Giunsa Nako Pagpalambo ang akong Relasyon Ngadto sa Dios

Ni Elder Massimo De Feo

Sa Seventy

Sa dihang nag-12 anyos na ko, nagsugod ko sa paghunahuna og maayo kon unsaon nga malambigit ko sa ebanghelyo.

Nagpuyo ko sa akong lungsod nga natawhan sa Taranto, Italy. Pipila pa lang ka tuig sukad ang akong igsoong lalaki ug ako nakahimamat sa mga misyonaryo ug nahimong mga miyembro sa Simbahan, pero misugod ko sa pagbati nga madasigon nga moapil pa. Misugod ko sa pagbati og tinguha nga mopaambit sa sakrament. Nahinumdom ko nga maglakaw ngadto sa simbahan kada Dominggo nga mag-ampo sa akong kasingkasing nga unta tawagon ko aron makapaambit sa sakrament.

Usa ka Dominggo sa buntag, ang akong branch president mitawag nako sa iyang opisina. Miingon siya, “Massimo, ang Ginoo gusto nga ikaw makadawat sa priesthood ug maordinahan nga usa ka deacon.”

Pagkadungog nako niadtong mga pulonga—“ang Ginoo gusto nga ikaw”—natandog kaayo ko niini. Gibati nako nga dili tawo ang mihangyo nako sa pagbuhat og usa ka butang, pero ang Ginoo gayud kadto nga personal nga mipadangat sa usa ka responsibilidad. Sa dihang ang akong branch president mitan-aw nako, gibati nako nga ang Ginoo mitunol sa Iyang mga kamot ngari nako.

Sa pagsugod nako sa pagpaambit sa sakrament kada Dominggo, mabati nako ang gahum sa pagkadiosnon sa akong kinabuhi. Mibati ko nga responsable, mibati ko nga nalambigit, ug nasayud ko nga naghimo ko sa buhat sa Ginoo. Gibati nako nga mas duol Kaniya pinaagi sa pagserbisyo Kaniya.

Kini nga kasinatian sa pagbati sa kamot sa Ginoo pinaagi sa akong mga lider ug sa akong mga responsibilidad nakatabang nako nga makapalambo og mas lawom nga personal nga relasyon ngadto Kaniya. Ganahan ko nga mas malambigit sa ebanghelyo; sa pagpakabuhi nako nianang paagiha, gibati nako ang presensya sa Dios sa akong kinabuhi. Ang pagpalambo niining matang sa relasyon ngadto Kaniya maoy usa sa labing importante nga mga butang nga inyong mabuhat sa inyong kabatan-on.

Pagkakita sa Ginoo diha sa Inyong mga Lider

Sa akong pakigkita sa akong branch president, nakahimo kini og lawom nga espirituhanong impresyon kanako sa dihang akong gibati nga ang Ginoo kadto, dili lang ang akong branch president, ang naghatag nako og responsibilidad. Sa pag-ila sa Ginoo pinaagi sa akong lider, gibati nako nga mas duol ngadto Kaniya, ug ang akong relasyon ngadto Kaniya milambo.

Kon nakasabut mo isip batan-on nga kon kamo hatagan og mga calling o kon maglingkod mo sa inyong mga klase sa simbahan, makadungog mo sa mga pulong sa Langitnong Amahan ug ni Jesukristo, dayon makakita mo sa simbahan sa lahi nga paagi—sa espirituhanog paagi. Magtinguha kamo nga moapil sa buhat sa Ginoo. Makabaton mo og lawom nga espirituhanong mga kasinatian ug mobati nga mas suod ngadto Kaniya kada Dominggo.

Pagkakita sa Ginoo diha sa mga Ordinansa

Makapalambo usab kita og personal nga relasyon ngadto sa Ginoo pinaagi sa pag-ila sa Iyang presensya samtang moapil kita sa mga ordinansa sa ebanghelyo. Kon moapil kita sa mga ordinansa—sama sa sakrament—masayud kita nga “ang gahum sa pagka-diosnon gipakita” (D&P 84:20). Sa dihang mipaambit ko sa sakrament, bisan sa edad nga 12 o 13, gibati gayud nako nga usa ko ka instrumento sa Iyang mga kamot. Gibati nako ang presensya ug gahum sa Dios niadtong mga ordinansa ug ang gahum sa pagkadiosnon sa akong kinabuhi. Ang pagbaton nianang sagradong kasinatian kada semana pinaagi sa pag-ila sa Ginoo dinhi niini nga ordinansa nakatabang nako nga mapalambo ang akong personal nga relasyon ngadto sa Ginoo.

Dili lamang kini limitado sa pagpaambit sa sakrament. Mabati usab nato ang gahum sa pagkadiosnon pinaagi sa pag-ambit sa sakrament kada Dominggo. Kon moambit kita sa sakrament, kinahanglang dili nato kini ibaliwala o panagsa ra o sa kaswal nga paagi. Kinahanglan natong tinguhaon, desisyunan, ug pangandaman ang pag-ambit sa sakrament, tanan niini makatugot kanato nga mabati ang gahum sa pagkadiosnon sa atong kinabuhi. Kinahanglan natong gamiton ang sakrament isip gamhanan nga espirituhanong himan sa pagpalambo sa atong relasyon ngadto sa Dios ug sa pag-andam sa atong kaugalingon alang sa kada adlaw nga mga hagit sa kinabuhi.

Usa ka Lawom nga Personal nga Relasyon

Desisyuni karon ang pagpalambo og lawom nga personal nga relasyon ngadto sa Ginoo. Kon mas duol ang inyong gibati ngadto Kaniya, mas sayon ang pagserbisyo Kaniya.

Ang Ginoo nagtunol sa iyang mga kamot sa matag usa kanato sa personal nga paagi. Kon mosimba kita, makadungog kita sa Iyang mga pulong. Kon moambit kita sa sakrament, nagtuman kita sa Iyang sagrado nga mga ordinansa. Kinahanglan kitang moila sa presensya ug gahum sa Dios diha sa atong mga lider ug sa mga ordinansa aron mapalambo nato ang personal nga relasyon ngadto Kaniya.