ព្រះចេស្តានៃព្រះយេស៊ូវគ្រីស្ទ និងគោលលទ្ធិដ៏បរិសុទ្ធ
ព្រះចេស្តានៃព្រះយេស៊ូវគ្រីស្ទ និងគោលលទ្ធិដ៏បរិសុទ្ធជាមួយអែលឌើរ នែល អិល អាន់ឌើរសិន
ថ្ងៃ អាទិត្យទី ១១ ខែ មិថុនា ឆ្នាំ ២០២៣
អែលឌើរ នែល អិល អាន់ឌើរសិន ៖សូមអរគុណ អែលឌើរ ហ្គីលប៊ឺត ។ សូមអរគុណបងប្រុស វិប ។ មិត្តភក្តិ និងមិត្តរួមការងារពីរនាក់ជាទីស្រឡាញ់របស់ខ្ញុំ ។ ខ្ញុំស្រឡាញ់ពួកលោកខ្លាំងណាស់ ។
តើក្រុមចម្រៀងនោះអស្ចារ្យណាស់ មែនទេ ? ហើយមានគារវភាពយ៉ាងខ្លាំង ! បងប្អូនពិតជាអស្ចារ្យខ្លាំងណាស់ ។ សូមអរគុណច្រើន !
ខ្ញុំបានគិតអំពីពាក្យពេចន៍ទាំងនោះ នៅពេលដែលបងប្អូនច្រៀងព្រមគ្នាក្នុងវគ្គទីបី « ទ្រង់ជាពន្លឺខ្ញុំ ហើយជាកម្លាំងចិត្ត ។ ខ្ញុំមានឫទ្ធិឧត្តមដោយព្រះចេស្ដាទ្រង់ » ។១ បើយើងអាចទទួលអារម្មណ៍ពីពាក្យពេចន៍ទាំងនោះចាក់ចូលយ៉ាងជ្រៅទៅក្នុងឆ្អឹងរបស់អ្នកដែលយើងបង្រៀន នោះវានឹងអាចរក្សាពួកគេឲ្យមានសុវត្ថិភាពខាងវិញ្ញាណ ។
តើវាពិតជាអស្ចារ្យណាស់ដែលនៅក្នុងរោងឧបោសថ មែនដែរឬទេ ? យើងពុំចាំបាច់ត្រូវមកទីនេះញឹកញាប់ទៀតឡើយ ។ បងប្អូនខ្លះមិនដែលបានមកទីនេះទេពីមុនមក ដោយបងប្អូននៅក្មេងពេក ។ យើងខ្លះមានអនុស្សាវរីយ៍ជាច្រើនពីរោងឧបោសថចាស់ដ៏ធំនេះ ។ តើមានបងប្អូនប៉ុន្មាននាក់នៅទីនេះមានការចងចាំល្អពីកន្លែងនេះ ? ( សូមលើកដៃ )
សាមសិបឆ្នាំមុន អែលឌើរ គ្រីស្តូហ្វឺសិន និងខ្ញុំត្រូវបានហៅនៅក្នុងសន្និសីទទូទៅខែ មេសា ។ តាមខ្ញុំនៅចាំ យើងអង្គុយនៅទីនេះហើយយើងបានឡើងមកអង្គុយលើកៅអីពណ៌ក្រហមទាំងនោះ ។ សាវកមួយរូប គឺអែលឌើរ ម៉ាវីន អាសតុន បានឈឺអំឡុងសន្និសីទនោះ ដូច្នេះអែលឌើរ គ្រីស្តូហ្វឺសិន និងខ្ញុំបានថ្លែងសាក្សីដ៏រាបទាបរបស់យើង ។ យើងពុំមានពេលគ្រប់គ្រាន់រៀបចំឡើយ ។
ខ្ញុំមានការចងចាំមួយទៀតនៅទីនេះ ដែលខ្ញុំនឹងចែកចាយមួយបងប្អូន ។
ខ្ញុំមិនដែលមានឱកាសនិយាយម្តងទៀតទេ តាំងពីទីបន្ទាល់នៅឆ្នាំ ១៩៩៣ ។ យើងបានមកសន្និសីទចុងក្រោយដែលបានធ្វើឡើងនៅទីនេះ នៅរោងឧបោសថនេះ វានៅ ខែ តុលា ឆ្នាំ ១៩៩៩ ។
មានអ្វីមួយបានកើតឡើងដែលធ្វើឲ្យខ្ញុំភ្ញាក់ផ្អើល ។ វាគឺជាព្រឹកថ្ងៃសុក្រពីមុន សន្និសីទ—ម៉ោង ៧:៣០នាទី ។ ខ្ញុំនៅក្នុងការិយាល័យរបស់ខ្ញុំកាលដែលទូរសព្ទបានរោទិ៍ឡើង ។ សម្លេងម្ខាងទៀតបានសួរថា « បងប្រុស អាន់ឌើរសិន ខ្ញុំជាប្រធាន ហ៊ីងគ្លី » ។ ខ្ញុំគឺជាអ្នកមានសិទ្ធិអំណាចទូទៅ ប៉ុន្ដែខ្ញុំចំណាយពេលតិចណាស់ជាមួយប្រធាន ហ៊ីងគ្លី ។ ពាក្យដំបូងរបស់លោកមកកាន់ខ្ញុំ—ខ្ញុំនិយាយពិតមែន—លោកមានប្រសាសន៍ថា « តើប្អូនជាកីឡាករបម្រុងប្រភេទណាដែរ ? » ខ្ញុំពិតជាមិនដឹងថាត្រូវឆ្លើយតបយ៉ាងម៉េចទេ តែខ្ញុំរអ៊ូតិចៗ ។ លោកបានបន្ដថា ៖ « អែលឌើរ រ៉ូបឺត ហែល ឈឺ ។ លោកនឹងចូលវះនៅថ្ងៃចន្ទ ហើយនឹងមិនអាចឡើងនិយាយនៅព្រឹកស្អែកបានទេ ។ យើងចង់ឲ្យប្អូននិយាយជំនួសលោកនៅព្រឹកថ្ងៃសៅរ៍ ។ យល់ព្រម ? លាសិនហើយ » ! វាបាននាំមកនូវកង្វល់ជាច្រើនម៉ោង ។ វាគឺជាបទពិសោធន៍តែមួយគត់របស់ខ្ញុំ នៃការផ្តល់ឲ្យនូវការចាត់តាំងឡើងនិយាយនៅក្នុងសន្និសីទទូទៅនៅទីនេះក្នុងរោងឧបោសថ ។
បើយើងមានពេល យើងចង់ស្ដាប់បទពិសោធន៍ទាំងអស់របស់បងប្អូន ។
