“Ayaw Pagduhaduha, apan Pagmatuohon.”

Elder Dale G. Renlund

Sa Korum sa Napulog Duha ka mga Apostoles

Uban ni Sister Ruth L. Renlund

Sibya sa Tinuig nga Training sa Seminaries and Institutes of Religion • Hunyo 12, 2018 • Conference Center Theater

Elder Dale G. Renlund: Mapasalamaton kaming makauban kamo. Mapasalamaton kami sa inyong gibuhat samtang kamo nagtudlo ug nag-abag sa seminaries and institutes sa tibuok kalibutan. Sa inyong pagbuhat sa ingon, hinumdumi kanunay kon unsa kahimuot ang Ginoo sa inyong pagserbis yo. Kabahin Siya sa inyong mga tigpaminaw; nag-uban Siya kaninyo, anaa Siya sa “inyong atubangan,” Siya “anaa sa inyong tuo nga kamot ug sa inyong wala,” ug ang Iyang “Espiritu mahimo nga anaa sa inyong mga kasingkasing,” ug ang Iyang “mga anghel anaa libut kaninyo, aron sa pagtabang kaninyo.”¹

Nagpasalamat ako ninyo alang sa Ginoo ug sa Iyang Simbahan tungod sa inyong hugot nga pagtuo ug kamatinud-anon. Salamat sa inyong pagdawat sa inyong mga responsibilidad. Salamat sa inyong pagtabang sa mga anak sa Langitnong Amahan nga makabalik ngadto Kaniya. Salamat sa inyong pagdapit sa Iyang mga anak sa pagduol ngadto kang Kristo.

Sister Ruth L. Renlund: Ug salamat niining maanindot kaayong choir nga nakatampo sa Espiritu sa miting. Ug nakasiguro ko nga kitang tanan gibayaw sa maanindot nga pakigpulong ni Brother Chad H Webb ug ni Elder Kim B. Clark. Ato usab silang pasalamatan sa ilang mga ehemplo sa pagkadisipulo. Malipayon kami nga nakaangkon og kahigayunan nga makauban ninyo sa paghisgut bahin sa hugot nga pagtuo ug pagduhaduha, usa ka hisgutanan nga kanunay ninyong gipamulong.

Elder Renlund: Hunahunaa ang matikyaob diha sa bangka samtang naglawig sa tunga-tunga sa kadagatan. Nagsul-ob ka og himan sa pagluwas sa kinabuhi ug pila na ka oras nga naglangoy padulong sa imong gituohan nga labing duol nga baybayon, apan wala ka makasiguro. Naughan na kaayo ka sa tubig sa lawas, nga sa matag higayon nga molangoy ka, mura ka og malipong. Sa imong banabana, ang baybayon mga 30 ka kilometro o 18 ka milya pa ang gilay-on. Nabalaka na ka sa imong kinabuhi. Sa layo imong nadunggan ang gamay nga andar sa makina. Ang tingog mura og nagpadulong nimo; ang imong paglaum nga maluwas nagkadako. Sa imong pagtan-aw, imong nakita ang bangka nga pangisdaan nga nagpadulong.

Sister Renlund: “Hay, salamat sa kahitas-an,” naghunahuna ka nga, ang kapitan nakakita na nimo! Ang bangka mihunong, ug usa ka buotan, hanas na kaayong mangingisda mitabang nimo sa pagpasakay sa bangka. Mapasalamaton kaayo ka nga mikamang ngadto sa lingkoranan sa bangka, nakapanghupaw sa kahupay. Gihatagan kag tubig sa mangingisda ug mga biskwit. Ang tubig ug mga biskwit nakahatag sa gikinahanglang pangpabaskog aron ka maulian. Naulian na kaayo ka ug malipayon na kaayo. Paingon na ka nga mopauli.

Sa dihang naulian na ka ug maayo na ang pamati, nagsugod ka og hatag og pagtagad sa pipila ka mga butang nga wala nimo namatikdi sa una. Ang tubig gikan sa sudlanan medyo bahaw na ug dili katong ganahan nimo nga—Evian o Perrier nga klase. Ang pangpabaskog nga gusto unta nimo mao ang karne nga unya parisan og tsokolate nga croissant. Namatikdan usab nimo nga ang buotan nga mangingisda tigulang na, nagsul-ob og daan na nga botas ug maong. Ang panapton sa iyang kalo mansado na, ug medyo bungol na siya.

Elder Renlund: Nabantayan usab nimo nga ang bangka gastado na ug duna nay mga lumping sa tuo nga bahin sa arko. Ang mga pintal nahup-ak, daan, ug nangapaksit na. Nabantayan usab nimo nga kon luagan sa paggunit sa mangingisda ang timon, ang bangka mokabig sa tuo. Nagsugod kag kabalaka nga kining bangka ug kining kapitan dili makahatag nimo og siguridad nga imong gikinahanglan. Nangutana ka sa tigulang nga mangingisda bahin sa lumping ug sa timon. Miingon siya nga wala siya nabalaka kaayo bahin niadtong mga butanga tungod kay nagdala siya sa bangka ngadto ug nganhi sa pangisdaan, sa samang rota, kada adlaw sulod sa mga dekada na. Ang bangka kanunayng luwas nga mohatud ug kasaligan kon asa man siya moadto.

Nahingangha ka! Nganong wala man siya mabalaka bahin sa mga lumping ug sa pagmaniubra? Ug nganong ang pagkaon dili man kadtong mas gusto nimo? Nagkadugay ang imong pagtan-aw sa bangka ug sa mangingisda, mas misamot ang imong kabalaka. Imong gi-kwestyon ang imong desisyon sa pagsakay sa bangka una sa tanan. Nagkadako na ang imong kahadlok. Sa katapusan, mimando ka sa mangingisda nga ihunong ang bangka ug tugutan ka nga mobalik sa tubig. Bisan og karon anaa pa gihapon ka sa kapin 20 ka kilometro o 12 ka milya, gikan sa baybayon dili na ka makaagwanta nga maghunahuna nga naa ka sa bangka. Uban sa dyutay nga kaguol, ang mangingisda mitabang nimo balik ngadto sa kadagatan.

