O Le Mana o Iesu Keriso ma le Aoaoga Faavae Mama
O Le Mana o Iesu Keriso ma le Aoaoga Faavae Mama faatasi ma Elder Neil L. Andersen
Aso Sa, 11 Iuni, 2023
Elder Neil L. Andersen: Faafetai lava, Elder Gilbert. Faafetai, Brother Webb. O le toalua o a’u uo ma paaga pele. Ou te alofa tele ia i la’ua.
Pe le’i matagofie ea lena aufaipese? E ese foi le mamalu! Matua’i maoa’e lava outou uma. Faafetai tele lava!
Sa ou mafaufau i na upu a’o usuina le fuaiupu lona tolu: “O Iesu lo’u sulu; o lo’u malosi lea. O lona lava mana ou te malo ai.”1 Pe a na mafai ona tatou avatua le lagona o na upu ia o’oo’o i loto o i latou tatou te a’oa’oina, o le a latou puipuia ai se tasi.
O se mea ofoofogia le i ai i le Tapeneko, a ea? Tatou te le o toe o mai soo iinei. O nisi o outou e le’i o mai lava iinei; tou te laiti tele. O nisi o i tatou e tele ni manatuaga mai lenei Tapeneko tuai. E toafia o i ai iinei e i ai se manatuaga manaia mai le i ai muamua iinei? (Sii mai le lima.)
Tolusefulu tausaga ua mavae, sa valaauina ai ma’ua ma Elder Christofferson i le konafesi aoao ia Aperila. Sa ma nonofo, pei ona ou manatuaina, i o tonu lava ae le’i me’i mai i nofoa lanumumu. O se tasi o Aposetolo, o Elder Marvin Ashton, sa gasegase i le taimi o lena konafesi, ma o lea sa ma molimau ai ma Elder Christofferson i lena konafesi. Sa le’i lava se taimi ma te saunia ai.
E i ai se mea ou te manatua iinei o le a ou faasoaina atu.
Ou te le’i toe lauga lava i le Tapeneko talu mai lena molimau i le 1993. Sa ma o mai i le konafesi mulimuli na tuu e fai iinei i le Tapeneko; ia Oketopa o le 1999.
Sa i ai se mea na tupu na matua faate’ia ai a’u. O le taeao o le Aso Faraile a’o lumanai le konafesi—i le 7:30 i le taeao. Sa ou i ai i lo’u ofisa ae tatagi le telefoni. Sa fai mai le leo i le isi itu, “Brother Andersen, o Peresitene Hinckley lea.” O a’u o se Pulega Aoao, ae laitiiti lava se taimi na ma mafuta ai ma Peresitene Hinckley. Ma o ana ulua’i upu nei ia te a’u—o le tala moni lava—sa ia fai mai, “O le a le ituaiga sui momo’e e i ai oe?” Sa ou matuai le iloa lava ona tali atu, ae sa ou faasenunui atu se tala. Sa faaauau o ia: “O loo gasegase Elder Robert Hales. E fai lona taotoga i le Aso Gafua ma e le mafai ona lauga i le taeao a taeao. Matou te mananao e te lauga e sui mo ia i le taeao o le Aso Toonai. Ua lelei? Tofa!” Na aumaia e lena mea le tele o itula o le atuatuvale ma le gatete. Na o le pau lena o lo’u aafiaga o le tuuina atu o se lauga ua atofaina mai i le konafesi aoao iinei i le Tapeneko.
Ana lava le taimi, semanu matou te fiafia e faalogologo i o outou aafiaga uma.