សូមអនុញ្ញាតឲ្យខ្ញុំចាប់ផ្តើមដោយបង្ហាញពីសេចក្តីស្រឡាញ់របស់ខ្ញុំនិងក្តីស្រឡាញ់របស់គណៈប្រធានទីមួយ និងកូរ៉ុមនៃពួកដប់ពីរនាក់ចំពោះបងប្អូនម្នាក់ៗ ។ យើងគោរព និងកោតសរសើរយ៉ាងក្រៃលែងចំពោះសេចក្ដីជំនឿ និងការលះបង់របស់បងប្អូនចំពោះព្រះអង្គសង្គ្រោះរបស់យើង គឺព្រះយេស៊ូវគ្រីស្ទ និងកិច្ចការដ៏បរិសុទ្ធរបស់ទ្រង់ ។ នេះគឺជាជំនាន់ប្រវត្តិសាស្ត្រដ៏សំខាន់យ៉ាងខ្លាំង ។ ជីវិតរបស់ពួកបរិសុទ្ធថ្ងៃចុងក្រោយវ័យក្មេងរបស់យើងរាប់រយពាន់នាក់ស្ថិតនៅក្នុងឥទ្ធិពលរបស់បងប្អូនយ៉ាងស្រទន់ ។ មិនថាបងប្អូនត្រូវបានហៅឲ្យបម្រើជាគ្រូបង្រៀនថ្នាក់សិក្ខាសាលា ឬថ្នាក់វិទ្យាស្ថាននៅក្នុងវួដ ឬស្តេករបស់បងប្អូន ឬក៏ត្រូវបានជ្រើសរើសឲ្យធ្វើជាគ្រូបង្រៀនម្នាក់នៅក្នុងថ្នាក់វិទ្យាស្ថានមួយក្នុងចំណោមថ្នាក់ទាំង ៦៣៨ របស់យើងនៅទូទាំងពិភពលោក ឬនៅថ្នាក់សិក្ខាសាលាដែលរៀនក្រោយចប់ម៉ោងសាលានោះទេ—ខ្ញុំទើបតែសួរបងប្រុស វិប ថាតើយើងមានថ្នាក់ប៉ុន្មាន ហើយគាត់បានឆ្លើយថា មានថ្នាក់សិក្ខាសាលាប្រហែលជា ៨០,០០០ ថ្នាក់ ។ ប្រាកដណាស់ ថ្នាក់សិក្ខាសាលាដែលរៀនក្រោយចប់ម៉ោងសាលា គឺនៅភាគខាងលិចសហរដ្ឋអាមេរិក កាណាដា និងសាលារៀនរបស់សាសនាចក្រ ។ ឬបើបងប្អូនបម្រើក្នុងសមត្ថភាពណាមួយ ដែលជួយដល់ការងាររបស់ថ្នាក់សិក្ខាសាលា និងថ្នាក់វិទ្យាស្ថាន ខ្ញុំសូមអរគុណបងប្អូនដោយស្មោះជំនួសឲ្យគណៈប្រធានទីមួយ និងកូរ៉ុមនៃពួកដប់ពីរនាក់ ។ យើងស្រឡាញ់បងប្អូន ហើយយើងអធិស្ឋានឲ្យបងប្អូន ។ យើងចាត់ទុកបងប្អូនជាសិស្សនៃព្រះយេស៊ូវគ្រីស្ទដូចយើងដែរ នៅពេលយើងរៀបចំមនុស្សសុចរិតនៅទូទាំងប្រជាជាតិ វប្បធម៌ និងភាសាទាំងឡាយនៃពិភពលោកនេះ ដើម្បីរៀបចំសម្រាប់ការយាងត្រឡប់ដ៏រុងរឿងរបស់ព្រះអង្គសង្គ្រោះមកកាន់ផែនដីនេះវិញ ។
ដើម្បីគោរពដល់បងប្អូនម្នាក់ៗ និងគ្រូបង្រៀនដ៏ឧត្តមដែលបានធ្វើកិច្ចការដ៏អស្ចារ្យនេះមុនបងប្អូន ថ្មីៗនេះ ខ្ញុំបានសន្ទនាយ៉ាងខ្លីជាមួយប្រធាន អេនឌី ឌីអាស ដែលជាប្រធានស្ដេកនៅទីនេះនៅទីក្រុង សលត៍ លេក ។ យើងបាននិយាយអំពីគ្រូបង្រៀនថ្នាក់សិក្ខាសាលាពេលព្រឹកព្រលឹមរបស់គាត់ កាលគាត់នៅក្មេង ។ ហើយនេះគឺជាការតភ្ជាប់ដ៏គួរឲ្យចាប់អារម្មណ៍ណាស់ ។ បន្ទាប់ពីបានចូលរួមក្នុងសាសនាចក្រនៅអាយុ ១៣ ឆ្នាំ នៅទីក្រុងថេមប៉ា រដ្ឋផ្លរីដា មួយឆ្នាំក្រោយមក ប្រធាន ឌីអាស បានចាប់ផ្ដើមចូលរៀនថ្នាក់សិក្ខាសាលា ដែលជាថ្នាក់សិក្ខាសាលាពេលព្រឹកព្រលឹមដែលភរិយាដ៏អស្ចារ្យរបស់ខ្ញុំ ខេធី ទៅរៀន ។ ឥឡូវនេះ បងប្អូននឹងសម្គាល់ឃើញថា គាត់មើលទៅចាស់ជាង ខេធី ច្រើន ។ ជីវិតកើតឡើងចំពោះយើងម្នាក់ៗខុសៗគ្នា ។ គ្រូបង្រៀនថ្នាក់នោះគឺជាម្តាយរបស់ ខេធី ដែលជាអនាគតម្តាយក្មេករបស់ខ្ញុំ ស៊ីស្ទើរ ម៉ាថា វិល្លាមស៍ ។ សូមស្ដាប់ការសន្ទនាដ៏ខ្លីនេះរវាងខ្ញុំ និងប្រធាន ឌីអាស ។
[ វីដេអូចាប់ផ្ដើម ]
អែលឌើរ អាន់ឌើរសិន ៖ ថ្ងៃនេះ ខ្ញុំនៅទីនេះជាមួយនឹងប្រធាន អេនឌី ឌីអាស ជាប្រធានស្ដេករីវើរសាយ សលត៍ លេក ។ ប្រធាន ឌីអាស និងខ្ញុំមានអ្វីមួយដូចគ្នា ហើយនោះគឺថា ភរិយារបស់ខ្ញុំ ខេធី បានរៀននៅថ្នាក់សិក្ខាសាលារបស់គាត់ជាង ៥០ ឆ្នាំមុន ហើយលើសពីនោះទៅទៀត គ្រូបង្រៀនរបស់ពួកគាត់គឺជាម្តាយរបស់ ខេធី ស៊ីស្ទើរ ម៉ាថា វិល្លាមស៍ ។ គាត់គឺជាស្ត្រីដ៏អស្ចារ្យម្នាក់ ។ ប្រាកដណាស់ ខ្ញុំស្គាល់គាត់យ៉ាងច្បាស់ ។ តាំងពីពេលនោះមក គាត់បានលាចាកលោកនេះ ។ ប៉ុន្តែខ្ញុំចង់ទទួលបានអារម្មណ៍ខ្លះនៅត្រង់នេះអំពីស៊ីស្ទើរ ម៉ាថា វិល្លាមស៍ ជាង ៥០ ឆ្នាំក្រោយមក ពីបុរសម្នាក់ដែលឥឡូវនេះជាប្រធានស្តេកម្នាក់ ដែលបានចូលរួមក្នុងសាសនាចក្រនៅពេលគាត់មានអាយុ ១៣ ឆ្នាំ ហើយបន្ទាប់មក បានចូលរៀនថ្នាក់សិក្ខាសាលាមួយឆ្នាំក្រោយមក ។ ប្រធាន ឌីអាស សូមប្រាប់យើងពីអារម្មណ៍ទាំងស្រុងអំពីស្ដ្រីរូបនេះ ដែលជាគ្រូបង្រៀនថ្នាក់សិក្ខាសាលារបស់លោក ។
ប្រធាន អេនឌី ឌីអាស ៖ គាត់ប្រហែលជាស្ត្រីមួយរូបក្នុងចំណោមស្ត្រីបីរូប ដែលមានឥទ្ធិពលខ្លាំងបំផុតនៅក្នុងជីវិតខ្ញុំ—ម្តាយខ្ញុំ ភរិយាខ្ញុំ និងស៊ីស្ទើរ វិល្លាមស៍។
អែលឌើរ អាន់ឌើរសិន ៖តើលោកមិននិយាយពន្លើសរឿងនេះទេឬ ?
ប្រធាន ឌីអាស ៖ខ្ញុំមិននិយាយពន្លើសទេ ។
អែលឌើរ អាន់ឌើរសិន ៖ តើគាត់អាចសំខាន់ខ្លាំងចំពោះលោកយ៉ាងម៉េចទៅ ?
