“Siya Moluwas Kanamo”
Ang tagsulat nagpuyo sa Utah, USA.
Taliwala sa grabe nga kadaut, gibantayan sa Ginoo ang Iyang mga misyonaryo.
Mga litrato gihatag sa tagsulat ug ni Michael Remington
Ang linog nga miigo sa Japan niadtong Marso sa 2011 miabut og 9.0 nga intensity sa Richter scale—usa kadto sa kinakusgang mga linog sa narekord nga kasaysayan. Nianang higayuna, nagserbisyo ko isip presidente sa Japan Sendai Mission, ang parte sa Japan nga kinadul-an sa sentro sa linog. Sobra sa 16,000 ka mga tawo ang namatay ug gatusan ka liboan sa mga panimalay ug mga building ang nahagsa sa linog ug sa misunod nga tsunami.
Bisan pa man sa grabe nga kadaut, wala kami mamatyi bisan usa ka misyonaryo. Sa misunod nga mga adlaw ug mga semana, nakakita ko og mga milagro sa kinabuhi sa mga misyonaryo nga among gikauban og serbisyo. Parehong sa wala pa ug pagkahuman sa linog, ang usa ka mahigugmaong Amahan mipahimutang og sunod-sunod nga mga panghitabo nga nakaluwas sa Iyang mga misyonaryo.
Gigiyahan ngadto sa Protektado nga mga Dapit
Ang mga miting sa pagpangulo alang sa Koriyama Zone sa among misyon hapit kanunayng mahitabo sa Huwebes. Niining higayuna, hinoon, ang miting naiskedyul og Biyernes, Marso 11, 2011—ang adlaw sa linog. Ang mga miting sa pagpangulo kasagaran naglakip lamang sa mga lider sa zone ug district. Niining higayuna, ang tanang misyonaryo sa zone gidapit ngadto sa miting sa pagpangulo. Nagpasabut kini nga sa adlaw sa linog, ang mga misyonaryo sa Japan Sendai nga nagpuyo sa kinadul-an sa mga nuclear reactor nga nadaut sa linog ug sa tsunami layo ra sa ilang mga apartment, luwas nga nagtambong og miting sa pagpangulo didto sa Koriyama chapel. Gibalhin sila sa Ginoo ngadto sa luwas nga dapit.
Ang mga misyonaryo nga diha sa among miting sa pagpangulo dili lamang maoy gigiyahan ngadto sa luwas nga dapit sa wala pa moigo ang linog. Nakat-unan og sayo sa mga misyonaryo nga mosalig sa Ginoo ug sa mga pag-aghat sa Espiritu. Sa dihang miigo ang linog, wala nay panahon nga manawag sa mga lider para sa mga direksyon. Ang ubang mga misyonaryo naluwas tungod kay misunod na sila sa Espiritu, nga migiya kanila ngadto sa protektado nga mga dapit nga giandam sa Langitnong Amahan alang kanila.
Human sa linog, daghang misyonaryo ang miadto sa mga evacuation center. Ang ubang mga zone namalhin ngadto sa mga chapel, nga nakaangkon og medyo gamay rang kadaut ug diin mas gibati gayud nila ang kalinaw gikan sa Espiritu Santo. Ang giswerte nga pipila nagpabilin sa ilang mga apartment, nga walay heater, tubig, kuryente, o pagkaon. Apan luwas ang tanan.
Gigiyahan pinaagi sa mga Babag
Sa sinugdanan, kay wala masayud sa kadaut ngadto sa mga nuclear power plant, gisulayan nako sa pagpabalik ang mga misyonaryo didto sa among miting sa pagpangulo ngadto sa ilang mga apartment pagkahuman dayon sa linog. Apan ang Ginoo mimugna og mga babag sa pagbuhat sa ingon. Walay mga bus o mga tren nga nagdagan. Mao nga ang Langitnong Amahan padayon nga mipabiling luwas sa mga misyonaryo didto sa Koriyama.
