Pagtugyan sa Akong mga Kabalaka ngadto sa Dios
Ang tagsulat nagpuyo sa Maule, Chile.
Sa dihang akong nahibaloan nga ang akong higala dunay dagkong gipanglimbasugan, nanglimbasug ko nga makakita og kalinaw.
Paghulagway nga gihimo sa model
Sa dihang ang akong higala nga si Fernanda (dili tinuod niyang pangalan) wala motungha sa klase usa ka Biyernes, naghunahuna ko kon unsay nahitabo. “Nasakit ba si Fer? OK ra ba siya?” Nangutana ko samtang giduol nako ang pipila ka higala sa pagtapos sa adlaw. “Wala siya masakit,” laing higala ang mitubag, “kinahanglan lang siya nga moadto og psychologist.” Sa dihang nangutana ko kon ngano, giingnan ko niya nga si Fernanda nag-antus og depresyon ug mipasakit sa iyang kaugalingon. Sa wala madugay human ko nakahibalo, gi-admit si Fernanda sa ospital aron matambalan, ug wala namo siya makita sulod sa pipila ka semana.
Bisan kon managhigala mi, wala siya mopakigabhin nianang bahina sa iyang kinabuhi ngari nako. Iya kining gitago sa tanan tungod kay naulaw siya. Gisultihan ko niya sa wala madugay nga dili siya gusto nga ang uban mahinugon niya o sa iyang sitwasyon. Pero wala ko mahinugon niya—mibati lang ko og kalooy.
Nianang unang adlaw, mihigda ko human mieskwela, gitabunan og unlan ang akong nawong. Naluya gyud ko sa emosyonal nga paagi apan nahingawa og maayo nga matulog. Ang akong kalibutan labihan ka gubot. Gibati nako nga diha ko sa tunga-tunga sa unos, ug daghang hunahuna ug pagbati ang gitayhup nianang unos sa lain-laing direksyon. Gibati nako ang kalibog, pag-inusara, ug, labaw sa tanan, ang pagkawalay mahimo aron makatabang.
Unsaon Nako sa Pagtabang?
Unsay akong mabuhat o masulti aron matabangan siya? Sa unsang paagiha nga kaming managhigala magkahiusa ug makahatag sa among suporta? Wala ko kakita og bisan unsang matang sa solusyon aron mahupay ang akong mga higala o ang akong kaugalingon. Nag-ampo ko alang sa inspirasyon pero akong gibati nga daw ang akong mga pag-ampo wala gayud matubag.
Pero pagkasunod semana nakadawat ko og inspirasyon. Naglingkod ko sa akong sayo sa buntag nga klase sa seminary sa dihang ang akong magtutudlo mipahinumdom namo sa Unang Panan-awon ug giunsa ni Joseph Smith pagpangayo og panabang sa Langitnong Amahan bahin sa iyang mga kalisdanan ug mga problema. Ang akong magtutudlo nianang higayuna miingon, “Kon tinguhaon nato ang Amahan ug mangutana Kaniya, Siya motubag kanato. Dili gayud kita mag-inusara.”
Nakaamgo ko nga sa akong kaguol, gisira nako ang akong kasingkasing ngadto sa akong Langitnong Amahan. Bisan kon misulay ko sa pag-ampo kanunay, dili kadto igo—duna gihapon koy daghang kahadlok aron makakita og kalinaw. Nasayud ko nga nakasabut gayud Siya kon unsay akong gibati ug nga makatabang Siya kanako. Pero kinahanglan nakong tugutan ang Iyang impluwensya ug tinud-anay nga mosalig nga mahimo Niya kini—kinahanglan kong mopakita og hugot nga pagtuo.
Busa akong gihimo. Sa katapusan, samtang nagpadayon ko sa pag-ampo ug pagbasa sa akong mga kasulatan, naningkamot nga kuhaon sa Manluluwas ang akong mga alantuson, nasabtan nako nga sa katapusan ang depresyon sa akong higala mahuman ra. Bisan pa man sa kamatuoran nga ang kagubot sa gawas nagpadayon, mibati ko og kakalma, balansyado, nga dunay kalinaw. Ang akong inahan kanunayng nag-awhag nako nga magtinguha og kalinaw, nga nag-ingon, “Ang imong higala ma-OK ra lagi ug mao usab ikaw. Pagpabiling lig-on sa ebanghelyo, ug mosalir ra kining tanan.”
Pagsuporta sa Akong Higala
Sa dihang si Fernanda sa katapusan mibalik na og eskwela, nakahimo ko sa paghatag niya og lig-ong suporta, pero tungod kini kay nagtinguha ko ug nakakita og kalinaw sa akong kaugalingon mismo pinaagi ni Jesukristo. Naningkamot ko sa akong pinakamaayo nga mahimong maayo nga tigpaminaw, mahimong positibo, ug sa pagpakigbahin sa ebanghelyo. Masaligon ko sa dihang mipasabut ko sa plano sa kalipay ug sa dihang ako siyang gisultihan nga ang atong Amahan gusto nga makakita kita og hingpit nga kalipay, bisan pa man sa atong mga hagit. Mahimong madugay kini, pero posible kini alang sa tanan Niyang mga anak.
Dunay daghang sitwasyon sa akong kinabuhi diin gibati nako ang kahingawa ug kaguol, pero tungod sa ebanghelyo kanunay nakong nahinumduman kon diin ko gikan. Nasayud ko nga ako anak sa Dios ug nga Siya adunay plano alang kanako—ug alang ni Fernanda. Kitang tanan naglakaw sa lain-laing mga dalan, pero ang matag usa alang sa atong kaayohan tungod kay nahigugma Siya kanato. Ang matag dalan, matag pagsulay, adunay katuyoan. Ug kon makakita kita og kalinaw niadtong mga pagsulay, mahimo kitang mopakigbahin sa kalinaw nga atong naangkon ngadto sa uban.