ប្រធាន ឌីអាស ៖ គាត់បានជួយខ្ញុំឲ្យរីកចម្រើន ហើយរៀនដំណឹងល្អ ពីព្រោះខ្ញុំជាសមាជិកថ្មីនៃសាសនាចក្រនៅអាយុ ១៣ ឆ្នាំ ហើយបន្ទាប់មក នៅអាយុ ១៤ ឆ្នាំ ខ្ញុំចាប់ផ្ដើមចូលរៀនថ្នាក់សិក្ខាសាលា ។ ហើយគាត់គឺជាមនុស្សម្នាក់ដ៏សំខាន់ ដែលបានជួយខ្ញុំឲ្យរៀនដំណឹងល្អ ។ កាលខ្ញុំរៀននៅវិទ្យាល័យ ខ្ញុំបានការងារមួយដែលខ្ញុំត្រូវទៅធ្វើការនៅម៉ោងពីរព្រឹក ហើយបន្ទាប់ពីខ្ញុំចេញពីធ្វើការ ខ្ញុំចូលរៀនថ្នាក់សិក្ខាសាលាពេលព្រឹកព្រលឹមនោះតែម្ដងនៅម៉ោងប្រាំមួយព្រឹក ព្រោះខ្ញុំមិនចង់ខកខានថ្នាក់នេះទេ វាសំខាន់ណាស់ចំពោះខ្ញុំ ។ ហើយគាត់បានត្រៀមអារម្មណ៍ « តោះ ចាប់ផ្ដើមមានបទពិសោធន៍ខាងវិញ្ញាណ » ជាស្រេច ហើយខ្ញុំចង់បានបទពិសោធន៍ខាងវិញ្ញាណទាំងនោះ ។
អែលឌើរ អាន់ឌើរសិន ៖តើគាត់បន្ដបង្រៀនភាពបរិសុទ្ធនៃដំណឹងល្អ និងធ្វើឲ្យដំណឹងល្អមានភាពសាមញ្ញ ឬក៏គាត់—ខ្ញុំចាំថា ៥០ ឆ្នាំមុននៅក្នុងថ្នាក់របស់ខ្ញុំខ្លះ យើងបានស្វែងយល់ពីអ្វីដែលយើងមិនដឹងសោះតែម្ដង ។
ប្រធាន ឌីអាស ៖ គាត់ពិតជាបានបង្រៀនខ្ញុំនូវគោលលទ្ធិដ៏បរិសុទ្ធនៃព្រះគ្រីស្ទ ។ គាត់បាននិយាយអំពីសេចក្ដីជំនឿ និងការប្រែចិត្ត និងអ្វីៗដែលយើងត្រូវធ្វើ ដើម្បីត្រឡប់ទៅកាន់ព្រះវរបិតាយើងដែលគង់នៅស្ថានសួគ៌វិញ ដោយកាន់ខ្ជាប់ដរាបដល់ចុងបំផុត ។
អែលឌើរ អាន់ឌើរសិន ៖ តើគាត់បានជួយលោកឲ្យមានការប្រែចិត្តជឿផ្ទាល់ខ្លួនរបស់លោកទៅលើព្រះអង្គសង្រ្គោះព្រះយេស៊ូវគ្រីស្ទ ដែលបន្ដមានពេញមួយជីវិតរបស់លោកដែរឬទេ ?
ប្រធាន ឌីអាស ៖ បាទ គាត់បានជួយ ។ ព្រោះគាត់បានជួយខ្ញុំឲ្យមានទំនាក់ទំនងជាមួយព្រះវរបិតាយើងដែលគង់នៅស្ថានសួគ៌ និងជាមួយព្រះអង្គសង្គ្រោះ ។ ខ្ញុំបានរៀនអំពីព្រះអង្គសង្គ្រោះមកពីគាត់ ។ និងអ្វីៗទាំងអស់ដែលមាននៅក្នុងព្រះគម្ពីរ ដែលគាត់អាចជួយខ្ញុំឲ្យមានការយល់ដឹងកាន់តែច្បាស់បាន និងគោលលទ្ធិទាំងឡាយដែលព្រះអង្គសង្រ្គោះបានបង្រៀន ។ គាត់មានទីបន្ទាល់ ហើយគាត់បានថ្លែង—ខ្ញុំមិនដែលឃើញគាត់បញ្ចប់មេរៀនដោយមិនបានថ្លែងទីបន្ទាល់របស់គាត់អំពីដំណឹងល្អនៃព្រះអង្គសង្រ្គោះ និងអំពីអ្វីដែលគាត់បានបង្រៀនសម្រាប់ថ្ងៃនោះទេ វាពិតជាសំខាន់ណាស់ ។ ហើយគាត់ជាមនុស្សដែលពេញដោយថាមពល គាត់នឹងធ្វើឲ្យយើងមានអារម្មណ៍ពេញដោយក្ដីស្រឡាញ់ចំពោះដំណឹងល្អ ដូចគាត់ដែរ ។ ហើយពេលខ្ញុំមើលទៅគាត់ ខ្ញុំបានព្យាយាមធ្វើតាមអ្វីដែលគាត់បានធ្វើ ។
អែលឌើរ អាន់ឌើរសិន ៖ មែនហើយ ពេលលោកក្រឡេកមើលទៅអតីតកាល បើលោកអាចនិយាយអ្វីមួយទៅកាន់គ្រូបង្រៀនថ្នាក់សិក្ខាសាលា និងថ្នាក់វិទ្យាស្ថាន—ទៅកាន់នរណាម្នាក់ដូចជាលោក ដែលជាមនុស្សថ្មីនៅក្នុងសាសនាចក្រ ដែលទើបនឹងចូល—តើលោកនឹងលើកទឹកចិត្តឲ្យពួកគេធ្វើអ្វីទៅ ប្រធាន ឌីអាស ?
ប្រធាន ឌីអាស ៖ ចូរស្រឡាញ់សិស្សរបស់បងប្អូន ។ សូមឲ្យពួកគេដឹងថា បងប្អូនស្រឡាញ់ព្រះវរបិតាសួគ៌ ហើយថាព្រះវរបិតាសួគ៌ស្រឡាញ់ពួកគេ ។ ថាព្រះអង្គសង្គ្រោះស្រឡាញ់ពួកគេ ។ ហើយថា បើបងប្អូននឹងដើរតាមព្រះ និងព្យាការីរបស់ទ្រង់ នោះបងប្អូននឹងអាចត្រឡប់ទៅវិញទៅរស់នៅជាមួយព្រះវរបិតាសួគ៌របស់យើងម្ដងទៀត ។
អែលឌើរ អាន់ឌើរសិន ៖ បាទ ខ្ញុំប្រាកដចិត្តថា ឪពុកម្តាយលោកនឹងមានមោទនភាពយ៉ាងខ្លាំងចំពោះលោក ។ ហើយខ្ញុំដឹងថា ស៊ីស្ទើរ វិល្លាមស៍ ដែលបានបញ្ចប់ជីវិតរមែងស្លាប់នេះ ២៥ ឆ្នាំកន្លងទៅហើយនោះ នឹងមានមោទនភាពយ៉ាងខ្លាំងចំពោះលោកដែរ ។
ប្រធាន ឌីអាស ៖ បាទ ខ្ញុំរីករាយណាស់ដែលឮដូច្នេះ ។
អែលឌើរ អាន់ឌើរសិន ៖ ល្អណាស់ សូមអរគុណច្រើន ។ ហើយសូមអរគុណដែលបានចែកចាយរឿងទាំងនេះជាមួយយើង ។
ប្រធាន ឌីអាស ៖ ដោយក្ដីរីករាយ ។
[ វីដេអូចប់ ]
អែលឌើរ អាន់ឌើរសិន ៖ បងប្រុស និងបងស្រី ឌីអាស មានវត្តមានជាមួយយើងនារាត្រីនេះ ។ បងប្រុស និងបងស្រី ឌីអាស តើបងទាំងពីរអាចក្រោកឈរបានទេ ដើម្បីពួកយើងអាចស្គាល់ ។ សូមអរគុណច្រើន ។
ប្រធាន ឌីអាស គឺជាតំណាងនៃឥទ្ធិពលដែលបងប្អូនកំពុងមាន ហើយនឹងបន្តមានទៅលើជំនាន់កំពុងពេញវ័យនេះ ដោយសារតែសេចក្ដីជំនឿរបស់បងប្អូនលើព្រះប្រោសលោះ និងរបៀបដែលបងប្អូនលើកទ្រង់ជាពន្លឺនៅក្នុងអ្វីៗទាំងអស់ ដែលបងប្អូននិយាយ និងធ្វើ ។
