Ang Plano sa Kaluwasan ug ang Nagtubo nga Henerasyon

Elder Kim B. Clark

Sa Seventy

Tinuig nga Training Broadcast sa Seminaries and Institutes of Religion • Hunyo 12, 2018 • Conference Center Theater

Nagpasalamat ko nga makapamulong kaninyo karon. Nagpasidungog ako kaninyong tanan sa talagsaong buhat nga inyong gihimo. Anaa kamo sa buluhaton sa Ginoo sa pagtabang sa nagtubong henerasyon nga makat-on og dako sa ebanghelyo ni Jesukristo. Niana nga buluhaton akong napili nga mamulong mahitungod sa pagtudlo sa plano sa kaluwasan ngadto sa talagsaong mga batan-on.

Nanawagan si Presidente Nelson natong tanan sa paghangop sa talagsaong mga pribilehiyo nga gihatag sa Dios kanato.¹ Mao kana ang gisangon kanato ug sa nagtubo nga henerasyon. Nasayud ko nga tanan kita kinahanglang mohimo pa og daghan sa pagtabang niining bililhong mga batan-on nga makat-on og maayo sa plano sa Langitnong Amahan. Kinahanglan nilang masayran ug masabtan kini sa ilang hunahuna ug kasingkasing; mohigugma og magpakabuhi niini; ug mahimong unsay gitakda nang daan sa Amahan kanila. Sa kalig-on ug gahum sa Ginoo ug pinaagi sa gahum sa Espiritu Santo, atong mahimo kining talagsaong buluhaton. Nasayud kong tinuod kini.

Mga tuig ang milabay, nagmisyon ko sa Germany. Kaniadto mogamit mi’g mga flannel board ug gagmayng mga lingin sa pagtudlo sa plano sa kaluwasan. Ang mga lingin mao ang premortal nga kalibutan, mortalidad, kalibutan sa espiritu, ug tulo ka ang-ang sa himaya. Kon sakto ko, ang bilo sa kalimot pinaliko-liko nga linya, ug ang Adlaw sa Paghukom rektanggulo. Karon, wala na mogamit og flannel boards ang mga misyonaryo, apan tuohi ko, nga ang gagmayng lingin buhi ug haum gihapon.

Aniay ehemplo gikan sa leksyon sa seminary sa Basahon ni Mormon bahin sa plano sa kaluwasan.²

Imahe

plano sa kaluwasan

Sigurado ko nga kini nga diagram makatabang sa mga estudyante, ug ang leksyon matahum nga summary sa importanting aspeto sa plano sa Amahan.

Hinoon, ganahan ko sa mga lingin, ug may duha ka imbitasyon alang ninyo samtang magtudlo kamo sa plano sa kaluwasan.

Una, palihug matnguni nga dili magtuo ang mga estudyante nga ang diagram mao ang plano. Dili kini maoy plano, apan sayon kaayo sa mga estudyante sa paghunahuna nga kon sila dunay mga lingin, masabtan nila ang plano.

Ikaduha, tabangi nga mahatagan og kahulugan ang plano diha sa ilang hunahuna ug ilang kasingkasing. Tabangi nga mahibalo sila ug mahigugma sa plano. Karon, tingali ang paagi aron mahimo kana mao ang pagsusi gayud sa plano.

Tungod niana, akong napili ang pag-emphasize sa tulo ka baruganan diha sa plano sa Amahan nga sa akong pagtuo makatabang sa nagtubong henerasyon aron mahibalo, mahigugma ug mosunod sa plano.

Baruganan #1: Si Jesukristo ang Dalan, Kamatuoran ug Kinabuhi

Busa, ang unang baruganan: Si Jesukristo ang Dalan, Kamatuoran ug Kinabuhi.³ Ang Ginoo ug ang Manluluwas si Jesukristo maoy sentro sa plano sa kaluwasan. Ang maulaon niyang sakripisyo maghimong posible sa tanang plano sa Amahan. Paminawa ang gisulti ni Alma sa iyang paghulagway sa gihimo sa Manluluwas kanato: “Ug siya magpadayon, mag-antus sa mga sakit ug mga kasakit ug mga pagtintal sa matag matang; …

