Ang Tanan Nagkinahanglan og Higala

Tim Overton

Arizona, USA

Paghulagway pinaagi ni Allen Garns

Mipaingon ko sa pultahan sa simbahan nga dunay usa ka klarong nahunahunaan: “Kon wala koy makit-an nga higala sa simbahan karon, dili na gyud ko mobalik.” Nakasimba na ko kuyog sa usa ka higala sa pipila ka higayon kaniadto, pero kini ang unang higayon nga mitambong ko isip investigator nga ako ra ug para sa akong kaugalingon. Gibati nako nga kinahanglan kong mopasakop sa Simbahan, pero duna koy mga kahadlok ug mga kabalaka.

Sa dihang misulod ko sa simbahan, gitimbaya ko sa usa ka young adult nga dunay dakong pahiyum ug mainiton nga paglamano. Iyang gipaila ang iyang kaugalingon nga si Dane McCartney. Nakita na nako si Dane kaniadto, sa dihang mi-try out siya para sa college football team nga akong giapilan. Ang akong kabalaka nawala sa dihang gidapit ko niya nga molingkod kauban niya atol sa mga miting sa Simbahan. Iya sab kong gidapit ngadto sa panimalay sa iyang pamilya para sa panihapon pagkahuman niana. Wala gyud koy higayon nga mobati nga nag-inusara nianang adlawa. Gisuportahan ko ni Dane ug sa iyang pamilya ug gitabangan nga matubag ang daghan nakong pangutana. Mipasakop ko sa Simbahan pipila ka semana human niana.

Kon igo lang nagmahigalaon si Dane nako nianang adlawa, tingali mibiya na ko sa simbahan human sa sakrament miting ug miundang na, nga naghunahuna nga misulay ko pero ang simbahan dili lang gyud para nako. Samtang sigurado nga importante ang pagkamahigalaon, ang pagkahimong usa ka higala naglangkob og sobra pa kay sa pagkamatinagdanon lang. Ang gugma ug suporta sa mga McCartney importante sa akong pagkakabig.

Kadto 14 ka tuig na ang milabay. Sukad niana nakaserbisyo ko og full-time nga misyon, naminyo sa templo, ug napanalanginan og lima ka talagsaong mga anak. Miserbisyo usab ako isip bishop ug stake president. Nakatambag ko og mga miyembro nga mihunong sa pagsimba tungod kay mibati sila nga nag-inusara ug walay mga higala sa simbahan. Naguol ko para nila. Unta dunay tawo nga misuporta nila sama sa gibuhat sa mga McCartney ngari nako.

Nagpasalamat ko sa akong Langitnong Amahan nga giamigo ko ni Dane nianang adlawa. Nanghinaut ko nga magmaisugon kitang tanan nga mahimong mga higala niadtong mga nag-investigate sa Simbahan, mga bag-o niini, o sa mga namalik niini.