ដោយមានការបម្រើដ៏ជាគំរូរបស់បងប្អូនរួចហើយ ការអធិស្ឋានរបស់ខ្ញុំនៅថ្ងៃនេះគឺថា ខ្ញុំអាចចែកចាយនូវការយល់ដឹងមួយ ឬពីរដែលនឹងលើកស្ទួយបងប្អូនខាងវិញ្ញាណ ហើយតាមរបៀបដ៏តូចតាចបំផុត វានឹងជួយបងប្អូនពង្រឹងការបម្រើដ៏សុចរិតដែលបងប្អូនកំពុងធ្វើនេះ ។
នេះគឺជាគំនិតពិចារណាទីមួយសម្រាប់បងប្អូន ៖ ចូរយើងបង្រៀន និងថ្លែងទីបន្ទាល់ឲ្យបានកាន់តែញឹកញាប់ និងមានអានុភាពជាងមុនអំពីព្រះយេស៊ូវគ្រីស្ទ ។
សូមគិតអំពីរបៀបដែលប្រសាសន៍ទាំងនេះពីប្រធាន រ័សុល អិម ណិលសុន នៅក្នុងសន្និសីទទូទៅកាលពី ខែ មេសា កន្លងទៅនេះ គឺទាន់ពេលវេលាសម្រាប់សិស្សដែលបងប្អូនបង្រៀន ៖ « មិនថាបងប្អូនមានសំណួរ ឬបញ្ហាអ្វីនោះទេ ចម្លើយត្រូវបានរកឃើញនៅក្នុងព្រះជន្ម និងការបង្រៀនរបស់ព្រះយេស៊ូវគ្រីស្ទជានិច្ច ។ ចូររៀនបន្ថែមទៀតអំពីដង្វាយធួន សេចក្តីស្រឡាញ់ សេចក្តីមេត្តាករុណា គោលលទ្ធិរបស់ទ្រង់ និងដំណឹងល្អនៃការព្យាបាលដែលបានស្តារឡើងវិញ និងការរីកចម្រើន ។ ចូរងាកទៅរកទ្រង់ ! ចូរដើរតាមទ្រង់ ! »២
នៅពេលខ្ញុំត្រូវបានហៅជាអ្នកមានសិទ្ធិអំណាចទូទៅកាលពី ៣០ ឆ្នាំកន្លងទៅ នៅដើមទសវត្សរ៍ឆ្នាំ ១៩៩០ មជ្ឈិមវ័យជាតិអាមេរិកប្រាំបួននាក់ក្នុងចំណោមដប់នាក់គឺជាគ្រិស្ដបរិស័ទ ។ យោងតាមមជ្ឈមណ្ឌលស្រាវជ្រាវ Pew ឥឡូវនេះ គ្រិស្ដបរិស័ទនៅសហរដ្ឋអាមេរិកមាន ៦៤ ភាគរយនៃប្រជាជន ហើយនឹងទំនងជាធ្លាក់ចុះក្រោម ៥០ ភាគរយក្នុងរយៈពេលពីរបីទសវត្សរ៍ទៀត ។ ប្រជាជាតិផ្សេងទៀតបានប្រឈមមុខ ឬកំពុងប្រឈមមុខនឹងឧបសគ្គនៃសេចក្ដីជំនឿស្រដៀងគ្នានេះ ។
ជាការពិតណាស់ មិនមែនបងប្អូនទាំងអស់ដែលចូលរួមនៅថ្ងៃនេះមកពីប្រទេសដែលគ្រិស្ដសាសនាគឺជាសាសនារដ្ឋនោះទេ ហើយបងប្អូនជាច្រើនមកពីតំបន់ដែលសេចក្ដីជំនឿលើព្រះយេស៊ូវគ្រីស្ទនៅតែបន្ដរឹងមាំ ។ ប៉ុន្តែមិនថាយើងរស់នៅទីណានោះទេ យើងដឹងថា ផ្លូវទៅកាន់ជីវិតដ៏អស់កល្បជានិច្ចចាប់ផ្ដើមដោយការប្រែចិត្តជឿដ៏ជ្រាលជ្រៅ និងតាំងចិត្តទៅកាន់ព្រះអង្គសង្រ្គោះរបស់យើង ដោយមានគារវភាពចំពោះព្រះជន្ម និងបេសកកម្មដ៏ទេវភាពរបស់ទ្រង់ ។
« ថូម៉ាស ទូលទ្រង់ថា ព្រះអម្ចាស់អើយ … ធ្វើដូចម្ដេចឲ្យយើងខ្ញុំស្គាល់ផ្លូវទៅបាន ? ព្រះយេស៊ូវមានព្រះបន្ទូលទៅគាត់ថា ខ្ញុំជាផ្លូវ ជាសេចក្តីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ » ។៣
នៅក្នុងសារលិខិតបើកនៅក្នុងសៀវភៅ ដើម្បីកម្លាំងនៃយុវជន គណៈប្រធានទីមួយបានសរសេរថា ៖ « ក្មួយៗពិតជាស្ថិតក្នុងចំណោមវិញ្ញាណជម្រើសរបស់ព្រះវរបិតាសួគ៌ ដែលបានបញ្ជូនមកផែនដីនៅពេលនេះ ដើម្បីធ្វើកិច្ចការសំខាន់ៗ ។ … សូមងាកទៅរកព្រះអង្គសង្គ្រោះ ។ ទ្រង់គឺជា ‹ កម្លាំងនៃយុវជន › » ។៤
ថ្មីៗនេះ ខ្ញុំបានទៅអគារថ្នាក់សិក្ខាសាលារបស់ចៅៗខ្ញុំ ។ ខ្ញុំចាប់អារម្មណ៍ដែលឃើញមានរូបភាពព្រះអង្គសង្រ្គោះជាច្រើន និងព្រះបន្ទូលរបស់ទ្រង់ផ្ទាល់ និងបទគម្ពីរផ្សេងទៀតព្យួរនៅលើជញ្ជាំង ដែលថ្លែងទីបន្ទាល់អំពីទ្រង់ ។
បងប្រុស ឆាត វិប បានបង្រៀនគោលការណ៍នេះ ៖ « របៀបដ៏សំខាន់បំផុតតែមួយគត់ដែលយើងអាចជួយបង្កើនសេចក្ដីជំនឿរបស់ជំនាន់ដែលកំពុងពេញវ័យគឺ ត្រូវដាក់ព្រះយេស៊ូវគ្រីស្ទជាចំណុចកណ្ដាលនៃការបង្រៀន និងការរៀនសូត្ររបស់យើងឲ្យកាន់តែពេញលេញ » ។៥
តើយើងមិនទទួលបានឥទ្ធិពលដ៏ជ្រាលជ្រៅមកពីសន្និសីទទូទៅ ខែ មេសា ទេឬអី នៅពេលប្រធាន ដាល្លិន អេក អូក បានដកស្រង់ពាក្យសម្ដីរបស់នីហ្វៃថា « សូមទទួលទាននូវព្រះបន្ទូលទាំងឡាយនៃព្រះគ្រីស្ទ ដ្បិតមើលចុះ ព្រះបន្ទូលទាំងឡាយនៃព្រះគ្រីស្ទនឹងប្រាប់ដល់អ្នកនូវគ្រប់អ្វីទាំងអស់ [ ដែល ] អ្នកត្រូវធ្វើ »៦រួចហើយបន្ដសារលិខិតដ៏មានអានុភាពរបស់លោកទាំងប៉ុន្មានទៀត ដើម្បីចែកចាយ « ការជ្រើសរើសព្រះបន្ទូលរបស់ព្រះអង្គសង្គ្រោះយើង—អ្វីដែលទ្រង់ បានមានបន្ទូលទាំងនៅក្នុងព្រះគម្ពីរសញ្ញាថ្មី និងព្រះគម្ពីរមរមន ។ ប្រធាន អូក បានបញ្ចប់ដោយការប្រកាសនៃព្យាការីដ៏សាមញ្ញនេះថា ៖ « ខ្ញុំសូមអះអាងពីសេចក្ដីពិតនៃការបង្រៀនទាំងនេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន » ។៧