Se’i ou amata i le faailoa atu o lo’u alofa ma alofaaga o le Au Peresitene Sili ma le Korama a Aposetolo e Toasefululua mo outou taitoatasi. E loloto lo matou faaaloalo ma lo matou faamemelo i lo outou faatuatua ma lo outou tuuto i lo tatou Faaola o Iesu Keriso ma Lana galuega paia. O aso taua tele nei o le talafaasolopito. E fiaselau afe ola o o tatou talavou o le Au Paia o Aso e Gata Ai o loo lagomalū i totonu o la outou tosinaga. Pe na valaau oe o se faiaoga seminare po o le inisitituti i lau uarota po o le siteki, pe sa filifili oe o se faiaoga i se tasi o a tatou inisitituti e 638 i le salafa o le lalolagi po o a tatou seminare i le taimi o a’oga--faatoa ou fesili atu lava ia Brother Webb pe fia a tatou vasega o i ai, ae fai mai masalo e 80,000 vasega seminare. O vasega seminare i le taimi o a’oga, e i le Iunaite Setete i sisifo, Kanata, ma a’oga a le Ekalesia. Pe o e auauna atu foi i soo se vaega e lagolago ai i le galuega mo Seminare ma Inisitituti, ou te faafetai atu mai le loto e avea ai ma sui o le Au Peresitene Sili ma le Korama a le Toasefululua. Matou te alolofa ia te outou ma o loo matou tatalo foi mo outou. Matou te mafaufau ia te outou o soo o Iesu Keriso a o tatou tapenaina se nuu amiotonu i atunuu uma, aganuu, ma gagana o le lalolagi, e sauniuni ai mo le toefoi mamalu mai o le Faaola i le lalolagi.
Ina ia faamamaluina ai outou taitoatasi ma faiaoga tamalii o e na mua i malae i lenei galuega tele, sa faia ai se ma talanoaga puupuu ma Peresitene Andy Diaz, o se peresitene o se siteki iinei i le Aai o Sate Leki. Sa ma talanoa e uiga i se faiaoga seminare i le taeao po i le taimi o lona talavou. Ma o le sootaga manaia tele lenei. Ina ua mavae ona auai i le Ekalesia i le 13 o ona tausaga i le aai o Tampa, Florida, sa amata ona auai Peresitene Diaz i le seminare i le tasi le tausaga mulimuli ane i le vasega seminare lava lea e tasi i le taeao ma lo’u toalua lelei o Kathy. Ia, o le a outou matauina e fai si ona matua tele nai lo Kathy. E eseese uma lava faiga a le olaga ia i tatou. O le faia’oga o le tina o Kathy, lo’u tina faale-tulafono i le lumanai, o Sister Martha Williams. Faafofoga mai i le ma talanoaga puupuu lenei ma Peresitene Diaz.
[Amata le vitio]
Elder Andersen: O loo ma i ai iinei ma Peresitene Andy Diaz, le peresitene o le Siteki a Salt Lake Riverside. E i ai se mea e masani ai ma’ua ma Peresitene Diaz, o lena mea o lo’u toalua, o Kathy, sa i ai i lana vasega seminare i le silia ma le 50 tausaga talu ai, ae le gata i lena, o lo la’ua faiaoga o le tina o Kathy, o Sister Martha Wiliams. O ia o se tamaitai ofoofogia. Ou te iloa lelei o ia. Ua maliu o ia. Ae ou te manao e aumaia ni nai lagona ii, i le silia ma le 50 tausaga mulimuli ane, mai se alii ua avea nei ma peresitene o le siteki, sa auai i le Ekalesia ina ua 13 ona tausaga ona alu lea i le seminare i se tausaga mulimuli ane, e uiga ia Sister Martha Williams. Aumai lava na o sina lagona tauaofa’i, Peresitene Diaz, e uiga i lenei tamaitai sa avea ma ou faiaoga seminare.
Peresitene Andy Diaz: Atonu o ia o se tasi o tamaitai aupito malolosi e toatolu i lo’u olaga--o lo’u tina, lo’u toalua, ma Sister Williams.
Elder Andersen: E te le o faateleina?
Peresitene Andy Diaz: Ou te le o faateleina.
Elder Andersen: Aisea e matua taua ai lenei tagata ia te oe?