“Ug siya modala diha kaniya sa kamatayon, nga siya mobadbad sa mga higot sa kamatayon diin naghigot sa iyang mga katawhan; … ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, … nga siya mahimo nga masayud sumala sa unod unsaon pagtabang ang iyang katawhan sumala sa ilang mga kahuyang. …

“Ang Anak sa Dios mag-antus sumala sa unod nga siya unta modala diha kaniya sa mga sala sa iyang mga katawhan, nga siya unta mopapas sa ilang mga kalapasan sumala sa gahum sa iyang pagluwas.”⁴

Ganahan ko niining mga bersikulo. Niining matahum nga pagkasulti, gilatid ni Alma ang kinasentrohang papel sa Pag-ula ni Jesukristo sa plano sa kaluwasan. Ania ang Pagkabanhaw, nga gihatag sa tanan. Ania ang kapasayloan ug katubsanan gikan sa sala niadtong maghinulsol. Ania ang gugma ni Jesukristo samtang mag-ayo Siya, mobayaw, ug molig-on sa atong mortal nga panaw. Ania ang gahum ni Jesukristo nga moluwas kanato gikan sa kamatayon ug sala, ug moabli kanato sa mga panalangin sa kahimayaan ug kinabuhing dayon.

Gusto kong mahibalo ug makasabut ang atong mga estudyante nga si Jesukristo mao gayud ang sentro sa plano sa Amahan ug sa ilang kinabuhi. Tungod sa Iyang makatubos nga sakripisyo,mikuyanap ang Iyang kahayag ngadto sa tanang nilalang sa Dios.⁵ Gani, Siya “sa tanan ug pinaagi sa tanang butang ang kahayag sa kamatuoran.”⁶ Kana nga kahayag naghatag og kinabuhi sa tanan ug nagdala sa “balaod diin ang tanang butang gidumala.”⁷ Hunahunaa kana! Ang tanan nga ania sa uniberso sa Dios, ang kinadak-ang mga galaxy nga may bilyon ka bitoon, ang kinagamyang butang, ang atong mortal nga lawas, atong imortal nga espiritu, ug ang atong mahangturong pag-uswag, ang tanan gidumala nianang balaan nga balaod pinaagi sa gugma sa atong Langitnong Amahan ug sa katingalahang Pag-ula ni Ginoong Jesukristo.

Ang Pag-ula ni Jesukristo para sa tanan nagdala sa kinalapdang epekto, ug bisan pa, personal gayud kaayo. Gani, ang gugma, kalooy, ug gahum sa atong Manluluwas mopanalangin sa atong mga estudyante tagsa-tagsa. Ang mga kasulatan nagtudlo kanato nga giantus ni Jesus ang matag kasakit, kasubo, ug kalisdanan nga masinati sa atong mga estudyante sa mortal nilang kinabuhi.⁸ Iyang gipas-an ang mga sala sa tanang katawhan aron makahinulsol sila.⁹ Si Jesus nakaila sa hingpit sa atong mga estudyante. Nahibawo siya sa ilang mga gilaktan kay Siya nakaagi na niini.

Makaduol sila Kaniya, magbaton og pagtuo, makahinulsol, ug makasunod Kaniya uban sa kamasaligon ug pagsalig nga Siya nahibawo sa dalan. Siya lamang sa tinuoray ang dalan ngadto sa mga butang nga pinakaimportante kanila.¹⁰ Siya ang dalan sa kapasayloan ug talagsaong pagkaayo. Siya ang dalan sa molahutay nga kalipay. Siya ang dalan sa pagpakig-uban sa Espiritu Santo, ug sa balaang kalig-on, kahupayan, pagpadayag, kahayag, ug gahum sa ilang kinabuhi. Siya ang dalan sa kaisug ug pailub, ug sa tanang hiyas nga balaan. Siya ang dalan sa lunsay ug hingpit nga gugma, ug sa kalinaw lapaw sa tanang panabut. Siya ang dalan sa mga pakigrelasyon sa gugma ug serbisyo nga magdala og lawom personal nga katumanan, kahulugan, ug katuyoan sa ilang kinabuhi karon ug sa hangtud. Siya ang dalan ngadto sa kahimayaan ug kinabuhing dayon uban sa ilang Langitnong Amahan ug sa ilang pamilya. Mga kaigsoonan, palihug itudlo sa atong mga estudyante nga “ang tanan nga maayong butang naggikan ni Jesukristo.¹¹ Siya ang tanan alang kanila.