មានព្រះចេស្ដាដ៏ខ្លាំងក្លានៅក្នុងព្រះបន្ទូលរបស់ព្រះយេស៊ូវគ្រីស្ទ ៖
« ចូរសូម នោះតែងនឹងឲ្យមកអ្នក ចូររក នោះតែងនឹងឃើញ ចូរគោះ នោះតែងនឹងបើកឲ្យអ្នក » ។៨
« ខ្ញុំជាសេចក្តីរស់ឡើងវិញ ហើយជាជីវិត អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ » ។៩
« មើលចុះ យើងគឺព្រះយេស៊ូវគ្រីស្ទ ជាព្រះរាជបុត្រានៃព្រះ ។… យើងជាពន្លឺ ហើយជាជីវិតនៃពិភពលោក » ។១០
បើបងប្អូនធ្លាប់ឆ្ងល់ថាតើត្រូវនិយាយអ្វី សូមថ្លែងព្រះបន្ទូលរបស់ព្រះអង្គសង្គ្រោះ ។ សូមនិយាយអំពីបទពិសោធន៍របស់ទ្រង់ និយាយអំពីរឿងប្រៀបប្រដូចរបស់ទ្រង់ និយាយពាក្យសម្ដីនៅក្នុងព្រះគម្ពីរ និងប្រសាសន៍របស់ព្យាការីដែលបានថ្លែងទីបន្ទាល់អំពីទ្រង់ ។
នៅពេលយើងបង្រៀន និងថ្លែងទីបន្ទាល់អំពីព្រះយេស៊ូវគ្រីស្ទ នោះព្រះវិញ្ញាណបរិសុទ្ធនឹងបញ្ជាក់ក្នុងចិត្តនៃសិស្សវ័យក្មេងរបស់យើងអំពីសេចក្ដីពិតនៃព្រះជន្ម និងការបង្រៀនរបស់ទ្រង់ ដែលមានអំណាចដ៏ខ្លាំង និងនៅយូរអង្វែងជាងអំណាចនៃការបង្រៀនរបស់យើងផ្ទាល់ ។
សូមយើងពិចារណាដោយរាបសាថា តើយើងកំពុងធ្វើអ្វីគ្រប់យ៉ាងដែលយើងគួរតែធ្វើក្នុងការបង្រៀន និងការថ្លែងទីបន្ទាល់អំពីដង្វាយធួនរបស់ទ្រង់ សេចក្ដីស្រឡាញ់របស់ទ្រង់ សេចក្ដីមេត្តាករុណារបស់ទ្រង់ គោលលទ្ធិរបស់ទ្រង់ ដំណឹងល្អដែលបានស្ដារឡើងវិញរបស់ទ្រង់ស្ដីពីការព្យាបាល និងការរីកចម្រើន ដូចដែលប្រធាន ណិលសុន បានសុំមកដែរឬទេ ។
ពីព្រោះលំនាំបង្រៀនរបស់យើងពីអតីតកាលប្រហែលជាមិនគ្រប់គ្រាន់សម្រាប់សព្វថ្ងៃនេះ និងអ្វីដែលនឹងកើតឡើងនៅពេលអនាគតនោះទេ ចូរយើងពង្រីកការយល់ដឹងរបស់យើងផ្ទាល់ ហើយដូចដែលប្រធាន ណិលសុន បានផ្តល់ដំបូន្មានមក « ចូររៀនបន្ថែមទៀត » ដោយខ្លួនយើង ហើយលើកទឹកចិត្តយុវវ័យ និងយុវមជ្ឈិមវ័យនៃសាសនាចក្រឲ្យ « រៀនបន្ថែមទៀត » អំពី « ព្រះជន្ម និងការបង្រៀនរបស់ព្រះយេស៊ូវគ្រីស្ទ » ។១១
ឥឡូវនេះ គំនិតពិចារណាទីពីររបស់ខ្ញុំ ៖ ចូរយើងរក្សាគោលលទ្ធិឲ្យបានបរិសុទ្ធ និងសាមញ្ញ ។
អ្វីដែលយើងពិតជាដឹងអំពីព្រះវរបិតាសួគ៌របស់យើង ព្រះអង្គសង្រ្គោះរបស់យើងគឺព្រះយេស៊ូវគ្រីស្ទ ជីវិតមុនឆាកជីវិតនេះរបស់យើង ផែនការនៃសុភមង្គលរបស់ព្រះវរបិតា គោលការណ៍នៃសេចក្តីជំនឿ និង ការប្រែចិត្ត និងពិធីបរិសុទ្ធទាំងឡាយ—យើងដឹងអ្វីៗទាំងអស់នេះ—សេចក្ដីត្រូវការរបស់យើងដើម្បីមានព្រះបញ្ញត្តិ សេចក្ដីសញ្ញា ការគោរពប្រតិបត្តិ និងការកាន់ខ្ជាប់ ព្រមទាំងពរជ័យដែលបានសន្យារបស់យើងហួសពីពិភពរមែងស្លាប់នេះ—អ្វីៗទាំងអស់នេះគឺច្បាស់ខ្លាំងណាស់ យើងមិនគួរមានអារម្មណ៍ថាត្រូវទៅ « ហួសទីដៅ »១២ដូចដែលព្រះគម្ពីរបង្រៀនឡើយ ។
យើងផ្ដោតការបង្រៀនរបស់យើងទៅលើព្រះវរបិតាសួគ៌របស់យើង ព្រះយេស៊ូវគ្រីស្ទ និងគោលលទ្ធិដែលបានបើកសម្ដែងរបស់ទ្រង់ ដើម្បីជួយយុវវ័យរបស់យើងឲ្យបង្កើនសេចក្ដីជំនឿលើទ្រង់ទាំងទ្វេ ប្រែចិត្តជឿលើទ្រង់ទាំងទ្វេ ហើយទទួលបានពរជ័យដែលបានសន្យារបស់ទ្រង់ទាំងទ្វេ ។
គោលលទ្ធិនៃព្រះគ្រីស្ទមាននៅក្នុងព្រះគម្ពីរ និងការបង្រៀនរបស់ពួកព្យាការី ព្រោះពួកលោកទទួលខុសត្រូវលើការប្រាប់ពីព្រះឆន្ទៈរបស់ព្រះអម្ចាស់ ។
គោលលទ្ធិក្នុងព្រះគម្ពីរ និងគោលលទ្ធិដែលបានបង្រៀនដោយពួកព្យាការី មាននូវគោលការណ៍នៃសាក្សីជាច្រើន ជាគោលការណ៍មួយដែលបងប្អូនបានស្ដាប់ឮជាញឹកញាប់នៅក្នុងសន្និសីទទូទៅ និងជាគោលការណ៍ដែលខ្ញុំបានចែកចាយជាង ១០ ឆ្នាំមុន ៖ « បញ្ហាមួយចំនួនបានមន្ទិលដល់សេចក្ដីជំនឿរបស់ពួកគេ នៅពេលដែលពួកគេឃើញសេចក្ដីថ្លែងការណ៍មួយ ដែលធ្វើដោយអ្នកដឹកនាំសាសនាចក្រម្នាក់ជាច្រើនទសវត្សរ៍កន្លងទៅ ដែលមើលទៅហាក់ដូចជាខុសគ្នានឹងគោលលទ្ធិរបស់យើង ។ មានគោលការណ៍ដ៏សំខាន់មួយដែលគ្រប់គ្រងគោលលទ្ធិនៃសាសនាចក្រនេះ ។ គោលលទ្ធិនេះត្រូវបានបង្រៀនដោយសមាជិកទាំង ១៥ រូបនៃគណៈប្រធានទីមួយ និងកូរ៉ុមនៃពួកដប់ពីរនាក់ ។ វាមិនបានលាក់ទុកនៅក្នុងកថាខណ្ឌមិនច្បាស់នៃការនិយាយមួយនោះទេ ។ គោលការណ៍ដ៏ពិតត្រូវបានបង្រៀនជាញឹកញាប់ ហើយដោយមនុស្សជាច្រើន ។ គោលលទ្ធិរបស់យើងមិនពិបាករកនោះទេ » ។១៣