Peresitene Diaz: Sa fesoasoani o ia ia ou tuputupu a’e ma aoao le talalelei, aua o a’u o se tagata fou lava i le Ekalesia i lo’u 13, ona amata lea o la’u seminare i le 14. Ma o ia moni lava sa fesoasoani ia te au e aoaoina le talalelei. Ina ua ou i ai i le a’oga faaitumalo, sa maua la’u gauega ma sa tatau ona ou alu e faigaluega i le itula e lua i le taeao, ona ou alu faasasa’o lea mai la’u galuega i le itula e lua, i le seminare i le taeao i le ono ona ou te le’i manao e misi; o le taua lena ia te au. E te iloa oe, ua uma ona ia saunia le lagona “Ia tatou maua se aafiaga faaleagaga,” ma sa ou manao i na aafiaga faaleagaga.
Elder Andersen: Na tumau o ia i luga o le mama a’ia’i o le talalelei ma le faigofie o le talalelei, pe sa ia--ou te manatua i le 50 tausaga talu ai i nisi o a’u vasega, sa matou sailia mea fou sa matou matua’i le iloaina lava se mea i ai.
Peresitene Diaz: Sa ia a’oa’o moni mai lava a’u i le aoaoga faavae mama a’ia’i a Keriso. Sa talanoa o ia e uiga i le faatuatua ma le salamo ma mea sa manaomia ona matou faia ina ia mafai ai ona toe foi atu i lo tatou Tama o i le Lagi, ma tumau e oo i le iuga.
Elder Andersen: Pe na fesoasoani o ia i lou liuga patino i le Faaola o Iesu Keriso, lea ua tumau i lou olaga atoa?
Peresitene Diaz: Ioe, na ia faia. Ona sa ia fesoasoani ia te au ia maua se sootaga ma lo tatou Tama o i le Lagi ma le Faaola. Sa ou aoao e uiga i le Faaola mai ia te ia. O mea uma foi sa i tusitusiga paia, sa mafai ona ia tatala mai ia matou malamalama ai faapea na aoaoga faavae na aoao mai e le Faaola. Sa i ai lana molimau, ma ou te le manatua lona faaumaina o se vasega e aunoa ma le tuuina mai o lana molimau i le talalelei a le Faaola ma mea sa ia aoao mai i lena aso; ia sa taua moni. O se tagata malosi tele; na te ‘auiina oe i le alofa o le talalelei sa ia te ia. Ma a uma ou mataituina o ia; ona ou taumafai lea e faata’ita’i i mea sa ia faia.
Elder Andersen: A’o e toe tepa nei la i tua, afai e i ai se mea e te saunoa atu ai i faiaoga seminare ma inisitituti--i se tasi e pei o oe, e fou i le Ekalesia, faatoa sau i totonu--mata o le a se mea e te fautuaina i latou e fai, Peresitene Diaz?
Peresitene Diaz: Alolofa ia outou tamaiti a’oga. Tuu atu ia latou iloa e te alofa i le Tama Faalelagi ma e alofa foi le Tama Faalelagi ia i latou. E alofa le Faaola ia i latou. Ma afai o le a outou mulimuli i le Atua ma Ana perofeta, o le a mafai ona outou toe foi atu ma mau faatasi ma lo tatou Tama Faalalelagi.
Elder Andersen: Ou te talitonu o le a mitamita ou matua ia te oe. Ou te iloa Sister Williams, o lē ua faauu nei mai lenei lalolagi i le 25 tausaga talu ai, o le a mitamita lava foi o ia ia te oe.
Peresitene Andy Diaz: O se mea lena ua matua faafiafiaina ai lo’u aso.
Elder Andersen: E, faafetai tele lava. Faafetai foi mo le faasoa mai o nei mea ia i matou.
Peresitene Diaz: E lē afaina.
[maea le vitio]
Elder Andersen: O loo tatou faatasi ai ma Brother ma Sister Diaz i le po nei. E mafai ona lua tutu, Brother ma Sister Diaz, ina ia mafai ona matou faailoa atu oulua? Faafetai tele lava.
O Peresitene Diaz o se sui o le tosinaga ua i ai outou ma o le a i ai pea i luga o tupulaga faia’e ona o lo outou faatuatua i le Togiola ma le ala o loo outou tuu ai o Ia i luga, o se malamalama i mea uma tou te fai atu ai ma fai.
