Pagtulun-an human sa usa ka Pagtulun-an
1 Nephi 3:7
Ang Ginoo misugo ni Nephi sa pag-adto ug sa pagbuhat.
7 Ug nahinabo nga ako, si Nephi, miingon ngadto sa akong amahan: Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.
Ako moadto
“Kamo nagpakita sa inyong pagsalig Kaniya kon kamo maminaw uban sa tinguha sa pagkat-on ug paghinulsol ug dayon moadto ug mobuhat sa bisan unsay Iyang gihangyo. Kon kamo igo nga mosalig sa Dios sa pagpaminaw sa Iyang mensahe sa matag pagpamulong, awit, ug pag-ampo dinhi [sa matag usa] niini nga komperensya, makaplagan ninyo kini. Ug kon kamo moadto ug mobuhat dayon sa unsay gusto Niyang ipabuhat kaninyo, ang inyong gahum sa pagsalig Kaniya motubo, ug moabut ang panahon diin kamo mapuno sa pagpasalamat nga masayud nga Siya misalig kaninyo.”
Presidente Henry B. Eyring, Unang Magtatambag sa Unang Kapangulohan, “Salig sa Dios, Dayon Lakaw ug Buhata,” Liahona, Nob. 2010, 73.
Buhata
“Ako kining gihimo nga lagda: Kon ang Ginoo mosugo, buhata kini.”
Mga Pagtulun-an sa mga Presidente sa Simbahan: Joseph Smith (2007), 190.
Ang Ginoo misugo
“Ang matag sugo sa Ginoo gihatag alang sa atong paglambo, pag-uswag, ug pagtubo.”
Elder Robert D. Hales (1932–2017) sa Korum sa Napulog Duha ka mga Apostoles, “If Thou Wilt Enter into Life, Keep the Commandments,” Ensign, Mayo 1996, 36.
Siya moandam og paagi
Sa Daang Tugon, ang pag-andam og paagi nagpasabut og pag-establisar og nindot, maayo pagkabutang og timailhan nga dalan (tan-awa sa Deuteronomio 19:3) o paghawan sa dalan pinaagi sa pagtangtang sa mga babag (tan-awa sa Isaias 40:3).
Kon ang Ginoo mohatag kanato og usa ka sugo, kanunay Siya nga moandam og paagi alang kanato kon andam kita nga mosalig Kaniya ug motuman. Apan sama ni Nephi, kinahanglan gayud nga molihok kita diha sa pagtuo; dayon ang paagi moabut ra, kay ang Ginoo “nagbuhat pinaagi sa gahum, sumala ngadto sa hugot nga pagtuo sa mga katawhan” (Moroni 10:7).
Makatuman
“Kon may pagtuo kamo … walay magamakuli alang kaninyo.”