Sister Renlund:Niini nga sambingay, ang bangka nagrepresentar sa Simbahan ug ang mangingisda kadtong nagserbisyo sa Simbahan.² Ang bugtong tumong sa Ang Simbahan ni Jesukristo sa mga Santos sa Ulahing mga Adlaw mao ang pagtabang sa Langitnong Amahan ug ni Jesukristo sa Ilang buhat sa pagpahinabo sa kinabuhing dayon sa mga anak sa Langitnong Amahan.³ Unsa ang pagtulun-an atong mapu-po sa bangka ug sa mangingisda bahin sa Simbahan? Ang lumping ug ang nangapaksit nga pintal sa Simbahan nakausab ba sa abilidad niini sa paghatag og awtorisado nga makaluwas ug makapahimaya nga mga ordinansa sa pagtabang nato nga mahimong sama sa atong Amahan sa Langit? Kon ang mangingisda kinahanglan mogunit sa timon sa duha ka kamot aron magpabilin sa agianan niini, nakapakunhod ba kana sa iyang abilidad ug sa bangka sa pagdala kanato nga luwas ug masaligan kon asa man kita padulong? Dili gikinahanglan nga na-orden kamo nga manalagna sama sa akong bana aron makahibalo nga ang pagbalik ngadto sa tubig makuyaw kay sa magpabilin sa bangka.

Matag miyembro sa Simbahan nagkinahanglan sa iyang kaugalingon nga pagsaksi sa pagkatinuod sa Ang Simbahan ni Jesukristo sa mga Santos sa Ulahing mga Adlaw. Kon wala kana nga pagkakabig, lakip sa dakong kausaban sa kasingkasing, ang mga tawo mahimong magsugod sa pagtutok sa representasyon sa biskwit ug nahup-ak nga pintal.

Elder Renlund: Nagsugod ang akong pagpamatuod sa dihang nagpuyo ko didto sa Göteborg, Sweden. Sa 11 anyos pa ko. Ang presidente sa misyon mihatag og imbitasyon ngadto sa tanang batan-on sa pagbasa sa basahon ni Mormon. Ang akong magulang nga lalaki, kinsa kanunay nakong gidayeg ug gitahud, midawat nianang hagit. Gusto ko nga maparehas niya, mao nga misugod usab ko sa pagbasa sa Basahon ni Mormon. Kadugayan niana, siguro sa dihang anaa na ko sa basahon ni Alma, usa sa magtatambag sa presidente sa misyon misulti namo nga kinahanglan mag-ampo kami bahin sa unsay among gibasa. Nakahinumdom ko sa gabii nga maayo kaayo nakong gibuhat kadto nga imbitasyon. Nakahinumdom ko sa apartment nga among gipuy-an ug sa kwarto nga katulganan nako ug sa akong igsoon. Human makatulog ang akong igsoon, mibangon ko ug miluhod sa kilid sa higdaanan ug akong gisugdan ang yano kaayong pag-ampo aron masayod kon tinuod ba ang Basahon ni Mormon.

Wala ko makadungog og tingog, apan ingon kini og ang Dios misulti kanako, “Ako nagsulti na nimo nga kini tinuod.” Kana nga kasinatian nakapausab nako. Nakapausab kini sa akong kinabuhi. Gisugdan kini sa usa ka proseso sa pagtuo, usa ka proseso sa pagkaanaa sa dalan sa pagkigsaad ug maningkamot sa paghimo og dugang pa ug mosulay sa paghimo og mas maayo. Didto sa Göteborg nga nakat-on ko kon unsaon sa paghinulsol. Didto sa Göteborg nga nagsugod ko sa pagtamud sa mga indibidwal nga naghimo sa ilang mga calling ug kinsa nagkugi og maayo sa pagtukod sa gingharian sa Dios. Didto nagsugod ko sa pagdayeg sa matinud-anong mga Santos sa Dios bisan asa man sila nagpuyo. Ang Göteborg ug ang gambalay sa Viktoriagatan diin kami nagkita nahimong espesyal nga dapit alang kanako.

Kalabut sa mga nahaunang mga kinabig ni Alma, atong mabasa: “Ug karon nahinabo nga tanan niini nabuhat sa Mormon, oo, diha sa mga tubig sa Mormon, diha sa kakahoyan nga duol sa tubig sa Mormon; oo, ang dapit sa Mormon, ang mga katubigan sa Mormon, ang kalasangan sa Mormon, unsa katahum sila ngadto sa mga mata kanila kinsa diha miabut ngadto sa kahibalo sa ilang Manunubos; oo, ug unsa kabulahan sila, kay sila moawit sa iyang pagdayeg sa kahangturan.”⁴

Didto sa Göteborg nga nakaangkon ko og kahibalo bahin sa akong Manunubos. Ang Göteborg ug Viktoriagatan ang nahimo nakong “Katubigan sa Mormon.”

Sister Renlund: Diin man ninyo nahibaloan ang bahin sa inyong Manunubos? Unsay inyong gibati? Kon nalimut na kamo, amo kamong awhagon sa paghinumdom ug moawhag niadtong inyong gitudloan sa paghinumdom unsay inyong nabati. Kini nga kahibalo ug kining mga pagbati maoy sinugdanan sa hugot nga pagtuo.

