Mga Santos: Ang Istorya sa Simbahan ni Jesukristo sa mga Santos sa Ulahing mga Adlaw
Niadtong 1861, si Presidente Brigham Young (1801–77) miawhag sa mga historian sa Simbahan nga usabon ang ilang pamaagi. “Isulat sa sinugilon nga estilo,” mitambag siya ug “isulat lamang ang ikanapulong bahin niini.”1
Ang istorya diha sa sunod nga mga pahina nagsunod niana nga tambag. Malipayon kong mopaila sa bag-ong upat ka volume nga series nga gitawag og Mga Santos: Ang Istorya sa Simbahan ni Jesukristo sa mga Santos sa Ulahing mga Adlaw. Ang Chapter 1 gilakip niini nga isyu, ug ang nagsunod nga mga chapter imantala niini nga magasin sa sunod nga pipila ka bulan. Ang unang libro maanaa na sa katapusan niining tuiga, ug ang ubang mga volume mosunod.
Kining art sa Nauvoo ipakita diha sa hapin sa Mga Santos volume 1.
Paghulagway pinaagi ni Greg Newbold
Ang Mga Santos giandam agig tubag sa sugo sa Ginoo “sa pagtipig sa talaan ug sa kasaysayan sa simbahan sa kanunay” (D&P 47:3). Dili sama sa nangaging mga kasaysayan sa Simbahan, usa kini ka gisugilon nga kasaysayan nga gisulat sa makakabig nga estilo nga ma-access sa mga batan-on ug mga hamtong.
Ang Mga Santos, hinoon, dili historical fiction. Usa kini ka tinuod nga istorya base sa mga rekord sa mga tawo sa nangagi. Ang matag detalye ug matag linya sa dialogue gisuportahan pinaagi sa historical nga mga tinubdan. Ang mubo nga mga sulat sa katapusan sa chapter nagpasabut sa mga rekord ug dugang nga mga tinubdan. Kadtong gusto nga mobasa sa aktwal nga mga rekord, nga mas masabtan ang may kalabutan nga mga hilisgutan, ug makadiskubre og dugang pa gani nga mga istorya makakita sa mga link diha sa luyo sa mga libro ug sa internet sa mgasantos.lds.org.Ang Labing Bililhon Nga Butang Sa Pagpahiuli
Kini nga mga libro dili kasulatan, apan sama sa mga kasulatan, naglakip kini sa balaanong kamatuoran ug mga istorya sa dili hingpit nga mga tawo nga naningkamot nga mahimong mga Santos pinaagi sa Pag-ula ni Jesukristo (tan-awa sa Mosiah 3:19).
Dihang gihiusa kini, ang upat ka volume nagsaysay sa istorya sa Simbahan sa Ginoo sa paningkamot nga matuman ang mando nga mahingpit ang mga Santos (tan-awa sa Mga Taga-Efeso 4:11-13).Ang mga santos lahi ra kaayo og pamaagi, estilo, ug gitinguha nga tigbasa kay sa katapusang duha ka daghang volume sa mga kasaysayan sa Simbahan nga namantala kaniadto. Ang unang kasaysayan gisugdan
ni Joseph Smith niadtong mga 1830 ug gimantala sugod niadtong 1842.2 Ang ikaduha gimantala niadtong 1930 pinaagi sa assistant Church historian nga si B. H. Roberts.3 Ang tibuok kalibutan nga nakab-ot sa gipahiuli nga ebanghelyo sukad niana ug ang sugo sa Ginoo sa pagtipig og kasaysayan nagpadayon “alang sa kaayohan sa simbahan, ug alang sa nagtubo nga mga kaliwatan” (D&P 69:8) nagtimaan nga panahon na nga i-apil ang daghan pa nga mga Santos sa Ulahing mga Adlaw diha sa istorya.
Ang Mga Santos nagsugilon sa mga istorya sa ordinaryo nga mga lalaki ug mga babaye gikan sa labing unang mga adlaw sa Simbahan hangtud karon. Naglakip usab kini sa bag-ong detalye ug panabut ngadto sa mas naila nga mga tawo ug mga panghitabo gikan sa kasaysayan sa Simbahan. Ang matag istorya makatabang kaninyo aron masabtan ug makadayeg sa mga Santos kinsa nag-una kaninyo aron mahimo ang Simbahan kon unsa kini karon. Sama ninyo, sila dunay mga hagit ug mga kalampusan, ug sila nagsakripisyo aron maestablisar ang Zion. Kon hiusahon, ang ilang mga istorya—ug ang inyo—mamugna ang labing bililhong butang sa Pagpahiuli.
Ang Atong Sagrado nga Kaagi
Ang mga tigtipig sa rekord sa Basahon ni Mormon mitipig sa parehong dagko ug gagmayng mga palid. Sa dagkong mga palid ilang narekord ang kasaysayan sa politika ug sa militar. Gigamit nila ang gagmayng mga palid alang “sa mga butang sa Dios” nga “labi nga bililhon,” lakip na sa “pagsangyaw nga sagrado, o pagpadayag nga mahinungdanon, o pagpanagna” (1 Nephi 6:3; Jacob 1:2, 4). Ang gagmayng mga palid girekord “alang sa kaayohan ni Kristo, ug alang sa kaayohan sa atong mga katawhan” (Jacob 1:4). Ang Mga Santos nagtumong nga mahimong “gagmayng mga palid” sa kasaysayan, nga nag-focus sa atong sagrado nga kaagi. Naglakip lamang kini sa sampol sa tanang istorya nga masugilon aron ipakita kon sa unsang paagi molihok ang Ginoo diha sa kinabuhi sa mga Santos sa Ulahing mga Adlaw.
Ang Mga Santos dili lamang mahitungod sa dili hingpit nga mga tawo sa nangagi nga nahimong mas maayo uban sa tabang sa Ginoo. Kini alang usab sa dili hingpit nga mga tawo karon nga gustong kanunay nga mahinumdom Kaniya. Makatabang kini aron mahinumduman ninyo kon unsa kamanggiloloy-on ang Manluluwas sa Iyang katawhan, kon giunsa Niya pagpalig-on ang huyang nga mga tawo, ug giunsa paghiusa sa mga Santos sa tibuok kalibutan sa pagpadayon sa buhat sa Dios.