តើបងប្អូនអាចឃើញសារៈសំខាន់នៃការលើកឡើងយ៉ាងខ្ជាប់ខ្ជួនពីការបង្រៀនរបស់ពួកព្យាការី និងសាវកនៅបក្នុងការពិភាក្សាក្នុងថ្នាក់រៀនរបស់បងប្អូនដែរឬទេ ? ការដឹកនាំទាំងឡាយរបស់ព្រះអម្ចាស់សម្រាប់សំណួរ និងកង្វល់នៅក្នុងពិភពលោកសម័យទំនើបរបស់យើង មានមកពីអ្នកដែលត្រូវបានតែងតាំងដោយសិទ្ធិអំណាចនៃសាវក ។ បើទំនុកចិត្តទៅលើពួកព្យាការី និងសាវកធ្លាក់ចុះ នោះការបង្វែរអារម្មណ៍ ការដឹកនាំខុស និងទស្សនវិជ្ជានៃពិភពលោកនេះ អាចបណ្ដាលឲ្យបុគ្គលម្នាក់វង្វេងចេញពីគ្រឹះខាងវិញ្ញាណ និងការប្រែចិត្តជឿរបស់ពួកគេបាន ។ សូមទន្ទឹងរង់ចាំស្ដាប់សន្និសីទទូទៅយ៉ាងអន្ទះសា ហើយពិភាក្សាពីការបង្រៀនដ៏សំខាន់ទាំងនេះបន្ទាប់ពីនោះ ។ សូមកំណត់ឲ្យបានច្បាស់ពីតួនាទីដ៏ពិសិដ្ឋនៃអ្នកដែលបានចាក់ប្រេងតាំងរបស់ព្រះអម្ចាស់ ។ កាលពិភពលោកនេះដាច់ទៅកាន់តែឆ្ងាយពីព្រះបញ្ញត្តិរបស់ព្រះ នោះតួនាទីរបស់ពួកសាវកនឹងកាន់តែសំខាន់ខ្លាំងឡើង ។
ក្នុងការរក្សាគោលលទ្ធិរបស់ព្រះអម្ចាស់ឲ្យបានបរិសុទ្ធ និងអាចយល់បាន សូមប្រុងប្រយ័ត្នដើម្បីនៅក្នុងព្រំដែនដែលព្រះបានបង្កើតឡើងជានិច្ច ដោយចៀសវាងពីកំហុសដែលកើតឡើងតាមរយៈការប៉ាន់ស្មាន និងគំនិតផ្ទាល់ខ្លួនដែលមិនមែនជាគោលលទ្ធិ ។ គំនិតបែបនេះអាចទាក់ទាញយ៉ាងខ្លាំងដល់មនុស្សមួយចំនួន ប៉ុន្តែវាមិនមានកម្លាំងនៃសេចក្ដីពិតដែលពង្រឹងសេចក្ដីជំនឿនោះទេ ។
ខ្ញុំចូលចិត្តមេរៀនដែលប្រធាន ដាល្លិន អេក អូក បានបង្រៀនកូនប្រុសរបស់លោក នៅពេលកូនប្រុសរបស់លោកបានសួរសំណួរមួយ ដែលមិនបានពន្យល់ច្បាស់នៅក្នុងគោលលទ្ធិនៃព្រះគ្រីស្ទ ។ ចម្លើយរបស់លោក ៖ « កូនប្រុស ប៉ាមិនដឹងចម្លើយចំពោះសំណួរនោះទេ ប៉ុន្ដែប៉ាចង់ឆ្លើយសំណួរមួយ ដែលប៉ាដឹងចម្លើយ » ។ បន្ទាប់មក លោកបានថ្លែងសាក្សីអំពីព្យាការី យ៉ូសែប ស្ម៊ីធ និងការនិមិត្តដំបូង ។ សូមយើងស្ម័គ្រចិត្តនិយាយថា « ខ្ញុំមិនដឹងអំពីរឿងនោះទេ ប៉ុន្ដែនេះគឺជាអ្វីដែលខ្ញុំពិតជាដឹង » ។
សូមពិចារណាសំណួរ និងចម្លើយទាំងនេះ ៖
« បងប្រុស ចូនស៍ តើមានទំនាក់ទំនងអ្វីរវាងទ្រឹស្ដី Big Bang និងអ័ដាម និងអេវ៉ា ? » « ខ្ញុំមិនដឹងចម្លើយចំពោះសំណួរនោះទេ ប៉ុន្តែខ្ញុំសូមប្រាប់បងប្អូនពីអ្វីដែលយើងពិតជាដឹងអំពីអ័ដាម និងអេវ៉ា » ។
« បងស្រី ហ្គុងសាឡេស៍ ហេតុអ្វីយើងមិនដឹងអ្វីទៀតអំពីព្រះមាតារបស់យើងនៅស្ថានសួគ៌ ? » « ខ្ញុំមិនដឹងចម្លើយចំពោះសំណួរនោះទេ ប៉ុន្តែខ្ញុំពិតជាដឹងថា ប្អូនគឺជា ‹ បុត្រីសំណព្វរបស់ព្រះបិតាមាតាសួគ៌ដែលមាននិស្ស័យនៃព្រះ និងជោគវាសនាដ៏អស់កល្បជានិច្ច ›១៤
សូមពិចារណាអំពីរបៀបដែលបងប្អូនអាចបង្វែរសំណួរល្អៗ ប៉ុន្តែជាសំណួរដែលល្បួងឲ្យមានការប៉ាន់ស្មាន ទៅជាចម្លើយដែលស្ថាបនាសេចក្ដីជំនឿទៅលើព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ហើយនេះជាឧបសគ្គមួយសម្រាប់បងប្អូន ។ សូមជួយបណ្ដុះការយល់ដឹងនេះដល់សិស្សរបស់បងប្អូនថា សំណួរទាំងអស់មិនត្រូវបានបង្កើតឡើងឲ្យស្មើគ្នាទេ ។ ការយល់ដឹង និងភាពចាស់ទុំខាងវិញ្ញាណជួយបែងចែកសំណួរសំខាន់ៗពីសំណួរដែលគួរឲ្យចាប់អារម្មណ៍ ។
ដោយមានភាពត្រឹមត្រូវ ភាពច្បាស់លាស់ និងភាពសាមញ្ញ យើងអញ្ជើញសាក្សីដែលបញ្ជាក់មកពីព្រះវិញ្ញាណបរិសុទ្ធ ។ « កាលណាព្រះដ៏ជាជំនួយទ្រង់យាងមក … គឺជាព្រះវិញ្ញាណនៃសេចក្ដីពិត … ទ្រង់នឹងធ្វើបន្ទាល់ពីខ្ញុំ » ។១៥
ព្រិកហាំ យ៉ង់ បានរៀបរាប់ពីការបង្រៀនរបស់យ៉ូសែប ស្ម៊ីធ តាមរបៀបនេះ ៖ « លោកបានយកស្ថានសួគ៌ និយាយតាមន័យធៀប ហើយនាំស្ថានសួគ៌ចុះមកផែនដី ហើយលោកបានយកផែនដីនេះ ឡើងទៅលើ ហើយបើកកិច្ចការនៃព្រះឡើងឲ្យងាយយល់ និងមានភាពសាមញ្ញ » ។១៦
សូមប្រុងប្រយ័ត្នថា ដំណើររឿង និងរឿងរ៉ាវដែលបងប្អូនស្ដាប់ឮ គឺមិនត្រូវបានបន្ថែមបន្ថយទេ ។ សូមព្យាយាមធានាថា ព្រះគម្ពីរ ឬសេចក្ដីថ្លែងការណ៍ដែលបងប្អូនកំពុងដកស្រង់ គឺស្ថិតនៅក្នុងបរិបទដែលវាមានបំណងចង់ប្រាប់ ។
វាងាយស្រួលក្នុងការទោរទន់ទៅរកអ្វីមួយថ្មី ឬគួរឲ្យចាប់អារម្មណ៍យ៉ាងខ្លាំងហួសពីកម្រិតនៃការយល់ដឹងរបស់យើង ។ សូមបន្ដនៅក្នុងទីសុវត្ថិភាពនៃគោលលទ្ធិដ៏បរិសុទ្ធ និងសាមញ្ញ ។