Ang hugot nga pagtuo usa ka pagpili nga kinahanglan himoon sa matag tawo. Ang hugot nga pagtuo dili basta lang gusto og usa ka butang nga tinuod ug naghanduraw nga makumbinser ang imong kaugalingon nga mao kini. Ang hugot nga pagtuo mao ang kasiguroan sa pagkatinuod sa mga butang nga wala nato makita. Usa usab kini ka baruganan nga aksyon. Tingali kini gikasulti nga ang hugot nga pagtuo mura og espirituhanon nga panumdoman sa atong kinabuhi sa wala pa dinhi sa yuta.

“Ang hugot nga pagtuo kinahanglan itumong diha ni Jesukristo aron kini makagiya sa usa ka tawo ngadto sa kaluwasan. … Ang hugot nga pagtuo mapukaw pinaagi sa pagpaminaw sa ebanghelyo nga gitudlo pinaagi sa may katungod nga mga tigdumala [sama ninyo] nga pinadala sa Dios. Ang mga milagro dili mamunga og hugot nga pagtuo, apan ang lig-on nga pagtuo motubo pinaagi sa pagkamasulundon sa ebanghelyo ni Jesukristo. Sa lain nga pagkasulti, ang hugot nga pagtuo moabut pinaagi sa pagkamatarung.”⁵ Ang hugot nga pagtuo dili moabut gikan sa pagpangayo og mga timailhan gikan sa Dios apan pinaagi sa pagtuman ug pagsunod sa Iyang mga sugo.

Elder Renlund: Ang Dios gusto nga magbaton kita og hugot nga pagtuo. Gusto Siya nga makaangkon kita og hugot nga pagtuo aron Siya makapanalangin kanato. Misulti si Alma niini ngadto sa mapaubsanon nga mga Zoramite: “Ug karon, tan-awa, ako moingon nganha kaninyo, ug ako manghinaut nga kamo kinahanglan mahinumdom, nga ang Dios maloloy-on ngadto sa tanan kinsa mituo diha sa iyang ngalan; busa siya nagtinguha, sa unang bahin, nga kamo kinahanglan motuo, oo, bisan sa iyang pulong.”⁶

Ang hugot nga pagtuo mao ang yawe nga makaabli sa kalooy sa Dios. Dayon si Alma mitudlo nga ang usa ka tawo kinahanglan nga mohukom nga siya gustong makabaton og hugot nga pagtuo ug dayon molihok diha sa hugot nga pagtuo sa dili pa ang pagtuo molambo. Mipadayon si Alma: “Apan tan-awa, kon kamo mopukaw ug modasig sa inyong mga galamhan, bisan ngadto sa pagsulay sa akong mga pulong, ug pagbansay sa usa ka tipik sa hugot nga pagtuo, oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa akong mga pulong.”⁷

Aron molambo ang hugot nga pagtuo, ang tawo kinahanglan gayud mopili sa pagbaton og hugot nga pagtuo. Ang usa ka tawo kinahanglan gayud magtinguha nga makabaton og hugot nga pagtuo. Ang usa ka tawo kinahanglan gayud molihok diha sa hugot nga pagtuo.

Sister Renlund:Tingali ang usa ka pagpakita makahulagway niini nga punto. Aduna kita dinhi usa ka gilansangan nga tabla. Aduna usab tay dugang 12 ka mga lansang. Mao nga, pinangga, aduna koy tahas alang ninyo. Mahimo ba ninyong balansehon ang ubang 12 ka mga lansang sa ibabaw sa nalansang na diha sa tabla?

Elder Renlund: Ang unsa?

Sister Renlund: Posible ba kini? Kana, naa na kay usa. Kinahanglan pa ka og 11 pa. Samtang nagsulbad niining puzzle, ang uban mahimong mosulay sa pagbutang og usa diha sa ibabaw ug dayon moundang.

Elder Renlund: Naa ba kay papilit diha?

Sister Renlund: Ang tawo mahimong maghunahuna nga ang sunod lakang dili mahimo. Daghang tawo ang moundang sa pagsulay, naghunahuna nga, “Imposible kini.”

Apan kon andam kamong moingon hinoon nga, “Posible ba kini?”, lagmit andam kamong mohimo sa laing paagi. Sulayi og ingon ani. Pagbutang og usa ka lansang sa atubangan nimo. Karon pagbutang og laing lansang atbang sa unang lansang, nga ang talinis mag-atubang diha nimo. Ibutang ang sunod nga lansang atbang sa unang lansang nga ang talinis layo nimo. Ipadayon ang pagbutang sa tanan apan ang katapusang lansang ibabag sa unang lansang diha sa nag-ambihas nga pagkahan-ay.

Sa inyong paghimo, inyong makita nga dunay metodo. Sugdan ninyo sa paghunahuna nga, “Tingali posible kini.” Ang inyong paglaum molambo. Sa katapusan, hapit na jud ka.

Elder Renlund: Nadugangan gyud ang akong paglaum.

Sister Renlund: ibutang ang katapusan nga lansang sa ibabaw ug sa nag-ambihas sa ubang lansang. Husto na! Ingon ra niana. Karon, pag-amping og maayo, guniti lang ang lansang sa ilalom, alsaha kining tanan ug ibutang ang lansang sa ilalom ngadto sa lansang diha sa tabla.

Usahay ang unang pagsulay dili mosalir. Busa, sa daghang pag-ekpirimento, kinahanglan sulayan sa ikaduhang higayon. Sunda ang samang paagi. Ibutang ang katapusang lansang sa ibabaw ug pag-amping og maayo, amping gyud—

Elder Renlund: Wala man ka magsulti daan.

Sister Renlund: Alsaha ang tanang lansang ug ibalanse kini. Perpekto! Sa higayon nga makahibalo na kamo unsaon kini pagbuhat, ang solusyon ingon og maklaro na.