Faatasi ai ma la outou tautua ua avea moni o se faataitaiga, ou te tatalo i le asō ia mafai ona ou faasoa atu se malamalamaaga se tasi pe lua foi o le a faagaeetia faaleagaga ia te outou ma o le a, i se ala aupito itiiti lava, fesoasoani ai ia te outou e faamalolosia le auaunaga amiotonu o loo outou tuuina atu.
O se mafaufauga muamua lea mo outou: Ia faatele ona tatou aoao atu ma molimau atu ma le mamana atili ia Iesu Keriso.
Mafaufau i le fetaui lelei o nei upu mai ia Peresitene Russell M. Nelson i le konafesi aoao ia Aperila talu ai nei, mo tamaiti a’oga o loo e aoaoina: “Po o a lava au fesili po o ou faafitauli o i ai, o le tali lava e maua i taimi uma i le soifuaga ma aoaoga a Iesu Keriso. Aoao atili e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma. Liliu Atu ia te Ia! Mulimuli ia te Ia!”2
Ina ua valaauina au e avea ma se tasi o le Au Pulega Aoao i le 30 tausaga talu ai i le popo fou o le vaitau 1990, o le iva mai le sefulu tagata matutua i le Iunaite Setete sa faailoa o ni Kerisiano. E tusa ai ma le Nofoaga Tutotonu o Sailiiliga a Pew, ua 64 nei pasene o le faitau aofai o Kerisiano i le Iunaite Setete ma e ono pa’ū i lalo ifo o le 50 pasene i totonu o nai fiasefulu tausaga. Ua feagai foi isi atunuu pe o loo feagai nei ma luitau faapena o le faatuatua.
Ioe, e le faapea o outou uma o loo auai mai i le asō e mai atunuu ua avea ia le FaaKerisiano ma tapuaiga fuaao, ma o le toatele foi o outou e mai eria o loo tumau malosi ai le faatuatua ia Iesu Keriso. Ae po o fea lava e te nofo ai, ua tatou iloa o le auala i le ola e faavavau e amata i se liua loloto ua mautu i lo tatou Faaola, ma se migao mo Lona soifua ma Lana misiona paia.
Na fai atu Toma ia te ia, Le Alii e, … Matou te mafaia faapefea ona iloa le ala? Ua fetalai atu Iesu ia te ia, O a’u nei le ala, ma le upumoni, ma le ola, e le alu atu lava se tasi i le Tama, pe a le ui mai ia te a’u.”3
I le savali amata i le Mo Le Malosi o le Autalavou, o loo tusia ai e le Au Peresitene Sili: “O outou moni lava o ni agaga filifilia a le Tama Faalelagi, na auina mai i le lalolagi i lenei taimi e faia ni mea taua. … Liliu atu i le Faaola. O Ia o le ‘malosi o le autalavou.’”4
Sa ou i ai talu ai nei i le fale o le seminare a fanau a la’u fanau. Sa faagaeetia lava au ona o luga o puipui sa tele le mau ata o le Faaola ma Ana lava fetalaiga ma isi mau e molimau ai ia te Ia.
Sa aoao mai e Brother Chad Webb le mataupu faavae lenei: “O le auala e tasi e sili ona taua e mafai ai ona tatou fesoasoani e faateleina le faatuatua i le tupulaga faia’e o le tuu atoatoa lea o Iesu Keriso i le totonugalemu o la tatou aoao atu ma le aoao mai.”5
Pe tatou te le’i matua’i aafia ea i le konafesi aoao ia Aperila ina ua sii mai e Peresitene Dallin H. Oaks ia upu a Nifae, “Taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia,”6 ona ia faaaoga lea o le vaega o totoe o lana savali mamana e faasoa mai ai “se filifiliga o afioga a lo tatou Faaola—o mea na Ia fetalaia” i le Feagaiga Fou ma le Tusi a Mamona. Sa faaiu e Peresitene Oaks i lana tautinoga faigofie faaperofeta lenei: “Ou te faamautu atu le moni o nei aoaoga i le suafa o Iesu Keriso, Amene.”7
O loo i ai se mana maoa’e i fetalaiga a Iesu Keriso:
“Ole atu, ona foaiina mai ai lea ia te outou; ia outou saili, ona outou maua ai lea.”8
“O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia.”9
“Faauta, o Au o Iesu Keriso, le Atalii o le Atua. … O A’u o le malamalama ma le ola o le lalolagi.”10
Afai e te taumafaufau po o le a se tala e fai, tautala i upu a le Faaola. Tautala e uiga i Ona aafiaga; tautala e uiga i Ana faataoto; tautala i upu o mau ma perofeta e molimau atu ai ia te Ia.
