Mga Baruganan sa Visiting Teaching

Ila-ilaha Siya ug ang Iyang Pamilya

Ang visiting teaching mao ang mahitungod sa sinserong pagkaila ug paghigugma sa matag sister aron makatabang kita sa pagpalig-on sa iyang pagtuo ug makahatag og serbisyo.

Si Rita Jeppeson ug ang iyang visiting teacher nagkahigalaay samtang magkita sila ug mag-inistoryahanay mahitungod sa ebanghelyo. Apan ang ilang mga pagbisita giapilan usab nila sa pagdula og mga word game, diin kini nakatabang aron magpabiling lantip ang nagkaedarang panghunahuna ni Rita. Tungod kay nakat-unan sa iyang visiting teacher kon unsa ang mga panginahanglan ug makapalipay ni Rita, silang duha magpaabut sa matag pagbisita. Dunay daghan kaayong butang nga mabuhat sa mga sister atol sa usa ka pagbisita, sama sa magkaubang manglakaw o pagtabang sa usa ka sister sa iyang mga buluhaton sa balay.Si Lucy Mack Smith, inahan ni Propeta Joseph Smith, mipahayag sa iyang mga gibati niadtong 1842 kon sa unsang paagi ang mga sister nga Santos sa Ulahing mga Adlaw sa bag-ohay lang nga na-establisar nga Relief Society mobati sa usag usa. Miingon siya, “Kinahanglan nga atong ampingan ang usag usa, bantayan ang usag usa, mohupay sa usag usa ug modawat og panudlo aron kitang tanan makaadto sa langit.”¹ Mao gihapon kini hangtud karon.

Si Elder Jeffrey R. Holland sa Korum sa Napulog Duha Ka mga Apostoles miingon, “Tan-awa ang inyong kaugalingon isip mga representante sa Ginoo para sa Iyang mga anak. … Manghinaot kami … nga i-establisar ninyo ang panahon sa tinuod, pinasubay sa ebanghelyo nga pag-atiman sa mga miyembro, pagbantay ug pag-atiman sa usag usa, motabang sa espiritwal ug temporal nga panginahanglan kutob sa mahimo nga mapuslanon.”²

Ang Ginoo pinaagi ni Moises misugo sa mga anak sa Israel nga “ang dumuloong nga nagapuyo uban kaninyo pagahimoon ninyo ingon sa molupyo sa taliwala ninyo, ug higugmaon mo siya ingon sa imong kaugalingon” (Levitico 19:34). Ang mga sister nga atong i-visiting teaching mahimong mga “dumuloong” samtang magsugod kita sa atong serbisyo, apan kon ato siyang ila-ilahon ug ang iyang pamilya, ang atong tinguha molambo aron sa “pagtambayayong sa usag usa nga mga alantuson, nga sila mahimo nga magaan” ug himoon nga ang atong “mga kasingkasing nabugkos diha sa pagkahiusa ug diha sa gugma sa usag usa” (Mosiah 18:8, 21).Mubo nga mga Sulat

1. Lucy Mack Smith, sa Anak nga mga Babaye sa Akong Gingharian: Ang Kasaysayan ug Buhat sa Relief Society (2011), 25.

2. Jeffrey R. Holland, “Mga Representante sa Simbahan,” Liahona, Nob. 2016, 62.

Ikonsiderar Kini

Sulod sa mga pamilya sa mga sister nga inyong i-visiting teaching, unsa ang umaabut nga mga panghitabo nga kinahanglan ninyong mahibaloan ug mahinumduman?

PAGPANGALAGAD

Kay sa mohatag og piho nga mensahe, kini nga pahina mag-feature og lain-laing baruganan matag bulan sa pagtabang aron mas epektibo kitang makapangalagad sa usag usa. Samtang mag-ampo ug mangita kamo og inspirasyon, inyong mahibaloan ang espirituhanong mensahe ug ang pagserbisyo nga gikinahanglan sa kada sister.