Elder Renlund: Ayaw pagginhawa!

Sister Renlund: Mao usab kini sa pag-angkon og usa ka pagpamatuod. Sa higayon nga mahibaloan na ninyo kon unsaon sa pagkuha og tubag gikan sa Dios, dayon ang sangputanan ingon og sigurado na. Kini gipamahayag diha sa saad sa Basahon ni Mormon ang gisunod sa akong bana ug ako sa 11 anyos pa ug ingon nga kitang tanan misunod sa dihang kita nakabaton sa atong pagpamatuod. “Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.”⁸

Kon inyong sugdan sa pangutana nga, “Kining mga butanga dili ba kaha tinuod?”, kini mosangpot sa hugot nga pagtuo. Kon inyong sugdan sa pangutana, “Dili ba kaha kini sayop?”, mosangpot kini sa pagduhaduha. Ug ang pagduhaduha dili gayud mosangpot sa hugot nga pagtuo.

Elder Renlund: Sa usa ka okasyon samtang mibisita sa usa ka komperensya sa stake, ang presidente sa stake mihangyo nako sa pagbisita sa usa ka tawo nga akong tawagon og Stephen. Si Stephen nagmatinud-anon nga miyembro sa Simbahan. Usa siya ka returned missionary ug naminyo sa templo. Matinud-anon kaayo siyang miserbisyo sulod sa daghang katuigan apan nagsugod sa pagduhaduha bahin sa Simbahan. Sa akong pagpakighinabi ni Stephen, miingon siya nga aduna siyay problema sa pagkatinuod nga si Joseph Smith misulat o midiktar og upat ka mga bersyon sa Unang Panan-awon. Naghunahuna siya nga tingali nagpasabut kini nga gihimo-himo lang kini ni Joseph Smith.

Akong gipakontak si Stephen sa usa ka tawo nga nagtrabaho diha sa Church History Department kinsa nagsiksik niining upat ka mga bersyon mga dekada nang milabay. Si Stephen nakighinabi sa tigsiksik. Sa sunod higayon nga nakig-istorya ko ni Stephen miingon ko, “Unya, unsa man ang imong gibati mahitungod sa Unang Panan-awon?”

Miingon siya, “Nan, okay na akong gibati bahin niana kay natubag man ang akong pangutana. Wala na kana maghasol kanako. Apan karon nabalaka ko bahin sa poligamiya nga gibuhat didto sa Nauvoo ug human sa Manifesto niadtong 1890. Kana nakasamok gayud kanako.”

Akong gihangyo si Stephen sa pagpakighinabi og laing tawo diha sa Church History Department. Human niadto nga diskusyon, akong gikontak si Stephen ug nangutana kon kumusta na siya.

Miingon siya, “Nan, wala na kana maghasol kanako. Nakasabut nako unsay nahitabo, ug ang akong mga gikabalak-an nasulbad na. Apan karon naproblema gyud ko nga ang priesthood gidili ngadto sa kaliwata nga Afrikano.”

Sister Renlund: Si Stephen sama sa daghang mga tawo. Mipili siya nga magmakanunayon nga tigduha-duha. Sa paglabay sa panahon, kon masulabad ang usa ka problema, adunay lain na usabsad ang makit-an. Bisan og si kinsa pa ang mosulay sa pagtubag niining mga pangutana, makakita siya og laing hilisgutan nga makapadayag sa iyang pagduhaduha. Ang gibuhat ni Stephen mao nga ang usa ka eklesiatikanhon nga pagdula og whack-a-mole. Nakahibalo ba mo anang, dula sa mga bata nga ang mole mosulpot diha sa tabla ug imo dayon ning bunalan, laing mole mosulpot na usab sa laing dapit.

Kini lahi kaayo nga sitwasyon alang sa usa ka babaye nga among nahimamat didto sa Lubumbashi, sa Democratic Republic sa Congo. Ang iyang ngalan mao si Angelique. Matinud-anon siya nga returned-missionary. Aduna siyay lig-on nga pagpamatuod ni Propeta Joseph Smith. Gimahal niya ang Basahon ni Mormon. Gimahal niya ang tanang butang bahin sa Simbahan.

Sa dihang nahimamat namo siya, nagbasa siya sa libro nga sinulat sa usa sa mga lider sa Simbahan sa wala pa siya nahimong Presidente sa Simbahan. Ang libro nasulat sa wala pa ang pagpadayag sa priesthood niadtong 1978 ug nagsugyot nga, tungod sa daghang butang nga nahimo sa kinabuhi sa wala pa dinhi sa yuta, nga kadtong kaliwatan sa Afrikano dili mahimaya. Si Angelique nagpatabang aron masabtan kon nganong naingon niini ang kahimtang. Gisultihan siya sa usa ka bag-ong sakop sa Korum sa Napulog Duha nga kining kanhi lider sa Simbahan nasayop, ingon ka simple ug nga siya namahayag lang sa iyang opinyon, usa ka opinyon nga dili husto. Natagbaw si Angelique sa pagpasabut. Milihok siya diha sa pagtuo pinaagi sa pagpabilin diha sa dalan sa pakigsaad ug misalig sa Dios.

