Pagserbisyo sa Simbahan
Ang Pagka-release mao ang Sinugdanan, Dili ang Katapusan
Walay posisyon o calling sa Simbahan ang mopataas o mopaubos kanato. Kauban kitang magpadayon.
Detalye gikan sa Seeking the One, ni Liz Lemon Swindle, dili mahimong kopyahon
Usa nako ka higala ang bag-o lang gi-release isip bishop sa iyang ward. Pipila ka adlaw ang milabay, kay nahibalo nga nagserbisyo sad ko isip bishop, mihangyo siya nga makig-istorya nako.
“Normal ra ba ni nga mobati sa unsay akong gibati?” nangutana siya.
“Unsa may imong gibati?”
“Wala nay koneksyon, siguro. Nalambigit ko sa daghan kaayong kinabuhi, ug karon sa kalit lang, wala na. Mobati pa kaha ko pag-usab og sama niadto nga pagkalambigit?”
Ang iyang pangutana nakapahunahuna nako sa panahon sa kaugalingon nakong pag-release. Nakahinumdom ko nga nakabaton og samang mga pagbati. Gimingaw ko nga hilabihan nga nalambigit sa pagtabang sa mga tawo aron mas mapaduol sa Manluluwas ug sa ilang Amahan sa Langit. Gimingaw ko sa pagdasig kanila aron magtinguha ug mosunod sa inspirasyon sa Espiritu Santo. Ang pagserbisyo isip bishop nahimong talagsaon nga panalangin, ug karon wala na kini.
Apan mao ba gyud kaha? Sa paglabay sa gamayng panahon, naamguhan nako nga ang panalangin sa paghatag og serbisyo wala gayud mawala. Nagpadayon kini nga oportunidad. Isip mga disipulo ni Jesukristo, dili ba angay man nato Siyang hinumduman kanunay? (tan-awa sa D&P 20:77, 79). Dili ba angay man kitang motabang kanunay sa uban aron mas mapaduol sa Manluluwas ug sa ilang Amahan sa Langit? Dili ba angay man kitang motabang kanunay sa uban, ilabi na sa atong mga kapikas ug mga pamilya, nga magtinguha ug mosunod sa inspirasyon sa Espiritu Santo?
Kining mga pulong nga gikan ni Elder Dallin H. Oaks sa Korum sa Napulog Duha ka mga Apostoles misantup sa hunahuna: “Wala kita ‘gipaubos’ kon kita ma-release, ug wala kita ‘gipataas’ kon kita tawagon. Walay ‘pataas o paubos’ sa pagserbisyo sa Ginoo. Dunay ‘abante o atras’ lamang, ug kana nga kalainan magdepende kon giunsa nato pagdawat ug paghimo ang atong pagka-release ug pagkatawag. Kausa nakadumala ko og pag-release sa batan-ong presidente sa stake nga nakahatag og maayong serbisyo sulod sa siyam ka tuig ug karon nalipay sa iyang pagka-release ug sa bag-ong calling nga nadawat niya ug sa iyang asawa. Gitawag sila nga mahimong lider sa nursery sa ilang ward. Niining Simbahana lang nga makita kana isip pareho nga talahuron!”1
Samtang ang akong higala ug ako nag-istorya, pareho namong naamguhan nga ang pagserbisyo wala matapos kon ma-release kita sa usa ka calling, bisan unsa pa kana nga calling. Alang sa mga sumusunod ni Kristo, ang pagserbisyo dili gayud matapos. Sa dili madugay makadawat kita og bag-ong calling, ug magsugod na usab kita samtang kauban kitang tanan nga magpadayon.