សូមប្រុងប្រយ័ត្នចំពោះជម្រើសរបស់បងប្អូនជាមួយប្រព័ន្ធផ្សព្វផ្សាយ រឿងរ៉ាវផ្ទាល់ខ្លួន និងមេរៀនដែលប្រើកម្មវត្ថុ ។ បើប្រើដោយប្រសិទ្ធភាព វាបន្ថែមចំណាប់អារម្មណ៍ និងភាពស៊ីជម្រៅ ។ បើសង្កត់ធ្ងន់ហួសកម្រិត វាអាចបង្វែរចេញពីការបង្រៀនរបស់បងប្អូនបាន ។ វិធីសាស្ត្រនេះអាចបាំងសារលិខិតពិតបាន ។
ព្យាការីអាលម៉ាបានថ្លែងទីបន្ទាល់ថា ដំណឹងដ៏រីករាយនៃដំណឹងល្អគឺ « បានមកឲ្យយើងដឹងដោយពាក្យដ៏ច្បាស់លាស់ ដើម្បីឲ្យយើងអាចយល់ ដើម្បីកុំឲ្យយើងអាចភាន់ច្រឡំបានឡើយ » ។១៧
« ឯត្រែក៏ដូចគ្នា បើឮសូរមិនច្បាស់ នោះតើនឹងមានអ្នកណាប្រុងប្រៀបខ្លួនទៅច្បាំងបាន ? »១៨
សូមគិតអំពីរបៀបដែលព្រះគម្ពីរទាំងនេះមានភាពច្បាស់លាស់យ៉ាងខ្លាំង ៖
« ចូរមកឯខ្ញុំ » ។១៩
« បើអ្នកណាចង់មកតាមខ្ញុំ នោះត្រូវឲ្យលះកាត់ចិត្តខ្លួនឯងចោលចេញ ហើយផ្ទុកឈើឆ្កាងខ្លួន [ រាល់ថ្ងៃ ] មកតាមខ្ញុំចុះ » ។២០
« ដ្បិតបើអ្នករាល់គ្នាអត់ទោសចំពោះការរំលងច្បាប់ ដែលមនុស្សលោកប្រព្រឹត្តធ្វើ នោះព្រះវរបិតានៃអ្នកដែលគង់នៅស្ថានសួគ៌ ទ្រង់នឹងអត់ទោសឲ្យអ្នករាល់គ្នាដែរ » ។២១
« ហើយយើងនឹងសាកល្បងពួកគេមើល បើសិនជាពួកគេនឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ពួកគេនឹងបញ្ជាដល់ពួកគេ » ។២២
« នេះជាសេចក្តីបញ្ញត្តិរបស់ខ្ញុំ គឺឲ្យអ្នករាល់គ្នាស្រឡាញ់ដល់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ » ។២៣
នៅក្នុងទេសនកថាដ៏មានអានុភាពរបស់លោក « ចូរស្តាប់តាមទ្រង់ចុះ » ប្រធាន ណិលសុន បានមានប្រសាសន៍ថា « [ ព្រះវរបិតាសួគ៌ ] ទ្រង់ទំនាក់ទំនងដោយសាមញ្ញ ស្ងប់ស្ងាត់ និងច្បាស់លាស់ ដែលយើងមិនអាចយល់ខុសអំពីទ្រង់ » ។២៤
ច្បាស់ ត្រឹមត្រូវ និងសាមញ្ញគឺជារបៀបដ៏ទេវភាពនៃការបង្រៀន ។
សូមមានប្រាជ្ញា ពេលបងប្អូនធ្វើឲ្យមានតុល្យភាពលើគោលលទ្ធិដែលបងប្អូនបង្រៀន ។ សូមផ្ដល់ទម្ងន់សមរម្យទៅលើចំណុចមួយនៃគោលលទ្ធិនៅក្នុងបរិបទនៃសេចក្ដីពិតដែលទាក់ទងផ្សេងទៀត ។ សូមចងចាំពីដំបូន្មានរបស់ព្រះអង្គសង្គ្រោះអំពីការបង្រៀនព្រះបញ្ញត្តិថា ៖ « គួរតែឲ្យអ្នករាល់គ្នាបានប្រព្រឹត្តការទាំងនេះ ហើយការឯទៀតនោះក៏មិនត្រូវចោលផង » ។២៥
អែលឌើរ នែល អិល ម៉ាកស្វែល បានពន្យល់ថា « គោលការណ៍នៃដំណឹងល្អត្រូវបានត្បាញចូលគ្នានៅក្នុងក្រណាត់មួយ ដែលធ្វើឲ្យវាត្រូវគ្នា និងមានតុល្យភាពជាមួយគ្នា » ។២៦
សូមគិតអំពីរឿងនេះ ៖ សេចក្ដីស្រឡាញ់ និងក្រឹត្យវិន័យរបស់ព្រះ ការអភ័យទោស និងការប្រែចិត្ត ស្រឡាញ់អ្នកដទៃ សិទ្ធិជ្រើសរើស និងការទទួលខុសត្រូវ ។
ដូចដែលបាននិយាយច្រើនដងហើយ សូមកុំបង្រៀនដើម្បីឲ្យបានត្រឹមតែយល់ឡើយ តែត្រូវបង្រៀនដើម្បីកុំឲ្យបងប្អូនយល់ខុសផងដែរ ។
ទីបំផុត ដូចដែលយើងទាំងអស់គ្នាបានដឹងយ៉ាងច្បាស់ហើយ សេចក្ដីពិតទាំងនេះត្រូវបានចែកចាយនៅក្នុងបរិយាកាសមួយដែលស្វាគមន៍ និងលើកទឹកចិត្តឲ្យមានព្រះវិញ្ញាណ ។ យើងមិនអាចបង្ខំឲ្យមានព្រះវិញ្ញាណបានទេ ។ យើងអធិស្ឋានសូម ហើយយើងយាងអញ្ជើញព្រះវិញ្ញាណ ប៉ុន្តែយើងមិនព្យាយាមប្រឌិតបទពិសោធន៍ខាងវិញ្ញាណទេ ។
ជាង ៣០ ឆ្នាំមុន ប្រធាន ដាល្លិន អេក អូក បានប្រាប់ខ្ញុំពីបទពិសោធន៍ជាមួយកូនស្រីរបស់លោក ឈ្មោះ ជេននី ដែលកាលនោះនៅវ័យជំទង់នៅឡើយ ។ នេះជាពាក្យសម្តីរបស់លោក ៖ « ជេននី បានចូលរៀនថ្នាក់យុវនារី ឬចូលរួមសកម្មភាពយុវនារីមួយ កាលនាងនៅវ័យជំទង់ ។ ពេលនាងត្រឡប់មកផ្ទះវិញ ភរិយាខ្ញុំ និងខ្ញុំបានសួរនាងថា តើការជួបជុំនោះយ៉ាងម៉េចដែរ ដូចដែលឪពុកម្ដាយគ្រប់រូបសួរ ។ ជេននី បានតបថា ‹ មែនហើយ គ្រូបាននិយាយថា យប់នេះ យើងនឹងមានបទពិសោធន៍ខាងវិញ្ញាណមួយ ។ បើគ្រប់គ្នាកាន់ដៃគ្នាជារង្វង់មួយ នោះយើងនឹងមានបទពិសោធន៍ខាងវិញ្ញាណ › » ។