Elder Renlund: Ang pagduhaduha dili makapasiugda sa hugot nga pagtuo. Ang kahayag wala mag-agad sa kangitngit sa pagkamugna niini. Si Pedro wala sultihi, samtang nagkaunlod siya ngadto sa tubig human nga misulay siya sa paglakaw ibabaw niini, “O Pedro, kon dako lang unta ang imong pagduha-duha.” Wala, gisultihan siya nga, “O tawong diyutayg pagtuo, nganong nagduhaduha ka man?”⁹

Diha sa Lectures on Faith, ang kalainan tali sa hugot nga pagtuo ug pagduhaduha gipasabut: “Ug kon asa anaa ang pagduhaduha ug kawalay kasiguroan wala ang hugot nga pagtuo, ni mahimong maanaa kini. Tungod kay ang pagduhaduha ug ang hugot nga pagtuo dili mabuhi sa samang tawo sa samang higayon; aron kanang mga tawo kansang mga hunahuna ubos sa pagduha-duha ug ang kahadlok dili makaangkon og dili matarug nga pagsalig; ug diin ang dili matarug nga pagsalig ang pagtuo huyang; ug diin ang hugot nga pagtuo huyang ang mga tawo dili makahimo sa pakigbatok sa tanang oposisyon, mga kalisdanan ug mga kasakit nga ilang matagbuan aron mahimong tigpanunod sa Dios, ug kauban nga tigpanunod ni Kristo Jesus; ug sila magmaluyahon diha sa ilang mga hunahuna, ug ang kaaway makaangkon og gahum diha kanila ug molaglag kanila.”¹⁰

Mao gayud kini ang nahitabo kang Estephen. Gitugutan niya ang pagduhaduha ug kawalay kasiguroan nga makaukopar sa iyang hunahuna. Sa paglabay sa panahon, wala na siyay kusog sa pagharong sa mga hagit nga atubangon sa tawo isip usa ka miyembro sa Simbahan. Nagkadako ang kabalaka diha sa iyang hunahuna, ug ang iyang hugot nga pagtuo nahanaw.

Sister Renlund: Ang pagbaton og pangutana bahin sa Simbahan ug sa doktrina niini dili problema. Ang pagpili nga mahimong magmakanunayon sa pagduhaduha mao ang problema. Nasabtan ni Joseph Smith nga sa dihang nabasa niya, “Kon aduna man kaninyoy nakulangan og kaalam, papangayoa siya sa Dios, nga nagapanghatag ngadto sa tanang mga tawo sa madagayaon gayud, ug sa walay pagpamoyboy; ug kini igahatag kaniya.”¹¹

Apan ang tudling nagpadayon, “Hinoon kinahanglan nga mangayo siya uban sa pagtuo, sa walay pagduhaduha.”¹²

Sa laing pagkasulti, pangayo sa Dios, sa walay pagduha-duha nga Siya makahatag kanimo sa tubag. Ang tudling nagpadayon, “Kay siya nga nagaduhaduha [o natahap], sama sa balud sa dagat nga ginahandos ug ginakusokuso sa hangin. Ayaw ipadahum sa maong tawo nga siya adunay madawat gikan sa Ginoo. Siya nga maoy tawong tagurhag panghunahuna nga mabalhinon sa tanan niyang mga paagi.”¹³

Aron makadawat sa matang sa tubag nga gitinguha ni Joseph Smith, aron makadawat sa matang sa tubag nga kulang nato, kinahanglan kita nga moduol sa Dios inubanan sa matuohon nga kasingkasing ug usa ka matinguhaon nga hunahuna nga ang mga butang sa Dios mabutyag ngari kanato.

Elder Renlund: Ganahan kami sa pamahayag ni ElderJohn A. Widstoe, usa ka nahaunang Apostol niining dispensasyon gikan sa Norway. Akong usbon sa pagkasulti ang unsay larino kaayo niyang giingon: “Ang pagduha-duha, gawas kon giusab ngadto sa pagpakisayud [gikan sa husto nga mga tinubdan], walay balor o bili sa kalibutan. … Ang pagpasigarbo sa pagkamaduhaduhaon … nag-urong nga maduhaduhaon, tawo nga kontento na sa iyang kaugalingon, dili andam nga maningkamot, sa paghatag og bugti sa [balaan] nga pagkaplag, dili kalikayan nga mosangpot sa kawalay pagtuo ug mahugaw nga kangitngit. Ang iyang mga pagduhaduha nanubo sama sa makahilo nga uhong tungod sa kakulang sa kahayag diha sa espirituhanon nga mga luna sa iyang hunahuna. Sa katapusan, buta sama sa mole diha sa iyang lungag, sa kasagaran iyang iagi ang saktong rason sa pagbugalbugal, ug imbis magkugi magtinapulan. Ang labing yanong kamatuoran mao ang sumada sa tanang maong pagduhaduha. … Dili man sayop ang magduhaduha gawas kon kini mahimong katapusan [niini mismo]. Makapasaka kini sa dignidad kon mahimo kining aktibo sa [balaan] nga pagsiksik, ug sa pagbuhat sa, kamatuoran. … Kana nga pagduhaduha modako ra sa iyang kaugalingon, ug, tungod sa makanunayong pagtapol, mopasanay og mas daghang pagduhaduha, dautan.”¹⁴

Ang mga pulong ni Elder Widstoe tinuod gihapon. Ang permanenting pagduhaduha dili mosangpot sa pagkahibalo sa katinuod sa Manluluwas, nga si Jesukristo; dili kini mosangpot sa pagkahibalo gayud nga kita adunay mabination, mahigugmaon nga Langitnong Amahan. Atong mahibaloan ang katinuod niining buhat sa ulahing mga adlaw, apan nagkinahanglan kini nga kita mopili sa hugot nga pagtuo, dili ang pagduhaduha, ug nga kita moadto sa husto nga mga tinubdan alang sa atong mga tubag. Nagkinahanglan kini nga atong ilhon nga atoa ang pagpili. Dili kini usa ka gawas nga pwersa nga gipatuman ngari kanato kon dawaton ba nato ang Pag-ula ni Jesukristo ug ang makaluwas nga mga ordinansa sa atong mga kinabuhi. Kita mopili sa pagsalig sa Dios.