Baruganan #2: Ang mga Anak sa Dios nga Lalaki ug Babaye dunay Mahangturong Ilhanan ug Katuyoan

Ang matag usa sa atong mga estudyante may mahangturong ilhanan og katuyoan. Ang matag usa kanila “hinigugmang espiritu nga anak nga lalaki o babaye sa langitnong mga ginikanan, mao nga, ang matag usa may mga kinaiya sa pagkadios ug kapalaran.”¹²

Ang plano sa Langitnong Amahan gihimo sa pagtabang sa tanan natong estudyante nga matuman ang mahangturon nilang ilhanan ug katuyoan pinaagi sa kalooy ug grasya ni Ginoong Jesukristo. Akong hisgutan ang tulo ka sukod sa ilang mahangturong ilhanan nga sa akong pagtuo importante kaayo nga ilang masabtan.

Akong sugdan sa katinuod nga ang atong mga estudyante espiritung mga anak sa Dios. Palihug tabangi nga mahibalo sila ug mobati nga Siya gayud ang Amahan sa Langit. Pinaagi sa Iyang Hinigugmang Anak, mipanalangin ang Langitnong Amahan sa atong mga estudyante og oportunidad ug kapasidad nga makat-on gayud sa Iyang mahangturon nga plano—motubo sa kahibalo ug panabut, maangkon ang kapasidad alang sa mas epektibong buhat sa katarung, ug mahisama Kaniya. Kini ang nagpatigbabaw nga katuyoan niining labing importante nga aspeto sa ilang mahangturon nga ilhanan.¹³

Ang ikaduhang mahinungdanon nga bahin sa mahangturon nilang ilhanan mao ang pagkahimong bana o asawa, sa mahangturong pamilya.¹⁴ Ang kaminyoon tali sa lalaki ug sa babaye giorden sa Dios kay kinaiyahan kana sa kinabuhing dayon.¹⁵ Diha sa mahangturong panglantaw sa atong Langitnong Amahan, ang atong mga estudyante mga inahan ug amahan sa Iyang gingharian. Kana ang mahangturon nilang ilhanan, sa Iyang plano. Ang mahangturon nilang katuyoan, mao ang pagmugna og celestial nga kaminyoon ug mahangturong pamilya.

Sa katapusan, ang atong mga estudyante angayang masayud nga mga binhi sila ni Abraham, mga katawhan sa pakigsaad sa Ginoo. Misaad ang Dios kang Abraham nga ang iyang binhi modala sa ebanghelyo ni Jesukristo ug sa balaang priesthood (lakip sa mga ordinansa sa kaluwasan) sa tanang kanasuran sa pagpanalangin sa tanang pamilya sa yuta sa duha ka kilid sa tabil.¹⁶ Mao kini ang panagpundok sa Israel ug importante kini nga bahin sa plano sa Amahan.¹⁷ Ang atong mga estudyante mga binhi ni Abraham, ug ang mahangturon nilang katuyoan mao ang paghimo sa buhat sa Dios isip gisaligan Niyang mga sulugoon. May importante silang luna, importanting tahas, diha sa plano sa Amahan.

Hunahunaa sa makadiyot ang makadasig, makatingalang mga panalangin nga tinguhang ihatag sa Langitnong Amahan ngadto sa atong mga estudyante. Ug bisan pa, ang uban sa atong estudyante maghunahuna kon may ingon ani bang ilhanan ug katuyoan ang Dios para nila. Mobati ang uban nga ang pagkahimong sama sa Langitnong Amahan, paghago isip sinaligan nga sulugoon, ma-seal sa usa ka mahangturon, minahal nga kapares ug magkaanak lisud kab-uton. Kon manamin sila, posibling dili nila makita ang gihulagway nako karon. Kon ingon ana ang gibati sa uban nimong mga estudyante, palihug ipatan-aw nila og balik. Ipatan-aw nila gamit ang mga mata sa pagtuo ug makita dili lang ang ilang dagway apan ang dagway usab ni Ginoong Jesukristo tupad nila uban sa gahum ug himaya ug ang walay katapusan, hingpit nga gugma. Wala Siya moanhi aron biyaan sila nga wala ang Iyang mga panalangin.¹⁸