A o tatou aoao atu ma molimau e uiga ia Iesu Keriso, o le a faamautu e le Agaga Paia i loto o o tatou so’o talavou le moni o Lona soifua ma aoaoga i le mana e sili atu ona tumau nai lo le mana o a tatou lava aoaoga.
Ia tatou mafaufau ma le lotomaualalo pe o tatou faia mea uma e ao ona tatou faia i le aoao atu ma le molimau atu, e pei ona talosagaina e Peresitene Nelson, e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma.
Ona o le mamanu o lo tatou aoao atu i le tuanai atonu e le lava mo le taimi nei, ma mea o le a oo mai i le lumanai, ia tatou faalautele lo tatou lava malamalama ma, e pei ona fautua mai Peresitene Nelson, “aoao atili” i tatou lava ma fautuaina le autalavou ma talavou matutua o le Ekalesia ina ia “aoao atili” e uiga i “le soifuaga ma aoaoga a Iesu Keriso.”11
Ia, o lo’u mafaufauga lona lua: Ia tatou tausisia le mama a’ia’i ma le faigofie o le aoaoga faavae.
O mea ua tatou iloa moni e uiga i lo tatou Tama Faalelagi; o lo tatou Faaola o Iesu Keriso; o lo tatou muai olaga; o le fuafuaga a lo tatou Tama o le fiafia mo i tatou; o mataupu faavae o le faatuatua ma le salamo; o sauniga faaola, poloaiga, feagaiga, usiusitai, ma le tumau; ma o tatou faamanuiaga folafolaina i tua atu o lenei lalolagi faaletino—ua matua’i manaia le manino o nei mea uma, e le tatau lava ona tatou lagonaina se manaomia ona o atu “i talaatu o le maka”12 e pei ona aoao mai tusitusiga paia.
Tatou te faatotonugalemuina a tatou aoaoga i lo tatou Tama Faalelagi, Iesu Keriso, ma la la’ua aoaoga faavae ua faaalia mai e fesoasoani ai i o tatou talavou ia faateleina le faatuatua ia i La’ua, ia liua ia i La’ua, ma maua a La’ua faamanuiaga folafolaina.
O aoaoga faavae o le Ekalesia o loo maua i tusitusiga paia ma i aoaoga a perofeta, o lona tiutetauave le fesoota’i mai o le finagalo o le Alii.
O le aoaoga faavae o i tusitusiga paia ma o loo aoao mai e perofeta e aofia ai le mataupu faavae o molimau e toatele, o se mataupu faavae tou te faalogo soo i ai i konafesi aoao ma se tasi na ou faasoaina atu i le silia ma le 10 tausaga talu ai: “E i ai nisi e fesiligia lo latou faatuatua pe a latou maua se faamatalaga na faia e se taitai o le Ekalesia i le fiasefulu tausaga talu ai lea ua foliga mai ua le ogatusa ma la tatou aoaoga faavae. O loo i ai se mataupu faavae taua o loo puleaina ai le aoaoga faavae o le Ekalesia. O le aoaoga faavae e aoaoina e uso uma e toa 15 o le Au Peresitene Sili ma le Korama a le Toasefululua. E le o natiaina i se parakalafa faigata o se lauga se tasi. O mataupu faavae moni e aoaoina soo e le toatele. O la tatou aoaoga faavae e le faigata ona maua.”13
O mafai ona outou vaai i le taua o le aumaia e le aunoa o aoaoga a perofeta ma aposetolo i talanoaga i o outou potu aoga? O taitaiga a le Alii mo fesili ma atugaluga i lo tatou lalolagi i ona po nei e sau mai ia i latou ua uma ona faauuina i le pule faaaposetolo. Afai ua fai ifo le talitonuga i perofeta ma aposetolo, o faalavefau, o ta’ita’igasese, ma faanaunauga o le lalolagi e mafai ona motuese ai se tasi mai ona taula mautu faaleagaga. Ia pulunaunau atu i konafesi aoao ma talanoaina aoaoga taua e aumaia ai. Ia faailoa manino le matafaioi paia a i latou ua faauuina e le Alii. A o aga’i mamao ese atu le lalolagi mai poloaiga a le Atua, o le a faateleina le taua o le matafaioi a Aposetolo.