ខ្ញុំបន្តដកស្រង់សម្តីប្រធានអូក ៖ « ខ្ញុំបានសួរ ជេននី ថា ‹ តើកូនមានអារម្មណ៍យ៉ាងណាដែរ ? › ហើយនាងបានឆ្លើយថា ‹ ខ្ញុំមានអារម្មណ៍ថាគគ្រេចណាស់ ! › » ( ប្រហែលសព្វថ្ងៃ ៣០ ឆ្នាំក្រោយមក យើងអាចនិយាយថា « ខ្ញុំមានអារម្មណ៍ថាកខ្វក់ » ។ ខ្ញុំមិនដឹងថា យើងនិយាយពាក្យអ្វីឲ្យត្រូវទេ ) ។ ប្រធាន អូក បានបន្តថា « ខ្ញុំតបទៅវិញថា ‹ ប៉ាសប្បាយចិត្ត ព្រោះពេលប៉ាស្ដាប់ឮអ្វីមួយដូច្នេះ ប៉ាក៏មានអារម្មណ៍គគ្រេចដែរ › » ។ បន្ទាប់មក ប្រធាន អូក បាននិយាយថា « ខ្ញុំបានបង្រៀននាងថា បទពិសោធន៍ខាងវិញ្ញាណមិនកើតមានតាមការគ្រោងណាត់ជួបនោះទេ តែវាកើតឡើង នៅពេលយើងស្វែងរកឥទ្ធិពលនៃព្រះវិញ្ញាណរបស់ព្រះអម្ចាស់ » ។
បងប្អូននៅចាំពីសេចក្ដីស្រឡាញ់ដែលប្រធាន ឌីអាស ទទួលបានពីគ្រូបង្រៀនថ្នាក់សិក្ខាសាលារបស់គាត់ ស៊ីស្ទើរ វិល្លាមស៍ ដែរទេ ? យើងយាងអញ្ជើញព្រះវិញ្ញាណ នៅពេលយើងបង្រៀនដោយសេចក្ដីស្រឡាញ់ សេចក្ដីសុខសាន្ដ ភាពទន់ភ្លន់ ភាពស្លូតបូត និងសេចក្ដីជំនឿ ។
បងប្អូនទាំងអស់គ្នាស្គាល់បទគម្ពីរនេះ ៖ « អ្នកណាដែលទទួលព្រះបន្ទូល ដោយសារព្រះវិញ្ញាណនៃសេចក្ដីពិត នោះបានទទួលព្រះបន្ទូល ដូចជាបានផ្សាយព្រះបន្ទូលដោយព្រះវិញ្ញាណនៃសេចក្ដីពិត ។ … ហេតុដូច្នោះហើយ អ្នកដែលផ្សាយ ហើយអ្នកដែលទទួល យល់គ្នាទៅវិញទៅមក ហើយទាំងពីរនាក់ត្រូវបានស្អាងឡើង ហើយត្រេកអរជាមួយគ្នា » ។២៧
ដូច្នេះ ការណ៍នេះមិនត្រឹមតែពឹងលើបងប្អូនប៉ុណ្ណោះទេ ប៉ុន្តែថែមទាំងលើសិស្សនៅក្នុងថ្នាក់រៀនរបស់បងប្អូនផងដែរ ។ សិស្សរបស់យើងនឹងរៀនពីបងប្អូន ថា មានតែតាមរយៈការគោរពប្រតិបត្តិ និងការចងចាំទ្រង់ជានិច្ចប៉ុណ្ណោះ ទើបពួកគេអាចបន្ដមានព្រះវិញ្ញាណរបស់ទ្រង់គង់ជាមួយពួកគេជានិច្ច ។
នេះគឺជាប្រសាសន៍របស់ប្រធាន អាវរិង ៖
« គោលលទ្ធិបង្កើននូវអានុភាពរបស់វា នៅពេលព្រះវិញ្ញាណបរិសុទ្ធបញ្ជាក់ថាវាគឺជាការពិត ។ យើងរៀបចំអ្នកដែលយើងបង្រៀនបានល្អបំផុត និងឲ្យអស់ពីលទ្ធភាព ដើម្បីទទួលបានការបំផុសគំនិតដ៏ស្ងប់ស្ងាត់នៃសំឡេងដ៏តូចរហៀង ។ ការណ៍នេះត្រូវការយ៉ាងហោចណាស់សេចក្ដីជំនឿខ្លះទៅលើព្រះយេស៊ូវគ្រីស្ទ ។ វាត្រូវការយ៉ាងហោចណាស់ភាពរាបសាខ្លះ ឆន្ទៈខ្លះដើម្បីចុះចូលតាមព្រះឆន្ទៈរបស់ព្រះអង្គសង្គ្រោះសម្រាប់យើង ។ បុគ្គលដែលបងប្អូនបានជួយ អាចមានភាពរាបសា និងឆន្ទៈតិចតួច ប៉ុន្តែបងប្អូនអាចជំរុញឲ្យពួកគេចង់ជឿបាន ។ លើសពីនោះទៀត បងប្អូនអាចទទួលបានទំនុកចិត្តពីអំណាចមួយទៀតនៃគោលលទ្ធិ ។ សេចក្ដីពិតអាចរៀបចំផ្លូវខ្លួនវាបាន ។ ការគ្រាន់តែស្ដាប់ឮពាក្យនៃគោលលទ្ធិអាចបណ្ដុះគ្រាប់ពូជនៃសេចក្ដីជំនឿក្នុងចិត្តបាន ។ ហើយសូម្បីតែគ្រាប់ពូជដ៏តូចមួយនៃសេចក្ដីជំនឿលើព្រះយេស៊ូវគ្រីស្ទ ក៏យាងអញ្ជើញព្រះវិញ្ញាណបានដែរ » ។២៨
ជាពាក្យដ៏មានន័យ ។ បងប្អូនទាំងអស់មានគារវភាពខ្លាំងណាស់ ។ សូមអរគុណច្រើនដែលអនុញ្ញាតឲ្យខ្ញុំចំណាយពេលនេះជាមួយបងប្អូន ។ យើងស្រឡាញ់បងប្អូន ហើយយើងសូមអរគុណចំពោះអ្វីទាំងអស់ដែលបងប្អូនធ្វើដើម្បីពង្រឹងយុវវ័យ និងយុវមជ្ឈិមវ័យនៅលីវរបស់យើង និងពង្រឹងសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ ។
ក្នុងនាមជាអ្នកបម្រើរបស់ព្រះអម្ចាស់ ហើយដោយសិទ្ធិអំណាចជាសាវករបស់ខ្ញុំ ខ្ញុំផ្ដល់ពរជ័យដល់បងប្អូនថា គំនិត និងចិត្តរបស់បងប្អូននឹងពោរពេញទៅដោយសេចក្ដីស្រឡាញ់ សេចក្ដីមេត្តាករុណា ការបង្រៀន និងគារវភាពដ៏ជ្រាលជ្រៅចំពោះពលិកម្មដ៏ធួន ដែលមិនអាចប្រៀបផ្ទឹមបានរបស់ព្រះអម្ចាស់ព្រះយេស៊ូវគ្រីស្ទនៃយើង ។ ខ្ញុំផ្ដល់ពរជ័យដល់បងប្អូន បើវាជាបំណងប្រាថ្នារបស់បងប្អូន ថាសមត្ថភាពរបស់បងប្អូនក្នុងការបង្រៀនគោលលទ្ធិនៃព្រះគ្រីស្ទដោយភាពបរិសុទ្ធ និងដោយអំណាចនឹងកើនឡើង ហើយថាបងប្អូននឹងឃើញ និងមានអារម្មណ៍ពីសាក្សីដែលបញ្ជាក់នោះមកពីព្រះវិញ្ញាណនៅលើសិស្សដ៏ល្អរបស់បងប្អូន ។
ខ្ញុំថ្លែងសាក្សីដ៏ពិតប្រាកដ និងជាក់ច្បាស់របស់ខ្ញុំដល់បងប្អូនថា ព្រះយេស៊ូវគឺជាព្រះគ្រីស្ទ ។ ហើយខ្ញុំសូមថ្លែងទីបន្ទាល់ដល់បងប្អូនអំពីការសន្យារបស់ទ្រង់ នៅពេលទ្រង់មានបន្ទូលថា « ដូច្នេះ អស់អ្នកណាដែលទទួលថ្លែងប្រាប់ពីខ្ញុំ នៅមុខមនុស្សលោក នោះខ្ញុំនឹងទទួលថ្លែងប្រាប់ពីអ្នកនោះ នៅចំពោះព្រះវរបិតាខ្ញុំ ដែលគង់នៅស្ថានសួគ៌ដែរ » ។២៩ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។