Baruganan #3: Ang Tanang Butang nga Gibutangan ni Jesukristo sa Iyang Ngalan Kauban sa Plano

Dili lang si Jesukristo anaa sa sentro sa plano sa Amahan, apan ang Iyang ngalan, Iyang gahum, Iyang buhat, ug ang Iyang kinaiya mabati sa kinatibuk-an. Akong gusto nga masayud ug makasabut ang atong mga estudyante nga ang tanang butang nga gibutangan ni Jesukristo sa Iyang ngalan parte sa plano sa Amahan.

Hunahunaa sa makadiyot unsa kanang mga butanga. Asa gibutang sa Manluluwas ang Iyang Ngalan? Aniay lista sa mga butang nga nagdala sa ngalan ni Jesukristo nga gituohan nakong importante kaayong masayran ug masabtan sa atong mga estudyante:

Ang Simbahan ni Jesukristo sa mga Santos sa Ulahing mga Adlaw: Ang ngalan sa Simbahan usa ka saksi nga kini gimugna ug gipangulohan ni Ginoong Jesukristo; kini Iyang Simbahan.¹⁹ Ang Simbahan mao ang gingharian sa Dios dinhi sa yuta. Pinaagi sa Simbahan ang Ginoo ug Manluluwas nagsuporta sa mga indibidwal ug pamilya sa ilang paningkamot alang sa kinabuhing dayon ug pag-andam sa yuta alang sa Iyang Ikaduha nga Pag-anhi. Ang Simbahan—ang tinuod ug buhi nga Simbahan sa Ginoo— ang labing mahinungdanon sa plano sa Amahan alang sa kaluwasan sa Iyang mga anak.
Ang Balaang Priesthood, subay sa Kapunongan sa Anak sa Dios: Ang balaang priesthood mao ang gahum ug awtoridad sa Dios. Gihatag kini sa tawo aron ang matinud-anong mga Santos sa Ulahing mga Adlaw mohimo sa Iyang buhat gamit ang Iyang awtoridad ug gahum. Pinaagi niana nga gahum ug awtoridad atong madawat ang mga ordinansa sa kaluwasan ug maangkon ang talagsaong mga panalangin sa mahimayaong plano sa Amahan.²⁰
Ang Balay sa Ginoo: Nagpuyo kita sa panahon nga ang mga templo nagkatap sa tibuok yuta. Atong kalipay nga gihimong posible sa Ginoo nga daghan kaayo sa Iyang matinud-anong mga anak makadawat sa ilang mga panalangin sa templo, lakip ang pag-seal sa mahangturong mga pamilya, sa duha ka kilid sa tabil. Ang mga ordinansa sa Balay sa Ginoo nagsumpay kanato ngadto sa mga gahum sa pagkadiosnon: importante kini sa plano sa Amahan alang sa kalipay sa Iyang mga anak.²¹
Ang propeta sa Ginoo: Sa paghisgot bahin sa Iyang propeta, miingon ang Ginoo: “Kay ang iyang pulong ikaw makadawat, ingon og gikan sa akong kaugalingon nga ba-ba.”²² Ang propeta sa Ginoo usa ka manalagna ug tigpadayag. Ang iyang mga pulong mao ang mga pulong sa Ginoo para kanato, alang sa atong panalangin niining kinabuhia, ug kahimayaan ug kinabuhing dayon sa kinabuhing moabut. Ang propeta sa Ginoo talagsaon nga bahin sa plano sa Amahan.
Ang Basahon ni Mormon: Lain nga Tugon ni Jesukristo: Ang Basahon ni Mormon usa ka saksi nga si Ginoong Jesukristo ang Manluluwas ug Manunubos, nga si Joseph Smith propeta sa Pagpahiuli, ug nga ang Ginoo miestablisar sa Iyang Simbahan sa katapusang mga adlaw. Naglakip usab kini sa matahum nga mga pagtulun-an bahin sa plano sa Amahan, nga nagdala og gamhanang pagpamatuod.²³ Niining tanan nga rason ang Basahon ni Mormon importante nga bahin sa talagsaong plano sa kaluwasan.