I le tausisia o le mama a’ia’i o le aoaoga faavae a le Alii ma ia malamalama gofie ai, faaeteete ina ia tumau i totonu o tuaoi ua uma ona faatuina e le Atua, taumamamo mai mea sese e oo mai e ala i le matematega ma manatu faaletagata lava ia e le faavaea. E mafai e na manatu ona matuai faatosina i nisi, ae e le o i ai se malosiaga o le mea moni lea e faamalosia ai le faatuatua.
Ou te fiafia i le lesona na aoao mai e Peresitene Dallin H. Oaks i lona atalii ina ua fai atu e lona atalii se fesili e le’i manino ona faamatalaina i le aoaoga faavae a Keriso. O lana tali: “Atalii, ou te le iloa le tali i lena fesili, ae se’i ou tali atua se fesili ou te iloa.” Ona ia tuu atu lea o le molimau e uiga i le Perofeta o Iosefa Samita ma le Uluai Faaaliga. Ia tatou fai atu ma le lotonaunau, “Ou te le iloa se mea e uiga i lena mea, ae o le mea lea ou te iloa.”
Mafaufau i nei fesili ma tali:
“Brother Jones, o le a le fesootaiga i le va o le Big Bang ma Atamu ma Eva?” “Ou te le iloa le tali i lena fesili, ae se’i ou ta’u atua ia te oe le mea ua tatou iloa e uiga ia Atamu ma Eva.”
“Sister Gonzalez, aisea e le tele ai ni mea tatou te iloa e uiga i lo tatou Tina i le Lagi?” “Ou te le iloa le tali i lena fesili, ae ou te iloa o oe “o se afafine pele o ni matua faalelagi, e i ai se natura paia ma se taunuuga e faavavau.’14
Mafaufau i le ala e mafai ai ona e liliu fesili lelei, nai lo fesili e faaosooso ai matematega, i ni tali e fausia ai le faatuatua i lo tatou Faaola o Iesu Keriso. Ma o se lu’i lenei mo outou. Fesoasoani e totō i au tamaiti a’oga le malamalamaaga faapea e le tutusa le fatuina o fesili uma. E fesoasoani le malamalama ma le matua faaleagaga e tuueseese ai fesili taua mai fesili mananaia.
Faatasi ai ma le sa’o lelei, manino, ma le faigofie, tatou te valaaulia ai le molimau faamautinoa a le Agaga Paia. “A maliu mai le Fesoasoani, … le Agaga lea o le upumoni, … o ia lea e molimau ia te au.”15
Na faamatalaina e Polika Iaga ia aoaoga a Iosefa Samita i le ala lea: “Sa ia aveina le lagi, i le talanoa atu faalemafaufau, ma aumaia i lalo i le fogaeleele; ma sa ia aveina le lalolagi, e avae ai i luga, ma tatala ai, i le manino ma le faigofie, o mea a le Atua.”16
Ia faaeteete i faamatalaga ma tala na faamatala atu ia te outou, e le o faaopoopoa i ai nisi mea. Taumafai ia mautinoa o mau ma faamatalaga e te sii maia, o loo i ai i le matalalaga na faamoemoeina ai.
E faigofie le tata’i atu i se mea fou pe soona faaosofia i talaatu o le si’ui o lo tatou malamalama. Nofo ai i totonu o le saogalemu o le mama a’ia’i ma le faigofie o le aoaoga faavae.
