Usa ka Panalangin sa Kahupayan

Sarah Bieber

Calgary, Alberta, Canada

Sa dihang naklaro nga ang kanser sa akong amahan delikado na, ang akong inahan miingon sa kasagmuyo, “Siguro dili nato madawat ang atong milagro.” Nianang higayuna, akong gibati nga ang among pamilya makadawat og mga milagro, bisan kon ang pagpreserbar sa kinabuhi sa akong amahan dili apil niini.

Usa ka milagro ang miabut usa ka buntag sa dihang ang akong higala nga si Beth nangutana nako kon unsay akong mga plano para nianang adlawa. Gisultihan nako siya nga nagplano ko nga mogahin sa hapon kauban ang akong amahan didto sa ospital, apan ang mga tawo nga akong gikasabut nga mobantay sa akong anak wala madayon. Mitanyag si Beth nga maoy mobantay sa akong mga anak aron makagahin kog panahon kauban ang akong amahan. Mitanyag usab siya nga magdala og panihapon ngadto sa akong pamilya. Mapasalamaton kaayo ko.

Sa dihang miabut ko sa ospital, ang akong amahan walay kusog nga mobuka sa iyang mga mata o mokaon og bisan unsang pagkaon. Apan sa wala madugay human niana nakasinati siya og talagsaong pagdugang sa kusog. Sulod sa sobra sa tulo ka oras nagmata na gyud siya, ug nag-istoryahanay mi ug gani nanglakaw pa libut sa ward sa ospital sa pipila ka higayon. Walay laing mga bisita ang miabut atol niining panahona. Napanalanginan ko nga makabaton niining panahona nga ako siyang makauban.

Nangatawa mi ug nanghilak mi nianang adlawa. Ang akong amahan mipakigbahin kanako sa iyang mga pagbati mahitungod sa pagbiya niining kinabuhi sa yuta ug unsay labing importante ngadto kaniya—ang iyang pagpamatuod sa ebanghelyo ni Jesukristo. Kadtong hapona mao ang usa sa labing bililhon nga handumanan sa akong kinabuhi. Tulo ka adlaw ang milabay namatay siya.

Paglabay lamang og usa ka semana human sa iyang lubong nga naamguhan nako nga ang katapusang higayon nga naistorya nako ang akong amahan mao ang hapon nga gibantayan ni Beth ang akong mga anak. Uban sa mga luha nga midagayday sa akong aping, mipadala ko ni Beth og email nga nagpasalamat niya para sa iyang serbisyo ug mipasabut kon unsa kini kaimportante ngari nako.

Mitubag si Beth, “Duna koy pagpamatuod nga ang Dios gusto nga mopadangat kanato og mga panalangin sa kahupayan ug grasya—ilabi na kon magsagubang kita og butang nga lisud. Nag-ampo ko para sa kahupayan para nimo ug sa imong pamilya atol niining panahona.”

Natandog ko nga giaghat sa Dios si Beth aron mahatag ang panalangin nga iyang giampo nga akong madawat. Nasayud ko nga ang Dios mohatag kanato og mga panalangin sa kahupayan atol sa lisud nga mga panahon sa atong kinabuhi.