Sister Renlund:Usahay mabutang ta sa pag-ila kon ang usa ka butang tinuod ba o dili. Mihatag si Mormong kanato og sumbanan nga sundon: “Busa, ang tanan nga mga butang nga maayo nagagikan sa Dios; ug kana nga mga dautan nagagikan sa yawa; … Apan tan-awa, kana nga iya sa Dios nagdapit ug nagdani sa paghimo sa maayo sa kanunay; busa, matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios. … Kay tan-awa, akong mga kaigsoonan, kini gihatag nganha kaninyo ang paghukom, nga kamo unta masayud sa maayo gikan sa dautan; ug ang paagi sa paghukom ingon ka yano, nga kamo mahimo nga masayud uban sa usa ka hingpit nga kasayuran, ingon nga ang kahayag sa adlaw gikan sa kangitngit sa kagabhion. Kay tan-awa, ang Espiritu ni Kristo gihatag ngadto sa matag tawo, siya masayud sa maayo gikan sa dautan; busa, ako mopakita nganha kaninyo sa paagi sa paghukom; kay ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahum ug gasa ni Kristo; busa kamo mahimo nga masayud uban sa usa ka hingpit nga kasayuran nga kini gikan sa Dios. Apan bisan unsa nga butang nga modani sa mga tawo sa pagbuhat sa dautan, ug sa dili pagtuo kang Kristo, ug sa paglimud kaniya, ug sa dili pag-alagad sa Dios, niana kamo masayud uban sa usa ka hingpit nga kasayuran nga kini gikan sa yawa.”¹⁵

Mao nga, simple lang kini. Kon ang pagpili makahimo kaninyo sa pagbuhat og maayo ug sa pagtuo kang Kristo, naggikan kini sa Dios. Kon ang pagpili nag-agni kaninyo sa paghimo og dautan ug paglimud kang Kristo, kini iya sa yawa. Sa inyong pagsubay sa dalan sa pagkigsaad, makahibalo kamo nga kadtong mga butang nga makabalda kaninyo gikan niana nga dalan, kanang mag-awhag kaninyo sa dili pagtuo diha ni Kristo, sayop. Kadtong mga butang nga nag-agni kaninyo sa pagtuo sa Dios, sa paghigugma Kaniya, ug ang pagsunod sa Iyang mga sugo naggikan sa Dios.

Elder Renlund: Makapaikag kon sa unsang paagi ang tawo motubag sa espirituhanon nga mga pag-aghat mag-agad kon ang tawo mopili sa pagtuo o sa pagduhaduha. Nahinumdom mo sa Mga Buhat kapitulo 2 samtang ang mga Apostoles nagsangyaw. Nakadungog sila og tingog gikan sa langit, ingon sa huros sa makusog nga hangin. “Ug silang tanan napuno sa Espiritu Santo, ug misugod sila sa pagsulti sa nagkalainlaing mga pinulongan, sumala sa ipalitok kanila sa Espiritu. … Ug sa nabanha na, ang kadaghanan nanagpanugok ug sila nangalibog kay ang matag-usa nakadungog man sa mga apostoles nga naglitok sa pinulongan sa matag-usa nga nakadungog. Ug sila nahingangha ug nahibulong, nga nanag-ingon, tan-awa ra, dili ba mga Galileanhon man kini silang tanan nga nanagpanulti? Ug naunsa ba nga ang tagsatagsa kanato nakadungog man kanila nga nagasulti sa atong matag-kaugalingong pinulongan nga natawhan?”¹⁶

Kining talagsaon nga mga panghitabo misangpot sa daghang pagkakabig. Apan alang sa uban, adunay lahi nga tubag. Atong mabasa, “Dihay nanag-ingon agig pagbugalbugal, Kana sila nangabasdak sa tam-is nga bino.”¹⁷

Ang Espiritu sama ra gihapon, kini mao ang Espiritu Santo nga gibubo niadtong mga Galileanhon nga mga Apostoles kinsa nagsangyaw bahin ni Jesukristo. Sa adlaw sa Pentecostes, ang Espiritu gibubo diha sa kaabunda ug gani ang uban mibugal-bugal niadtong mga nakabig ug nangrason sa kasinatian. Agig resusta, ilang nataligam-an kining masadya nga pagbubo sa Espiritu Santo. Unsay nakahimo og kalainan? Ang ila pagpili. Kadtong mipili sa hugot nga pagtuo ug pagsalig imbis pagduhaduha nakaangkon og talagsaong espirituhanong kasinatian nga misangpot ngadto sa pagkakabig.

Sister Renlund: Namulong usab si Alma bahin niini. Miingon siya: “Ug busa, siya nga mopatig-a sa iyang kasingkasing, ang mao modawat sa gamay nga bahin sa pulong; ug siya nga dili mopatig-a sa iyang kasingkasing, ngadto kaniya ihatag ang dako nga bahin sa pulong, hangtud kini ihatag ngadto kaniya ang kasayuran sa mga misteryo sa Dios hangtud siya masayud kanila sa hingpit. Ug sila nga mopatig-a sa ilang mga kasingkasing, ngadto kanila ihatag ang gamay nga bahin sa pulong hangtud sila wala nay masayran mahitungod sa iyang mga misteryo; ug unya sila pagadad-on nga mga bihag sa yawa, ug pagadad-on pinaagi sa iyang kabubut-on ubos ngadto sa kalaglagan.”¹⁸

Balik ngadto sa atong sambingay, kadtong mopili sa pagpabilin diha sa gastado, tingali lumping nga bangka nga nangahup-ak na ang pintal mao kadtong wala nagmagahi sa ilang kasingkasing. Nagsubay sila sa dalan sa pakigsaad ug nagpabilin sa dalan sa pagkigsaad. Dayon, samtang naglahutay sila hangtud sa katapusan, ang saad sa kinabuhing dayon gilugwayan. Mao kini ang labing dako nga gasa nga mahatag sa Dios. Pinaagi kini niining proseso nga kita makaila ni Jesukristo, makahibalo sa Iyang buhi nga reyalidad, ug makahibalo sa Iyang gugma ug kaluoy. Kining espirituhanon nga gasa mahatag sa tanang mopasarang.