Naghunahuna ko nga kinahanglanon ko didto sa mission home duol sa sentro sa linog. Apan human sa otso oras sa pagdrayb sa naguba ug naghuot nga kadalanan, among nabantayan nga ang amo usab nga agianan nababagan. Ang nahitabo hinoon kay didto ra man mi sa Koriyama, mas nakatabang mi sa pagpabakwit sa uban pang mga misyonaryo, usa ka proseso nga nakahatag og dugang nga ebidensya nga ang Ginoo nagbantay kanamo.
Human sa linog nagnihit ang gasolina. Ang trak sa gasolina nga nakamaneho pag-agi sa guba nga dalan hinay kaayong nagbiyahe, nga miresulta sa tulo ka oras nga paghulat sa gasolina, kon ugaling aduna man gani. Apan ang Ginoo misangkap kanamo sa milagrusong mga paagi. Pananglitan, samtang nagpabakwit sa mga sister ug sa mga elder ngadto sa luwas nga dapit sa Niigata sa laing bahin sa isla, naamguhan namo nga nagdrayb mi og 18 ka oras nga dunay usa ra ka tangke, nga ang gauge sa gasolina kanunayng naka-register nga “full.” Samtang nagkaduol na mi sa Niigata, ang gauge sa gasolina kalit rang minaug ngadto sa “empty.”
Peligro nga Biyahe
Swerte lang, ang among Langitnong Amahan padayon nga migiya og usa ka han-ay nga pagpabakwit taliwala sa grabe nga kadaut. Ang taas nga biyahe delikado. Dunay nagpadayong mga aftershock. Walay pampublikong transportasyon. Ang tubig ug ang suplay sa kuryente nabalda, ug hapit imposible na ang pagpalit og gasolina o pagkaon. Si Sister Tateoka ug ako nakasabut gayud kaayo nga kami ra ang makaabut ngadto sa duha ka elder sa bukiran nga lugar ug duha pa ka laing elder agi sa bukid ngadto sa laing bahin sa isla. Ang mga freeway gisirhan, mao nga kining katapusang biyahe magkinahanglan og lima o unom ka oras nga pagdrayb paingon sa amihanan sa bukid agi sa dili sementado nga mga dalan, laing duha ngadto sa tulo ka oras agi sa bukid ug paingon ngadto sa Tsuruoka, ug dugang upat ka oras balik ngadto sa luwas nga dapit.
Mibiya mi sayo sa buntag sa Marso 16 ug miabut sa apartment nila ni Elder Ohsugi ug Elder Yuasa mga alas 5:00 sa hapon. Aron makuha ang katapusang duha ka elder, kinahanglan mi nga mobiyahe balik ngadto sa habagatan, agi sa ibabaw sa bukid, ug paingon ngadto sa siyudad sa Tsuruoka. Gamit ang wala na kaabut sa tunga sa tangke nga gasolina, nasayud mi nga dili na mi pwedeng mobalik. Samtang nagsugod mi pagbiyahe aron kuhaon ang katapusang duha ka elder, nagsugod na sa pag-snow. Wala madugay, nabantayan namo ang among kaugalingon nga anaa sa dalan nga dili makita tungod sa unos sa snow, nga nagbiyahe og minos sa 15 ka milya (24 km) kada oras. Dili nako makita ang mga linya sa highway.
Pagka-alas 7:30 sa gabii, sa dihang sa katapusan nakaabut na mi sa ibabaw, gipahunong mi sa pulis. Usa ka opisyal ang mipahibalo nako nga usa ka dinahili ang nakababag sa dalan ug nakasira sa agianan sa bukid. Iya kong gisultihan nga dili na mi pwedeng magpadayon pa; kinahanglan ming mobalik ug moagi sa alternatibong ruta ngadto sa laing bahin sa isla tuyok sa dinahili. Kay wala nay igong gasolina nga makatuyok sa dinahili, makita nga wala na mi laing paagi aron makaabut ngadto nilang Elder Lay ug Elder Ruefenacht didto sa Tsuruoka.