Ia faaeteete i ala o faasalalauga e te filifilia, tala faaletagata lava ia, ma lesona faatino. O le faaaogaina lelei, e faaopoopo ai le naunau i ai ma le loloto. A oo ina soona faamamafaina, e mafai ona tata’iese ai mai lau aoaoga. E mafai ona ufitia le savali i le metotia.
Na molimauina e le perofeta o Alema faapea o tala fiafia o le talalelei na “faailoa mai ia i tatou i upu manino, ina ia mafai ona tatou malamalama, e lē mafai ona tatou sese.”17
“Aua foi a faaletonu le leo o le pu, o ai ea se na te sauni e tau?”18
Mafaufau pe o faapefea ona manaia le manino o nei mau:
“O mai ia te a’u.”19
“A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i [aso taitasi], i le mulimuli mai ai ia te au.”20
“Afai tou te faamagaloina atu tagata i a latou agasala, e faamagaloina foi outou e lo outou Tama o i le lagi.”21
“Ma o le a tatou tofotofo ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”22
“O la’u poloaiga lenei, ia outou fealofani, e pei ona ou alofa atu ia te outou.”23
I lana lauga mamana “Faalogo ia te Ia,” na saunoa ai Peresitene Nelson, “E fesootai mai le [Tama Faalelagi] ma le faigofie, filemu, ma i se manino matuā maofa lava lea e le mafai ona tatou malamalama sese ai ia te Ia.”24
Manino, sa’o lelei, faigofie o le ala faalelagi lea o le aoao atu.
Ia e atamai a o e faapalenia le aoaoga faavae e te aoao atu. Tuu se mamafa talafeagai i se matautu o le aoaoga faavae i totonu o le matalalaga o isi upumoni fesootai. Manatua le fautuaga a le Faaola e uiga i le aoao atu o poloaiga: “E tatau pe ana faia nei mea, ae aua foi le tuu na mea.”25
Na faamalamalama mai e Elder Neal A. Maxwell, “O mataupu faavae o le talalelei ua lalagaina faatasi i se ie lea e fesootai ai i latou ma paleni i le tasi ma le isi.”26
Mafaufau i ai: O le alofa o le Atua ma tulafono a le Atua, faamagalo atu ma le salamo, o le alofa mo le Atua ma le alofa mo isi, o le faitalia ma le tali atu.
E pei ona ta’ua i le tele o taimi, aoao atu ia le tau ina malamalama, ae aoao atu ina ia le malamalama sese ia te oe.
O le mea mulimuli, e pei foi ona tatou iloa lelei uma, e tatau ona faasoa atu nei mea moni i se faiga e talialelei ma uuna’ia ai le Agaga. E le mafai ona tatou faamalosia le Agaga. Tatou te tatalo ma valaaulia le Agaga, ae tatou te le taumafai faa’ole’ole e faafoliga se aafiaga faaleagaga.
I le silia ma le 30 tausaga talu ai, sa faamatala mai ai e Peresitene Dallin H. Oaks ia te au se aafiaga ma lona afafine o Jenny, a o talavou i lena taimi. O ana upu nei: “Sa i ai Jenny i se vasega a Tamaitai Talavou po o se gaoioiga i le taimi na talavou ai o ia. Ina ua sau o ia i le fale, sa ma fesili atu ma lo’u toalua ia te ia pe na faape’ī mai le latou tauaofiaga, e pei ona faia e matua. Sa fai mai Jenny, ‘E, ia na fai mai le faiaoga, “O le po nei o le a tatou maua ai se aafiaga faaleagaga. Afai e uulima tagata uma i le li’o, o le a maua so tatou aafiaga faaleagaga.”’”