Sa Doktrina ug mga Pakigsaad giingon, “Ngadto sa uban kini gihatag pinaagi sa Espiritu Santo aron masayud nga si Jesukristo mao ang Anak sa Dios, ug nga siya gilansang sa krus alang sa mga sala sa kalibutan. Ngadto sa uban kini gihatag sa pagtuo sa ilang mga pulong, nga sila unta makabaton og kinabuhi nga dayon kon sila magpadayon nga matinud-anon.”¹⁹

Elder Renlund: Niadtong Abril 2009, gipaluyohan ako isip usa ka General Authority sa Simbahan. Niadtong Oktubre 2009, gihangyo ko sa pagpamulong sa kinatibuk-ang komperensya. Kabahin kini sa “paglihi nga programa sa bag-ong General Autoriry sa Simbahan.” Nabalaka ko nga ang makapaminaw ba ang akong amahan sa komperensya. Nagtrabaho siya isip panday sa tibuok niyang kinabuhi ug, sa edad nga 92, aduna na siyay grabing problema sa bukobuko. Dili siya makaadto sa Conference Center. Mao nga, usa sa akong mga igsoong babaye misiguro nga makatan-aw siya sa sesyon diha sa TV didto sa iyang panimalay sa Siyudad sa Salt Lake.

Human sa komperensya miadto ko sa iyang balay aron masuta unsay iyang hunahuna sa akong pakigpulong. Hilumon siya nga tawo ug dili kaayo hilig mohatag og komplemento.

Miingon ko, “Pa, nakakita ba ka sa komperensya?”

Siya miingon, “Ya.”

Miingon ko, “Pa, nakadungog ba ka sa akong pakigpulong?”

Siya miingon, “Ya.”

Miingon ko, “Unya, Pa, unsay imong hunahuna?”

Miingon siya, “Ah, maayo ra man to. Nakadayeg kaayo ko hapit.” Ug kadto ang labing maayo nga komplemento gikan niya.

Apan akong nahibaloan nga medyo nahasol siya og gamay nianang hapona, tungod kay gusto gayud niyang mopaambit ngari nako sa usa niya ka damgo sa miaging gabii. Dili siya damguhon nga tawo. Wala siyay mga imahenasyon. Wala gayud koy nahibaloan nga siya namakak. Kanunay siyang pintok nga manulti. Miingon siya, “nagdamgo ko nga namatay ko ug nakita ang Manluluwas, si Jesukristo. Iya akong gidawat sa iyang mga bukton ug miingon nga akong mga sala napasaylo na. Ug Dale, nindot kaayo kadto pamation.” Mao ra kadto ang iyang giingon, ug napugngan ko sa pagpadayon og pangutana. Namatay siya paglabay sa duha ka bulan samtang si Ruth ug ako didto sa Madagascar.

Ang akong papa, human mipasakop sa Simbahan didto sa Larsmo, Finland, sa edad nga 24 nagpakabuhi sumala sa kahayag ug kahibalo nga iyang nadawat. Iyang nabuhat ang tanan nga gipabuhat kaniya. Nahimo siyang usa kinsa angayan nianang gasa sa Espiritu nga mahibalo nga si Jesus mao ang Kristo ug gilansang alang sa mga sala sa kalibutan, ug sa iyang mga sala. Ang mahimong angayan alang niining gasa wala mag-agad sa sekso ug wala usab kini nag-agad sa katungdanan sa priesthood. Nag-agad kini sa pagkaangayan nianang gasa pinaagi sa pagpili sa hugot nga pagtuo, pinaagi sa pagpili sa dalan sa pakigsaad.

Sister Renlund: Mga kaigsoonan, sa inyong pagtabang sa mga indibidwal nga makabuntog sa pagduhaduha ug mogamit sa hugot nga pagtuo, inyong natuman ang unsay giawhag ni Presidente Russell M. Nelson nga atong buhaton isip Simbahan. Miingon siya nga “ang among mensahe ngadto sa kalibutan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, dawata ang mga panalangin sa balaan nga templo, pagbaton og molahutay nga kalipay, ug mahimong angayan sa kinabuhing dayon.”²⁰ Ang pagdawat niining imbitasyon usa ka buhat sa hugot nga pagtuo.

Samtang kamo magtudlo, makatabang usab kamo niadtong kinsa mibiya sa dalan sa pakigsaad. Kamo magtudlo alang kanila, alang sa ilang mga anak, mga apo, ug tingali sa mga apo sa tuhod. Ang Manluluwas nag-awhag, “Kay ngadto kanila kamo magpadayon sa pag-alagad; kay kamo wala masayud kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug Ako moayo kanila; ug kamo mao ang hinungdan sa pagdala og kaluwasan ngadto kanila.”²¹

Mao kini ang higayon sa dakong kamatinguhaon diha sa Simbahan. Ang kamatuoran nga natago sulod sa mga siglo nabutyag na. Ang balaan nga mga templo nagdaghan sa yuta. Ang mga misyonaryo nagsangyaw sa mensahe sa dakong kalipay sa hapit matag nasud. Isip katawhan nga mga Santos ug mga disipulo sa Ginoong si Jesukristo, nagkahiusa kita sa pagpangalagad diha sa “mas balaan nga paagi,” ingon sa giawhag ni Presidente Nelson, ug ang Ginoo mipadali sa Iyang “buluhaton diha sa iyang angay nga panahon.”²² Ang Ginoo sa ubasan mag-ugmad uban kanato.²³ Ang mensahe nga inyong itudlo mao ang mensahe sa hingpit nga kalipay ug kamaya nga mao ang panalangin alang sa matinud-anon.²⁴

