Ola Tumau Faaleagaga
O Le Mana o Iesu Keriso ma le Aoaoga Faavae Mama faatasi ma Elder Neil L. Andersen
11 Iuni, 2023
Savali Amata
Uso e ma tuafafine, talofa. I o tatou faiaoga faalelotu ua potopoto i le lalolagi atoa, se’i ou momoli atu muamua lava lo’u agaga faafetai mo le auala o loo outou aoao atu ai ma auauna atu i o tatou tamaiti a’oga. E toe a tino moni mai, ua ia te outou le lumanai tonu o le Ekalesia i a outou vasega. A o ou faimalaga atu i le seminare, inisitituti, ma vasega a iunivesite i le lalolagi atoa, e musuia lava au i le ala o loo outou tausia ai tamaiti aoga ma fesoasoani ina ia taulaina o latou olaga ia Iesu Keriso. Ina ua mua’i faalani e Maria le Makatala le Faaola toetu, sa ia filifilia le suafa “Raponi.”1 Ua toe faaupu e le tusiga o le “Le Matai,” ae o le faaliliuga Eleni o le “Faiaoga.” O se valaauga ina a malualii o loo tatou tauaveina nei o ni faiaoga, e faasino a tatou tamaiti a’oga i le Faiaoga Sili, o Iesu Keriso.
A mae’a a’u upu faafeiloai, o le a tatou mauaina ni fautuaga mai se Aposetolo a le Alii o Iesu Keriso i le ala e aoao atu ai upumoni i se tau ua faatupula’ia o le fememea’i ma le taufaasese. Sa i ai so’u aafiaga talu ai nei lea na faateleina ai lo’u lava malamalama i lenei luitau. Sa tofia au faatasi ma Peresitene Henry B. Eyring i le BYU-Hawaii, lea na ta’ua ai e se tamaitiiti a’oga le saunoaga a Peresitene Nelson: “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.”2 Sa fesili le tamaitiiti aoga e uiga i aafiaga o lenei mea mo talavou matutua. Sa faaauau ona ou faamatala i ai le ala e fesoasoani ai le Agaga ia i latou e faia filifiliga—taua o le olaga i mea e suesue ai, o ai e tafao faamasani ma faaipoipo i ai, ma pe o fea e nofo ai ma faigaluega.
Ona tali lea o Peresitene Eyring i lona toe faaupuina o se mea taua e agavaa ai i le saunoaga a Peresitene Nelson lea na ia faamatalaina ai le ala e “ola ai faaleagaga.” Sa ia faailoa mai o le ola faaleagaga o le a tatou manaomia o le a sili mamao atu nai lo filifiliga faigofie o le olaga na ou faailoaina atu. Sa ia faamatala le ala o le a ola ai o tatou talavou ma talavou matutua i se vaitau o le a natia ai ma le poto upumoni e le fili, lea a aunoa ma le Agaga Paia, o le a matua faateleina—le faigata—ona iloa le lelei mai le leaga, le upumoni mai le mea sese. Ona avea ai lea o le ola faaleagaga o se mataupu o le iloaina o le mea moni.
O le po nei, ou te faamoemoe o le a tatou tomanatu i le ala tatou te aoao atu ai o tatou tamaiti a’oga ia iloaina le mea moni. Ou te faamoemoe foi o le a tatou mafaufau i la tatou matafaioi i le aoao atu o upumoni ma le sa’o lelei ma le manino atoatoa. Ua ou sagisagi fiafia atu a o tatou aoao mai ia Elder Andersen, ma ou te molimau atu ia te outou a tatou taulaina a tatou aoaoga ia Iesu Keriso ma i aoaoga faavae mama a’ia’i, ua tatou fatuina se mamanu mo o tatou tamaiti a’oga e vaai ma iloa ai mea moni—e le gata i totonu o a tatou vasega, ae i o latou olaga atoa. Ou te fai atu ai nei mea uma i le suafa o Iesu Keriso, amene.
Fofogaina Aloaia o Elder Neil L. Andersen
O lo’u avanoa lenei e faalauiloa atu ai le susuga ia Elder Neil L. Andersen. E tele mea e mafai ona ou faasoa atu e uiga ia Elder Andersen—o lana faaipoipoga ofoofogia ma lona aiga matagofie; o mea ua ausia e ana aoaoga ma pisinisi; o lana auaunaga i le Ekalesia, e aofia ai le valaauga o le au Andersen o ni taitai misiona i le Misiona a Farani Bordeaux. Ua saunoa Elder Andersen i le faaFarani, ae e tautala foi o ia i le faaPotukale ma le Sipaniolo. Mo nisi o i tatou i le po nei, o le mea e lelei ai, e tautala foi o ia i le Igilisi. Sa soifua o ia i le salafa o le lalolagi ma silafia le Ekalesia i soo se mea lava o loo e aoaoina ai ma siitia a tatou tamaiti a’oga.
Ae pe a ou mafaufau ia Elder Andersen, e lua lava uiga ou te faamoemoe o le a outou manatua. Muamua, o Elder Andersen e mata’itu, mulimuli, ma puipuia le perofeta a le Atua. Ua ou matauina pe a maea konafesi aoao, e lolomi ma suesue e Elder Andersen upu a le perofeta ona ia faaaogaina lea e fai ma vaega o ana lava aoaoga. Ua ou molimau patinoina Elder Andersen o faalauteleina aoaoga a Peresitene Nelson i le avea ai o se e faatupuina le filemu; avea ma matua amiotonu, ma tumu i faamoemoega; ma le fausiaina o o tatou faavae ia Iesu Keriso. Lona lua, o Elder Andersen lava ia o se molimau faapitoa ia Iesu Keriso. Na te tauaveina faatasi ma ia lenei valaauga o se tausimea paia. I se tofiga faatasi ma Elder ma Sister Andersen i le A’oga Amata o le Fuavaa i le Ea i Colorado, sa ou matauina ai o ia o aoao atu ma molimau e uiga ia Iesu Keriso i le au talavou faatoa tau aoao, na o mai e faalogologo a o ia lauga. A o o’u matauina o ia i lena afiafi, sa ou lagonaina se faamautinoaga lofituina o loo ou i ai faatasi ma se molimau faapitoa a Iesu Keriso.
Ou te faamoemoe o le a outou aloa’ia le avanoa tou te faalogologo ai nei i se Aposetolo a le Alii, o le e mulimuli i le perofeta ma molimau a le Faaola, o Iesu Keriso. Elder Andersen, ua matou sagisagi atu i au aoaoga.