណែនាំពីអែលឌើរ នែល អិល អាន់ឌើរសិន ។ មានរឿងជាច្រើនដែលខ្ញុំអាចចែកចាយអំពីអែលឌើរ អាន់ឌើរសិន— អាពាហ៍ពិពាហ៍ និងគ្រួសារដ៏អស្ចារ្យរបស់លោក សមិទ្ធិផលផ្នែកអប់រំ និងអាជីវកម្មរបស់លោក និងការបម្រើសំខាន់ៗរបស់លោកចំពោះសាសនាចក្រ រួមទាំងការហៅជាអ្នកដឹកនាំបេសកកម្មទៅកាន់បេសកកម្មបរដូ ប្រទេសបារាំងផងដែរ ។ អែលឌើរ អាន់ឌើរសិន និយាយភាសាបារាំង ប៉ុន្តែក៏ចេះភាសាព័រទុយហ្គាល់ និងអេស្ប៉ាញដែរ ។ សម្រាប់ពួកយើងមួយចំនួននៅរាត្រីនេះ សំណាងល្អណាស់ លោកក៏ចេះភាសាអង់គ្លេសផងដែរ លោកបានរស់នៅជុំវិញពិភពលោក ហើយស្គាល់សាសនាចក្រគ្រប់ទីកន្លែងដែលបងប្អូនកំពុងបង្រៀន និងលើកស្ទួយដល់សិស្សរបស់យើង ។

ប៉ុន្តែនៅពេលខ្ញុំគិតអំពីអែលឌើរ អាន់ឌើរសិន មានលក្ខណៈពីរយ៉ាង ដែលខ្ញុំសង្ឃឹមថាបងប្អូននឹងចងចាំនៅពេលដែលបងប្អូនស្តាប់លោកនារាត្រីនេះ ។ ទីមួយ អែលឌើរ អាន់ឌើរសិន មើល តាមដាន ហើយការពារព្យាការីរបស់ព្រះ ។ ខ្ញុំបានសង្កេតឃើញក្នុងកិច្ចការនេះថានៅក្នុងរបៀបដែលបន្ទាប់ពីសន្និសីទទូទៅ អែលឌើរ អាន់ឌើរសិន បោះពុម្ព ហើយសិក្សាពាក្យសម្ដីរបស់ព្យាការី ហើយបន្ទាប់មកធ្វើឲ្យពាក្យសំដីនោះក្លាយជាផ្នែកនៃការបង្រៀនរបស់លោកផ្ទាល់ ។ ខ្ញុំបានធ្វើជាសាក្សីដោយផ្ទាល់ថា អែលឌើរ អាន់ឌើរសិន បានពង្រីកការបង្រៀនរបស់ប្រធាន ណិលសុន ស្ដីពីការធ្វើជាអ្នកផ្សះផ្សាគេ ការធ្វើជាមនុស្សសុចរិត ការធ្វើជាឪពុកម្តាយដែលមានការទទួលខុសត្រូវ ហើយការស្ថាបនាគ្រឹះរបស់យើងលើព្រះយេស៊ូវគ្រីស្ទ ។ ទីពីរ អែលឌើរ អាន់ឌើរសិន ខ្លួនលោកផ្ទាល់គឺជាសាក្សីពិសេសមួយរូបរបស់ព្រះយេស៊ូវគ្រីស្ទ ។ លោកយកការហៅនេះជាកិច្ចការដ៏ពិសិដ្ឋមួយ ។ នៅក្នុងការចាត់តាំងមួយជាមួយនឹងអែលឌើរ និងស៊ីស្ទើរ អាន់ឌើរសិន ទៅសាលាទ័ពអាកាសនៅរដ្ឋខូឡូរ៉ាដូជិតមួយឆ្នាំទៅហើយ ខ្ញុំបានមើលលោកបង្រៀន និងថ្លែងទីបន្ទាល់អំពីព្រះយេស៊ូវគ្រីស្ទដល់សិស្សនិស្សិតដែលបានមកស្តាប់លោកមានប្រសាសន៍ ។ នៅពេលខ្ញុំអង្កេតមើលលោកនៅល្ងាចនោះ ខ្ញុំមានចំណាប់អារម្មណ៍ និងការបញ្ជាក់ដ៏លើសលប់ថា ខ្ញុំនៅក្នុងវត្តមានសាក្សីដ៏ពិសេសម្នាក់នៃព្រះយេស៊ូវគ្រីស្ទ ។

ខ្ញុំសង្ឃឹមថាបងប្អូននឹងស្គាល់ឱកាសនេះថា ឥឡូវយើងបានស្ដាប់មកពីសាវករបស់ព្រះអម្ចាស់ដែលដើរតាមព្យាការី និងជាសាក្សីនៃព្រះអង្គសង្គ្រោះ ព្រះយេស៊ូវគ្រីស្ទ ។ អែលឌើរ អាន់ឌើរសិន ពួកយើងទន្ទឹងរង់ចាំការបង្រៀនរបស់លោក ។