Mga anak sa Langitnong Amahan: Si Jesukristo nagbutang sa Iyang ngalan diha sa mga anak sa Langitnong Amahan kinsa mohimo ug motuman sa sagradong mga pakigsaad. Gibutang Niya ang Iyang ngalan diha ninyo nga nagtudlo, sa inyong pagtambong sa templo.²⁴ Tuyo Niya ang pagbutang sa Iyang ngalan diha sa inyong mga estudyante, ug sa mga pagpamatuod nga ilang ihatag sa kalibutan samtang moapil sila sa pagpundok sa Israel.²⁵ Mao kini ang plano sa Amahan.

Tanan nga gihisgutan nato dinhi—ug tanan nga atong manganlan, sama sa tanang meetinghouse sa kalibutan ug atong mga pag-ampo sa Langitnong Amahan—mga butang diin gibutang ni Jesukristo ang Iyang ngalan. Kabahin kini sa plano ug sa katumanan sa panagna. Sama sa giingon ni Apostol Pablo dugay na, “Inig abut sa tukmang panahon, [ang Amahan mohiusa] diha kang Kristo sa tanang butang, mga butang diha sa langit ug mga butang dinhi sa yuta.”²⁶

Mga kaigsoonan, palihug tabangi ang atong mga estudyante nga mahibalo nga kining pamilyar kaayo nilang mga butang—ang Simbahan, priesthood, templo, propeta, Basahon ni Mormon—tanan nagdala sa ngalan sa Manluluwas kay tanan kini ania sa pagdala kanato kang Jesukristo, kinsa mao ang dalan sa kalinaw niining kinabuhia ug kahimayaan ug kinabuhing dayon sa kalibutang moabut.

Akong tapuson karon uban sa pagtulun-an, mahitungod sa tahas sa plano sa Amahan sa inadlawng pagpakabuhi sa atong mga estudyante. Ang pagtulun-an naggikan sa pakigpulong ni Haring Benjamin sa iyang katawhan. Sa sinugdanan gayud sa iyang pakigpulong, miingon siya, “Patalinghug ngari kanako, ug [ablihi] ang inyong mga dunggan nga kamo unta makadungog, ug [ang] inyong mga kasingkasing nga kamo unta makasabut, ug sa inyong mga hunahuna nga ang mga misteryo sa Dios unta mabuksan sa inyong panan-aw.”²⁷

Ganahan ko sa mga pulong “nga ang mga misteryo sa Dios unta mabuksan sa inyong panan-aw,” ug gusto kong gamiton kini ngadto sa atong mga estudyante. Karon, giklaro ni Haring Benjamin nga ang “mga misteryo sa Dios” nga tuyo niyang buksan sa panan-aw sa katawhan mao ang mga elemento nga mahinungdanon sa dakong plano sa kaluwasan. Alang sa atong mga katuyoan, ang pamahayag ni Haring Benjamin may duha ka kahulugan. Una, nagpasabut kini nga kon abli ang kasingkasing ug hunahuna sa mga estudyante ug motudlo kita uban sa Espiritu, makita ug masabtan sa mga estudyante ang plano. Apan adunay laing kahulugan. Kon masabtan nila ang plano diha sa ilang kasingkasing, ang plano mahimong paagi nga makita nila ang ilang kaugalingon ug ang kalibutan nga naglibot kanila. Ang plano mamahimo nilang panan-aw. Makita sa atong mga estudyante ang plano, ug ang plano motabang nila nga makakita.