Elder Renlund: Ang unang responsibilidad nako isip usa ka sakop sa Korum sa Napulog Duha ka mga Apostoles mao ang pag-adto ug pagsulti sa Church History Department nga ako mopuli ni Elder Jeffrey R. Holland isip tigtambag sa ilang departamento. Sama sa inyong mahanduraw, adunay mga “paghilak, ug pagdangoyngoy, ug pagpangagot sa mga ngipon”²⁵ sa dihang ilang nahibaloan nga ang ilang pinalanggang tigtambag mapulihan na. Nagkulang na gud sa tisyu.

Isip kabahin sa akong tahas isip tigtambag sa Church History Department, nabasa na nako ang tanang volume sa The Joseph Smith Papers. Nabasa na usab nako ang unang volume sa sugilanon sa kasaysayan sa Simbahan, nga giulohan og Saints. ²⁶ Ang pagbasa sa tanan nga nasulat gayud ni Joseph Smith o gikareport yanong nakapalig-on sa akong pagpamatuod sa iyang papel isip usa ka propeta, pinili sa Dios sa pagpahiuli sa Iyang buhat dinhi sa yuta.

Si Joseph Smith wala gayud molihok isip usa ka impostor kinsa nakigkonsabo sa paglingla. Tataw nga si Joseph Smith mituo nga siya nakakita unsay iyang gisulti nga iyang nakita, ang atong Langitnong Amahan ug si Jesukristo; si Moroni; Juan Bautista; Pedro, Santiago, ug Juan; si Moises; Elias; ug si Elijah. Klaro nga siya milihok isip usa ka tawo kinsa nakahupot sa bulawan nga mga palid ug gihubad kadtong karaan nga mga teksto pinaagi sa gasa ug gahum sa Dios. Klaro nga siya milihok isip usa ka tawo kinsa nakadawat og pagpadayag gikan ni Jesukristo Mismo. Klaro nga siya milihok isip usa ka tawo kinsa nakadawat sa priesthood ug sa mga yawe sa balaan nga pagka-Apostol.

Nakahibalo ko sa mga paagi nga mas gamhanan ug mas masaligan kay sa unsay mabatyagan sa lima ko ka pagbati ug mopadayag nga si Joseph Smith nakakita sa unsay iyang gisulti nga iyang nakit-an, mihubad sa Basahon ni Mormon pinaagi sa gasa ug gahum sa Dios, ug nakadawat sa priesthood inubanan sa mga yawe niini alang sa kaluwasan sa katawhan. Nakahibalo ko nga kini tinuod. Nakahibalo ko nga kadtong mga yawe ania sa yuta karon ug nga si Presidente Nelson mao ang angayan nga sumusunod ni Joseph Smith dinhi sa yuta.

Unsay atong gihunahuna nga lumping ug nahup-ak nga pintal sa gastado nga bangka mahimong maoy gitugotan ug balaanon nga gisugo gikan sa mahangturon nga panglantaw. Ang Ginoo mahimong nakagunit sa nalumping ug sa nahup-ak nga pintal o Siya migamit niini alang sa Iyang kaugalingong mga katuyoan. Ako mismo nasayud nga ang Ginoo, si Jesukristo, naggiya sa Iyang buhat dinhi sa yuta karon. Ang Iyang mga sulugoon nakaila kaayo Kaniya. Ako nakaila Kaniya.

Sister Renlund: Mapasalamaton kong modugang sa akong pagpamatuod nga ako nasayud nga si Jesukristo mao ang atong Manluluwas. Kon mogamit kita sa hugot nga pagtuo, dili magduhaduha, diha sa Iyang maulaon nga pagsakripisyo ug ang mga bunga niana nga Pag-ula, sa atong mga kinabuhi mahangturon nga mapanalanginan. Mapasalamaton ko nga Iyang gipahiuli ang Iyang Simbahan karon uban sa hingpit nga mga panalangin nga magamit gayud sa mga anak sa Dios dinhi sa yuta.

Elder Renlund: Ang mensahe nga anaa kanato mao ang “ayaw pagduhaduha, apan pagmatuohon.”²⁷ Ania ako sa akong katungdanan isip usa ka Apostol sa Ginoo, si Jesukristo. Ania ako sa paghatag og espesyal nga pagsaksi sa ngalan ni Jesukristo, nga Siya buhi ug mao ang Manluluwas sa kalibutan. Ako mosaksi sa Iyang dalaygon nga kalooy, gugma, ug maamumahon nga pagpakabana alang sa tanang anak sa Dios. Ako mosaksi sa Iyang dili ikatandi nga maulaong pagsakripisyo alang kaninyo ug kanako. Sa akong pagkaila sa Manluluwas, nakat-on ako sa Iyang dakong tinguha sa pag-ayo sa mga butang, sa pagtabang sa pag-alim sa mga samad, ug sa paghupay sa mga nagmasulub-o. Mao kini ang usa sa Iyang dalaygon nga mga hiyas.

Ako mag-ampo gayud nga ang labing buhong nga mga panalangin sa Dios manaa diha ninyo, sa inyong mga pamilya, sa inyong mga estudyante, nga kamo motabang niadtong mga estudyante nga makapalambo og hugot nga pagtuo diha ni Jesukristo nga sila “dili magduhaduha, apan magmatuohon,” sa pangalan ni Jesukristo, amen.