E faaauau pea ona ou ta’ua Peresitene Oaks: “Sa ou fesili ia Jenny, ‘O le a sou lagona sa i ai?’ Ma sa ia fai mai, ‘Pei sa ou faafefea ea!’” (Atonu o le asō, i le 30 tausaga mulimuli ane, tatou te faapea ai, “Sa ou inoino.” Ou te le o mautinoa po o a tonu ni upu.) Sa faaauau pea Peresitene Oaks, “Sa ou fai atu, ‘Ua lelei aua a ou faalogo i se mea faapea, ou te lagona foi le faafefea ea.’” Ona saunoa mai lea o Peresitene Oaks, “Sa ou aoao atu ia te ia e le faatulagaina ni taimi o aafiaga faaleagaga, ae e tutupu lava pe a tatou sailia le tosinaga a le Agaga o le Alii.”
Manatua le alofa na lagonaina e Peresitene Diaz mai lona faiaoga seminare, o Sister Williams? Tatou te valaaulia le Agaga a o tatou aoao atu i le alofa, filemu, le gaoia, agamalu, ma le faatuatua.
Ua outou iloa uma le mau lenei: “O ia o lē e mauaina le afioga e ala i le Agaga o le upumoni e maua e ia e pei ona talai atu i le Agaga o le upumoni. … O le mea lea, o ia o lē e talai atu atoa ma ia o lē e mauaina, e malamalama i le tasi, ma e faagaeetiaina ma olioli faatasi i laua uma.”27
O lea la ua le na o oe e nafa ma lenei mea ae o i latou foi o i lou potuaoga. O le a aoaoina e o tatou tamaiti a’oga mai ia te oe e na o le usiusitai ma le manatuaina pea o Ia e mafai ai ona latou maua pea Lona Agaga e faatasi ma i latou.
O upu nei a Peresitene Eyring:
“E maua le mana e aoaoga faavae a o faamautu mai e le Agaga Paia ua moni ia. Tatou te saunia i latou o tatou aoaoina, i le mea sili tatou te mafaia, ia maua musumusuga filemu a le leo mālu ma le itiiti. O lena tulaga e manaomia ai se faatuatua ia Iesu Keriso. E manaomia ai sina lotomaualalo, sina naunautai e gauai atu i le finagalo o le Faaola mo i tatou. O le tagata o le a e fesoasoani atu i ai atonu o loo i ai ni vaega itiiti o ia tulaga manaomia, ae e mafai ona e uunaia ina ia mananao i latou e talitonu. E sili atu nai lo lena, e mafai ona e maua le lagolago mai se isi e uiga i mana o aoaoga faavae. E mafai e le upumoni ona saunia lona lava ala. O le tau lava o le faalogologo i upu o aoaoga faavae e mafai ona totōina ai le fatu o le faatuatua i le loto. Ma e oo lava i se fatu itiiti o le faatuatua ia Iesu Keriso, na te valaauliaina le Agaga.”28
Mananaia ia upu. Ia, e ese lo outou faaaloalo. Faafetai tele mo le faatagaina o a’u e faaalu lenei taimi ma outou. Matou te alolofa ia te outou, ma faafetai atu mo mea uma o loo outou faia e faamalolosia ai le autalavou ma talavou nofofua matutua, ma faamalolosia ai lo latou faatuatua ia Iesu Keriso.
I le avea ai o se auauna a le Alii, ma faatasi ai ma la’u pule faaaposetolo, ou te faamanuia ia te outou ia faatutumuina o outou mafaufau ma o outou loto i le alofa, le alofa mutimutivale, o aoaoga, ma se migao loloto mo le taulaga togiola e le mafaatusalia a lo tatou Alii o Iesu Keriso. Ou te faamanuia ia te outou, pe afai o lo outou manao lea, ia faateleina lo outou tomai e aoao atu le aoaoga faavae a Keriso ma le mama a’ia’i ma le mana, ma ia outou vaai ma lagonaina le molimau faamautinoa a le Agaga Paia i luga o a outou tamaiti a’oga.
Ou te tuua outou ma la’u molimau mautu ma le mautinoa o Iesu o le Keriso. Ma ou te molimau atu ia te outou i Lana folafolaga ina ua Ia fetalai, “Ai se na te ta’uta’u au i luma o tagata, o au foi ou te tautau o ia i luma o lo’u Tama o i le lagi.”29 I le suafa o Iesu Keriso, amene.