Sa unsang paagi ang atong mga estudyante tinuoray nga makakita sa plano? Ang atong mga klase importante nga bahin niana nga proseso, ug ang Langitnong Amahan mas nakahimo og daghan sa pagbukas sa Iyang plano diha sa ilang panan-aw. Palihug tudloi ang mga estudyante nga pwede nilang makita ang plano:

Diha sa pagkatawo sa bata, ug sa matag higayon nga dunay mamatay.²⁸
Diha sa templo, sa mga ordinansa sa mga patay.²⁹
Diha sa ordinansa sa sakrament sa Adlawng Igpapahulay.³⁰
Diha sa paghinulsol, samtang mag-ampo sila sa Langitnong Amahan alang sa kapasayloan sa ngalan ni Jesukristo.³¹
Diha sa Basahon ni Mormon, kana nga gamhanang tugon ni Jesukristo.³²
Diha sa pagkakita, pagpaminaw, ug pagsunod sa Propeta sa Dios.³³
Diha sa mga panalangin sa priesthood.³⁴
Diha sa seminary ug institute diin mobati sila sa gugma ni Kristo, Iyang kahayag, ug Iyang gahum.³⁵
Matag gutlo nga mag-ampo sila sa Amahan sa ngalan ni Jesukristo.³⁶

Palihug tabangi ang atong mga estudyante nga mahibalo niining matahum nga kamatuoran: kon makita nila kining mga butanga, nagtan-aw sila sa naglihok nga plano sa Amahan. Kon bukas ang ilang kasingkasing, mosaksi ang Espiritu Santo kanila nga ang plano tinuod, ug alang kini kanila.³⁷ Kon molambo ang ilang pagtuo ug panabut kang Jesukristo, ang plano mamahimo nga ilang panglataw sa kinabuhi ug sa ilaha mismo. Ilang makita ang ilang kaugalingon diha sa plano, ug magsugod sila sa pagkakita sa kalibutan sa ilang palibut sama sa pagtan-aw niini sa Ginoo.

Ang plano mahimo nga estraktura sa buluhaton nga ilang magamit sa pagsabut sa mga isyu problema ug mga hagit nga ilang giatubang. Gani, mao kana ang gitudlo diha sa Mahinungdanon nga Dokumento sa Doktrinal Mastery. Akong kutloon: “Sa pagsusi sa doktrinal nga mga konsepto, mga pangutana, ug sosyal nga mga isyu inubanan sa mahangturong panglantaw, atong ikonsiderar ang kinatibuk-ang kahulugan niini sa plano sa kaluwasan ug sa mga pagtulun-an sa Manluluwas. … Magtugot kini nga atong maporma og usab ang pangutana … ug matan-aw ang mga ideya base sa sumbanan sa kamatuoran nga gihimo sa Ginoo kay sa modawat sa … mga pagbana-bana nga gihimo sa kalibutan.”³⁸

Kon makita sa atong mga estudyante kini nga sundanan, ang plano sa kaluwasan maoy paagi nga masabtan nila ang ilang kaugalingon, ilang responsibilidad, ug mga oportunidad ug mga panalangin. Paagi kini unsaon nila sa pagpangita ang kahulugan ug katuyoan sa ilang kinabuhi. Uban sa Espiritu nga nagtudlo ug naggiya kanila, mabatunan nila ang giingon ni Pablo nga “panghunahuna ni Kristo.”³⁹

Minahal kong mga kaigsoonan, akong pag-ampo nga ang plano sa Amahan masulod sa inyong kasingkasing, nga makita ninyo ang inyong kaugalingon diha sa plano, ug ang plano mamahimo kon unsay tan-aw ninyo sa kalibutan.⁴⁰ Mopamatuod ko nga ang plano sa Amahan tinuod. Ang Dios nga atong Amahan buhi. Si Jesus mao ang Kristo ang atong Manluluwas ug Manunubos. Ako nasayud nga Siya buhi. Kini ang Iyang Simbahan. Anaa kamo sa Iyang buluhaton, sa pagtudlo sa plano sa Amahan ngadto sa nagtubo nga henerasyon pinaagi sa gahum sa Espiritu Santo. Niini ako mopamatuod sa pangalan ni Jesukristo, amen.

© 2018 pinaagi sa Intellectual Reserve, Inc. Tanang mga katungod gigahin. Pagtugot sa Iningles: 3/18. Pagtugot sa paghubad: 3/18. Hubad sa “The Plan of Salvation and the Rising Generation.” Cebuano. PD60006246 853