Milagruso nga Biyahe
Nasagmuyo, mibalik mi sigun sa gimando sa pulis. Gihangyo nako ang mga elder diha sa van nga tawagan ang matag miyembro sa Yamagata Ward aron masiguro nga makakita mi og tawo nga makahatag namo og gasolina. Mihunong mi ug kinasingkasing nga nag-ampo, nga nagsangpit sa tanang gahum sa langit kutob sa among mahimo. Nag-ampo mi alang sa laing milagro ug midangup pag-usab sa Ginoo.
Ang mga misyonaryo nanawag sa matag aktibo nga miyembro. Apan walay usa nga dunay gasolina. Ang mga gasolinahan nahutdan og suplay ug nanira. Dayon ang mga elder naaghat nga tawagan ang usa ka dili kaayo aktibo nga higala, si Brother Tsuchihashi. Ang among Langitnong Amahan migiya na usab sa among agianan. Si Brother Tsuchihashi makahatag namo og 20 ka litro (5 ka galon) nga gasolina. Apan aron mahimamat kining buotan nga brother, kinahanglan mi nga mobiyahe og laing usa ka oras sa amihanan, sa pikas nga direksyon kon asa mi gustong moadto. Ang gidaghanon sa gasolina makatabang apan dili paigo aron makatugot namo nga makabiyahe tuyok sa dinahili.
Kay dunay pagtuo, mibiyahe mi paingon sa amihanan, sa gihapon wala masayud kon unsaon namo pagkuha sa laing duha ka elder. Nakaabut mi sa Siyudad sa Shinjo, diin nadawat namo ang 20 ka litro nga gasolina. Sa wala madugay human niana, nakadawat ko og tawag gikan ni Presidente Yoshida, ang akong counselor, kinsa nabalaka na kaayo nga wala pa mi makabalik. Nangutana siya kon asa na mi, ug sa dihang gisultihan nako siya nga sa Shinjo, nakuratan siya nga layo na kaayo mi sa among padulngan. Lapas na kadto sa iyang abilidad nga makaadto namo ug makatabang namo nga makabalik.
Dayon mitan-aw siya sa iyang mapa, ug sa nagkurog nga tingog nagkanga-kanga, “Dunay wala kaayo mahibaloi nga agianan sa bukid nga modala ninyo gikan sa Shinjo ngadto sa mga elder sa Tsuruoka.” Miandam ang Ginoo og paagi aron maanaa kami sa tukma gayud nga dapit nga gikinahanglan aron makamaneho tuyok sa dinahili. Ang gasolina nga gihatag ngari namo sakto ra gayud ang gidaghanon nga gikinahanglan aron makahimo sa luwas nga pagbiyahe tuyok sa dinahili aron makuha ang mga elder.
Sa dihang gikontak nako ang matag misyonaryo human sa linog ug nakahibalo kon sa unsang paagi sila nagiyahan ngadto sa luwas nga dapit sa wala pa gayud ang linog ug tsunami, mibati ko nga hilabihan ka mapasalamaton. Duha ka misyonaryo, kinsa naprotektahan gikan sa tsunami pinaagi sa pagsaka ngadto sa ikaupat nga andana sa evacuation center, mipahayag sa ilang pasalamat nga napabiling luwas sa panahon sa dakong kakuyaw.
Ilang gibati nga ang mga pulong ni Helaman mihulagwaysa ilang sitwasyon: “Ang Ginoo nga among Dios miduaw kanamo uban ang mga pasalig nga siya moluwas kanamo; oo, hangtud nga siya misulti og kalinaw sa among mga kalag, ug mihatag ngari kanamo og hilabihan ka hugot nga pagtuo, ug mihimo kanamo nga kami kinahanglan molaum sa among kaluwasan diha kaniya.” (Alma 58:11).